Matius 6
6
Nangkambelai pewai
1“Linga komi! Nemo komi mampoingkuka patudu agamami i tingoo tauna bona kana rahilora moto. Apa ane wee, moma komi mamparata tomo lako Tuamami i huruga. 2Etumo, ane mewai komi hangu hangaa mampatulungi tauna, nemo mitutura hi tau ntanina ewa to laibabeira tauna to nabelo wongko i hou-hou pepuea to Yahudi pade i dala-dala, bona tauna mampaunera. Mpuu-mpuu Ku'ulika komi, momami maria to ratarimara lako Alatala, apa laitarimarami peune lako manuhia. 3Naupawee ane mewai komi hangu hangaa, nemo nancani pale kaimi napa to laipopewai pale kanami, 4bona pewaimi ee moma hema mangincani. Tuamami to i huruga to nampahilo napa to laipopewai mpelerumi, mampawaika komi mei tomo.”
Nangkambelai bewa mohambaya
(Luk. 11:2-4)
5“Ane mohambaya komi, nemo mohambaya ewa pohambayara to nabelo wongko. To laipokonora, nohambaya nokangkore i butu hou pepuea to Yahudi pade i popengaa dala to naroa, bona tau-tauna mampahilora. Mpuu-mpuu Ku'ulika komi, momami maria to ratarimara lako Alatala, apa laitarimarami peune lako manuhia. 6Naupawee ane mohambaya komi, pehuamo komi i rara kamarami, wunta womomi pade pohambayamo hi Tuamami to i kaleruana. Ane wee, Tuamami to i huruga to nampahilo komi nohambaya i kaleruana, mampawaika komi mei tomo. 7Ane mohambaya komi, nemo mipomehuli-huli ewa to laibabeira to moma nangincani Alatala. Iulira hira ane madea mati to raulira, hambayara ratarima. 8Aji, nemo mipenau ingkura. Apa Tuamami to i huruga nangincani napa to iparaluumi kapomana laiperapimi hi Hia. 9Ane mohambaya komi, pohambayamo komi iwei,
Tuama kami to i huruga,
rapemabohemi hanga-Mu to nagaha.
10Moparentamo-Ko i dunia halaku Magau,
mawalimi dota-Mu i dunia ewa i huruga.
11Waika kami welau ei pangkoni kami toto kaganana,
12pade ampuni kahalaa kami,
ewa kami mui noampuni tauna to nahala hi kami.
13Pade nemo kami Mupalele rapehori,
naupawee bakahamo kami lako to nadaa.
[Habana Ikomi Magau to nabaraka pade to laipemabohe hanga-Mu, duu kahae-haena. Amin.]#6:13 Rara ayat 13 ei naria to laitulihi rara tanda iwei [ ] habana habagia buku Matius owi to rara baha Yunani moma naria ayat to i rara tanda [ ] ei mai. Naupawee, naria mui habagia buku Matius owi to rara baha Yunani naria laitulihi ayat to i rara tanda [ ] ee mai.
14Apa ane miampuni humawee kahalaa tauna, Tuamami to i huruga mui mampa'ampuni kahalaami. 15Naupawee ane moma komi mampa'ampuni kahalaa tauna, Tuamami to i huruga mui moma mampa'ampuni kahalaami.”
Nangkambelai bewa mopuaha
16“Ane mopuaha komi, nemo komi mamonto ewa tauna to nabelo wongko. Hira nampakamonto lencera bona tau ntanina mampahilo ane nopuahara. Mpuu-mpuu Ku'ulika komi, momami maria to ratarimara lako Alatala, apa laitarimarami peune lako manuhia. 17Naupawee ane mopuaha komi, popinoumo komi pade karabimi wuluami, 18bona moma rancanira tau ntanina ane nopuaha komi. Ane iwee, Tuamami to i huruga to nampahilo napa to laibabei mpelerumi, mampawaika komi mei tomo.”
Nangkambelai motobu gagu
19“Nemo komi motobu gagumi i dunia. Apa gagu i dunia ei nadoli nakoni bubu ba mataigaraa, pade pobolia gagumi ee mai nadoli rabongkarara pade gagumi rapangiora to pangio. 20Naupawee tobumi gagu i huruga to moma mamala nakoni bubu bo mataigaraa, pade moma maria to pangio mobongkara bo mampangio gagumi ee mai. 21Habana, i rima gagumi naria, i hee mui rarami.
22Mata ee mai nahibali ewa poindo i wotomi. Ane mabelo matami, humawotomi mabaa. 23Ane madaa matami, humawotomi malimau. Aji, ane baa to naria hi komi nalimau, nalimau mpuu katuwumi.
24Moma naria haduaa batua to nobago hi rodua maradika. Habana, ane rodua maradikana, hadua'i mei napodaa pade to ntanina napotowe. Hadua'i naturuhi parentana pade to ntanina moma'i napangala. Iwee mui komi, ane laipotowemi gagu i dunia ei, moma mibuku mantuku dota Alatala.”
Nangkambelai kamere rara
(Luk. 12:22-31)
25“Etumo Ku'ulika komi, nemo mamere rarami mampekiri katuwumi, napa mei to mikoni bo to mi'inu, pade nemo mamere rarami mampekiri napa mei to mipowarui wotomi. Apa nobunupi tuwu ee lako pangkoni pade nobunupi woto lako powaru. 26Hilora tonci i langi. Momara nohawu, momara nepae pade momara noboli pae i rara gampiri. Naupawee, laipakoni-Na motora Tuamami to i huruga. Neparauli komi, neliupi pobunumi i tingoo Alatala lako tonci-tonci lauria. 27Hema komi to hante kamere rarana namala notambai kalanga umuruna naupa haeo aga? 28Moma naria bununa ane mamere rarami mampekiri maria warumi ba moma. Hilo motoramo bunga to natuwu i bone lauria. Momara nobago, momara nobalowo, 29naupawee Ku'ulika komi, Magau Salomo naupa nahugi'i, moma'i nowaru ewa karamba bunga-bunga ee mai. 30Ane iwee Alatala nampakaramba bunga-bunga i bone to welau ei natuwu bo naile ratene i rara apu, neparauli komi, natantu ami kana Nawaika komi waru to miparaluu. Nakura gagakona peparahayami! 31Etumo, nemo mamere rara pade mepekune i rara bongo, ‘Napami to kikoni?’ ba ‘Napami to ki'inu?’ pade ‘Napami to kipowaru?’ 32Humaweena ee laipalira tauna to moma nangincani Alatala. Bo kakonona, Tuamami to i huruga nangincani ane komi namparaluu humaweena lauria.
33Aji to koropokona, pehimukuimi bona Alatala moparenta rara katuwumi, pade poingkukami napa to nanoro i tingoo-Na. Ane iweedimi mibabei, humawee kaparaluami ntanina Nawaika moto komi. 34Lauparia, nemo mamere rarami nangkambelai napa to miparaluu maile, habana maile naria moto muihawo kahehaana. Kahehaa to haeo, maganami haeo.”
सध्या निवडलेले:
Matius 6: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
