मत्ती 6
6
दुक्पा ङेतातेबाला मद्धत खित्जीन चुक खित्च्ये
1थेमे ज्येन बात च्यि सासीन परमेश्वरगी खि साबा साबाच्योक खित्जीन ख्योकोनगी मिओनगी थोङला खेराङला धर्मतीते मि दुका सिरस्यीत सिरच्येते सेमगी माकेत। थोक खासीन स्वर्गने देत्कान्ते ख्योकोन आबा परमेश्वरगी ख्योकोनला छ्याःङ इनाम मेतेरो।
2थोगी ख्योकोन सुइँदेकी सुइँदा दुक्पा ङेतातेबाला खइँदा तेरजीन ज्येनगी खोपरोङला धर्मतीते मि दुका साला मान खित्स्यीत सिराच्योक खित्कान्ते मिओनगी च्योक माकेत। होथोक्ते मिओनगी चुक खिते सासीन खोपरोङगी चुक लेमु खाका सिन गाङेकी छ्या स्येस्यीत सिन मिटिङ खित्च्येते खाम्बे नाङला थेमे मि छ्वासा रूसाला गाङेपा थे बात गेङगो। दि बात ङेन। थोक खित्कान्ते मिओनला ज्येनगीचेन मान खिओ। तर परमेश्वरगी तेरच्येते इनामचेन थेबेकी छ्याःङ मेङेदो। 3थोगी दुक्पा ङेतातेबाला खइँदा तेरजीन ख्योकोनगीचेन सुङगीङ सुइँको मेङेत्च्या खाला बिन। 4थोक खासीन सुङगीङ छ्या मेस्येच्या खाईन खाबाते काम थोङकान्ते ख्योकोन आबा परमेश्वरगी ख्योकोनगी चुक खासुङा थोङला ख्योकोनला इनाम तेरग्यो।
प्रार्थना चुक खाला खिता फाप्कीते
(लूका ११:१-४)
5प्रार्थना खित्जीन ख्योकोनगीचेन ज्येनगी खोपरोङला धर्मतीते मि दुका साला मान खित्स्यीत सिराच्योक खित्कान्ते मिओनगी च्योक माकेत। होथोक्ते मिओनगी चुक खिते सासीन परमेश्वरला आउदी खाला माने खित्कान्ते ईन सिन तेन्दाला मिटिङ खित्च्येते खाम्बे नाङला थेमे मि छ्वासा रूसाला गाङेकी थोङस्यीत सिन आउदी खाला प्रार्थना खिओ। दि बात ङेन। मिओनगी थेबाला मान खिओ। तर परमेश्वरगीनी थेबे प्रार्थना ङेनराङ मेङेनो। 6प्रार्थना खित्जीन ख्योकोनगीचेन ज्येनगी मोथोङच्या खाला च्यिकराङ खइँसाला देत्ला च्याला मि मिगी थोङा मुथुप्च्येते ख्योकोन आबा परमेश्वरला प्रार्थना खि। थोक खासीन सुङगीङ मोथोङच्या खाईन खाबाते कामोङ थोङकान्ते ख्योकोन आबा परमेश्वरगी ख्योकोन प्रार्थना ङेन्ला ख्योकोनला इनाम तेरग्यो।
7थेमे प्रार्थना खित्जीन ख्योकोनगी परमेश्वरला छ्या मेस्येकान्ते मिओनगी च्योक माकेत। थेबाचेन काल्बासाक ल्हा लु मोल्नामेईकामा खोपरोङगी साबाच्योक खाला तेरग्यो सिन ल्हा लु मोल्गीनराङ देत्क्यो। 8ख्योकोनगीङ काल्बासाक प्रार्थना खानामेईकामा ख्योकोन आबा परमेश्वरगी ङेन्ग्यो सिरच्येते होथेबेते च्योक्ते विचार माकेत। ख्योकोनला च्यि च्यि गोकीते सिननी ख्योकोनगी नाङ सिरा भन्दा गोमाकाराङ थेकी छ्या स्येकीन सिन्दा ओङगो।
9ख्योकोनगीचेन परमेश्वरला दोक सिन प्रार्थना खि। चुक सासीन
‘स्वर्गने देत्कान्ते आबा परमेश्वर, मि गाङेकी खोल्ला मान खित्स्यीत।
10सा लुङबा खाङ पूरो खाला खुई राज्य ओङस्यीत। स्वर्गने खाबा च्योकराङ दि पृथ्वीदुङ मि गाङेकी आबा खुई साबाते ङेन्ला खि साबा च्योकराङ खित्स्यीत।
11थरिङ लाईदु ङ्योकोनला गोच्येते साप थुङा नाङ।
12ङ्योकोनगी ङेराङला मेलेबा खित्कान्ते मिओनला माफ तेरा च्योकराङ खाला ङ्योकोनगी खाबाते पाप माफ नाङ।
13थेमे मेलेबा काम खित्से छ्य्वापेई ङ्योकोनला जोए खाला नाङ। मिला मेलेबा खित्कान्ते शैतान लाःक्तुकीङ खुईराङ जोए खाला नाङ।
गाङेपा गाङेला राज्य खित्कान्ते खोराङ ईन। खोत्ताङ छ्येज्यीक शक्ति ओत। खुईते सधैँभरि जय जय ओङस्यीत। आमेन,’ सिन सि।
14ईन्दालाचेन ख्योकोनगी खेराङला मेलेबा खित्कान्ते मिओनला माफ बिन्सीन स्वर्गने देत्कान्ते ख्योकोन आबा परमेश्वरगीङ ख्योकोन पाप माफ तेरग्यो। 15ख्योकोनगी थेबाला माफ माबिन्सीनचेन थेकीङ ख्योकोनला माफ तेरराङ मेतेरो।
बर्त देत्जीन चुक खित्च्ये
16थेमे बर्त देत्जीन ख्योकोनगीचेन ज्येनगी खोपरोङला धर्मतीते मि दुका साला मान खित्स्यीत सिराच्योक खित्कान्ते मिओनगी च्योक माकेत। होथोक्ते मिओनगीचेन खोपरोङ बर्त देता ओताक्वा सिन ज्येनगी छ्या स्येस्यीत सिन छ्येत सेत्ला देत्क्यो। दि बात ङेन। थोक खित्कान्ते मिओनला ज्येनगीचेन मान खिओ। तर परमेश्वरगी तेरच्येते इनामचेन थेबेकी छ्याःङ मेङेदो। 17थोगी ख्योकोनचेन बर्त देत्जीन छ्येत ठु, गोःला मोर्गु कुला ज्येन बेलाला च्योकराङ छ्येत हुरहुर खाला देत। 18दोक खासीन सुङगीङ छ्या मेस्येच्या खाईन बर्त देत्सीनोङ मि मिगी थोङा मुथुप्च्येते ख्योकोन आबा परमेश्वरगीचेन थे बात छ्या स्येला ख्योकोनला इनाम तेरग्यो।
स्वर्गे सम्पत्ति बात
(लूका १२:३३-३४)
19लोक्ला ज्येन बात च्यि सासीन ख्योकोनगी दुरू सम्पत्ति साला माज्यो। दोक्ते सम्पत्तिनी बुईकी सेइओ, चा छ्याक्यो, खिये खिओ थेमे चोरगी कुला सिन्ला तोरला डुइओ। 20दुरू सम्पत्ति सोक्पा साटोला बरू ख्योकोनगी स्वर्गने दाक्पोन मिनला सम्पत्ति सोक्च्येते खि। स्वर्गे सम्पत्तिचेन दुरूते च्योक बुईकी मास्साओ, चा माछ्याओ, खिये खाला मोन्डोओ थेमे चोरगीङ क्वा मुथुबो। 21बात च्यि सासीन ख्योकोनते सम्पत्ति जहाँ दुक, सेमोङ थेरूराङ ओङगो। दुरू ओत्सीन दुरूराङ थेमे स्वर्गने ओत्सीन स्वर्गनेराङ।
नाम्दाकताङ मुन्दाक बात
(लूका ११:३४-३६; १६:१३)
22थेमे मि मिक मि लाईदु बत्ती च्योकराङ ईन। च्यि सासीन मिक लेमु ओत्सीन नाम्दाकला देत्ला ख्योकोनगी जे कामोङ लेमु खिता थुप्क्यो। 23तर मिक लेमु मेत्सीन मुन्दाकलाकामा देत्ला ख्योकोनगी छ्याःङ लेमु खिता मुथुबो। थोगी मिक लेमु मेत्सीन नाम्दाकला मेन्देकी आउदी ज्यीबा लाङच्या मुन्दाकलाकामा देता फाप्ला ख्योकोन खालि मेलेबा मेलेबा कामकामा खित्कान डुइओ।
24योक्पोकी जुन खाम्बादु देत्ला दुक थे खाम्बे धनीकी कोताते बातकामा ङेन्दा फाप्क्यो। ज्येन मालिककी कोताते थेकी ङेन्दा मुथुबो। मालिक ङि ओङसीन थेला खाङ मालिकते मन परे खिका थेकी कोताते ङेन्ला थेलाराङ खुशी जोइओ। ज्येनतेकी कोतातेलाचेन थेकी नामज्योकराङ मेसेदो। योक्पोज्यीगी मालिक ङिला लेमु खिता माथुपा च्योकराङ खाला ख्योकोनगीङ परमेश्वरलाङ सम्पत्तिलाङ माया खिता मुथुबो। परमेश्वरला माने खासीन सम्पत्ति माया मारे खिता फाप्क्यो, सम्पत्ति माया खासीन परमेश्वरला माने खिता मुथुबो।
पीर खिता माफाप्च्येते बात
(लूका १२:२२-३१)
25बात दोक ईन्देकी च्यि साच्ये, च्यि थुङच्ये थेमे च्यि खोन्च्ये सिन ख्योकोन पीर माकेत। च्यि मि जुनी भन्दाङ साप थुङा छ्ये ईनरो? ना जीउ भन्दाङ खोन्च्येतेका छ्ये ईन्दे? 26छ्योज्युङमालाराङ ताला विचार खि। च्यि थेबेकी कहिलेबा खेतीपाती लै खाबातेताङ अन्ने भकारी काङाते ख्योकोनगी थोङा ओत? थोक माक्यासीनोङ स्वर्गने देत्कान्ते ख्योकोन आबा परमेश्वरगी थेबाला साप थुङा बिन्लाराङ दुक। छ्योज्युङमा जाबालानी परमेश्वरगी साप थुङा बिन्ला दुक सासीन ख्योकोनला झन मेतेरोतरो? छ्योज्युङमा भन्दानी परमेश्वर लाईदु ख्योकोन खापान खापान छ्ये ईन याङ। 27थेमे च्यि ख्योकोनगी पीर खाला खेराङ आयु टिक्पीई रीम्बु ओङगोतरो? अहँ, थोकनी बान्दा मेङगो।
28थेमे लोक्ला च्यि खोन्च्ये सिन च्यिला पीर खिते? पाङगी नाङला फोङा ओताते लिली मेन्दोकलाराङ तो। दि मेन्दोकतेबा थोई लेमु दुका। मिकी दुक्पा खाला खोलाक खोन्दाच्योक लेमु ओङाला दि मेन्दोककी छ्याःङ खिता माफाबो। 29थेमे दि बात छ्या ओत? थाङबो सोलोमन गेल्बो थोक छ्युक्पु ओत्कीन आउदी लेमु लेमु खोलाक खोन्जीनोङ होदि मेन्दोकज्यीक छेदोङ लेमु थोङा मेतान। 30थरिङ दोक लेमु खाईन फोङा ओत्सीनोङ ङारो दि मेन्दोक सोताङराङ ङाला काम्ला दाक स्येइओ। थोक खित्च्ये जालानी परमेश्वरगी होदोक लेमु थोङच्या जोला दुक सासीन च्यि ख्योकोनला खोन्च्येते मेतेरोतरो? दाक्पोनला गोच्येते गाङे परमेश्वरगीराङ तेरग्यो सिन ख्योकोनगी पत्ते खाबाते खोइ? 31थोगी च्यि खोन्च्ये, चुक खाला साप थुङा ङेदोङा सिन पीर खिता थोङ। 32परमेश्वरला छ्या मेस्येकान्ते मिओनगीकामा खालि साच्या थुङच्याताङ खोन्च्ये विचारकामा खिन देत्क्यो। ख्योकोनला साप थुङा थेमे खोन्दा गोक्यो सिननी स्वर्गने देत्कान्ते ख्योकोन आबा परमेश्वरला दाक छ्या ओत याङ। 33थोगी ख्योकोनगी पीर खिते साटोला खेराङ सेम पूरो खाला परमेश्वर राज्य छ्य्वापा लै खि। थेमे थेकी साबा साबाच्योक खि। थोक खासीनराङ ख्योकोनला गोच्येते जति गाङे परमेश्वरगी तेरग्यो। 34थोगी ङारो च्यि ओङोङा, सा थुङा ङेदोङाना माङेदोङा सिन थरिङराङ पीर माकेत। च्यिला सासीन ङारो लाईदु गोच्येते ङारोराङ ङेत्क्यो। थरिङला थरिङ बातकामा विचार खासीन ओङगो।
सध्या निवडलेले:
मत्ती 6: JUL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 1992 Wycliffe Bible Translators Inc. All rights reserved.
