Pin'ilʋg 31
31
Jakob nɛ o nidib la lɛbi kul la yɛla
1Di da kena ka Jakob wʋm ye Laban biribis la yɛt ye, “Jakob zu nɛ ti saam bʋn wʋsa, o kpan'am la wʋsa da anɛ ti saam din.” 2Ka Jakob nyɛ ka Laban bɛllim zaŋi ken o san'an pʋ lɛn nwɛnɛ lin da an si'em la. 3Ka Zugsɔb yɛl Jakob ye, “Lɛmmi fʋ saam teŋin nɛ fʋ nidibin, ka m na bɛ nɛf.” 4Ka Jakob tʋm buol Rakɛl nɛ Lea ye ba kem o san'an mɔɔgin zin'ikanɛ ka o bʋnkɔnbid la bɛ la. 5Ka o yɛli ba ye, “M nyɛ ka ya saam bɛllim zaŋi ken mam san'an pʋ lɛn nwɛnɛ lin da an si'em, amaa m saam Wina'am la bɛ nɛ mam. 6Ya mi' man tʋm nɛ m paŋ si'em tisi ya saam la. 7Amaa ya saam zam mam hali ka tiaki m yɔɔd nɔɔr piiga. Amaa Wina'am pʋ kɛ ka o san'am mam. 8O ya'a ye, ‘Pɛpʋpɔnra la na anɛ fʋ bʋn,’ ba wʋsa da du'adi pɛpʋpɔnra, ka o mɛ ya'a da ye, ‘Pɛlasalasa la na anɛ fʋ bʋn,’ ba wʋsa du'adi lasa-lasa. 9Ala ka Wina'am nɔki ya saam bʋnkɔnbid la tis mam. 10Kɔnbid la dʋʋb saŋa ka m da zaansim nyɛ ka bʋraad banɛ dʋt bʋnya'as la da anɛ bʋmpʋpɔnra nɛ lasa-lasa. 11Ka Wina'am maliak buolim zaansʋŋin la ye, ‘Jakob!’ Ka m siak ye, ‘Naa, manɛ nwa'!’ 12Ka o ye, ‘Gɔsima, bʋraad banɛ dʋt la wʋsa anɛ pʋpɔnra, nɛ lasa-lasa. Man nyɛ Laban n maannif si'em la zug ka m niŋ ala. 13Manɛ an Betel teŋin Wina'am la, zin'ikanɛ ka fʋ da nɔk kugiri ba'a zi'el ka bu'oe malʋŋ kpaam niŋ ka pɔ nɔɔri tisim la. Nannanna basim teŋ kaŋa ka lɛbi fʋ nidib teŋin.’” 14Ka Rakɛl nɛ Lea lɛbis ye, “Tinam on kʋ paam si'el si'eli ti saam yinnɛɛ? 15Ayei! O pʋ gɔs ka tinam anɛ saammaa? O pʋ kuosi ti nɛ ka di'e dinɛ ka ba yɔɔ ti yɛla la dii naae? 16Sida arezak kanɛ ka Wina'am nɔki yii ti saam san'an la anɛ tinam nɛ ti biis din. Dinzugɔ tʋm dinɛ wʋsa ka Wina'am yɛlif.” 17Ka Jakob duoe nɔk o pu'ab la nɛ o biis la ban'al yʋgʋma. 18Ka kad bʋnkɔnbid la galis tuon, nɛ la'abanɛ ka o paam Padanaram teŋin la lɛbid Keenan, o saam Isaak san'an. 19Laban n, da gaad ye o kies o pɛ'ɛs kɔnbid la, ka Rakɛl zuu o saam Laban yir wina. 20Ka Jakob mɛ da pan'as Laban, onɛ an Aram nid la, ka su'a zɔ ka pʋ yɛl o si'ela.
21Jakob da nɔk on mɔr si'el wʋsa n zɔɔ lɔ'ɔŋ Efiritis kɔldaug la kennɛ kpa'ad Gilead linɛ an zuoya teŋ la. 22Daba atan' daar ka ba nyaan yɛl Laban ye Jakob zɔya. 23Ka o duoe la'as o ba'abiis ka ba kad Jakob bugiri keŋ daba ayɔpɔi ka paae o Gilead linɛ an zuoya teŋin la. 24Ka Laban onɛ an Aram nid la yʋ'ʋn da nyɛ zaansʋŋʋn yʋ'ʋŋ ka Wina'am yɛl o ye, “Gu'usimi fʋ mɛŋ! Mid ka fʋ pian' linɛ an sʋm bɛɛ bɛ'ɛdi tis Jakob!”
25Ka Laban yʋ'ʋn keŋ paae Jakob san'an. Ka Jakob ti' o sʋga Gilead zuoya teŋin, ka Laban nɛ o nidib la mɛ paae na ti' ba sʋga anina mɛn. 26Ka Laban yɛl Jakob ye, “Bɔɔ la ka fʋ tʋm? Fʋ pan'asimi mɔri m pu'ayuos la zɔ wʋʋ tanpin ka ba gban'e ba nɛ. 27Bɔ ka fʋ pan'asim ka su'a zɔ? Bɔɔ maal ka fʋ pʋ yɛlim ka m kɛ ka fʋ keŋ nɛ sumalisim, nɛ yʋʋma, ka siyada nwɛ'ɛd ka wiis piebida? 28Fʋ pʋ kɛ ka m kaanbi tisim yaas nɛ m pu'ayuos la ka kɛɛsi ba sʋ'ʋŋa. Fʋ tʋmnɛ yalim tʋʋma! 29M mɔr suori na tun'e san'amif, amaa yʋ'ʋŋin ka fʋ saam Wina'am la sa yɛlim ye, ‘Gu'usim ka da pian' bɛ'ɛd bɛɛ sʋm tis Jakob la.’ 30Ya'a an sida, m mi' ye fʋ bɔɔd nɛ fʋ sʋʋnr wʋsa ye fʋ kuli fʋ saam yir. Ka bɔzug kimm ka fʋ zuu m wina?”
31Ka Jakob lɛbis Laban ye, “Dabiem zug ka m zɔ, bɔzugɔ m tɛn'ɛs ye fʋ na faaɛn fʋ pu'ayuos la nɛ paŋ. 32Amaa fʋ ya'a nyɛ ka sɔ' mɔri fʋ wina la, o sɔb na kpi! Vɛɛnsimi ti, ti du'adib la wʋsa nifin ka gɔs ye fʋ si'el bɛɛ m san'anɛɛ. Fʋ ya'a nyɛ si'el fʋn nɔkim.” Jakob da nam pʋ baŋ ye Rakɛl zu wina la.
33Ka Laban kpɛn' Jakob dɔɔgin la, nɛ Lea dɔɔgin, nɛ ba tʋmtʋm pu'ab dɔɔdin la ka pʋ nyɛɛ. Ka o gaadi kpɛn' Rakɛl dɔɔgin la mɛn. 34Li saŋa ka Rakɛl pʋn nɔk wina la niŋ o yʋgʋm ga'arin ka zin' li zug, ka Laban iee zin'ig wʋsa dɔɔg la pʋʋgin ka pʋ nyɛ si'ela. 35Ka Rakɛl yɛl o saam ye, “M ba', da kɛ ka fʋ sʋʋnr duoe man zin' fʋ tuon la zugɔ, ka m kʋ nyaŋi duoe bɔzugɔ m paami m pier.” Ka Laban iee-iee dɔɔgin la wʋsa ka pʋ nyɛ wina la.
36Ka Jakob sʋʋnr pɛlig ka o tans Laban ka bu'os o ye, “Taal bɔ kimm ka m tʋm? Bɛɛ tʋʋmbɛ'ɛd bɔ ka m tʋm ka fʋ kad mam paae kpɛla na? 37Nannanna fʋn gɔsi m la'adin la wʋsa la, fʋ lauk bɔ ka fʋ nyɛ? Fʋ ya'a nyɛ lauk si'a, fʋn mɔri li na digili fʋ nidib nɛ mam nidib la tuon ka ba tisi ti babayi' la onɛ mɔr bʋʋd! 38Yʋma pisi nwa' ka m bɛɛ fʋ san'an; fʋ pɛ'og bɛɛ bʋʋg nan mi' vɛnbis bɛɛ m nan mi' gban'e fʋ pɛraugʋ kʋʋ ɔnbɛ? 39M nam mɔr ni'imi kɛɛn fʋ san'an na ye kɔnbid la yinne ka bʋnkɔnbbɛ'og gban'e. Hali baa li ya'a niŋ ala, m gban'adnɛ m mɛŋ pɛ'ogʋ yɔɔ li sam. Ka ba ya'a zu kɔnbʋg yʋ'ʋŋ bɛɛ nintaŋ fʋ yɛt ye m yɔɔmi li sam. 40M bɛllim da an si'em la, ka nintaŋ nwɛ'ɛdim ka waad kʋʋdim ka gbɛɛm yii m nini ni. 41M namis nɛ anwana yʋma pisi la wʋsa fʋ yin. M da tʋm yʋma pii nɛ anaasi fʋ pu'ayuos ayi' la yɛla, ka tʋm yʋma ayuobʋ ka di'e kɔnbid la, ka fʋ tiak mam yɔɔd nɔɔr piiga. 42M yaanam Wina'am onɛ an Abraham Wina'am nɛ Isaak Wina'am ya'a ka'anɛ m san'anɛ, bi'esʋg kae ye fʋ naan kadin mam ka m keŋ nɛ nu'uzaalisɛ. Amaa Zugsɔb la nyɛ m namisʋg la zug, nɛ man tʋm nimmua siem la, din ka o sa zɛrigif yʋ'ʋŋin man zug la.”
43Laban lɛbis o ye, “Pu'ab la anɛ mam pu'ayuos, ba biis la mɛ anɛ man din, ka bʋnkɔnbid la anɛ man din mɛn. Fʋn nyɛt si'el la wʋsa anɛ mam bʋn. La'an nɛ wala, m na lɛn nyaŋi niŋ bɔ nɛ m pu'ayuos nwa' nɛ ba biis banɛ ka ba du'a la? 44Kɛl ka mam nɛ fʋ maal nɔnaar, ka li an kasɛt man nɛ fʋ teŋsʋk.” 45Ka Jakob nɔk kugiri ba'a zi'el sappi ye li an kasɛt kugir, 46ka yɛl o nidib la ye, “La'asimi kuga na!” Ka ba la'as kuga dʋ'ʋs dʋʋr. Ka ba wʋsa la'as taaba kuga la baba di diib. 47Laban da pʋd o li yʋ'ʋr ye Jegar Sahaduta,#31:47 Li gbin Aram buudi pian'adin anɛ, ‘Kasɛt Dʋʋr’. ka Jakob mɛ buoli li o mɛŋ pian'adin ye Galeed. 48Laban da yɛl ye, “Dʋʋr kaŋa anɛ kasɛt mam nɛ fʋn sʋʋgin.” Linzug ka ba da buon zin'ig la ye Galeed. 49Li yʋ'ʋr yinne mɛ an Misipa,#31:49 Li gbin Hibiru pian'adin anɛ gɔsig zin'ig. bɔzugɔ o yɛl ye, “Zugsɔb la na gɔs man nɛ fʋ ti wɛligir nwa' pʋʋgin.” 50Laban da lɛn yɛl ye, “Fʋ ya'a pʋ maali m biis la sʋ'ʋŋa, bɛɛ fʋ tɔɔmnɛ di pu'a sieba, la'an nɛ man ka' anina la, baŋim ye Wina'am anɛ kasɛt man nɛ fʋ sʋʋgin.” 51Laban mɛ daa yɛl Jakob ye, “Kuga dʋʋr la nɛ tiɛnr kugir kanɛ ka fʋ ba'a zi'el sappi man nɛ fʋn sʋʋgin la nwa'. 52Kuga dʋʋr la nɛ tiɛnr kugir nwa' anɛ kasɛti pa'an ye mam kʋ lɔ'ɔŋi kɛɛn fʋ san'an na daami fɔ, ka fʋ mɛ kʋ lɔ'ɔŋi li kɛn mam san'an na daami ma. 53Onɛ an Abraham Wina'am nɛ Nahor Wina'am, nɛ ba yaanam Wina'am la, na pa'al onɛ mɔr bʋʋd man nɛ fʋn sʋʋgin.” Ka Jakob mɛ pɔɔ o saam Isaak yʋ'ʋr zug ka siak nɔzi'elʋg la. 54O da maal maan zuoya teŋin la ka buol o nidib ka ba di. Ba da dii naae ka gbɛɛn anina.
55Ka di yim bɛogʋn asuba ka Laban kuak o yaas nɛ o pu'ayuos la pʋ'ʋsi ba sʋ'ʋŋa ka kaanb, kaanb sʋŋʋ tisi ba ka lɛbi kul.
सध्या निवडलेले:
Pin'ilʋg 31: kus_gh
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Ghana Institute of Linguistics, Literacy and Bible Translation