Apostel isht Anumpa 9
9
1Yʋmohmi ma, Sal ʋt Chitokaka i̱ nan im ai ithana ʋhleha ha̱ i̱ nokowa, micha ʋbi aiena he fiopʋt kohonchi kʋt imoma mʋt, na holitompa isht a̱sha pehlichi im ona tok.
2Micha sinakak puta, Tamaskʋs a̱sha ka, nakni okmá, keyukmʋt ohoyo hokmá nana hosh, ilʋppa chohmi kʋt a̱sha na, ahayuchikmʋt talakchi o̱ Cheluselem a̱ pehlichit ʋla hinla kʋt, yʋmma puta pit holisso ha̱, im ikba hi a̱, im asilhha tok.
3Atuk osh ia hosh a̱ya mʋt, Tamaskʋs pit bili̱ka ona tok; mihma tohwikelit ʋba minti kʋt yʋmmak ash o̱ ashali̱ka tommit a folupli tok.
4Yohmi ma aka ont itula tok; micha anumpa hʋt, Sal, Sal, nanta katihmi ho̱ is sʋlbʋshali cho? im ahanchi na haklo tok.
5Mihmʋt, Chitokaka ma! kʋta chia hoh cho? achi tok. Mihma Chitokaka ashot, Ʋno akosh, Chisʋs ish ilbʋshahanli ka sia mak oke, Na halupa puta asʋnalinchit ish haha̱hli kʋt chi̱ palʋmmi hoke; achi tok.
6Yohmi ma yʋmmak ashot nukhlakanchʋt wʋnihinchi mʋt, Chitokaka ma! nanta hak o̱ katiohmi la hi a̱, si sʋm ahni cho? achi tok. Mihma Chitokaka yʋt, Wakaya cha, iʋt tʋmaha ha̱ ont ish chukowakmak o̱, nana ish kaniohma chi̱ kʋt, chim annoa chi̱ hoke; im achi tok.
7Yohmi ma hatak apehʋt a̱ya tuk ashot anumpa kʋne haklo kia, hatak nana kia ik peso mʋt, ik anumpolo hosh hieli tok.
8Atuk o̱, Sal ʋt aka itolʋt tani tok: micha nishkin ʋt fatuma mʋt, hatak nana kia ik peso ki tok. Yohmi ma ibbak a̱ halʋlli cha ishtiʋt, Tamaskʋs a̱ okla isht chukowa tok.
9Yohmi ma ik hoponayo mʋt, anonti ik impo, nan ik ishko aienʋt ahanta na nitak tuchina tok.
10Yʋmohmi ma hatak nan ithʋna achʋfa, Ananaiʋs hohchifo kʋt Tamaskʋs a̱ anta tuk o̱: yʋmmak ash o̱ holhpokuna ka, Chitokaka yʋt, Ananaiʋs, im achi tok; mihma, Yak anta lishke, Chitokaka ma! achi tok.
11Mihma, Wakayʋt iʋt hina Apissa hohchifo ka ish ona cha, Chutʋs in chuka ya̱, Tasʋs hatak Sal hohchifo ka, ish aponaklashke; yʋmmak ash osh ʋba pit anumpohonli hoka.
12Micha holhpokuna kʋt, hatak Ananaiʋs hohchifo hosh ant chukowa cha hopo̱koya chi̱ ka, ibbak a̱ ant isht um bitepa na, pisa tuk oke: Chitokaka yʋt im achi tok.
13Yohmi ma Ananaiʋs ashot afalaminchi mʋt, Chitokaka ma! hatak ilʋppʋt, chi̱ holitopa ʋhleha Cheluselem aiasha ka kaniohmit nan isht okpʋni ka, laua ho̱ a haklo li chatuk.
14Micha chi̱ hohchifo pit hochifo ʋhleha mominchit takcha chi̱ ka, na holitompa isht a̱sha pehlichi ʋhleha yʋt im apesa tuk o̱, ilʋppa anta hoke: achi tok.
15Yohmi kia Chitokaka ash ot, Iá, nan isht ʋm ʋtta holitopa, sa hohchifo ha̱ shoyulit, mi̱ko ʋhleha micha okla nan ik ithano puta, micha Islael ushi ʋhleha aiena itikba ya̱ hikia hi oka.
16Micha ʋno sa hohchifo pulla ka, na palʋmmi hochito kaniohmi kia isht ilbʋsha chi̱ ka, im anoli la chi̱ hoka; im achi tok.
17Mihma Ananaiʋs ash ot, iʋt aboha ya̱ ont chukowa tok; micha ibbak a̱ isht umbitepa mʋt, Itibapishi li Sal ma! ish minti ma, hina takla ya̱ a chi̱ haiaka tuk, Chitokaka Chisʋs ʋt chishno ʋt ish hopo̱koyo cha, Shilombish Holitopa yʋt chi anukfohka chi̱ ho̱, auet sa chʋffichi tuk oke; achi tok.
18Yohmi ma chekosi makinli ho̱, na hakhlobish atuk o̱ chohmit nishkin a̱ mokohlit aka itula tok; yohmi ma ashali̱ka hopo̱koyo mʋt, wakaya cha baptismo tok.
19Micha nana impʋt in taha mʋt hlampko tok; yohmi mʋt Sal ʋt nan‐ithʋna ʋhleha Tamaskʋs ma̱ya ka awant anta na nitak kanohmi tok.
20Micha in chekosi makinli ho̱, Klaist a̱ yʋmmʋt Chihowa Ushi atuk a̱, sinakak puta ka, isht ai anumpohonli tok.
21Yohmi ma okla haklo kʋt momʋt anukhlakancha mʋt, Ilʋppak osh na hohchifo ilʋppa pit hochifot Cheluselem ai asha tuk a̱ ilbʋshahanli cha, ilʋppa a̱ya kʋt, yʋmmʋt talakchi yo̱, na holitompa isht a̱sha pehlichi ʋhleha, isht im ona chi̱ mak atuk keyu̱? achi tok.
22Yohmi kia Sal ʋto hlampko kʋt isht i̱ shahlit ishtia, yohmi mʋt atokowʋt, ilʋppak osh Klaist fehna mak oke; aha̱ya mʋt, Chu okla Tamaskʋs a̱sha tuk a imaiyʋchi tok.
23Yʋmohmi kash o̱ nitak kanohmi kʋt taha ma, Chu okla hʋt, yʋmma ʋba chi̱ kʋt isht anumpulit ma̱ya tok.
24Yohmi kia okla nan ahnit ma̱ya ka, Sal ʋt akostininchi tok; mihma ʋba chi̱ kʋt nitak, micha ninak moyuma holihta okhissa puta ka okla atoni tok.
25Yohmi ma nan ithʋna ʋhleha hʋt nitak o̱ ishit, kishi fohkit tʋli holihta lapalint aka pit bohli tok.
26Yʋmohmi na Sal ʋt Cheluselem a̱ ʋla mʋt, nan ithʋna ʋhleha ha̱ ibafohka bʋnna tok. Yohmi kia momʋt okla i̱ nukshopa tok; micha yʋmmʋt nan ithʋna yo̱ ik im ahobo ki tok.
27Yohmi kia Banabas ato eshi cha, ilauelit ʋbanumpeshi ʋhleha ya̱ isht im ʋla tok; micha hina takla ya̱ kaniohmit Chitokaka ya̱ pisa tok, yohmi na im anumpuli tok, micha kaniohmit nukwa̱ya iksho hosh, Chisʋs hohchifo ha̱ Tamaskʋs a̱ isht ai anumpohonli tok aiena ka, im anoli tok.
28Yohmi ma Cheluselem a̱ a̱sht kocha, micha ant abeha aiena ka ta̱kla ahanta tok.
29Micha nukwa̱ya iksho hosh, Chitokaka Chisʋs hohchifo ha̱ isht anumpohonli cha, Klik okla ma itim anumpohonli tok; yohmi kia ʋbi bʋnnʋt okla aiasha tok.
30Yohmi na itibapishi ʋhleha yʋt akostininchi mʋt, ilauelit Seselia isht ʋla cha, Tasʋs a̱ pit chʋffichi tok.
31Yohmi na Chutia yakni ʋt moyuma, micha Kalili, micha Samelia aiena ka, ʋbanumpuli iksa puta kʋt nuktanla mʋt isht i̱ shahlit ia tok; mihma Chitokaka i̱ nukshoyupa, micha Shilombish Holitopa ya̱ isht ilai yukpa aienʋt itʋnowa kʋt, lauʋt isht i̱ shaiyahli tok oke.
32Yakohmi tok; Pita yʋt mominchit hlopullit a̱ya mʋt, ʋbanumpuli ʋhleha Litti ai asha tuk ash kia, im ʋla tok.
33Mihmʋt yʋmma hatak achʋfa, Enias hohchifo kʋt palsi isht abeka hosh topa itoyula na afʋmmi untuchina tuk o̱, ont pisa tok.
34Micha Pita yashot, Enias ma! Chisʋs Klaist ʋt chi hlakofichishke. Tani cha, chishno inlit chin topa ha patalí, im achi tok. Mihma chekosi tani tok oke.
35Yohmi ma Litti, micha Salon aiena a̱sha tuk ʋt momʋt yʋmma pisa mʋt, filemʋt Chitokaka ya̱ im ai ona tok.
36Yohmi ma nan ithʋna achʋfa Tabihla hohchifo, yʋmmʋt toshowakmʋt Takʋs achi ho̱, Chappa ya̱ anta tok: ohoyo ilʋppʋt nan achukma a yʋmohmi, micha na habenʋchi aiena biekʋt ahanta tok.
37Atuk o̱ nitak yʋmma foka ma yakohmi tok; yʋmmʋt abeka cha illi tok; yohmi ma yʋmmak ash okla achifʋt tahli mʋt, ʋba potʋlhpo ya̱ boyuhli tok.
38Mihmʋt Litti yʋt Chappa ya̱ pit bili̱ka hatuk, micha nan ithʋna ʋhleha hʋt, Pita yʋt yʋmma anta ka, okla ha̱klo tuk osh anukwa̱ya im ʋla hinla ka, pit im ahnit hatak tuklo ka pit tihleli tok.
39Atuk o̱, Pita yash ot wakaya cha awant ia tok. Atuk osh ʋla ma, ilauelit ʋba potʋlhpo ya̱ okla ishit chukowa tok; mihma ohoyo ʋlhtakla ʋhleha yʋt momʋt apehʋt hiohma̱yʋt yaiya mʋt, nafohka, micha anchi chohmi, Takʋs ʋt awant anta moma mʋt ikbi tok a̱, haiakahanchi tok.
40Yohmi kia Pita yʋt mominchit kocha weli cha, hʋchukbihlepʋt hikia mʋt, ʋba pit anumpuli tok; mihmʋt haknip ai ittola ka pit filema mʋt, Tabihla, taní, achi tok; yohmi ma nishkin a̱ fatummi cha Pita ya̱ pisa mʋt, tanit binili tok.
41Mihma ibbak pit ima cha wakayʋchi tok. Micha ʋba pit anumpuli ʋhleha, micha ohoyo ʋlhtakla puta aiena kash hoyo cha, okcha̱ya ho̱ ima tok.
42Yohmi ma Chappa okla hʋt momʋt yʋmma akostininchi tok; yohmi mʋt la̱wʋt Chitokaka ya̱ i̱ yimmi tok.
43Mihma yakohmi tok; Saimon wak hakshup hummʋchi ya̱ awant Chappa ya̱ ahanta na nitak kanohmi tok oke.
Kanilis ʋt Pita ya̱ pit hoyo, 1, 34 Pita yʋt ʋbanumpa isht anumpuli. Shilombish Holitopa yʋt haponaklo ʋhlcha ha̱ onʋtoyula.
सध्या निवडलेले:
Apostel isht Anumpa 9: CHH
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Published by the American Bible Society 1848-1886, reprinted 1913
