Fúcihum 14
14
Aburam napagen Loot
1No unu baje gúyiih goono gubaagiir gammee : Amurafel hara mof mara Sineyaar, Ariyok hara Ellasaar, Kedoor-Lawomeer hara Elam, bugo nꞌTidal hara Goyim. 2Bugo guyihoulo mee bu gatiigen gúyiih goono futok gammee : Bera hara ésuk yara Sodom, Birisa hara Gomoor, Sinab hara Adima, Semebeer hara Seboyim bugo nꞌáyiih aahu hara Bela (to may nguroge mee Sowaar). 3Gúyiih gaagu gammee futok nguhomen buganiil, ngujow gulako bo nꞌgásilimb gaagu gara Sidiim (jaat fal fara Ñulooro fubobot go.) 4Símit guñen nꞌsíruba bugo nesoŋ Kedoor-Lawomeer. Emít yakaan mee guñen nꞌsífaajiir, gusoŋuloot.
5Tíiŋ émit yakaan mee guñen nꞌsibaagiir, Kedoor-Lawomeer bugo nꞌgupaalool gúyiih gakaan mee fúpaalum, ngutiigen ulahooriil gucee. Nguheek : erefayiit gacin mee Asetarot-Karinayim, esuusiit gacin mee Ham, emiit gacin mee Sawe-Kiriatayim 6nꞌehooriit gacin mee nꞌsimontaañ saasu sara Seyiir. Guheekiil, nguteooriil jaram gútiiŋ El-Paran cik bo nꞌerampaasa yaayu. 7Nan guteooriil mee gufaak, ngúbaañul bu En-Misepat (to may nguroge mee Kades), nguyiis sísuk saasu sara mof maamu peepe mara emalekiit yaayu nꞌemooriit gacin mee Hasason-Tamaar.
8Ñeer gúyiih gammee futok bugara : Sodom, Gomoor, Adima, Seboyim son Bela (yommee Sowaar), ngúpurenul utiigaiil guyihen nꞌgásilimb gara Sidiim bu gatiigen 9Kedoor-Lawomeer áyiih hara Elam, Tidal hara Goyim, Amurafel hara Sineyaar bugo nꞌAriyok hara Ellasaar. Gúyiih gammee futok bu nꞌgúyiih gubaagiir. 10Tooge sikoloŋ sara gakap gañuget ngutipanet, simemmeeŋ dó nꞌgásilimb gaagu gara Sidiim. Nan gúyiih bugara Sodom nꞌGomoor gommee netey, nguloh dó nꞌsikoloŋ saasu. Gapak mee ngutey bu nꞌemontaañ ecee. 11Gayiis mee Sodom nꞌGomoor nguteb fubajiil son múcahoaayiil peepe. 12Ngujok Loot hacineen mee Sodom ammee aleeh atii Aburam, ngujow son fubajool ró.
13Aceeiil hapagulo mee nꞌfutiik faafu atey mee agaan Aburam ammee áhebura aahu, bo ban acin mee nꞌununuk wáamak waawu wara Mamure, amooriit aahu. Mamure bugo nꞌgutiool Esekol nꞌAneer, bapaalaayiil nꞌAburam mara búriinoor nꞌfutiik. 14Nan Aburam ajam mee mara Loot gujogoojok, nátiiŋ gahomen dó mꞌbuganool utiiga siceme sífaajiir nꞌguñen gaat nꞌgúfaajiir (318) min awand gúyiih gammee gubaagiir káŋ bu nꞌésuk yara Daan. 15Nafanjen gayooŋool ngutiigen ulahooriil nu fuk, nguheekiil nguteooriil káŋ bu Hoba yabaañ mee nꞌgañen gamay gara Damaas. 16Ñeer Aburam nátebul fubajiil peepe. Nabaañenúl may Loot, aleeh atiool, son fubajool, nꞌukoña, mꞌbugaagu gajogi mee.
Melikisedek násoonien Aburam
17Nan Aburam aheekulo mee Kedoor-lawomeer bugo nꞌgupaalool gúyiih, náahul. Ayíih hara Sodom nápurul ngurehoor nꞌgásilimb gara Sawe, gurok go Gásilimb Ayíih. 18Melikisedek áyiih hara Salem ban nakaan ásimena hara Atúuha hareg mee nárookene, náŋarul fúmbuur son bíiñ. 19Afaak násoonien Aburam, narok : «
Atúuha hareg mee nárookene, hátuut mee émit nꞌetaam, úsoonien Aburam.
20Usalaal Atúuha hareg mee nárookene, hakaani mee nuheek ulahoori. »
Aburam nasenool éjako yara wan abajulo mee nꞌfutiik faafu.
21Ayíih hara Sodom narok Aburam : « Usenom buganom, nuŋar fubaj faafu. » 22Aburam narogool : « Nitebe gañenom bu nꞌAcehériit mee, Atúuha hareg mee nárookene, hátuut mee émit nꞌetaam : 23Nikali mat iŋar wanoowan wiiya : let galaam, let fundaap fara ekok gasamata, mo mat újuh urok aw ubenene fubajom. 24Mat iŋar wanoowan bu nꞌínje. Wan buganom gúcaho bo mee utootook. Bare gupaalom Aneer, Esekol, bugo mꞌMamure, mbil guyab gaŋariil. »
सध्या निवडलेले:
Fúcihum 14: gsl
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 (Active), Wycliffe Bible Translators, Inc. All rights reserved.