Taetas 1
1
1Inau ia Pol, nina tinoni ago ia God ma nina tinoni ni saurongo#1:1 Tinoni ni saurongo na asana “Aposol.” ia Jisas Kraes. Ia God e viliu nau ku sangara nina tinoni vivili nira ia, ma kara ni tamani dodonu ira tatana ia Jisas, ma kara hanaa ira na omea tutuni nira ma kara ni toha tana mamauri te ngangavina ia God. 2Ma na omea tutuni nira nia ba kara vahanira ira kara tamania na papada susuliha ta kara mauri savaliu. Ia God te voo na lelekaha, e veke nohaa na mamauri sali i sau tahuna te teha vata ia na agosia na pari de. 3Mi tana tahu te livua ia God, e tihisi lengaa na saurongo de tana ago te livu vaniu nau. Mu kori lengaa na saurongo de matengana ia God, nida Tahamauri, te kejaliu nau.
4Inau u mamare vaniho hoe, ia Taetas. Ihoe o vahai kalavata na dalegu nau, matengana ikohita to tamani chikai bamu na dodonu.
Nina toba talana ma nina rapo ia God na Tohadada, ma ia Jisas Kraes nida Tahamauri, ke toha koluho hoe.
Na naunau talana na tinoni leholeho tana vale lotu
5Inau u basiaho hoe tana momoru i Krit, mo ko ni hotosia hoe na hua ta teha vata hita na agosi kodea. Ko vilia kesana na tinoni leholeho kara morosi taonia na vale lotu nira tatana e visa na vera, vahai tu kori vaniho noha nau. 6Na tinoni leho tana vale lotu nia ke hoto kalavata na mamaurina me ke ni teha chikai na kori sekoliana, me ke tamani bamua ke chikai na tauna. Na dalena nira ia kara tamani dodonu tatana ia Jisas Kraes, me ke ni teha siki tinoni ke kori sekolira kovahai ara pejakoe ma na toha tana mamauri bubuleha. 7Na tinoni leho nia ke hoto na mamaurina me ke ni teha chikai na kori sekoliana, matengana ia e morosi taonia nina tinoni nira ia God. Ma ia ke mui na hotuhotu, me ke mui na kore kesakesa. Ma ia ke mui na inu solehana, me ke mui na ngalo pidu ma na ngangavina golo solehana. 8Ma na tinoni nia ke turu talanara na tinoni tahuna ta kara mai tana valena. Ia na tinoni te ke ngangavina na naunau talana. Ia ke morosi taoni tovosia, ma na mamaurina ia ke hoto me ke toha bukea ia God. 9Ia ke donu kalavataa na saurongo tutuni vahai ta sasania hita, me ke ni sangara na tinoni tana sasani tutuni, me ke valagu utusira ira tara hoso tahania na saurongo nia.
10Inau u kori vahai nia, matengana e danga na tinoni ara pejakoe#1:10 Pejakoe e vahai “teha vavalinge.”, mi ira ara kori tugaleta mara tovoa na lekasi tinoni. Na tinoni vahai nia e danga tatadira ira tara koria ira na Kristin kara taonia nidira keja ira na Jiu, na keja ni pari papadana. 11Ko mui na talasangara ira kara valagu, matengana ira ara sekoli kodea nidira dodonu na vangana kesana na vale tana nidira sasani sekoseko, ma kara ni taha golo bamu tatadira. 12Me seisuge e chikai nidira propet tovosi ira na Krit i sau e kori mana tahuna te kori vahai de, “Ira na vangana i Krit ara lelekaha visa tahu, mi ira na tinoni sekoseko. Ira ara lahu solehana na ago, mara toha ni hahani bamu.” 13E mana nina valagu na propet de tana rongodira ira na vangana i Krit. Mi matengana te vahai nia, ko rapachi talanara mo ko kori vanira ira ara ruri, ma kara ni tuu ngachi ira tana nidira dodonu. 14Ma kara mui na valingea nidira koripoto lelekaha ira na Jiu, ma na nidira keja ira tara hoso tahania na sasani tutuni. 15E visa na omea e hoto vanira ira te hoto na tobadira. Me teha siki omea ke hoto vanira ira te seko na tobadira, mara voo na donua ia God, matengana na manasadira ira ma na papadadira ira e seko noha. 16Ira ara koria kovahai ira ara hanaa ia God, ma nidira naunau ira te tihisi lengaa ira ara voo ia God. Na tinoni vahai nira nia ara seko solehana, mara teha na valingea ia God, mara teha tihiladira kara agosia siki omea talana.
सध्या निवडलेले:
Taetas 1: mln
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2024 (active), Wycliffe Bible Translators, Inc. All rights reserved