Luk 19

Jisos abola Sakeus

1Jisos kehm rehnge go Jeriko, sehng asongo. 2Nne awohng jolo o, no bo jo lung-e re Sakeus. Á jolo ntubesi abakokatak, fere fꞌfang. 3Á jo sebe re á nyehn ana Jisos li no. We á joom nyehn, tib ellong ane gbale o sehng, ga fvfo á jolo nkpehrekahba nne. 4Owo á kehm beke, gbo bo mbang, song wahr ekuntaake, eji á lꞌnyehn-e. Tibre Jisos jo ba elsehnge go mbang nyio.

5Eji Jisos ba rehng edi jio, á kehm kpuru ero, kehm-e tongo re, “Sakeus, badde elwaare, tibre lela m bahke kange go ega etahk.” 6Owo á kehm badde elwaare, ba vvr-e go eyebatahng.

7Bo nyehne kan ano, bo kehm kehme elmemme ane kpee re, “Nne noa ebtahm re á song kang a nne no li na nne abiafem.”#19:7 Luk 15:2

8Sakeus kehm mehle yiimi, kehm bungu tong Ntul a Jisos re, “Nsoo, m bahke yange nsol enyame, yehke ejang ka akpak. Nne awohng awohng no n nehm-e go ejum ajehng ajehng, m bahk-e gale nkpel eni budu.”#19:8 Mat 3:8

9Owo Jisos kehm-e tongo re, “Lela eltahre ebba go etahk jia, tib eji á tob li mmon no Ebraham.#19:9 Luk 13:16 10Tibre Mmon no nne ba re á ba seb, fere tahre jio ji ma tan.”#19:10 1 Tim 1:15

Elgan ni li bada ntul no tahme nlaabambang ejahbe

(Mat 25:14-30)

11Eji ane bao wuku nsol nyio, Jisos kehm tubu bo elgan. Tibre ngare nyio yebkabbe go Jeusalem, ane bao jo fere tir re, etul bi Esowo bahke soro ba tvtv. 12Owo wahng ka á kehm bungu re,

“Mmon a ntul awohng jolo go, no tahme nlaabambang ejahbe re á song li etul feere.#19:12 Jon 14:3,28 13Re á kehm tahme, á lungu alokeltum ebe, ane awubu, ka bo mpon ewubu ewubu, kehm tongo bo re, ‘Roden akpohko nyaa, wahn jen are tete me n feere ba.’#19:13 Mak 16:15; Elt 1:8

14“Ejahbe eje ko-e ekv, owo bo kehm tiingi etib tv-e re, bo nehme seb re á ba jol ntul abo.#19:14 Jon 1:11

15“Eji á ma song li etul feere, á kehm ba lung alokeltum ebe, ba á ka bo akpohko re bo ba, eji á lꞌkahn ana bo ma li nsehng go are ma bo ma jen.#19:15 2 Kor 5:10

16“Ngbokambang a nlokeltum kehm bake, ba yiimi go ege esamahr, kehm bungu re, ‘Nsoo, mpon ewubu enya nyi a ka-m no eblim mpon atahl alon.’

17“Owo á kehm-e tongo re, ‘Woblim sehng, nnooba nlokeltum. Tib eji a ma bel ekakesehk go mmonsꞌsohka mmojum, a bahke jo fili ejahbe na ebwubu.’

18“Etoono nlokeltum noko kehm kpe lohng ba, ba bung re, ‘Nsoo, mpon ewubu enya nyi a ka-m no eblim mpon atahl abal a mpon ewubu.’

19“Owo á kehm-e tongo re, ‘A bahke jo fili ejahbe na eblon.’

20“Noko kehm kpe lohng ba, ba bung re, ‘Nsoo, nyehn mpon ewubu enya ga! N kake go egame afiafong, song bum go. 21N jo fahl-a fahl. Tibre a li ebibbib nne sehng. A kpo rod nsol nyi ki li wo bumu no. A kpo kpa nsol nyi a ki bahm.’

22“Á kehm-e tongo re, ‘Wo ebꞌbi nlokeltum noa, m bahke koko alum nnyo enya lam-a. A kꞌkahn re, me ebibbib nne ji. N kpo rod nsol nyi n ki bum, fere kpa nsol nyi n ki bahm. 23Jen ji wahnge a ki ka njenare akpohko enyame, kehn eji m ma feere ba, n jol ba ko, fere ko nsehng budu?’

24“Owo á kehm bungu tong ane ba yiimi ona re, ‘Taaren ye mpon ewubu nyio, wahn faake a nyi ka nne no kpi mpon atahl alon.’#19:24 2 Kor 6:1

25“Bo kehm-e tongo re, ‘Nsoo, á kpi mpon atahl alono!’ 26Á kehm faange re, ‘N kp-n tongo re, nne awohng awohng no lꞌbel, bo bahk-e kake na budu. Nne no ki kpi, jol ji á kpi no, bo bahk-e taare.

27“ ‘Anebekv ebame bao ba kil sebe re me m ba jol ntul abo, song koon bo ba, wahn ba wul bo go egame esamahr.’ ”

Ana Jisos yele go Jeusalem a egburu ellub

(Mat 21:1-11; Mak 11:1-11; Jon 12:12-19)

28Eji Jisos ma bung ano, á kehm soro asi asongo go Jeusalem.

29Eji á ba rehng kohlo go Betfage, a Betani, ajahbe nya li go nnahb ewong ji bo kpo lung re Oliv, á kehm yehke abatꞌtoono ebe na abal tum. 30Re á kehm tumu bo, á tongo bo re,

“Songen go ejahbe ji li go egahna mbuksong. Ń lꞌsong rehng ejahbe jio, eji ń fi no, ḿ bahke nyehne mmon a mbvankang no bo kal-e kꞌkuumu, no bo tohk-e go eti. Fanngen ye, wahn ko-e ba a ne! 31Nne awohng awohng no lꞌbahb-n re, ‘Jen ji wahnge ń kp-e fannge?’ faangen ye re, ‘Ntul wo kp-e sebe.’ ”

32Ane ba Jisos tumu bo kehm lohko je, lohko song nyehn ana Jisos tongo bo.

33Eji bo jo fannge mmon a mbvankang noo, owo afono mbvankang nyio kehm bahbe bo re, “Jen ji wahnge ń kpꞌfannge mbvankang nyio?”

34Owo bo kehm faange re, “Ntul wo kp-e sebe.”

35Bo kehm koko mbvankang nyio tahm a nyi goji Jisos, fere yehke nsol nyi bo kake no, yal mbvankang nyio go njahm, fere mehl Jisos jehke.

36Eji mbvankang jo jen a ne asongo, bo kehme abomo ebo yal go mbang. 37Eji á jo badde go ewong jio asongo, ngare nyi á ma kabbe go Jeusalem, ellong abatꞌtoono ebe gbalee kehm kehme elgeere, fere jo tehk Esowo wahre wahre tib go agburu akpokosi nya bo ma nyehn.

38Bo jo bungu re, “Elfuulu li a ntul no kpꞌbake go mbing nyi Jehova. Elkoono jol go ejahbetul Esowo, ellub jol go ero!”#19:38 Luk 2:14

39Egom Farisi jindiki ji woomo go ellong ane bao kehm-e tongo re, “Ntꞌtibi, nyam abatꞌtoono eba!”

40Jisos kehm faange re, “N kp-n tongo re, Ane baa lꞌbelle, atal bahke kehme elrabe.”#19:40 Mat 3:9; 1 Pit 2:5

Ana Jisos lingi Jeusalem

41Eji bo ba rehng kohlo go Jeusalem, eji á ma nyehn yefono ejahbe, á kehm kehme ellingi re,#19:41 Luk 23:28 42“N kpꞌsebe re wahn lub kahn lela ejum ji bahke koko elkoono ba a ni,#19:42 Jon 16:33 wo anv, ń nehme ma nyehn.#19:42 Mat 13:15 43Tibre afung nyao bahk-n kpiri, nya anebekv ebahne bahke bake, ba senng-n kak, fere kohk-n tv. 44Bo bahke rannge ejahbe ejahne kpee, a ane kpee ba lene o. Jol eltal anehng anehng nehm kpe jol ni bahke sake kuumu a ntem egahne ejahbe.#19:44 Luk 21:6 Tibre ń kahnem ngare nyi Esowo ba re á ba tahr-n.”

Ana Jisos je go etahk Esowo

(Mat 21:12-17; Mak 11:15-19; Jon 2:13-22)

45Jisos kehm yange go etahk Esowo, song kehme ane bao kam, ba ji o, jo gungu nsol, 46fere tong bo re, “Bo nyono go nwer Esowo re, Esowo bungu re, ‘Etahk ejame bahke jolo etahk ero akake.’ Wahn ebfere rod bum ana ebehre awajv.”#19:46 1 Kor 3:16-17

47Jisos jo tibi efung abehng abehng go etahk Esowo. Atubesi abalimajom, atꞌtibi ba atahm, a atubesi ane jo sebe re bo wul-e. 48Jol bo tikem kahn mbang ana nyi bo bahke limi.#19:48 Luk 22:53 Tibre ane kpee jo wuung-e atung sehng, eji ellum ene anehng anehng lꞌkꞌgbo ndi.

सध्या निवडलेले:

Luk 19: EKA-011

ठळक

सामायिक करा

कॉपी करा