Matius 22
22
Porapa nangkambelai huha ponikaa
(Luk. 14:15-24)
1Napu ee laipapola-Na mui Yesus nangulika todea hante porapa ntanina, iwei, 2“Poparentaa Alatala ee mai mamala rarapaika ewa ei. Naria hadua magau to nobabei huha ponikaa anana balailo. 3Hia nantudu batua-batuana mangkiora tauna to laioka i huha ponikaa ee mai. Naupawee tauna eera mai momara nadota narata.
4Laitudukina muira batua to ntanina hante peboha, ‘Ulikara tauna to laioka etu mai: Pangkoni laipahadiami. Japi-japiku tuamana bo ewuaku ntanina to narudu laihamalemi, pade humaweena nahadiami. Maimo komi i huha ponikaa ei mai.’ 5Naupawee tau-tauna to laioka ee mai moma itaparira pekio ee mai. Nariara to rau pampara moto, naria muira to rau nouruhi balu-balura moto, 6pade naria muira to nampahoko batua ee mai, laiduahira pade laipatehira. 7Lauparia nahodomi magau ee mai. Laitudunara tantarana rau mampatehira to pepatehi ee mai pade mohuwe ngatara.
8Napu ee iulikanara batuana, ‘Nahadiami huha ponikaa ei mai, naupawee tau-tauna to laioka ee momara nahipato marata, apa moma itaparira peokaku. 9Etumo, koimo komi i dala-dala rara ngata pade butu tauna to mipotomu, okaramo tumai i huha ponikaa ei mai.’ 10Lauparia rauramo batua ee mai nampaoka humawee tauna to laipotomura i dala, belo tauna to nadaa ingkura bo tauna to nabelo ingkura, hampena hou pohuhaa ee mai naponu duu hante to rata.
11Napu ee nehuami magau ee nampotomukara to ratana ee mai. Laihilona naria hadua tauna nampake waru to moma nahipato rapake rau i ponikaa. 12Magau ee mai nampekune'i, ‘Ompi, bewako nehua tumai bo momako nampake waru ewa to rau i ponikaa?’ Naupawee tauna ee mai moma'i nowotu. 13Lauparia magau ee mai nangulikara batuana, ‘Pou pale bo paana pade tenemi rau i kalimauana to nalimau ntoto. I riami potantangia pade kapepaa.’ ”
14Napu ee Yesus nopahudu porapa lauria, iuli-Na, “Apa nadea to laikio, naupawee hodi aga to laipelihi.”
Nangkambelai pobayari paja hi Magau Bohe Roma
(Mrk. 12:13-17; Luk. 20:20-26)
15Napu ee rauramo to Farisi nolibu bona mamalara mopanawu Yesus hante hangaa pepekunea. 16Laitudura ana-ana gurura hante bahangkua dua tauna to nopahamika hi Magau Herodes mepekune hi Yesus iwei, “Guru, laincani kami ane Iko ei to nanoro, pade nanoro-Ko nopatudu nangkambelai dota Alatala. Moma hema to laipokaeka-Mu, apa moma-Ko nampelihi tauna. 17Aji, ulika kami popantarui-Mu, mamaladihawo mobayari paja hi Magau Bohe Roma#22:17 Magau Bohe Roma rara baha Yunanina laiuli ‘Kaisar.’ Tempo ee hia noparenta i Israel pade humangkulili tahi Mediterania. ba momadi?”
18Naupawee laincani-Na Yesus patuju rarara to nadaa ee mai, etu pade iulika-Nara, “Komi to nabelo wongko, napa pade laipehimukuimi mopanawu-'A? 19Pahiloi-'A doi to laipake mobayari paja etu.” Laikenira hampeka doi halaka hi Yesus. 20Lauparia, laipekune-Nara, “Gambara pade hanga hema to laitulihi i rara doi ei mai?”
21Nehonora, “Gambara pade hanga Magau Bohe Roma.”
Yesus nangulikara, “Ane wetu, popewaimi hi Magau Bohe napa to kana mipopewai hi Magau Bohe, pade hi Alatala napa to kana mipopewai hi Alatala.” 22Nangepe lauria, naherara. Napu ee rauramo nampalahi Yesus.
Pepekunea to Saduki nangkambelai katuwu nculi
(Mrk. 12:18-27; Luk. 20:27-40)
23Eo ee mai, narataramo bahangkua dua to Saduki hi Yesus. Pampahara to Saduki, moma naria katuwu nculi tauna to namate. Nepekunera hi Yesus iwei, 24#Ul. 25:5“Guru, Musa nanguli ane hadua balailo mamate pade moma'i noana, ompina kana mampobangkele bangkelena bona maria muli ompina to namate ee mai. 25Naria hi kami to no'ompi pitu dua. To ulumbua nobangkele, napu ee namatemi. Moma'i noana, etu pade bangkelena ee mai laipobangkele tuaina. 26Wee moto mui to karoduana pade katoluna duuna to kapapituna. 27Kahuduana, namate purarapa, namate muimihawo bangkele ee mai. 28Hema mei lako hira to no'ompi papitu ee to mawali balailo bangkele ee mai, ane temponapi katuwu nculi to mate? Apa humaweera nampobangkele'i.”
29Yesus nangulikara, “Nahala pampahami, apa moma komi nengkao Buku to Nagaha bo baraka Alatala! 30Tempo katuwu nculi to mate, hira mei matuwu ewa malaeka i huruga, momaramo moncamoko ba rapoponcamoko. 31Naupawee nangkambelai katuwu nculi to mate, apa poma'i laibahami lolita Alatala to nanguli iwei, 32#Kel. 3:6, 15‘Akumi Alatala Abraham, Alatala Ishak pade Alatala Yakub’? Batuana, naupa Abraham, Ishak pade Yakub nahaeramo namate, batena motora natuwu dohe Alatala. Apa laincanita ane Alatala ee mai moma-'I Alatalara to mate, naupawee Alatalara to natuwu.” 33Nahera mpuura todea to nangepe patudu Yesus lauria.
Parenta to koropokona
(Mrk. 12:28-34; Luk. 10:25-28)
34Pangepera to Farisi ane momaramo natepehono to Saduki laibabei Yesus, nahiromuramo. 35Pade hadua lako hi hira, hadua to nataualu buku Taurat, mingki mopanawu Yesus hante nepekune iwei, 36“Guru, parenta uma to koropokona rara patudu Taurat?”
37 #
Ul. 6:5
Nehono Yesus hi hia, “ ‘Potowemi Pue Alatalamu hante kaponu raramu pade hante humawee tuwumu pade hante humawee pampekirimu.’ 38Etumi parenta to koropokona pade to pamulana. 39#Im. 19:18Pade parenta to karongaana to nahibali hante ee, ‘Potowemi hingka manuhiamu ewa pampotowemu wotomu moto.’ 40Rongaa parenta eemi puu humawee ihi buku Taurat pade buku nabi-nabi.”
Katekaia Yesus hante Magau Daud
(Mrk. 12:35-37; Luk. 20:41-44)
41Bulara to Farisi nahiromu, Yesus nepekune hi hira, iuli-Na, 42“Bewa popantaruimi komi nangkambelai Magau to Pepakahalama to laitipa Alatala? Muli hema-'I?”
Nehonora hi Hia, “Muli Magau Daud.”
43Iuli-Na hi hira, “Ane wee, napa pade Daud nanguli Puena-'I? Apa Daud to naponu hante Inoha to Nagaha nanguli iwei,
44 #
Mzm. 110:1
‘Nololitami Pue Alatala hi Pueku:
Poncunamo-Ko mali pangkana-Ku,
duuna bali-bali-Mu Kupopotingkodu i tingoo-Mu.’
45Aji ane Daud nanguli Magau to Pepakahalama ee mai Puena, bewa mui pade rauli mulina-'I?”
46Moma hema haduaa to namala nampahonoi-'I. Hinungkai eo ee, momami hema to nabia nampali dala mopanawu Yesus hante pepekunea.
सध्या निवडलेले:
Matius 22: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
