Luk 8
8
Avbe Ikhuo Ni Lele Jesu
1Ọ ghi kpẹe kherhe, Jesu kegha lele ẹvbo nekhua hia kevbe ne giẹrẹ khian, ọ kegha kpe orhu Iyẹn Ne ọ Maa Arriọba Osanobua. Avbe erhuanegbe ẹre ne iweva keghi vbe lele ẹe. 2Ikhuo eso keghi vbe rrọọ, usun iran ne a sinmwi vbe obọ emianmwẹ kevbe orhiọn dan: Meri (ne a tie ẹre Magdalen) ne a khu orhiọn esu ihinrọn ladian vbe egbe ẹre. 3Joana ne amwẹ Kiuza ne ọ winna vbe ẹguae Hẹrọd, kevbe Susana kevbe ikhuo ni bun ọvbehe, iran ni lo emwi ewe iran ya gha yi Jesu kevbe erhuanegbe ẹre obọ.
Itan Ọkemwiokọ
(Matiu 13:1-9; Mak 4:1-9)
4Emwa kegha ke ẹvbo ughughan bu Jesu rre. Ugbẹn vbe emwa ghi gbe ẹbu, Jesu keghi kpa itan na ma iran, ọ wẹẹ:
5“Okpia ọkpa keghi ya kọ emwiokọ ẹre, ugbẹn Vbe ọ ghi tu ẹe lele ugbo khian, eso keghi dele ye adesẹ odẹ, a keghi ye owẹ rrilo eni mu otọ, avbe ahianmwẹ keghi vbe rhọ ẹre re. 6Eso dele ye otọ okuta, ugbẹn vbe emwiokọ ni ghi zọọ, iran kakaa, rhunmwuda otọ ẹre imwẹ amẹ. 7Eso dele ye uwu ogigban, iran vbe emwiokọ ghi gba wan, igban keghi khuakhua ẹe gbua. 8Emwiokọ eso keghi dele ye otọ ne ọ maa, iran keghi wan, iran mọ ọmọ ọkpọkpa vbọ iyisẹn iyisẹn.”
Jesu keghi rhie tẹe wẹẹ, “Ne ehọ re họn ẹmwẹ gie ẹre họn.”
Emwi Ne O Yae Kpa Itan Na
(Matiu 13:10-17; Mak 4:10-12)
9Avbe erhuanegbe Jesu keghi nọ rẹn emwi ne a ya ẹe itan na kha. 10Jesu keghi wanniẹn wẹẹ, “A rhie ne uwa nẹ ne uwa rẹn oro ne ọ rre ẹmwẹ Arriọba Osanobua, sokpan itan ọre a ya tae ma emwa ọvbehe ne a miẹn wẹ iran gha tọn aro yọọ, sokpan iran i dẹghe, iran gha danmwehọ sokpan iran i rẹn evba yae kha.
Jesu Rhan Otọ Itan Ọkemwiokọ
(Matiu 13:18-23; Mak 4:13-20)
11“Emwi ne a ye itan ni kha ọ na khin. Emwiokọ ọrọre ẹmwẹ Osanobua, 12Emwiokọ ni dele ye adesẹ odẹ ọrọre iran ni te họn, sokpan esu keghi do rhie ẹmwẹ ni hin iran ekhọe rre, ne iran ghẹ miẹn ehe na yayi ne a miẹn iran fan. 13Emwiokọ ni dele ye otọ okuta mudia ye ihe iran ni họn ẹmwẹ nii, iran na ye oghọghọ miẹn rẹn, sokpan ọ ma mu iran ekhọe, iran keghi yayi vbe ẹghẹ kherhe, sokpan edanmwẹ ghi rre, ehia keghi dele. 14Emwiokọ ni dele ye uwu igban mudia ye ihe iran ni họn ẹn sokpan orueghe, ẹfe kevbe orhiẹnrhiẹn agbọn keghi siẹn yan rẹn, iran keghi yẹn ọnrẹn gbua, ọ ma ghi hin obọ arowa. 15Emwiokọ ni dele ye otọ ne ọ maa mudia ye iran ni họn ẹmwẹ ni, iran keghi ye ekhọe esi nọ họn ẹmwẹ dae yi, iran na gha ya ẹe khian rhinrin ọ te do mọ.
Ukpa Ne Ọ Rre Ototọ Ọkpan
(Mak 4:21-25)
16“Ọmwa i ra rhu ukpa nẹ ne ọ rhie okpan rhu ẹe ginna otọ ra ne ọ mu ẹn ye ototọ ukpo na vbiẹ. Sokpan erhan ọmukpa ọre a mu ẹn yi ne emwa miẹn ehe na gha bẹghe vbe iran a ra la owa.
17“Emwi ne a rhirhi rhie lẹre gha dinna azagba, a gha vbe miẹn emwi ne a guere a ghi mu ẹn dinna idagbo.
18“Rhunmwuda ọnii, wa ghi ye egbe vbene uwa ya danmwehọ hẹ, rhunmwuda ọmwa nọ mwẹ nẹ, te a ra gha rhie ba ẹre re, ọmwa ne ẹ i mwẹ emwi rhọkpa, a gha wa miẹn ẹre etunnẹ ne ọ te ro ighẹ irẹn mwẹ.”
Iye Kevbe Etẹn Jesu
(Matiu 12:46-50; Mak 3:31-35)
19Iye kevbe etẹn Jesu keghi bu ẹre gha dee sokpan iran ma sẹtin miẹn ọẹn ne ubunmwẹ ẹvbo. 20Orhiọnkpa keghi ya tama rẹn wẹ, “Iye uẹ kevbe etuẹn mudia vbe ore iran ho ne iran miẹn uẹn.”
21Jesu keghi tama iran hia wẹẹ, “Iye mwẹ kevbe etẹn mwẹ ọrọre avbe iran ni họn ẹmwẹ Osanobua, iran na vbe ya ẹe gha ru emwi.”
Jesu Dọ Okpẹhoho Yọ
(Matiu 8:23-27; Mak 4:35-41)
22Ẹdẹ ọkpa, Jesu kevbe avbe erhuanegbe ẹre keghi la uwu okọ, ọ khama iran wẹẹ, “Wa gie a fian odighi gberra ghe obọ nọkpa.” 23Ẹghẹ ne iran ghi na gua okọ khian, Jesu kegha vbiẹ. Okpẹhoho keghi wa la odighi ni, amẹ na gha vba la okọ sẹrriọ ne ọ na ghi zẹ ẹbe ne iran hia. 24Avbe erhuanegbe keghi bu Jesu gha dee, iran huẹn ọnrẹn wẹẹ, “Arowa ghe ighe ma wiri!” Jesu keghi gua kpao, ọ gu ẹhoho kevbe ogbigbi amẹ ni guan, ehia keghi rọọ, ehe hia keghi furre khuẹrhẹ. 25Rẹn keghi tama avbe erhuanegbe wẹẹ, “Iyayi rua vboo?” Sokpan unu yan iran, ohan kevbe gha mu iran, iran na suẹ gha nọ egbe wẹ, “Gha ọmwa na khin? Ọ gu ẹhoho kevbe ogbigbi ẹzẹ guan, iran wa họn.”
Jesu Sinmwi Ọmwa Ne Ọ Mwẹ Avbe Orhiọn Esu
(Matiu 8:28-34; Mak 5:1-20)
26Iran keghi gua okọ gberra gha rrie isoko Gadara ne ọ rre obọ nọkpa vbe a gha fian odighi rra nẹ. 27Jesu ghi wa rhie owẹ sẹ otọ, okpia ọkpa ne orhiọn esu ni bun rre uwu ẹre keghi wa ke ore ẹvbo ni bu ẹre gha dee. Ẹ i re eban ọ ghi rhuan ukpọn sẹ, ẹ i di owa ya, avbe uvun ni rre itẹ ọre ọ dia. 28Ọ keghi datu vbe ọ dẹghe Jesu, ọ degbe otọ vbe odaro ọre ọ datu wẹẹ, “Jesu Ovbi Osanobua Ne Ọ Yo Sẹ, vbe ua gualọ sẹ egbe mwẹ? Lahọ ghẹ rriọ mwẹ oya.” 29Emwi ne ọ a ya ẹe gha guan vberriọ ọrọre wẹ Jesu ka tama avbe orhiọn dan nii nẹ ne iran lahin uwu ẹre rre. Ẹghẹ ni bun ọre ọ ya mu ẹn, a gha rhe mu ẹn khui, a na ye ọgiọrọ rro ẹre obọ rro ẹre owẹ, ọ gha bunnọ ọgiọrọ ni kua nẹ, orhiọn esu ni ghi bi ẹre, uhunmwu la uwu ato.
30Jesu keghi nọ rẹn wẹ, “Vbe a tie ruẹ?” Ọ wanniẹn wẹẹ, “Oghẹn,” rhunmwuda orhiọn esu ni he la uwa ẹre bun ẹsẹse. 31Avbe orhiọn esu keghi rinmwian Jesu wẹ ne Ọ ghẹ hẹ iran ku uvun eghan avbe orhiọn esu.
32Oghẹn nọkhua ọghe esiebo keghi rre ọkpẹn evba. Iran gha rria vbe ehanhan oke. Avbe orhiọn esu ni keghi rinmwian Jesu ne ọ gie iran gha rrie uwu avbe esiebo ni, rẹn keghi zẹ iran obọ. 33Avbe orhiọn esu ni keghi kpao hin uwu okpia ni rre, iran na la uwu avbe esiebo ni, oghẹn ni hian keghi wa khọn lele ehanhan oke ni ya wulo ye uwu odighi.
34Iran ni te su esiebo ghi miẹn emwi ne ọ sunu, iran keghi rhulẹ gha rrie ore ẹvbo kevbe agọ ya kha. 35Emwa hia keghi vẹ ya gha ghe emwi ne ọ sunu. Iran ghi sẹ ehe ne Jesu ye iran keghi do vba okpia ne a na khulo orhiọn esu ladian ni vbe tota ye ọre akharha, ọ rhuan ukpọn, aro hian rẹn vbe uhunmwu, ohan keghi mu iran. 36Iran ne aro ẹre sẹ ọe keghi na iyẹn vbene a ya sinmwi ẹn hẹẹ. 37Emwa hia ni wa ke otọ Gadara rre keghi bu Jesu gha dee, iran tama rẹn ne ọ do kpao hin iran ẹvbo rre rhunmwuda ohan mu iran ẹsẹse. Rhunmwuda ọnii, Jesu keghi la okọ, ọ na kpao. 38Okpia ne avbe orhiọn esu ladian vbe egbe ẹre keghi rinmwian Jesu wẹẹ, “Gun mwẹ lele uẹ.” Sokpan Jesu keghi gie ẹe werriegbe wẹẹ, 39“Gha rrie owa ne u ya gha na iyẹn emwi ne Osanobua ru nuẹn.” Okpia ni keghi ya yọ owẹ lele ẹvbo nii hia, ọ na gha na iyẹn emwi ne Jesu ru nẹẹn.
Ovbi E Jairọs Ne Okhuo, Kevbe Okhuo Ne Ọ Ya Obọ Kan Jesu Ukpọn
(Matiu 9:18-26; Mak 5:21-43)
40Ugbẹn vbe Jesu ghi sẹ iyeke nọkpa ọghe odighi nii, emwa ni gbe ẹbu ye evba keghi gbe ọbokhian ne ẹn rhunmwuda, ọkpẹre ne iran kegha dia khẹ ọre. 41Ọkpa vbe uwu avbe ọdakha Ọgua ediọn ẹvbo nii ne a tie ẹre Jairọs keghi rre. Ọ keghi de gbe otọ vbe akharha Jesu, ọ rinmwian ẹn ne ọ gha die owa irẹn. 42Rhunmwuda te ovbi ẹre ne okhuo ne ọ rre ọmọ ukpo iweva ghi ra wa wu.
43Ugbẹn vbe Jesu ghi khian, emwa hia kegha khuakhua ẹe, okhuo ne esagiẹn ye ukpo iweva tue, keghi rre evba. Ọ lo emwi ne ọ mwẹ hia ne avbe ọbo fo, sokpan a ma miẹn ne ọ sẹtin sinmwi ẹn. 44Ọ keghi lele uwu ẹbu nii la Jesu odieke, ọ keghi ye obọ kan ehọ ẹwu ẹre, esagiẹn ne ọ tue ẹre nii keghi ka vbe ọwarọkpa nii. 45Jesu keghi nọ wẹẹ, “Gha ọ ya obọ kan mwẹ?” Emwa hia keghi siẹn, ọre Pita ghi na kha wẹ, “Arowa, ghe vbene emwa hia ni ma rhurhu uẹ gha khuakhua a bun hẹ.”
46Sokpan Jesu wẹ, “Arhiọnkpa ya obọ kanmwẹ. Emwi ne I ya rẹn ọrọre wẹ ẹtin eso ke egbe mwẹ ladian.” 47Okhuo ni ghi miẹn ighe ọ vẹ nẹ, ọ keghi ye uguọmwẹ do de gbe otọ vbe akharha Jesu. Ọ keghi wa sirra emwa hia tama rẹn emwi ne ọ ya irẹn ya obọ kan rẹn, kevbe vbe ne egbe wa rran irẹn hẹ vbe ọwarọkpa nii. 48Jesu keghi tama rẹn wẹẹ, “Ovbi mwẹ, iyayi ruẹ muẹn egbe rran nẹ. Gha khian vbe ọfumwegbe.”
49Te Jesu he wa ye guan ẹmwẹ na vbe ọmwa ne a gie ẹre uhunmwu ke owa ọdakha nii rre sẹ evba, ọ tama Jairọs wẹẹ, “Ovbi uẹ wu nẹ ne u ghẹ ghi kpokpo ọmamwaemwi.”
50Sokpan Jesu ghi họn, ọ tama Jairọs wẹẹ, “Ghẹ fian afianma, sokpan yayi, egbe gha rran rẹn.”
51Ọ ghi sẹ nene owa, ọ ma gie ọmwa rhọkpa lele ẹe la owa gberra Pita, Jems, Jọn, deba erha kevbe iye ọmọ nii. 52Emwa ni rre evba hia kegha viẹ, iran gha khiẹ ọmọ nii, Jesu keghi kha wẹẹ, “Wa ghẹ ghi viẹ, ọmọ na ma wu, te ọ vbiẹ kẹkan!”
53Iran hia kegha vin ihue ye ọre akhọe rhunmwuda iran rẹnrẹn ighe te ọ wu. 54Sokpan Jesu keghi rhie ẹre obọ, ọ wẹẹ, “Kpaegbe ọmọ ne ọmọ!” 55Orhiọn rẹn keghi dọlegbe rre, ọ na gua kpao, Jesu na wẹ ne iran rhie evbare nẹ ẹn re. 56Izegbe na wa zẹ evbibiẹ ọe, sokpan Jesu yan ma iran ne iran ghẹ ta emwi ne ọ sunu ma ọmwaikọmwa.
सध्या निवडलेले:
Luk 8: EDO96
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
@ The Bible Society of Nigeria, 1996
