Gimpuunan 8
8
Ti Pagkak-at Gunaw
1Balaw kinalimtan Diyus si Nuwi hanggan kay manga kaibahan hayup sa sulud barku. Nakan ipinahuyup niya ti durus sa kalibutan ag amat-amat maghubas ti danum. 2Pinut-an niya ti manga bulbugan ag inampara ti uran. 3Amat-amat di gid ti paghubas danum sa sulud usa ka gatus may limangpulu ka sirang. 4Pagka sampulu may pitu pag sirang sa ika pitu pag bulan, nisayad ti barku sa kabaantudan Ararat. 5Sigi di ti paghubas danum. Ag pagka sa un-an pag sirang sa ikasampulu pag bulan, magtabaw yi ti katayungtungan manga bantud.
6Pagkalawuy 40 ka sirang siyun ginan sa magtabaw bantud, binukasan ni Nuwi ti gaha barku 7ag pinalpasan ti usa ka uwak. Tunda pag uwak pabalik-balik maglayang tugka sa amat-amat paghubas danum. 8Pinalpasan diman ni Nuwi ti usa ka kalampati hampay maalaman niya nu hinmubas yi ti danum, 9dapat unman may maapunan ti kalampati dahil magkalapawan waya danum ti buu kalibutan. Nakan binmalik yi lang ti kalampati sa kan Nuwi sa barku. Ihinunat ni Nuwi kay takyay ag ipinaapun niya ti kalampati bag-u ipinaslud sa barku. 10Pinalipas dap ni Nuwi ti pitu ka sirang bag-u di maan pinalpasan niya ti kalampati. 11Madulum-dulum yi ti malambung kay magbalik ti kalampati may tangag sugbuk labung ulibu pag kayu. Nakan naalaman ni Nuwi hinmubas yi ti danum. 12Pinalipas dap maan ni Nuwi ti pitu waya ka sirang bag-u di maan niya pinalpasan ti kalampati, dapat unman yi inda binmalik.
13Katpung un-an pag sirang sa un-an pag bulan nak-at yi ti danum. Si Nuwi 601 ka timpu yi tunda katpung. Binukasan niya ti tabun barku ag nakitan niya mamara yi ti daga. 14Katpung 27 pag sirang sa ikadwa pag bulan, mamara yi ti daga sa buu kalibutan.
15Magkun ti Diyus sa kan Nuwi, 16“Pagluwas yi kamu tanan sa barku. 17Palwasan diman ti tanan hayup hampay yumamu sida ag mangalat sa buu kalibutan.” 18Nakan linmuwas ngani si Nuwi kaibahan kay asawa, kay manga anak lalaki hanggan kay manga umagad. 19Linmuwas diman ti tanan hayup: ti maglakaw, ti maglayang hanggan ti magyapang. Mirinsanan sida angay sa kanda kalasi.
Naghandug si Nuwi
20Nagbuwat harandugan si Nuwi para sa Panginuun. Bag-u nagbuul siya usa sa kada kalasi hayup malumpiyu#8:20 malumpiyu: Kay ibug sabihun, mahimu ihandug; ngatay, kan-un. hanggan diman sa kada kalasi manga manuk malumpiyu, bag-u sinunug niya inda sa harandugan bilang handug sa Panginuun. 21Pagka nahungaw Panginuun ti mabanglu pag hungaw, magkun siya sa kay sadili, “Balaw yi gid niku umanun saadan ti daga dahil sa pagbuwatun manga tawu. Una waya alam niku makasalanan ti tawu ginan sa anak waya siya, balaw yi gid niku rurisun uman ti tanan magkabuhi parihu sa kang binwat. 22Habang atay di waya ti kalibutan, may panahun tigparamgas ag tig-arani. May tigraramig ag may tig-irinit, may abagat ag turungun, ag may sirang ag may yabi.”
सध्या निवडलेले:
Gimpuunan 8: HNN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Copyright © 2023 by OMF International, Philippines