Matta 13
13
Mʊsǝn Kɛl A Dul Nǝ Kwala
(Mar 4:1-9; Luk 8:4-8)
1A kum gɔ Yesu a jel a lɔ ya yɨɨ a kʌng wɨma. 2Nǝbɔ a mʊrkaɨ, a lada na a kang gǝnɨ, n jʊ a bwɨ a dɔ tɨyamwɛngɔ a yɨ woi, nǝbɔ tɨm a kʌng wɨmaɨ a lada. 3A sʊwa ji kanjǝlɔ a lada nǝn mʊsǝn kɛl, a sʊwa gɔ, “Kaa nǝ jʊngtǝm twam a jel ya wa dʊʊm a tɔtwam gǝn. 4Nǝn kwama nɨ gǝ wam dʊʊmɔ lɛɨ, nǝngɔ kaam dʊʊmɔ a tǝla a golaɨ, nǝngɔ lǝbɨtɨnɔ ba sobamɨ. 5Kaamɨ a tǝla a daa tatǝn, daagɔ tǝmɔ a tushi bɔ. A ta bɔ bʊtɔ nǝngɔ ja gii. 6Shilotǝm kɔkɔgɔ a twɨlam ji, ja kʊshɨm, jʊ a bwɨɨ nʌl jinɔ a ta bɔ tǝm. 7Kaamɨ a tǝla a kʊm shola, nǝngɔ sholagɔ a bǝm jii. 8Kaamɨ a yal a tǝm nyan, ja jǝg dulɔ, nugɔ a bʊm, kaamɨ dulɔ fʊlkʊb fʊlkʊb, kaamɨ fʊltǝnukun nukun, kaamɨ fʊtǝtaal taal. 9Nʊ nɨ nǝn lɔl nyʊwatǝmɨ, bɛ ga nyʊwa.”
Jʊ Mʊsǝn Kɛl Nɨ Nʊng Lɛɨ
(Mar 4:10-12; Luk 8:9,10)
10Nǝngɔ bɛtɔ mɛlalɨgɔ a bɛ a daa gǝ woi, ba ja sʊwa gǝn gɔ, “N wɛ a bwɨ mʊ sʊwa nǝbɔ kɛlɔ nǝn mʊsǝn kɛlɨ?”
11Yesu a sʊwa ji gɔ, “A jenɔ ja kwɛl ja jǝla jem jǝ́ nyǝm kanjǝl nɨ ja yʊ yʊɨ a fɔlɔn lɔ Kwaamaɨ. A jinɔ, ja nǝ ji bɔ nyǝmtǝmɔ. 12Nʊ nɨ nǝn jǝlɨ, jǝ sʊ gǝm sʊ a lada. Nʊ nɨ mɨ nǝnɨ, kǝlɨ jʊ nɨ gǝ nǝnɨ, jǝ yem gǝm yem. 13N jʊ a bwɨ mǝ sʊwa ji mʊsǝn kɛltɨn nɛɨ,
“Na ja dʌngi,
mɨsɔ jǝ kuwo lɛ,
jǝ kaa kaa lɔlɔ sǝ jǝ nyʊwa,
mɨsɔ jǝ nyʊwa lɛ,
mɨsɔ jǝ nyǝm lɛ tag.
14N dǝngdǝng kɛl Ishayaɨ nǝkuwotǝmkǝgagɔ a sʊwa a dul jin gɔ,
“ ‘Jǝ́ nyʊwa nyʊwa,
mɨsɔ jǝ́ nyǝm lɛ,
Jǝ́ dʌng dʌng,
mɨsɔ jǝ́ kuwo lɛ.
15Jʊ a bwɨɨ nǝl nǝb nɨ
a kwam nyɔ,
lɔl jinɔ mɨ nyʊwa lɛ,
ja kʊmam nu jinɔ.
Sǝ ka ja kuwo nǝn nu jin,
ja nyʊwa nǝn lɔl jin,
ja nyǝm a mʊgɔ nǝl jin,
ja yǝla a daa mɨ woi,
n gung ji.’
16Nu jenɔ a nya bwili, jʊ a bwɨɨ jǝ kuwo lɛ, lɔl jenɔ tʌji ja nya bwili, jʊ a bwɨɨ jǝ nyʊwa lɛ. 17N bɨlǝngǝn mǝ sʊwa jen nɛɨ, nǝbkuwotǝmkǝgagɔ jǝbɔ nǝb dǝngdǝngɔ a lada ja saa ja kuwo jʊ nɨ jǝ́ kuwo lɛɨ, ja kuwo bɔ, ja nyʊwa jʊ nɨ jǝ́ nyʊwa lɛɨ, ja nyʊwa bɔ.
Yesu A Fɛta Ji Mʊsǝn Kɛlɔ A Dul Nǝ Kwalaɨ
(Mar 4:13-20; Luk 8:11-15)
18“Jʊ mʊsǝnɔ nʊng lɛ a dul nǝ kwalaɨ n wɔ. 19Na nǝl a nyʊwa kɛl a dul fɔlɔn lɔ Kwaamaɨ, nǝngɔ a nyǝm bɨɨ, Mammɔ ba jǝgǝm jǝgǝm jʊ ja kwal a mʊgɔ nǝl nʊ gɨɨ. Wʊnɨ nǝn gɔ dʊʊmɔ a yal a golaɨ. 20Dʊʊm nɨ a yal a daa tatǝnɨ, gǝ nʊng nʊ nɨ a nyʊwa kɛl Kwaamaɨ, a yo nǝn fulotǝm nǝlɨ. 21Mɨ nǝn nʌl, mɨ gǝ tɨ lɛ a kʊta, na gaalanɔ jǝbɔ gʌtǝmɔ a nya gǝn a dul kɛl Kwaamaɨ, gǝ fǝ fǝ naa, a yǝla a gʊ nǝn gul. 22Nʊ nɨ a yal a kʊm sholaɨ, n nʊ nɨ a nyʊwa kɛl Kwaamaɨ, komʌn kanjǝl yooligɔ jǝbɔ swɨtǝm shilo a bǝm kɛl Kwaamaɨ a kala nǝn kwanɨ. 23Dʊʊm nɨ a yal a tǝm nyaɨ, gǝ nʊng nʊ nɨ a nyʊwa kɛl Kwaamaɨ, a nyǝm, maa maajɨ lɛ nǝnɨ, jǝg dʊʊmɔ lɛɨ, kaamɨ fʊlkʊb win win, kaamɨ fʊltǝnukun nukun, kaamɨ fʊtǝtaal taal.”
Mʊsǝn Kɛl A Dul Yǝla Nɨ A Mʊgɔ Nuyilaɨ
24Yesu a yǝla a sʊwa ji kaa mʊsǝn kɛl gɔ, “Fɔlɔn lɔ Kwaamaɨ gǝ na na nʊ nɨ a wa dʊʊm nyan a tɔtwam gǝnɨ. 25Kwama nɨ nǝbɔ gwam daa dum lɛɨ, nǝ kii gǝnɔ a yɔ ya wa kaa dʊʊm yǝla a mʊgɔ twam jaam, nǝngɔ a shui. 26Kwama jaamɔ a gimi, nǝngɔ yǝlagɔ a gi tǝgǝnɨ.
27“Bɛtɔ jwaalɛn nǝ lɔ gǝnɨ ja yɔ ya jǝ sʊwa gǝn gɔ, ‘Tɛlalɔ, nǝn gɔ kɛna n dʊʊm nyan mʊ wa a tɔtwam mʊnɨ, a bwɨ nyǝn yǝlagɔ a gi tʌgoi?’
28“A sʊwa ji gɔ, ‘N nǝ kii mɨ a maa mɨ jʊ nɨɨ.’
“Bɛtɔ jwaalɛn gǝnɔ ja sʊwa gǝn gɔ, ‘Mʊ swɨ lɛ ya nǝ kubom yǝlagɔ ka?’
29“Nǝngɔ a sʊwa ji gɔ, ‘Mɨ nyɔ, kage na jǝ́ kubom yǝlagɔ lɛɨ, jǝ́ kum nǝn jaam gǝn. 30Jǝ́ bǝla ji wo gwam ja dʊʊl dakini ba la nǝn di kʌsotǝmɔ. Na la kwama kʌsotǝmɨ, sǝ n sʊwa nǝb kʌsotǝmɔ ja tǝl ja biyo yǝlagɔ, ja mʊr ja bwabam, ja twɨm, sǝ ja mʊr jaamɔ ja tal a bʌni.’ ”
Mʊsǝn Kɛl A Dul Nu Tɨya Mastad
(Mar 4:30-32; Luk 13:18,19)
31Yesu a sʊwa ji kaa mʊsǝn kɛl gɔ, “Fɔlɔn lɔ Kwaamaɨ gǝ na na nu mastad, wʊnɨ kaa nǝl a do ya kwal a tɔtwam gǝnɨ. 32Nǝn gɔ a maa dǝm a kʊm dʊʊmtɨnɨ, na a dʊʊlɨ, nǝn gɔ a laa jǝjalǝn yaagɔ tɛɛnatǝmɨ, a yǝlam tɨya. Lǝbɨtɨnɔ ba jǝ tii lɔ jinɔ wo a kangtɨn gǝnɔ gǝm.”
Mʊsǝn Kɛl A Dul Yisti
(Luk 13:20,21)
33Yesu a sʊwa ji kaa mʊsǝn kɛl gɔ, “Fɔlɔn lɔ Kwaamaɨ gǝ na na yisti wʊnɨ kaa nɔɔlɨ a dǝg tʌgo a mim nuyila taasa taalɨ, a fi gǝn gwamɨ.”
Yesu A Sʊwa Mʊsǝn Kɛltɨn
(Mar 4:30-32)
34Yesu a sʊwa nǝbɔ gwam kanjǝl nɨ nǝn mʊsǝn kɛl. Mɨ gǝ sʊwa ji kɛl lɛ a dǝg bɔ mʊsǝn kɛl wo. 35A maa nyɔ, sǝ ja yii jʊ Ishaya nǝkuwotǝmkǝgagɔ a sʊwaɨ gɔ,
“Mǝ sʊwa sʊwa mʊsǝn kɛltɨn,
mǝ sʊwa sʊwa kanjǝl nɨ
ja yʊ yʊɨ a tǝltǝm yooligɔ gǝmɨ.”
Yesu A Fɛta Ji Mʊsǝn Kɛlɔ A Dul Yǝla Nɨ A Mʊgɔ Nuyilaɨ
36Nǝngɔ Yesu a bǝla mʊrkalɨ nǝbɨɨ, a dɔ lɔngɨɨ. Bɛtɔ mɛlalɨ gǝnɔ ba nya gǝnɨ, ja bʌ gǝn gɔ, “Sʊwa nǝn, mʊsǝn kɛl nɨ a dul yǝla nɨ a tɔtwamɨ, gǝ nʊng wɛ?”
37Nǝngɔ a jǝla ji gɔ, “Nʊ a wa dʊʊm nyanɨ, nǝn Bʊla Nǝlɨ. 38Tɔtwamɔ nǝn gɔ n yooligɨɨ, dʊʊm nyanɔ, nǝn gɔ bɛtɔ lɔ fɔlɔnɨ, yǝlagɔ n bɛtɔ Mammɨ. 39Nǝ kii nɨ a wa yǝlagɨɨ, nǝn gɔ nǝn Mammɨ. Kwama kʌsotǝmɔ, n dɨltǝm yooli, nǝb kʌsotǝmɔ n bɛtɔ twama Kwaamaɨ.
40“Kanga jǝ mʊr yǝlagɔ lɛ ja twɨmɨ, yǝlam nyɔ a kum dɨltǝm yooli. 41Bʊla Nǝlɨ twam twam bɛtɔ twama Kwaamaɨ ja mʊr nǝbɔ gwam a dǝg nǝbɔ maatǝm bwɨlangkɛlɨ, jǝbɔ nǝbɔ maa bwɨlang jǝl lɛɨ, sǝ ja jǝgǝm ji a fɔlɔn gǝnɔ gǝm. 42Sǝ ja tal ji a mʊgɔ kǝla nɨ a shilo shiloi. Jǝ ji ji wi nǝn kʊʊtǝm nungʌn a daa gɔ. 43A kwama gɔ, nǝb dǝngdǝngɔ, jǝ yǝlam nǝn ganggang nyɔ na kɔkɔ a mʊgɔ Fɔlɔn Tɛtɛ jii. Nʊ nɨ nǝn lɔl nyʊwatǝmɨ, bɛ ga nyʊwa.
Shilo Nɨ Ja Yʊ Yʊɨ
44“Fɔlɔn lɔ Kwaamaɨ gǝ na na shilo nɨ ja yʊ a tɔtwamɨ. Kwama nɨ kaa nǝl a nyaɨ, a yǝla a yʊ tagɨ. Fulotǝm nǝlɔ a la gǝm daaɨ, nǝngɔ a yɔ ya miyom kanjǝl nɨ gǝ nǝngǝnɨ pʌd, a tenʌm tɔtwam gɨɨ.
Tɛl Bʊmǝn
45“Fɔlɔn lɔ Kwaamaɨ tag gǝ na na nǝ jatǝm gamdʌbo nɨ saa tɛl bʊmǝntɨn nɛɨ. 46A yɔ ya nya tɛl bʊmɨ nɨ kemʌnɔ a kwam nyɨɨ, nǝngɔ a miyo kanjǝl nɨ gǝ nǝn gwamɨ, nǝngɔ a ten nǝnɨ.
Mʊsǝn Kɛl A Dul Lɨyal Tatǝm Jʌngi
47“Fɔlɔn lɔ Kwaamaɨ tag gǝ na na lɨyal nɨ ja mal a mʊgɔ wɨmaɨ, jǝ tam jʌngi lɛɨ, gǝ ta jʌngitɨnɔ nǝn dʌmʌn. 48Lɨyal nɨ a yii, ja gʊ ja yɔ nǝn a kʌng wɨma. Ja yɨɨ, ja sobam jʌngi bʊmǝntɨnɔ, ja tal a tun, nǝngɔ ja tǝlam nǝb nɨ n ke bɔ jʌngi nyaɨ. 49Yǝlam nyɔ a dɨltǝm yooligɔ gǝm. Bɛtɔ twama Kwaamaɨ ba jǝ bel bel sǝ ja jǝgam nǝb bwɨlamɔ a mʊgɔ nǝb dǝngdǝngɔ gǝm. 50Sǝ ja tal ji a mʊgɔ kǝla nɨ a shilo shiloi. Jǝ ji ji wi nǝn kʊʊtǝm nungʌn a daa gɔ.
Shilo Fɨ Jǝbɔ A Galɨ
51“Jǝ́ nyǝm kanjǝl nɨ gwam ka?”
Nǝngɔ ja jǝla gɔ, “Ɔɔ.”
52Nǝngɔ a sʊwa ji gɔ, “Gwam nǝ mɛlalɨ diil nɨ a yǝlam bwɛ mɛlalɨ a fɔlɔn lɔ Kwaamaɨ, gǝ na na tɛlalɔ nɨ a jǝg shilo fɨ jǝbɔ shilo galɨ a daa yatǝm jini.”
Ja Kɔ Yesu A Nazarat
(Mar 6:1-6; Luk 4:16-30)
53Yesu a dɨ sʊwalatǝm mʊsǝn kɛltɨn nɨɨ, nǝngɔ a bǝla daagɨɨ. 54A yǝla a bɛ a tuulɔ gɨɨ, nǝngɔ a tǝl mɛla nǝbɔ gǝm lɛ a kantɨn mɛlalɨ jini. Nǝngɔ ja ta kang a nyiyo gɔ, “Bwɛ nɨ a nya yʊlan nɨ a fee nyɨɨ, jǝbɔ kwaan maatǝm kanjǝl laatǝm kang nɨ? 55Bwɛ nɨ n ke bɔ bʊla nǝ fɛlatǝm daa yɨmtɨn nɨ ka? Nɛnɛ gɔ ke bɔ Maryamu ka? Kɛtǝlam gǝnɔ, jǝ ke bɔ bǝ Yakubu, jǝbɔ Yusufu, jǝbɔ Saminu, jǝbɔ Yahuza ka? 56N ke bɔ kɛtǝlam gǝnɔ nɔɔtǝnɔ gwam jǝ dakini jǝbɔ bǝnɨ ka? Na gǝ na nyɨɨ, ga nya jʊtǝb nɨ a fee?” 57Nǝngɔ ja maa fitǝm nǝl jǝbɔ gɨɨ.
Nǝngɔ Yesu a sʊwa ji gɔ, “Nǝbɔ gwam jǝ nǝ nǝ nǝkuwotǝmkǝga dʊʊn, na ke bɔ a tǝm gǝn, jǝbɔ lɔ gɨɨ.”
58A maa bɔ jǝ laatǝm kang a gǝlala a daa gɔ gǝm, jʊ a bwɨɨ ja nǝ bɔ bɨlǝngkɛl.
सध्या निवडलेले:
Matta 13: DBD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©️2024 Luke Initiative for Scripture Translation
