Мф 4
4
4 ГЛАВА
1-11 Иисусым тергымаш. 12-17 Иисус Галилейыште ышташ тӱҥалеш. 18-22 Иисус икымше тунемшыж-влакым ӱжеш. 23-25 Иисусын калык верч тыршымыже.
1Иисусым диавол тергыже манын, Шӱлыш Тудым ир мландыш наҥгаен. 2Нылле кече да нылле йӱд нимом кочде пӱтым кучымеке, Иисус пытартышлан шужымым шижын. 3Тудын деке алгаштарыше миен да ойлен: «Тый Юмын Эрге улат гын, нине кӱ-влаклан киндыш савырнаш кӱштӧ». 4Но Иисус вашештен: «Возымо:
”Айдеме кинде дене гына огыл,
а Юмын умшаж гыч лекше кажне шомак дене ила”».#4:4 Втор 8:3.
5Тунам диавол Тудым Иерусалим святой олашке наҥгаен, храм леведыш тӱрыш шогалтен 6да ойлен: «Тый Юмын Эрге улат гын, ӱлыкӧ тӧрштӧ, возымо вет:
”Тудо Суксыж-влаклан Тыйын нерген кӱшта:
йолет дене кӱэш ит шӱртньӧ манын,
нуно Тыйым кидешышт нумал наҥгаят”».#4:6 Пс 90:11-12.
7Иисус тудлан каласен: «Тыгак возымо: ”Господь Юметым ит терге”».#4:7 Втор 6:16.
8Ынде диавол Тудым пеш кӱкшӧ курык ӱмбаке намиен, тӱнясе чыла кугыжанышым, мо дене чапланымыштым ончыктен 9да ойлен: «Кумык возын ончыланем вуетым савет гын, чыла тидым Тылат пуэм». 10Тунам Иисус тудлан ойлен: «Мый дечем кораҥ, сатана! Возымо:
”Господь Юметлан, сукен, вуйым саве,
ик Тудланак веле служитле”».#4:10 Втор 6:13.
11Тунам диавол Тудым коден каен, а Суксо-влак толыныт да Иисуслан служитлаш тӱҥалыныт.
12Иоанным кучен петырыме нерген колмеке, Иисус Галилейыш каен. 13Назаретым коден, теҥыз воктен верланыше Завулон ден Неффалим кундемысе Капернаумыш илаш толын. 14Тыге Исаия пророк гоч каласыме шукталтын. Тудо ойлен:
15«Завулон мланде ден Неффалим мланде,
теҥыз деке кайыме корно,
Иордан вес вел кундем,
чын Юмым палыдыме-влакын Галилейже –
16пычкемыште илыше калык
кугу волгыдым ужын,
колымаш ӱмылан велыште шинчыше-влаклан
волгыдо волгалтын».#4:15-16 Ис 9:1-2.
17Тиде жап гыч Иисус увертарен туныкташ тӱҥалын. Тудо ойлен: «Языкым касарыктен, Юмо деке савырныза: Пылпомыш Кугыжаныш лишемын».
18Галилей теҥыз воктеч кайымыж годым Тудо кок изак-шолякым, Петр манме Симоным да тудын Андрей шольыжым, ужын. Нуно колызо лийыныт, тиде жапыште вапшыштым вӱдыш кышкеныт. 19Иисус нунылан ойлен: «Почешем кайыза, Мый тендам айдеме кучышым ыштем». 20Нуно тунамак вапшыштым коденыт да Иисус почеш каеныт. 21Тушеч умбакырак ошкылмеке, вес кок изак-шолякым, Зеведейын Иаков ден Иоанн эргыж-влакым ужын. Нуно ачашт дене пырля пушышто лийыныт да вапшыштым ачаленыт. Иисус нунымат ӱжын. 22Нуно тунамак пушыштым, ачаштым коденыт да Иисус почеш каеныт.
23Иисус уло Галилей мучко коштын да синагоглаште туныктен, Кугыжанышын Поро Увержым каласкален, еҥ-влакым тӱрлӧ чер да ӱнардыме улмышт деч паремден. 24Тудын нерген мут уло Сирий мучко шарлен. Туешкыше, тӱрлӧ чер дене орланыше да корштен йӧсланыше, ия кучыман, тылзе кушмо годым орланыше, йыжыҥдыме еҥ-влакым чыланыштымат Иисус деке конденыт, да Тудо нуным паремден. 25Иисус почеш Галилей, Декаполис#4:25 «Декаполис» – Лу ола., Иерусалим, Иудей да Иордан эҥер вес могыр гыч шуко калык коштын.
सध्या निवडलेले:
Мф 4: УС
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Библийым кусарыше институт, Хельсинки 2007
