Luk 9

Ana Jisos tumu abatꞌtoono ebe

(Mat 10:5-15; Mak 6:7-13)

1Jisos kehm lungu abatꞌtoono ebe, ewubu ane abal, tv edi ajehng, fere ka bo nsahm nyi bo bahke jo kam ane abi atohko kpee yehke, fere jo lim ane, bo nob ayam ebo. 2Owo á kehm tumu bo re, bo song tiingi ane etib bi etul bi Esowo, fere lim ane, bo nob ayam ebo. 3Á kehm tongo bo re, “Eljen ni ḿ bahke tahme, kana rod ejum ajehng ajehng fili, ana ebti efilibo, a abam, a nsol alehke, a akpohko. Kana fili nsubu ebal ebal!#9:3 Luk 22:35 4Etahk ajehng ajehng ji bo lꞌvvr-n, jolen o, tete wahn tahm ejahbe jio.#9:4 Elt 16:15 5Ejahbe ajehng ajehng ji tohk-n vvrv, tahmen ejahbe jio, wahn kum ebtohko go egahne akpade. Ebtohko bio bi bahke jolo ana ntianse nyi bahke jo bung tob bo.”#9:5 Elt 13:51

6Abatꞌtoono bao kehm tahme, jo yannge ajahbe ajahbe ajahbe, jo tiingi nnoobo etib, fere jo lim ane edi ajehng ajehng, bo nob ayam ebo.

Ana ala teele Herod

(Mat 14:1-12; Mak 6:14-29)

7Eji Herod ji jolo ntul no Galili wuku nsol kpee nyi jo lim, owo ala kehm jo teel-e, tibre ane bandiki jo bungu re, “Jon ji nwohngalahb ebnyahme go elkv.” 8Ane bandiki bungu re, “Elaija wo ma lohng ba.” Ane bandiki bungu re, “Nnyehnamahr awohng noko no jolo go nkꞌkula ngare wo ma feere ba jol go elkpin.”

9Herod bungu re, “Jon, m m-e kim esi, wo anv, nne awo n kpꞌkpeke wuk elkohn nsol ana nyia bada ne?”

Owo á kehm jo gare ana á bahke nyehne Jisos.#9:9 Luk 23:8

Ana Jisos le ellong ane tvv (5,000)

(Mat 14:13-21; Mak 6:30-44; Jon 6:1-14)

10Eji abatiingetib ma feere, bo kehm ba tong Jisos ejum ajehng ajehng ji bo ma lim. Á kehm koko bo bo, tahm a bo go ejahbe ji bo jo lung re Betsaida. 11Eji ane wuku ano, owo bo kehm-e toono. Á kehm gbaame bo, fere bung a bo bade etul bi Esowo. Ane ba jo yam, á lim bo, bo nob.

12Ngare nyi njul yahke ba ellahme, owo abatꞌtoono ebe, ewubu ane abal kehm bake ba tong-e re, “Tong ane baa, bo song go ajahbe nya li kpidi kpidi, a abon ajahbe bako, eji bo lꞌting nsol alehke li, fere ting adi nyao bo bahke kange. Tibre tahm edi jia rehng go ajahbe ekidi kpꞌlabe.”

13Owo Jisos kehm tongo bo re, “Wahnfono antahng kaan bo nsol alehke, bo li.”#9:13 Jon 21:15; Mat 24:45

Bo kehm faange re, “E kpi abon abred na alon, kunu abon nsahre na abal ba ba. Anv, a kpꞌsebe re wahr tahm song gunu nsol alehke, ba ka elkohn ellong ane ana niaa?”#9:13 Jon 16:14-15 14Tibre aneblum ba jolo o, jolo ejum ane atahltahl nkpel ewubbal atahl awubu (5,000).

Owo Jisos kehm tongo abatꞌtoono ebe re, “Nong, ane baa ji agꞌgabe agꞌgabe, ellong anehng anehng jo jol ane atahl abal ane awubu.”

15Abatꞌtoono ebe kehm limi ano, ane bao kpee ji ndi.

16Owo Jisos kehm rodo abon abred bao na alon, kunu abon nsahre abal, kpiidi amahr enye go elbung, kak Esowo saam, bakke, ka abatꞌtoono ebe, eji bo lꞌsong bak ellong ane bao. Bo kehm song bak bo.

17Ane bao li kpee wohngo. Abatꞌtoono ebe kehm taare erik ji ane bao li no sa, ruru ewubu ejeere ebbal.

Ana Pita bungu bada Jisos

(Mat 16:13-19; Mak 8:27-29)

18Efung abehng bi Jisos jo kak ero antahng, abatꞌtoono ebe kehm ba kpir-e. Jisos kehm bahbe bo re, “Anv, ane kpo bung renan bada name? Me n li elkohn nne awo?”

19Bo kehm faange re, “Ane bandiki kpo bung re, wo Jon ji nwohngalahb wo. Ane bandiki re, wo Elaija wo. Ane bandiki re, nnyehnamahr awohng noko no jolo mahne mahne wo ma nyahme.”#9:19 Jon 6:14; 7:12,26-27,40-43

20Owo Jisos kehm bahbe bo re, “Anv, wahn kpo bung renan bada name? Me n li elkohn nne awo?”

Pita kehm faange re, “Wo li Mesaya nyi Esowo tum-a no.”

21Jisos kehm rehke bo, fere bung a bo tꞌtahne re, bo kꞌtong nnene.

Ana Jisos bungu bade elkv ene

(Mat 16:20-28; Mak 8:30-38)

22Owo Jisos kehm bungu tong abatꞌtoono ebe re, “Mmon no nne bahke nyehne erem gbꞌgbal. Anebkul nfam, atubesi abalimajom, a atꞌtibi ba atahm bahk-e tene, fere wul-e. Lꞌkang nfung era, á nyahme go elkv.”#9:22 Luk 18:31-34 23Owo á kehm bungu tong ane kpee re, “Nne no lꞌseb re á toon-m, nong á ten elne tv-m, fere rod ekros eje efung abehng abehng, jo toon-m. 24Nne awohng awohng no kpꞌsebe re á tahre elkpin ene, á bahke tane na elkpin ene. Nne awohng awohng no lꞌtane elkpin ene tib go egame esi, á bahke tahre na elkpin ene.#9:24 Luk 17:32-33; Jon 12:25 25Nsehng anyi nne bahke lehke, jol afi á gbo afang nya njini nyia kpee, fere tane elkpin ene, afi á yake elne ka go? 26Tibre nne awohng awohng no lꞌbe ndon, ten-m, afi jolo alum enyame, fvfo, Mmon no nne bahke tob be-e ndon, á lꞌba go ege ellub, a ellub ni Nde, a abarebare enjel.#9:26 Rom 1:16 27Etingitingi, n kp-n tongo re, Egom jindiki ji yim a, nehm kpo, tete bo nyehn etul bi Esowo go amahr.”#9:27 Luk 9:32

Ana Jisos yaange ngubjing

(Mat 17:1-8; Mak 9:2-8)

28Bomo ngare nyi Jisos bungu alum nyao, eji ma kang nfung enehkeni, owo á kehm rodo Pita, Jon, a Jems, wahr a bo go ewong re á song kak ero.

29Eji á jo kak ero, esamahr ebe kehm yaange. Nsol nyi á kake no kehm bare, fere jo nyꞌnyane.

30Owo ane abal kehm soro lohng ba kehme elbungu a ne, noko jolo Moses, noko jol Elaija.#9:30 Mak 12:27 31Bo ba go ellub ba bung a Jisos bade elkv ni á yahke ba elkpoko go Jeusalem, eji á lꞌgohro lim ji Esowo toobo no bum-e.

32Wo gana, Bab Pita ebgbo ellu kpꞌlale.#9:32 Mak 14:37 Eji bo ma nyahme, bo kehm nyehne Jisos a ellub ene, fere nyehn ane abal ba yiimi a ne ona.

33Eji ane bao yahke tahm, owo Pita kehm tongo Jisos re, “Nsoo, nꞌnob re wahr jol a. Nong, wahr si nkpatahk era, behko bꞌba, behko bi Moses, behko bi Elaija.” Jol á kahnem ji á jo bꞌbung.

34Eji á kpi mbungu mbungu, ekparesemsem kehm tahle, ba bulu bo. Bo kehm kehme elfahle, eji bo woomo go ekparesemsem.

35Bo kehm wuku ellum go atahng ekparesemsem re, “A wo li akor-m mmon ewame, jo wuken ye!”#9:35 Luk 3:22

36Eji ellum nio ma mal, bo nyehne Jisos ntahngtahng. Bo belle na belle. Ngare nyio bo tikem tong nne awohng awohng ejum ajehng ajehng ji bo nyehne no.

Ana Jisos limi mmonse no bele ebi etohko, á nob

(Mat 17:14-18; Mak 9:14-27)

37Etoono efung behko eji bo ma badde go ewong, ellong ane tvv kehm ba kpiri Jisos.

38Nne awohng go ellong ane bao kehm rabe re, “Ntꞌtibi, n kpa gboongo! Nyehn mmon ewame ana! Ye ntahngtahng wo n kpi-e no. 39Ebi etohko kpo yehk-e. Ngare anyehng anyehng nyi á lꞌyehk-e, á soro biingi tvtv, fere sok-e, tete nfahl jo tub-e nnyo, fere jo jahr-e. Kpo riidi kehm-e yake abo. 40Me n gboongo abatꞌtoono eba re bo kam-e yehke. Bo maam lim.”

41Owo Jisos kehm faange re, “Jen ji wahnge wahn ane ba li anv kil taame? Ń kpo fere soodo! Anv, m bahke kange renan a nahne, fere jo tib-n, ń kehm kahne? Ko mmon ewa ba a ne!”

42Eji mmon noo jo jen abake, ebi etohko jio kehm-e soro yehke tub go ndi, á soro gbo ngboko.

Owo Jisos kehm nyame esabsab etohko jio, fere lim mmon noo, á nob, fere yak-e ka nde.

43Ane kpee kehm kpoko bo esi, eji bo nyehne egburu nsahm nyi Esowo.

Ana Jisos kpe bung bade elkv ene

(Mat 17:22-23; Mak 9:30-32)

Eji kpi nkpoko nkpoko ane bao kpee esi bade ejum ajehng ajehng ji Jisos ma lim, owo á kehm tongo abatꞌtoono ebe re, 44“Wuken alum nyaa, wahn kak go egahna ntim! Tibre Mmon no nne, bo yahk-e ba elyake kak ane go abo.”

45Bo kahnem ana alum nyao lohngo no. Tibre á lenngem bo, eji bo lꞌkꞌkahn ana lohngo no.#9:45 Luk 18:34; Mak 4:13; Jon 8:27; 10:6 Bo jo fꞌfahl a ye bahb ana alum nyao lohngo no.

Nne awo ga gbal?

(Mat 18:1-5; Mak 9:33-37)

46Abatꞌtoono Jisos kehm kehme nfaabe lim bada nne no ga gbal go bo ellong.

47Eji Jisos sebe kahn ji bo jo tir go bo a ntim, owo á kehm koko mmonse, á ba yiimi kohl-e, 48kehm tongo bo re, “Nne awohng awohng no lꞌko mmonse ana noa tib go egama mbing, á ko me. Nne no lꞌko me, á ko nne no tum-m no.#9:48 Mat 10:40 Tibre nne no lꞌga rede go egahne ellong, ye wo li njꞌjoka nne.”

Nne awo li nne ewahne?

(Mak 9:38-40)

49Jon kehm bungu re, “Nsoo, wahr ebnyehn nne no kpꞌkame ane abi atohko yehke go ega mbing. E m-e sahde, tibre wa á kpehme toono ana wahr.”

50Owo Jisos kehm-e faange re, “Kana ye kpe sahde, tibre nne no tohk-n ko ekv, ye nne ewahne wo.”#9:50 Fil 1:15-18; Jon 10:16

Ejahbe ji tene Jisos

51Eji afung nya bo bahke rodo Jisos tahm a ne go ejahbetul Esowo ma kabbe, á kehm bobo eltim ene re á tahm go Jeusalem.#9:51 Fil 2:8; Luk 13:33 52Á kehm tumu ane, bo gbo-e mbang, song rehng go ejahbe Samaria ajehng re bo song toobo nsol bum-e.#9:52 Jon 4:4 53Ane ba jolo ona we koom, tibre bo kahne kpee re, á jo tahme go Jeusalem.#9:53 Jon 4:9

54Eji abatꞌtoono ebe Jems, a Jon nyehne ano, owo bo kehm bahbe re, “Ntul, anv, a kpꞌsebe re wahr biri agun lohng go ejahbetul Esowo tv boa, ana Elaija limi noa?”#9:54 Mat 10:14

55Owo Jisos kehm keebe, kehm nyame bo re, “Anv, ń nehme kahn elkohn etohko ji ń kpi noa?”#9:55 Mat 5:44

56“Tibre Mmon no nne baam re á ba rannge elkpin ane, á ba na re ane bel eltahre.”#9:56 Jon 3:17; 12:47 Owo bo kehm sehnge, song rehng ejahbe jehko.

Nong, akvne kpa akvne kak

(Mat 8:19-22)

57Eji bo jo jen go mbang asongo, nne awohng kehm tongo Jisos re, “M bahk-a toono, je edi ajehng ajehng ji a fi no.”

58Owo Jisos kehm-e faange re, “Akpangang kpi abing, nruk kpi ntahk. Wo, Mmon no nne, edi ellohko esi ajehng ajehng á kpimm.”#9:58 1 Pit 2:11

59Owo Jisos kehm tongo nne noko re, “Tahm toon-m!” Á kehm-e faange re, “Nsoo, nong me n tohko gbo mbang song kpa nsoo kak.”

60Jisos kehm-e tongo re, “Nong, akvne kpa akvne ebo kak.#9:60 Ef 2:1; Kol 3:1-2 Wo, song, wo song tiingi etib bio bi etul bi Esowo.”

61Owo nne noko kehm kpe bung re, “Ntul, m bahk-a toono. Nong, me n tohko gbo mbang song tong ane ebame re me n fio.” 62Owo Jisos kehm-e tongo re, “Nne awohng awohng no ma rod elu eje, bom egbe abahme, fere jo keebe go njahm, á kpeem fuumu re á kuumu etul bi Esowo.”#9:62 Luk 17:32

सध्या निवडलेले:

Luk 9: EKA-011

ठळक

सामायिक करा

कॉपी करा