JUAN 5
5
Jesús cu dzáic u toj óolal jun túul máac túuch' u wíinclil yaan Betesda
1Cu dzo'ocol lela' le judíobo' tu beetajo'ob jun p'éel kiinbesaj, ca j suunaj Jesús Jerusalén. 2Ti' le caajo', naadz ti' le jool naj cu kaaba'intic u Jool naj le j tamano'obo', yaan jun p'éel u cúuchil ja' u kaaba' ich hebreoe' Betesda, yaan cinco u jool najilo'ob. 3Yaan te'elo' ya'abcach koja'ano'ob chilicbalo'ob lu'um, ch'óopo'ob, móocho'ob yéetel paralitico'ob, táan u pa'atico'ob u péecsa'al le ja'o'. 4Tumen yaan u kiinil cu yéemel jun túul ángel u péeques le ja'o'; le máax cun yáax ocol ichil le ja' cu dzo'ocol u péecsa'alo', cu yutztal ti' je'el ba'axac koja'anil yaan ti'e'. 5Yaan túun te'elo' jun túul máac dzo'oc treinta y ocho ja'abo'ob koja'anchajac. 6Jesuse' le ca tu yilaj le máac chilicbalo' ca tu na'ataj dzo'oc u yúuchtal anac beyo', ca tu káat chi'itaj ti': ¿A káat utztal?
7Le koja'ano' tu núucaj ti': Yuumtzil, mina'an máax ocsiquen ichil le ja' quéen péecsa'aco'. Mantadz cu yúuchul le quéen in wóolt ocle', u láak cu yocol táanil ti' teen.
8Jesuse' tu ya'alaj ti': Líiken, ch'a'a u nu'ucul a chital, xíimbanen. 9Ti' le jun súutuco' utzchaj le máaco', tu ch'a'aj u nu'ucul u chitale' ca jo'op' u xíimbal. Ba'ale' tumen sábadoe' 10le judíobo' tu ya'alajo'ob ti' le máax dza'ab u toj óolalo': Bejela'e' sábado; ma' utz a cuchic u nu'ucul a chitali'.
11Le máaco' tu núucaj ti'ob: Le máax dzáa in toj óolalo' tu ya'alaj teen: Ch'a'a u nu'ucul a chital, xíimbanen. 12Tu káatajo'ob túun ti': ¿Máax a'al teech: ch'a'a u nu'ucul a chital xíimbanen?
13Ba'ale' le máaco' ma' u yojel máax dzáa u toj óolali', tumen yaan ya'abcach máaco'ob te'elo', Jesús xane' dzo'oquili' u bine'. 14Cu dzo'ocole' j ila'ab tumen Jesús te j kulnajo', ca j a'ala'ab ti': Ile, beora' dzo'oc a wutztala', ma' a suut kebanchajal, u ti'al ma' u yúuchul teech u láak ba'al asab kaas.
15Le máaco' j bine' ca tu ya'alaj ti' le judíobo' Jesús máax dzáa u toj óolal. 16Le o'olale' le judíobo' jo'op' u ch'a'apachtico'ob Jesús yéetel tu yóoltajo'ob u quiimso'ob, tumen tu beetaj le ba'alo'oba' u ti'al sábado. 17Ba'ale' Jesuse' tu ya'alaj ti'ob: In Taatae' tac bejela' táan u meyaja', bey xan teen táan in meyaj.
18Le o'olale' le judíobo' jach tu tucultajo'ob u quiimso'ob, tumen ma' chéen cu dzáic jun tzéel u ya'almaj t'aanil sábadoi', ba'ale' cu queticubáa xan yéetel Jajal Dios iquil u ya'alic Jajal Dios u Taata.
U páajtalil u Paal Jajal Dios
19Jesuse' tu ya'alaj túun ti'ob: Tu jaajil, tu jaajil quin wa'alic ti' te'exe', u Paal Jajal Diose' ma' tu páajtal u beetic mixba'al chéen tu juun yo'olal. Chéen cu beetic le ba'ax cu yilic u beetic u Taatao'. Tuláacal ba'ax cu beetic le Taatao', bey xan le Paalo' cu beetic. 20Tumen le Taatao' u yaabiltmaj le Paalo', le o'olale' cu ye'esic ti'e' tuláacal ba'ax cu beetic; yéetel bíin u ye'es ti'e' ba'alo'ob mas nuuctaco'ob, bíin ja'akac a wóole'ex tu yo'olal le ba'alo'oba'. 21Tumen je'el bix le Taata cu caapúut cuxquintic le quimeno'ob yéetel cu dzáic cuxtal ti'obo', bey xan le Paalo' cu dzáic cuxtal ti' le máaxo'ob u káat u dzáe'. 22Le Taatao' ma' tu p'is óoltic mix máac, tumen u dzaamaj ti' le Paalo' tuláacal páajtalil u ti'al u p'is óol, 23u ti'al ca tzi'iquic le Paal tumen tuláacal máaco' je'el bix cu tziquico'ob le Taatao'. Le máax ma' tu tziquic le Paalo', ma' táan u tziquic le Taata máax túuxto'.
24Tu jaajil tu jaajil, quin wa'alic ti' te'exe' le máax cu ch'en xiquint le ba'ax quin wa'alica' yéetel cu yocsaj óoltic máax túuxtene' yaan cuxtal mina'an u xuul ti': yéetel ma' bíin xot kinta'aqui', tumen dzo'oc u lukul ti' quíimil u ti'al u máan ti' cuxtal. 25Tu jaajil tu jaajil quin wa'alic ti' te'exe', táan u taal u kiinil, dzo'oc xan u kuchul, le quéen u'uya'ac u t'aan u Paal Jajal Dios tumen le quimeno'obo'; le máaxo'ob cu yu'ubico'ob u t'ane' bíin cuxlaco'ob. 26Tumen le Taatao' yaan páajtalil ti' u dzáic cuxtal, bey xan u dzaamaj páajtalil ti' le Paalo' u ti'al u dzáic cuxtal. 27Dza'an xan páajtalil ti' u ti'al u p'is óol, tumen leti'e' u Paal Máac. 28Ma' u ja'akal a wóole'ex tu yo'olal lela', tumen bíin kuchuc u kiinil le quéen u'uya'ac u t'aan tumen tuláacal le quimeno'obo' 29yéetel bin jóokoco'ob ti' le mucnalo'obo'. Le máaxo'ob tu beetajo'ob utze', bin caapúut cuxlaco'ob u ti'al u yantal cuxtal ti'ob; ba'ale' le máaxo'ob tu beetajo'ob kaase', bíin caapúut cuxlaco'ob u ti'al ca xot kinta'aco'ob.
30Tene' ma' tu páajtal in beetic mixba'al chéen tu juunal in wóol. Tene' quin p'is óol je'el bix cu ya'alic teen Jajal Diose' yéetel in p'is óole' ma'alob, tumen ma' táan in beetic le ba'ax in káate' ba'ale' le ba'ax u káat le Taata máax túuxteno'. 31Wa teen jaajcuntic ba'ax quin wa'alique', le ba'ax quin wa'alico' ma' ma'alob jaajcunta'anili'. 32Ba'ale' yaan u láak máax jaajcuntic tin wo'olal, tene' in wojel le ba'ax cu ya'alic tin wo'olalo' jach u jaajil. 33Te'exe' ta túuxtaje'ex káatbil u chi' Juan, le ba'ax tu núucaj leti'o' jaaj. 34Ba'ale' tene' ma' táan in kamic u jaajcunaj wa máax máaquil, chéen quin wa'alic lela' u ti'al ca páatac a to'ocle'ex. 35Juane' bey jun p'éel sáasil cu yelel yéetel cu sáasilcunaje', te'ex túune' ta wóoltaje'ex a qui'imaccuns a wóole'ex ti' u sáasilil tu yo'olal jun p'íit kiino'ob. 36Ba'ale' tene' yaan tin wo'olal jun p'éel jaajcunaj asab ma'alob ti' le tu ya'alaj Juano'. Le ba'alo'ob quin beetico', leti'e' ba'alo'ob tu kubentaj teen le Taata ca in beeto', leti'ob jaajcuntic jach tu jaajil túuxta'aben tumen le Taatao'. 37Bey xan le Taata túuxteno' cu dzáic jaajcunaj tin wo'olal, quex mix jun téen a wu'uyme'ex u t'aan mix a wilme'exi'. 38Ba'ale' u t'ane' ma' ococ ta pucsi'ikale'exi', tumen ma' ta wocsaj óoltique'ex le máax túuxta'an tumen le Taatao'. 39Te'exe' ca xakaltique'ex le Quili'ich Dzíibo'ob yéetel chuca'an óolalo', tumen ca pa'atique'ex a caxtique'ex ti'obe' le cuxtal mina'an u xuulo', ba'ale' leti' le Quili'ich Dzíibo'ob cu t'aano'ob tin wo'olalo'. 40Cu dzo'ocole' ma' a káate'ex taal ti' teen u ti'al ca yanac te'ex le cuxtalo'.
41Tene' ma' táan in kamic tziquil cu taal ti' máaco'ob. 42U láak ba'ale', tene' in kaj óole'ex yéetel in wojel ma' a yaabiltma'ex Jajal Diosi. 43Tene' taalaja'anen tu kaaba' in Taata, ba'ale' te'exe' ma' táan a kamiquene'ex; wa ca taalac u láak máax chéen ti' u kaaba'e', leti'e' je'el a kamique'exe'. 44¿Bix je'el u páajtal u yantal te'ex ocsaj óolal, wa ca kamique'ex tziquil cu taal chéen ta baatzile'exe' yéetel ma' táan a caxtique'ex le tziquil cu taal ti' le jun túulili' Jajal Dioso'? 45Ma' a tuclique'ex wa teen quin in tac a poole'ex tu táan in Taata; máax taquic a poole'exe' Moisés, ti' máax a dzaamajex a alab óolale'ex. 46Tumen wa ca wocsaj óolte'ex ba'ax tu ya'alaj Moisese', je'el xan a wocsaj óoltiquene'exe', tumen Moisese' dzíibnaj tin wo'olal. 47Ba'ale' wa ma' táan a wocsaj óoltique'ex ba'ax tu dzíibtaj leti'e', ¿bix can a wocsaj óolte'ex ba'ax quin wa'alic teen?
सध्या निवडलेले:
JUAN 5: YUA04
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Maya de YucatánTumben Nupt'an NT © Sociedad Bíblica de Mexico, 2004.
