Taetas 2
2
Ia Pol e kori lengaa nina naunau talana na Kristin
1Mihoe ia Taetas, ko sasanira na tinoni kara toha taonia na sasani tutuni. 2Ko sasanira ira na mane tuali kara toha manasa me ke ni hanaa na tinoni tamani kukuni tatadira. Mi ira kara tuu ngachi tana nidira dodonu tatana ia God, ma kara toha tana mamauri ni vaisahavi, ma kara tuu ngachi tana tahu sekoseko.
3Mo ko kori vanira soha lakamu ira na daki tuali, kara toha taonia ira na naunau talana te tihisia kovahai ira ara tamani kukuni tatana ia God. Ira kara mui na tutugu sekolia na tinoni, ma kara mui na ngalo inu vuaeni solehana. Mi ira kara sasani bamua na hua te talana. 4Ira kara sasanira na daki vaolu kara ni sahavia na taudira ma na daledira. 5Mi ira kara sasani lakamura kara turu tovosia na mamauridira, me ke hoto na manasadira ma kara ago tana valedira. Mi ira kara tamania na naunau talana, ma kara valinge mangana na taudira, me ke ni teha ke chikai na kori sekolia nina valagu ia God.
6Me vahai soha lakamu ira na mane borau. Hoe ko navusira kara turu tovosia na mamauridira. 7Ihoe ia Taetas, ko tihisia na naunau talana tatana e visa na omea to agosia, kara ni toha taonia. Nimu sasani hoe ke hoto kalavata, mo ko ni tihisi lengaa ihoe o pada mamavaa na hua to sasania. 8Ko sasania hoe na hua te tutuni, me ke ni teha na tinoni na kori sekoliana. Tina ke vahai nia, mi ira nimu hala hoe ngeni ba kara vahamaa, matengana ira ba kara teha tamani siki omea vata ni kori sekolihita.
9Ko sasanira ira na slev#2:9 Na slev nina tinoni tatamani chikai na tinoni taovia, ma na nina taovia nia e hanaa raia ke agosi bamua siki omea. kara rongomangana nidira taovia, ma kara agosia visa na omea me ke ni vahanira ma kara mamahela. Kara mui na valagu visu vanira, 10ma kara mui na belia siki nidira omea. Mi ira kara tihisi tovosi vania nidira taovia kovahai ira na tinoni tara norudira#2:10 Norudira e vahai “trastem olketa.” . Tana nidira ago talana ira nia, ba ke vahania na sasani tana rongona ia God, nida Tahamauri, me ke tangi odo.
11Ia ta ka toha vahai hita, matengana nina toba talana ia God e laba lenga tahuna te mai vati ni taha maurisia visa na tinoni. 12Tana rongona nina toba talana ia, me sasanihita ka basiaa na naunau te teha hoto tana matana ia, ma ka basiaa visa na omea sekoseko ta ngaloa hita tana pari de. Hita ka toha manasa, ma ka toha hoto, ma ka agosia visa na omea talana tana tahu de. 13Ia ta ka toha vahai hita, ma ka pitua na dani mamahela ta padaa hita, tahuna te ke laba lenga nina susuliha ma na mararana nida God te pichakae, ma ia Jisas Kraes, nida Tahamauri. 14Ia Jisas Kraes e sivo saladada hita me sau tovosia na mamaurina, me ke ni taha chonihita tana naunau sekoseko. Me vahanihita hita ma male tana matana ma ka ni lia nina tinoni ia, ma ngangavina solehana hita na agosiana visa na omea talana.
15Na omea nira de to ko sasanira hoe, mo ko kori talana vanira ira na tinoni kara agosia. Tahuna ta kara teha ira na agosi taonia, ihoe o tamania na susuliha vata ni rapachira. Mo ko mui na talasangaa ke chikai ke pejoa na hua to koria hoe.
सध्या निवडलेले:
Taetas 2: mln
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2024 (active), Wycliffe Bible Translators, Inc. All rights reserved