Mateo 2

Siupapo i'nio 'yijejne'n tal 'niji taj'le ni kilie' iyoyisijyin'ni pa yi'i pa kia'le

1Jesús yijijyi'n japa isi' jle' iyo'ate Belén, yiji japa ajnat Judea pakayi ti yi'i ti iyo anechiyasa' pa Herodes.#2.1 Herodes siupa jlamt'iyijipe (2.1) Siupapo i'nio 'yijejne'n ini'neyasane niwa katese'l pi iyo, tal 'niji siunie taj'le na kilie', ti yiyeyisi japa Jerusalén, 2ti 'yasanisi'ni pa kia'le, ti iyo'ate:

—¿Tepa yiji siupa Judíojos jika anechiyas, ti k'iejli yiji'n? A'wenajk'i jlaja jika kates ti 'yakaja ti k'iejli 'nes pijia'm, jak je iyoyiji ti anamaja'ni, ti awoki ka tijwilaja ti jayunitie.

3Herodes wuj ti iyoyi jijliak'aliye, ti ipi'yayet'ipi, siu'neje papo Jerusalén jlele kia'iyojliyi wikie'eyi ti jijliak'ali po'. 4Tanat'iyisipi papo pa'yijis jika anechiyasas, siu'neje papo jiwos pet pa Moisés jika'neyasajnaye. I'yasin'ne ti iyo'ate:

—¿Tepa t'e jane'yijyine pak siupa Injwajieti ti Sinia' jijliujwanik?

5'Yina isiujlisie'ne ti iyoyits'i 'ate:

—Janejiyi'n Belenne, siojopa yiji jana Judea. Iyoyi niwa jlamtis t'ipi papo Sinia' jijwejlanawos, ti yi'i ni ji'wet ti iyo'ate:

6“A'am Belén, jlejyi jana Judá,

kiak jiwo pit je ka insamjlie

ti jlejyi'i niwak siuniwa isi'il ti wus yi'i janak ajnat.

Kajeyepa ti nak jantaj'le nak anechiyas ti jan'yena napo 'yaka kia'lis Israel.”#Miq 5.2

7Ti Herodes 'yijenayi kiwaka, sekyi'i i'nialkit'ne papoka 'yijejne'n, ti i'yase'n ti iyone'ate:

—¿Tepayi ti ji'wenayi japak kates?

Ijwilisiam'ne, 8sekyi'i ijliuyet'i'nijpe ti iyone'ate:

—Maye'ni joye Belenne, 'yasanayi'ni siupa yi'i pa kia'le. Siuti ja'wena, ka apilieyek'inie'e ka yikiena'a pet ti kiak jayo jayunit.

9-10Ipi'ya wek siupa tiwonaja, sekyi'i ti yamat'i'nijpe. Siojopa kates ti i'winist'iyipi ti 'yakaja, japak'ne siojopa iniajne'n k'iye. Wuj ti inkase'n. Paj ti yiyet'iyipi pa yi'i pa kia'le japak kates 'yina sek yajapa'aja'n ape'e.

11'Yuyeyisi, i'winis'ne pa kia'le siu'neje japa jlet, sekyi'i ti t'akosjlete'l itiyeyisijin kiajwe ti iyunitis. 'Yajlinitiek'i ape'e puwa jikijmatis, iyoyeyi 'wajietisa' puwa wikinie maja ti 'najli siu'neje pa incienso, siu'neje pa mirra.

12Paj ti jijwejlik tiwenajat'ijiampe, ti iyo'ate, “Siuti ja apilie'ni, ká anoyeyinie'e ja Herodes.” Ijiatjliyi, 'wena iniuyisiapi'ni ti yama'ni, ti yapilie'ni.

José siu'neje japa María i'yiltajnanesi pa jlas japa Egipto

13Jlampa yama'ni papok siupapo i'nio 'yijejne'n, Saka'niona jijliujwanik poli jlele inikajanitia'm pa José, ti yiniji pa jijwejlik ti imia'a, iyonat'iyijpe 'ate:

—Neppijia'm, majna'a mayi ni kia'le siu'neje jana jlet, ka 'yiltanayi jana Egipto. Sek we'e'nina'a ijiatjliyijna'a jla'am ka poyetana'a paka ijwi'lase'm. Herodes janwojyin'ni ni kia'le, ti iyo ka ila'an.

14José t'ojwe'n jiwekie'e, sek tajlat'i'yipe ti yame pa kia'le siu'neje japa jlet, pak siupa ajnaj, ti ijioyis Egíptojo. 15Sek je tajlits'i paj ti 'yalat'ipi pa Herodes. Tepa jawo ka kiak je iwo ti kiak iyo kiwa Sinia' jlamtis ti ijwijla'm papo jijwejlanawos, ti yiyet'iyipi japak siojopa jloma tenaja, ti iyo'ate, “Ane ni yas ti yi' Egíptojo.”#Os 11.1

Herodes takajlunie papo kia'lis ka tilianaja'n

16Ti Herodes itijnisieyi papok i'nio 'yijejne'n ti jla'm je 'yuyisi ape'e, sekyi'i jwesie'ne, sekyi'i takajlunie'ne ka tilianaja'n papo kia'lis sek ji'wet'e, yi' japa Belén, siu'neje papo yiji pet siupuwa isi'il jilis je tosape'n. I'yenijits'i siupapo jika najkapis times, siu'neje papo sajmela'ajane ti k'iejli yik'iji'n. 'Yina yame siupa iyone papo i'nio 'yijejne'n ti ijwijla'm. 17Pakayi'ne pet ti yiyeyi siupa injwejlanik jiwo Jeremías iyot'iyipi ti iyo'ate:

18“Pesieje ni ina'lap ti tojma'm jana Ramá,

naka ni inajlas, siu'neje ni injlak'ali ti wuj.

Raquel janaka ti tajwits'i'ni kiapo jilis,

je iyojonk'iye ka poye pa ka ijloye'ni,

ka jeyewat ka intankiunk'i papo jilis,

'wanjlit'iyi kajeyepa ti je 'wasajne'n.”#Jer 31.15

José, María siu'neje pa kia'le Jesús yapijlia'm papo Israel jlele

19Jlampa Herodes 'yalat'ipi, Saka'niona jijliujwanik poli jlele ijioyi'ni pa José ti ini'wenkijna'm ti yine jijwejliki ti imia'a, ts'e yi'i japa Egipto, iyone 'ate:

20—Jlam woni'ni 'ate neppijia'm, kime ni kia'le siu'neje jana jlet, maye'ni apilieyi napo Israel jlele, 'yina no'we siukiapo iyotajapi ka ila'an ni kia'le.

21Ijiatjliyi José inilanat'ipi pijia'm, isimayi pa kia'le siu'neje japa jlet ti yapijlia'm papo Israel jlele t'ipi. 22Je 'es t'ipi ti t'ijieyeyi ti Arquelao iyo anechiyasa' ti its'iuye'e pi jinia' Herodes, sekyi'i pak je ijwiyi'ni ka nek. 'Yina Sinia' jijwejlik iwijnam'ne, ti iniuyeje siupa ka iniwone. Tejeyet'iyijpe 'nijiye pa kia'le siu'neje japa jlet yi'i japa ajnat Galilea. 23Ti 'nesat'ipi yamitayi japa Nazaret, japak'ne ti iyo 'weta. Pakayi ti yiyeyi japak jloma siupi iyot'iyipi papo Sinia' jijwejlanawos ti kiak ja tiwonaja'ni 'ate Nazareno.

सध्या निवडलेले:

Mateo 2: CRT97

ठळक

सामायिक करा

कॉपी करा