MATEO 7
7
Ma' a p'is óoltique'ex u láak máaco'ob
(Lc 6.37-38,41-42)
1Ma' a p'is óoltique'ex u láak máaco'ob tu yo'olal ma' a p'is óolta'ale'ex. 2Tumen bíin p'is óolta'aque'ex tumen Jajal Dios je'el bix a p'is óoltique'ex u láak máaco'obe', bíin xan p'i'isique'ex yéetel le x p'isib iquil a p'isique'ex u láak máaco'obo'. 3¿Bix anil cu páajtal a wilic le chan sojol yaan tu yich a sucu'uno' wa ma' táan u páajtal a wilic le che' yaan ta wich techo'? 4Wa yaan jun p'éel che' ta wiche' ¿bix úuchac u páajtal a wa'alic ti' a sucu'un: cha'a in jóokesic le chan sojol yaan ta wicho'? 5¡J ca'a p'éel ich! jóokes táanil le che' yaan ta wicho' tu yo'olal beyo' ca páatac a wilic ma'alob a jóokesic le chan sojol yaan tu yich a sucu'uno'.
6Ma' a dzáique'ex le quili'ich ba'alo'ob ti' peeko'obo', mix a pulique'ex a perlae'ex ti' kéekeno'ob, bic úuchac ca u peepe'cha'to'ob yéetel ca u sutubao'ok ta wóokole'ex uti'a'al u ja'aja'ate'ex.
Káatnene'ex, caxannene'ex, kopnene'ex
(Lc 11.9-13; 6.31)
7Káatnene'ex, bíin dza'abac te'ex; caxannene'ex, bíin a nuptáan a kaaxane'ex; koopnene'ex, bíin je'ebec te'ex le jool najo'. 8Tumen máax cu káataje' cu kam; máax cu caxane' cu nuptáan; máax xan cu kope' cu je'ebel jool naj ti'.
9¿Yaan wa máax ichile'ex je'el u dzáic jun p'éel tuunich ti' u paal le quéen káata'ac waaj ti'e'? 10¿Wa ca u dzáa jun túul caan ti' le quéen kata'ac jun túul cay ti'e'? 11Wa te'ex, quex kaakas máaque'ex, a wojele'ex a dza'ex ma'alob ba'alo'ob ti' a paalale'exe', a Taataex yaan te j ca'ano' asab je'el u dzáic ma'alob ba'alo'ob ti' máaxo'ob káatic ti'o'.
12Bey túuno' beete'ex mantadz ti' u láak máaco'ob le ba'ax a káate'ex ca u beeto'ob ti' te'exo'; tumen le cu ca'ansic u ya'almaj t'aan Moisés yéetel u dzíibo'ob le aj bóobato'obo'.
Le ca'a p'éel jool najo'obo'
(Lc 13.24)
13Ooquene'ex ti' le nu'unut' jool najo'. Tumen cóoch le jool naj bey xan le bej cu bíin ti' xu'ulsajilo', yéetel ya'ab máaco'ob cu yoclobi'; 14ba'ale' nu'ut' le jool naj bey xan le bej cu bin ti' cuxtalo', yéetel jach jun p'íit máaco'ob nuptantico'ob.
Jun cúul chee' cu kaj óolta'al tu yo'olal u yiich
(Lc 6.43-44)
15Canantaba'ex ti' le tuus máaco'ob cu ya'alico'ob táan u t'aano'ob tu yo'olal Jajal Dios. Cu taalo'ob ti' te'ex je'el bix j tamano'obe', ba'ale' tu pucsi'ikalo'obe' beyo'ob chacmo'ole'. 16Te'exe' je'el u páajtal a kaj óoltique'exo'obe' tu yo'olal ba'ax cu beetico'ob, tumen ¿je'el wa u t'o'ocol uva ti' ki'ixo'ob, wa higo ti' tzacamo'ob? 17Bey túuno', tuláacal ma'alob che'e' cu dzáic ma'alob ich, ba'ale' le kaakas che'e' kaakas ich cu dzáic. 18Jun cúul ma'alob che'e ma' tu páajtal u dzáic kaakas ich, mix xan jun cúul kaakas che' cu páajtal u dzáic ma'alob ich. 19Tuláacal che' ma' táan u dzáic ma'alob iche', cu ch'a'acale' cu tóoca'al ti' káak. 20Le beetique', te'exe' je'el a kaj óoltiquexo'ob tu yo'olal ba'ax cu beetico'obe'.
Ma' tuláacal máac bíin oococ tu ajawil Jajal Dios
(Lc 13.25-27)
21Ma' tuláacal le máaxo'ob cu ya'alico'ob ten: Yuumtzil, Yuumtzil, bíin ojco'ob tu ajawil ca'an, ba'ale' chéen le máaxo'ob cu beetico'ob u alab óolal in Taata yaan te j ca'ano'. 22Le quéen kuchuc le kiino', yaab máaxo'ob bíin u ya'alo'ob ten: Yuumtzil, Yuumtzil, to'one' j t'aanajo'on ta kaaba', ta kaaba' xan t jóokesaj kaakas pixano'ob, ta kaaba' xan t mentaj ya'ab chíiculalo'ob. 23Ba'ale' tene' bíin in wa'al ti'ob: Mix bikin in kaj óolte'ex; ¡tzelaba'ex tin táan, te'ex ta beetaje'ex ba'alo'ob kaastac!
Ca' p'éel chuunpako'ob
(Mc 1.22; Lc 6.47-49)
24Le máax cu yu'ubic in t'aan yéetel cu beetic ba'ax quin wa'alique', bey jun túul máac yaan u na'at tu beetaj u yotoch tu yóokol tuuniche'. 25J káax cháaque', áalcabnaj le ja'obo', j taal ka'amcach iik tu yóokol le najo', ba'ale' ma' j lúubi', tumen yóokol tuunich yaan u chunpakil. 26Le máax cu yu'ubic in t'aan, ba'ale' ma' tu beetic ba'ax quin wa'alique', bey jun túul máac mina'an u na'at tu beetaj u yotoch tu yóokol le sa'am lu'umo'. 27J káax cháaque', áalcabnaj le ja'obo', j taal ka'amcach iik tu yóokol le najo'. Ca j lúubi, ¡Ca jach xu'ulsa'abi'!
28Le ca j dzo'oc u t'aan Jesuse', le máaco'obo' jaka'an u yóolo'ob tu yo'olal u ca'ansaj; 29tumen cu ca'ansaj bey jun túul máac yaan u páajtalile', ma' je'el bix u j ca'anbesajilo'ob le a'almaj t'aano'.
सध्या निवडलेले:
MATEO 7: YUA04
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Maya de YucatánTumben Nupt'an NT © Sociedad Bíblica de Mexico, 2004.
