मत्ती 4
4
1ओहाङःसैको बाप्तीस्मा त्याक्आक्तीको येसुकायः परमेस्वर्कोः ग्वालामःइ मान्ता याक्गार्सीःमालो बेलाङ्ताङ् आलःती गम्लाङ् दाक्आथै। ओहाङः मुतोक्हाङः सैतान् त तोओ अरुसै ताङ्ह्ओ लान्इ येसुकायः “थ्योन्ह्ती होम्सा खाय्नौया खाय्उलुया” त दाय्ह्ती योसाकायः आलःआथै। 2ओहाङःसैको चालीस् दीन्च्युक्कायः येसुइ दोह्मा जेःमाःत उपाङ् काःती मुआ। ओःनम् दीन् पुत्आक्तीको ओउःपाय् आन योङ्क्राय्ओ खेःतो। 3ओउःत योङ्क्राय्तोक्हाङः ओउः सैतान् लान्पाय् थ्योन्ह्ती योलाङ् वाङ्ती “लौ नाङ् दोङ्सीलेः परमेस्वर्कोः चोःलेःतेः खेःतेःनाः त खेःया इ बाङ्कायः ‘लौ लाङ् थाङ्ती स्याव्अ’ त दाय्ह्ती तोउ दा” त दाय्ह्ती येसुकायः तोथातो 4“खेःल ‘मान्ताइपाय् जेःगा जेःती झुङ्आले स्याक्इली परमेस्वर्इ तोआ कुरा ङ्हाम्ती ह पेआ जीङः दोःती स्याक्नै’ त दाय्ह्ती दाय्ह्ओ परमेस्वर्कोः आखरःहाङः लेखती मुनाः” त दाय्ह्ती येसु त्याङ्आ। 5ओहाङःसैको येसुकायः सैतान्इ यरुसालेम् सहर्ताङ् लात्ती आलःती ओहाङःकोः मन्दीर्कोः च्योःहाङः न्यास्नी गम्आथै। 6ओहाङः गम्आक्तीको “लौ नाङ् दोङ्सीलेः परमेस्वर्कोः चोःलेःतेः खेःतेःनाः त खेःया इसै क्लाःती ल्होक्स। इसै ग्लेःती नाङ् जीक्तेःल दोह् हायःती दाय्ह्सा परमेस्वर्कोः आखरःहाङः ‘ “लौ इकायः पेतो ओम्पायःती योनु दा” त दाय्ह्ती परमेस्वर्इ लयःकोः ल्होक्ओमयःकायः गानाक्ती तोआकान्’ त दाय्ह्तीमा मुनाः फेरीलेः ‘ “लौ इकायःपाय् तोन्ती बाङ्हाङः दोम् क्रुत्मा दोह्मा थुङ्ती जीक्सा ताक्लाम्” त दाय्ह्ती ओउः ल्होक्ओमयःइ नाङ्कायः ओम्पायःतीलेः लात्तेःनाः’ त दाय्ह्तीमा परमेस्वर्कोः आखरःहाङः लेखती मुनाः” त दाय्ह्ती सैतान्इ तोमाआथै। 7“खेःल ‘नाङ्इ लयःकोः परमेस्वर्कोः ल्हुङ्तुक् योसा काम् जाङ्ह्सा स्याव्ल’ त दाय्ह्ओमा लेखती मुनाः” त दाय्ह्ती येसु त्याङ्आ। 8ओहाङःसैको ओउःकायः सैतान्इ आन यास्ओ स्यालुङ्कोः च्योःताङ् लात्ती आलःती ल्हाव्ह्दैबाङ्कोः सबै राजाकोः पेपेओ देस्लम् छ्यानःती 9“लौ ङाकायः बाःती स्यवतेःनाःची त खेःया ङाइ इ सबैलेः बयःनेःनाङ् बा” त दाय्ह्ती फेरीलेः सैतान्इ थ्योन्ह्ती तोथातो 10“लौ आल्अ नाङ् सैतान्पाय्। ‘नाङ्इ परमेस्वर्कायः झुङ्आले बाःती झाह्ती स्यवसा खेःनाः। ओउःकोः काम् ह जाङ्ह्उ दा’ तमा आखरःहाङः लेखती मुनाः” त दाय्ह्ती येसु त्याङ्आ। 11ओहाङःसैको एत त्याङ्आक्ती सैतान् येसुकायः फेती ज्याल्आ। परमेस्वर्कोः ल्होक्ओमयः वाङ्ती येसुकायः स्यास्आथै।
12ओहाङःसैको यात्दीन्हाङः हेरोद् राजाइ बाप्तीस्मा बयःओ युहनाकः ल्हुङ् मल्ह्ती झ्यान्ते ओउःकायः चुम्ती झ्याल्खानहाङः थुनआथै। 13फेरी युहना थुनती मुनाः त तोओ सायःती येसु नासरेत् गाव्सै फेती गालील अन्चल्ताङ् दाह्ती वाङ्ती ओहाङःकोः कफर्नाहुम् त तोओ सहर्हाङः याक्आकाय्। ओउः कफर्नाहुम् त तोओ सहर् गालील त तोओ ताङ्ह्ओ दुम्हान्कोः छेव्हाङः मुओ खेःतो। ओउःपाय् जेबुलुन् नाप्ताली नीस्पुःचाःकोः प्लोमःदाने मोमःदानेकोः देस्हाङः लेःआः। 14ओउःतलेः उय्ह्लेकोः एसायाइ तोआकान् 15“योर्दन् खोलाकोः उःसै द्युम्मालो तीःताङ् आल्ओ ल्याम्हाङः ओहाङःपाय् जेबुलुन् नाप्तालीकोः नीस् देस् मुनाः। ओउः गालील त तोओहाङः इस्राएली खेःमालोलम् याक्ती मुनै। 16ओउःमयःपाय् ङ्हा च्याक्ओमा मान्ता तोङ्ह्मालो देस्हाङःमा याक्ती मुइतो ओउःमयःकःहाङः लोने पेतो थोङ्तो स्याव्ओआः बा” त दाय्ह्ती एसाया उय्ह्ले दाय्ह्ओ कुरा द्याह् ताप्तो स्याव्आ। 17ओहाङःसैको ओउःतोक्हाङःसै येसुइ सबैकायः गानाक्ती तोती “लौ परमेस्वर्कोः राजी दाङ्खेःनाः बा ओउःत झ्यान्ते लःलयःकोः रेव्ओ काम्खे फेती परमेस्वर्कोः पेओ कुरा ङ्हाम्ती जाङ्ह्नु दा” त दाय्ह्ती येसुइ थोल्ह्ती तोओ खेःतो।
18ओहाङःसैको येसु गालीलकोः छेव्हाङः वाह्ती नीस्चाक् ङाः सात्ओ काम् धुःती जाङ्ह्ओ पुःचाः च्यवःआकान् ओउःनीस्पाय् सीमोन् अन्द्रीयस् त मय्ङ्चतो। फेरी येसु वाङ्तोक्हाङः ओउःनीस् पुःचाः तीःहाङः लाङः वार्ओ खेःचतो। 19ओहाङःसै ओउःनीस्कायः च्यवःआक्तीको “लौ नीङ्जी ङाकुस् वाङ्ज। ङाकुस् वाङ्आक्तीको नीङ्जीइ लाङः वार्मामाःत ङाइ तोओ पेओ समचार् वार्ती ङाकःताङ् मान्तालम् वानःतेःनाःजु” त दाय्ह्ती येसुइ तोथाचतो 20ओउःइ तोओ कुरा सायःआक्तीको ओउःनीस् पुःचाःइ लाङः फेती येसुकुस् वाह्आकाच। 21ओहाङःसैको आल्ती जबदी त तोओकोः याकुब् युहना नीस् गोय्चोःचोः आपाकुस् दोङ्गाहाङः लाङः ताक्ओ च्यवःआकान्। ओउःनीस् च्यवःआक्तीको येसुइ गोत्थाचतो 22गोत्तोक्हाङः ओउः नीस् पुःचाःइ दोङ्गाहाङः मुओ आपाकायः फेती ओउःनीस्मा येसुकुस् वाह्आकाय्।
23ओहाङःसैको येसु गालील अन्चल्ताङ् तोमःती यहुदी मान्तालम्कोः थनःओ कीम् कीम्हाङः तोमःती दाह्ती पोक्ती परमेस्वर्कोः राजीकोः पेओ समचार् थोल्ह्ती तोतीमा नाःतो खाल्कोः जीक्ओ मान्तालम्कायः स्याक्ताक्तीमा वाह्ओ खेःतो। 24ओउःत वाह्तोक्हाङः येसुकोः कुरा सीरीया देस्हाङःमा सबै मान्तालम्इ ल्हाक्ती नोःकाय्ती झ्यान्ते ओउःकःताङ् नाःतो जीक्ओलम् वाह्सा खाय्मालोलम् लान्इ ङायःओलम्कायःमा वानःआकानी। 25येसुकःताङ् वानःआक्तीको ओउःइ स्याक्ताक्आथास। ओहाङःसैको नाःतो मान्तालम् यरुसालेम् यहुदीयासैमा गालीलमा दस् सहर्सैमा योर्दन्कोः उःसैमा ओउः सबै देस्लम्सै वाङ्ती येसुकुस् वाह्आकाय्।
सध्या निवडलेले:
मत्ती 4: CDM93
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 1993 Wycliffe Bible Translators Inc., All Rights Reserved.
