TĨĨGI WERE 4
4
Kayin wo de Abel
1Adam kal woge ɓiŋ wãy ɓe Efa. Á kal maŋ ɓiili, kal biŋ Kayin. Wãyn day ga : Ndi biŋ je twar we wer kayge ma Manwuri. 2Á kal biŋ wegeman ɓe Abel pa. Abel kal joŋge diŋ je koɗ horoge, Kayin diŋ je jeɗ sir lay. 3Wo dayge ti wurpo Kayin kal age de leʼge fẽẽre ɓe maga se jeɗ ra doo fen hãge ne Manwuri. 4Abel ɓen lam lay no, kal age de jag weere sããre ɓe ma taŋgun wo, de noo ɓaara, ne Manwur lay. Abel kal koge nen Manwur de fen hãge ma ɓen ɓuy de ele. 5Ama Kayin de fen hãge ma ɓen ɓuy laa koge nen ɓe de el gà. Wããre sen kal car jiili Kayin go debaŋ, tog pel ne hẽn lay. 6Manwur wii Kayin ga : Ndo car jiili go lay, tog pel lay mokay re may la? 7Hayga ndo oo we de el no, ndo ur mbo yaŋ go ciŋ, day hayga ndo joŋ we de el gà lay no, ɓlagge de ɓoʼ hiigi jag tiŋ ni ɓo day de sãy ɓo ti. Ama ma ɓon daŋn go egre ane. 8De sen ni, Kayin kal yaʼge wii hẽn ɓe Abele. Wo dayge de maga saara wo wo go mbásga, Kayin kal ngiɗ nen de hẽn ɓe Abel kal ʼwarge ɓe go.
9Manwur wii Kayin so ga : Hẽn ɓo Abel gen la? Á kal fer wããre ne hẽn ga : ndi ko gà. Ndi diŋ je gor ti hẽn ɓi no? 10Doo kay nono, Baa day ga : Ndo joŋ nà diŋ mayla? Cíi hẽn ɓon le ti war nen siri, hãã war ɓe wo daʼ me ge 11Patala ndo joŋ ge go de faɗge, hãã see sir maga hãʼ jag ɓe go ma yãã cíi hẽn ɓon doo ɓo mono. 12De maga ndo leʼ je sir ge we no, ndo daʼge horog maga wo nen ɓe ni gà so. Ndo kol ge go de welge daɗge ti tamsir ga caw lay. 13Kayin wii Manwur ga : Ɓlagge ɓin bay ma soɗge wa doo kluu. 14Ndo nii gi mbo ndi go wara see sirn so, ndi joŋ ge mbi nen yoŋge wo go see ɓo hãã so, ndi wel mbi wo go daɗge ti tamsir caw so, day jobo daʼ ndi we mo ʼwar mbe ndi go. 15Manwur wiin ga : Jobo ii gi Kayin we no, à saʼge hee ɓe go ɓaale renam. Manwur kal duʼ fen kaŋ nen go ne Kayin see, nen maga jar maga daʼn ge wo we mo mbarn wo wa. 16Blam ɓe Kayin kal kalge go see Manwuri, wo hayge ɓi sir Nod, see Eden wo nen ɓaŋ wer ɓe no kay no.
Wer mani Kayin wo no
17Kayin kal woge ɓiŋ wãy ɓe se kal maŋ ɓiili, kal biŋ Henog. Á kal laa sir po, kal kaŋ ɗúu ɓe de ɗúu wel ɓe Henoge. 18Henog kal biŋ Irad, Irad kal biŋ Mehuyayel, Mehuyayel kal biŋ Metukayel, Metukayel kal biŋ Lemege. 19Lemeg kal da naare ɓoge, à ɗe la ga Ada, à ɗe ma lan ga Silla. 20Ada kal biŋ Yabal, Yabal diŋ moo jar maga wo de horog koɗge go ga tiʼ mo ɓuy no. 21Ɗúu hẽn ɓen hay ga : Yubal, Yubal diŋ moo jar maga maʼ wo tidil wo de jar ʼwad dãã wo mo ɓuy no. 22Silla ti ɓaŋ ma ɓen lam lay no, kal biŋ tubal-Kayin maga hay too boo maaway wo de boo mo lay. Maygeman Tubal-Kayin hay diŋ Naama. 23Lemeg wii naare ɓe wo ga :
Ada wo de Silla, laa we jag ɓi!
Naare mani Lemeg wo, kaŋ we sug ɓay laa wããre ɓi no!
Ndi ii jobo go ti wããge maga à kaŋ me see no,
Ndi ii weklee go ti defõõre wããge maga kaŋ me see.
24À saʼge hee Kayin go ɓaale renam,
Day ma Lemegn joŋ ge ɓaale doo renam.
25Adam kal woge ɓiŋ wãy ɓe pa, á kal biŋ wele, se kal kaŋ ɗúu ne hẽn ga, Sede, werga á kal wããge ga Baa hã mbèere ma tigriŋ we me ti ngel Abel maga Kayin ʼwarn go mono. 26Sed mo lay kal biŋ wel lay, day kal kaŋ ɗúu ne hẽn ga, Enoge. Diŋ de wur sen so ga à kal tĩĩ wer ɗe ɗúu Manwuri ma goŋge ɓe.
सध्या निवडलेले:
TĨĨGI WERE 4: TUP
ठळक
सामायिक करा
कॉपी करा
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.