Matius 20
20
Porapa nangkambelai to nangkoni gaji i pampa anggur
1“Poparentaa Alatala ee mai nahibali hante hadua tauna to naria pampa anggurna. Hangkabaadipi tauna ee mai raumi nampali tauna to mobago i pampa anggurna ee. 2Nabotu'ipi hante hira to pobago ee mai ane tomo haeo hampeka doi halaka, laitudunaramo rau i pampa anggurna.
3Ba maria tinti hahio hampepulo, rauki mui'i, laihilona naria muira tau ntanina to moma naria bagora noncuna i pasar. 4Iulikanara, ‘Koimo komi mobago i pampa anggurku, kuwaikadamo komi mei tomo to mahipato mitarima.’ Rau mpuuramo i pampa anggurna. 5Ba maria tinti hampulu rongu mpoeo lia pade tinti tolu ngkinuwia, rau mui'imi pade nobabei nahibali hante to pamulana laibabeina.
6Ba maria tinti alima ngkinuwia, nehuwu mui'imi pade naria muiradapa tau ntanina to lairatana moma naria bagora. Iulikanara, ‘Napa pade noncuna i hei moto komi, moma komi nobago haeoa?’
7Nehonora, ‘Momakawo naria tauna to nangkio kami mangkoni gaji.’
Iulikanara, ‘Ane wetu, koimo komi mobago i pampa anggurku.’
8Ngkawengiapi, tumpu pampa ee mai nangulika mandorona, ‘Kiora to pobago etu, pade bayarimi tomora, mopamula lako hira to nehua kahuduana duuna hira to nehua pamulana.’
9Narataramo to nehua nobago tinti alima, pade laitarimara tomora hore-hore hampeka doi halaka. 10Iwee mui to pobago ntanina duuna hira to nehua nobago pamulana. To nobago pamulana ee mai nampaharumaka mantarima tomo to melabipi kadeana, naupawee hore hampeka doi halaka motodi to laitarimara.
11Hangka laitarimara tomora ee mai, nokahururamo hi tumpu pampa ee mai. 12Iulira, ‘Hira to nehua nobago kahuduana ei mai, hajaa motora nobago. Naupawee laipahibalimu motodi gajira hante kami to nobago haeoa pade to namparasai kapane eo.’
13Naupawee tumpu pampa ee mai nampahonoi hadua lako hi hira, ‘Ompi, momako laibagiuku. Apa moma nabotutamo ane tomo haeo hampeka doi halaka? 14Alami bagiamu pade koimoko. To nehua kahuduana eira mai kuwaika nahibali moto kadeana hante to laitarimamu. 15Hema mampatagi'a mampake doiku mantuku dota raraku? Ba nohiridako habana nabelo raraku?’ ”
16Napu ee laipadola-Na mui Yesus nangulikara, “Weemi mei to madupa, tauna to tempo ei laibila mawali tauna to moma rabila. Pade tauna to tempo ei moma laibila mawali tauna to rabila.”
Pangkewo Yesus katolu ngkanina nangkambelai bewa'I mei mamate
(Mrk. 10:32-34; Luk. 18:31-34)
17Tempo Yesus rau i Yerusalem, lentongo dala laikio-Nara hampulu rodua ana guru-Na bona mopatanira momako lako todea, pade iulika-Nara, 18“Hilo, kita ei mai rara pomakoa rau i Yerusalem. I ria mei Ana Manuhia rapopewai hi imam-imam to i matana pade hi hira to nataualu buku Taurat, pade rabotuhira mei bona rahuku mate-'I. 19Napu ee rapopewaira-'I hi tau-tauna to moma Yahudi, bona rapopore-'I, racambu pade rasalib. Naupawee eo katoluna mei rapakatuwu nculi-'I.”
Perapia tina Yakobus pade Yohanes
(Mrk. 10:35-45)
20Lauparia naratami bangkele Zebedeus hi Yesus hante rodua anana, Yakobus pade Yohanes. Bangkele Zebedeus ee mai notingkodu i tingoo Yesus, apa maria to mingki naperapi hi Hia.
21Yesus nanguli, “To tina, napa to mupodota Kubabeikako?”
Nehono'i, “Kuperapi bona anaku to rodua ei mai mamalara mei moncuna moparenta hingkani-ngkani hante Iko i rara poparentaa-Mu. Hadua mali pangkana-Mu pade hadua mali pangkai-Mu.”
22Naupawee Yesus nangulikara ana Zebedeus ee, “Moma incanimi napa to iperapimi. Mipakule mangkolo kahehaa to kana Kukolo?”
Nehonora hi Hia, “Kipakule.”
23Yesus nangulikara, “Mikolo ami mei kahehaa-Ku, naupawee hema mei to moncuna mali pangkana-Ku ba mali pangkai-Ku, moma Aku to mampakatantu. Laipakatantu-Na amimi Alatala Tuama-Ku hemara to moncuna i poncunaa ee.”
24Nangepe lauria, nahodoramo ana guru to hampulu dua hi ana-ana Zebedeus ee mai. 25Naupawee Yesus nangkio purara, pade iuli-Na, “Laincanimi moto ane to poparenta to moma nangincani Alatala noparenta todeara hante hombora. Tauna to naria pangkara noparenta todeara hante hekera. 26Moma iwee ane komi. Hema lako hi komi mingki malangko pangkana, hia ee mai kana mampalayani komi ewa hadua batua. 27Pade hema to mingki mawali to pangkenimi, hia kana mawali ewa hadua batua mopahadia napa to miparaluu. 28Nahibali hante Ana Manuhia narata, moma bona ralayani, naupawee mampalayani pade mampopewai tuwu-Na mawali petolohi hi tauna to nadea.”
Yesus nampakauri rodua to naburo
(Mrk. 10:46-52; Luk. 18:35-43)
29Pehuwura Yesus hante ana-ana guru-Na lako Yerikho, nadea tauna nantuku-'I. 30Naria rodua to naburo noncuna i wiwi dala. Pangepera ane Yesus noliu, nongareramo, “Tuama, muli Magau Daud, potowe kamikawo!” 31Naupawee todea ee mai nantagira, pade nantudura malino.
Molelau pahimukukira laumi nongare, iulira, “Tuama, muli Magau Daud, potowe kamikawo!”
32Nangepera nongare, nentuumi Yesus pade laikio-Nara, iuli-Na, “Napa to laipodotami Kubabeika komi?”
33Nehonora to naburo ee mai, “Pue, to laipodota kami, bona mamala kami menaa.”
34Na'ahi rara Yesus nampahilora. Lauparia laidama-Na matara, pade tempo ee mui namalaramo nenaa. Napu ee rauramo nantuku Yesus.
सध्या निवडलेले:
Matius 20: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
