Matta 17
17
Kǝga Yesui A Fʌto
(Mar 9:2-13; Luk 9:28-36)
1Kumɔ nukun a shui, nǝngɔ Yesu a do Bitrus jǝbɔ Yakubu jǝbɔ kɨla gɔ Yohana a yɔ nǝn ji fʌlen kwaaji a dʌbʌl yem nɨ a deba debaɨ. 2Nǝn kwama jǝ fʌleni, nǝngɔ jelkalǝng gǝnɔ a yǝla a kǝga jini, kǝga gǝnɔ a fʌto beta lɛ na nu kwama, dwang dʊʊl gǝnɔ a yǝlam a fulo, beta lɛ nyɔ. 3Tʌgo a kang nǝngɔ Musa jǝbɔ Iliya ja jel a kǝga gǝnɨ, jǝ kiyo kɛlɔ lɛ jǝbɔ gɨɨ.
4Nǝngɔ Bitrus a sʊwa Yesu gɔ, “Tɛlalɔ, a bʊm nyɔ nǝn nɨ fɔ a daa nɨɨ. Na ń jǝlaɨ, mǝ ma ma gushigɔ taal, win na a mɔ, win na a Musaɨ, win na a Iliyaɨ.”
5Nǝn kwama Bitrus sʊwam kɛl nɨ lɛɨ, nǝngɔ kaa lul fulo ba sum jii. Tʌgo a kang, kaa diil a mʊgɔ lul gɔ, “Wʊnɨ nǝn Bʊla mɨ nɨ mǝ swɨ lɛɨ. Wʊnɨ nǝl mǝndɨ nyʊwa fulotǝm nǝl lɛ nǝn gǝ dangǝnɨ. Jǝ́ nyʊwa gǝn!”
6Nǝn kwama bɛtɔ mɛlalɨgɔ a nyʊwa nyɨɨ, ja nyʊwa taal nyangǝn, ja gǝla ja sum nǝn kǝga a tǝm. 7Nǝngɔ Yesu a bɛ ba ke jii, a sʊwa gɔ, “Jǝ́ gun jǝ́ tɨ tɨɨ. Ka jǝ́ nyʊwa lɛ taal.” 8Nǝn kwama ja wumʌm nu jini, ja kuwo nǝn Yesu kwaagɔ win.
9Kwama nɨ jǝ gǝlam lɛ a dʌbʌl yemi, nǝngɔ Yesu a gʊ lɔl jini gɔ, “Ka jǝ́ sʊwa lɛ kaa nǝl jʊ jǝ́ kuwoi, ba jǝ́ sʊwa nǝn kwama ja gung Bʊla Nǝlɨ a bwaaɨ.”
10Nǝngɔ bɛtɔ mɛlalɨ nɨ a bʌ gǝn gɔ, “N wɛ a bwɨ nǝb mɛlalɨ diilɔ a sʊwa gɔ nǝn Iliya tǝl bɛtǝmɔ lɛɨ sǝla Kiristi a bɛɨ?”
11Nǝngɔ a jǝla ji gɔ, “Bɨlǝngkɛl, Iliya bɛ bɛ, ba fɛka kanjǝlɔ tʌgo dǝngdǝng gwam. 12Mǝ sʊwa jen nɛ, Iliya a kwɛl a bɛ bɛɨ, ja nyǝm bɔ gɔ nǝn gɔ, ja maa gǝm jʊ nɨ jǝ swɨ lɛ ja maa gǝmɨ. A na nyɔ Bʊla Nǝlɨ nɔɔ nɔɔ gaalan a kang jin.” 13Nǝngɔ la bɛtɔ mɛlalɨgɔ a nyǝm gɔ Yesu gǝ sʊwa ji kɛlɔ a dul Yohanaɨ nǝ Yʊtǝm mwɛ Sagsagɔ.
Yesu A Gung Bwɛsǝn Nɨ Nǝn Bwɛlaaɨ
(Mar 9:14-29; Luk 9:37-43)
14Ba ja la daa nɨ nǝbɔ a mʊrka a lada nyɨɨ, nǝngɔ kaa balɨ a bɛ a daa Yesu woi, ba gǝla a jʊng a kǝga gǝnɨ. A sʊwa gɔ, 15“Tɛlalɔ, ji bʊnǝn bwɛ balɨ mǝndɨ. Nǝngǝn nǝn jwi, gǝ na a mʊgɔ gaalan nyangǝn. Kwangkwang gǝ yal yal a mʊgɔ kǝla jǝbɔ mʊgɔ mwɛ. 16N yɔ nǝn gɔ a daa bɛtɔ mɛlalɨ mʊnɔ woi mǝʊ ja gung gǝn, ja dwal bɔ ja gung gǝn.”
17Nǝngɔ Yesu a jǝla ji gɔ, “Jǝ́ nǝbɔ kal nɨɨ, mɨ jen nǝn nǝtǝm bɨlǝngkɛl, jǝ́ nǝb bwɨlan, naa nyǝn mǝ yɨ lɛ nǝbɔ jeni, naa nyǝn mǝ kʊ nǝl lɛ nǝn jeni? Jǝ́ bɛ mɨ nǝn bwɛ balɨ nɨ fɔ.” 18Nǝngɔ Yesu a ga bwɛlaa nɨ gǝm wulongi, nǝngɔ a jelʌm a bǝla bwɛɨ. Tʌgo a kang a gung bwɛ balɨ nɨ a twɨla gǝnɔ gǝm.
19Nǝngɔ bɛtɔ mɛlalɨgɔ a bɛ a daa Yesu woi kwama jǝ kwaajii, nǝngɔ ja bʌ gǝn gɔ, “N wɛ a bwɨ nǝn dwal bɔ nǝn jǝg bwɛlaa nɨɨ?”
20Nǝngɔ Yesu a sʊwa ji gɔ, “Jʊ a bwɨɨ nǝtǝm bɨlǝngkɛl jenɔ nǝn dǝm nyɔ. N bɨlǝngǝn mǝ sʊwa jen nɛɨ, na jǝ́ nǝngǝn nǝtǝm bɨlǝngkɛl nǝn dǝm nyɔ na nu mastadɨ, jǝ́ sʊwa sʊwa yem nɨ jengɔ a bǝla daa nɨ, a bǝla. Mɨ jʊ nɨ wo laa kwaan jenɔ lɛɨ.” [21Bwɛlaa nɨ mɨsɔ jel lɛ, na ke bɔ a gola keli jǝbɔ dotǝm diil mwɛɨ.]#17:21 Kaam bɛl mʊlalɨ galɨgɔ mɨ nǝn bɛ gola nɨ.
Yesu A Yǝla A Sʊwa Kɛl Bwaa Gǝnɔ
(Mar 9:30-32; Luk 9:43-45)
22Bɛtɔ mɛlalɨ gǝnɔ a mʊrka a tǝm Galilii, nǝngɔ Yesu a sʊwa ji gɔ, “Jǝ nǝ nǝ Bʊla Nǝlɨ a kang nǝfitʌmi. 23Jǝ jʌ gǝn jʌ, a kum na taal gun gun nǝn kʊlɨ.” Pʌd jinɔ fitǝm nǝlɔ a yii mʊgɔ nǝl jinɔ.
Ywatǝm Kemʌn Tǝm Kan Kwaamanɔ
24Nǝn kwama Yesu jǝbɔ bɛtɔ mɛlalɨ gǝnɔ a lam a tuulɔ Kafarnahumi, nǝb nɨ yo kemʌn tǝm Kan Kwaamanɔ lɛɨ ja bɛ a daa Bitrus woi, ja bʌ gǝn gɔ, “Feyi jenɔ ywa kemʌn tǝm Kan Kwaamanɔ lɛ ka?”
25Nǝngɔ Bitrus a jǝla gɔ, “Ɔɔ, gǝ ywa ywa.”
A dɔ mʊgɔ lɔngɨ, nǝngɔ Yesu a tǝl sʊwa lɛ gɔ, “Saminu, n wɛ mʊ kuwo a bʌtʌm kɛl nɨ gǝmɨ? Fɔlɔlɔmɔ gǝ yo kemʌn tǝmɔ a kang woi? Jǝ yo a daa bɛtɔ lɔ jii woi ka? Jǝ yo a kang kaam nǝbɨɨ ka?”
26Nǝngɔ Bitrus a jǝla gɔ, “A kang kaamɨ.” Nǝngɔ Yesu a sʊwa gɔ, “A bɛtɔ lɔ jii mɨ jǝ ywa lɛ. 27Bǝ swɨ bɔ ja kal nǝl. Yɔ a wɨma ya ta jʌngigɔ. Jʌngi nɨ mʊ ta nǝn tɨkǝgaɨ, wum nyiyo gǝnɔ mʊ nya nya kemʌn sǝlǝnɔ wo, sǝ ń do ń nɨ nǝb yotǝm kemʌn tǝmɔ, ywa ywa kemʌn tǝm mǝndɨ jǝbɔ a jenɔ.”
सध्या निवडलेले:
Matta 17: DBD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©️2024 Luke Initiative for Scripture Translation
