JOHN 1
1
Atsa no Ashi shive
1Abothu lono Atsa ae, Atsa huye Alhou gholo ae; eno Atsa huye Alhou ke. 2Pa ye abothu lono Alhou gholo ae. 3Pa vecheo thokha lho eno Pa sümo keloye kiumu lho püamoe. 4Pa lolo aküxüpu ae, eno aküxüpu huno timiqo küvü ke. 5Aküvü huno aküzü lo yepüvü, eno aküzü ye tipau küzüpho mlave.
6Alhou no timi lakhi puwu, pa je ye John. 7Pa ye thopi shi aküvü ghili ashepe shiniye ighi, tishianguno kümtsü no pa vecheo pülülu peniye ke. 8Pa ye aküvü kumoe, ikemu aküvü ghili thopi shiniye ighi.
9Aküvü kuchou khikhi timi kümtsü yepüvü cheni keno tipau ayeghi lo ighi niye shiae. 10Pa ye ayeghi lo ae, eno ayeghiqha ye Pa vecheo lhoke, ikeghi ayeghi lomi no Pa ithimoe. 11Pa no Pa yeghiqha lau ighi kemu Paw timiqou no Pa ikhilumoe. 12Ikemu khunono Pa ikhilu, Pa je lono pülülu keno, panoqo pelo Alhou nuli shilupe kepu chipiu Pa no tsüe, 13ti ye ashi lono punu keu momu timi pulou lono kumoe, ikemu Alhou launo ke.
14Atsa huno ashi shive no ningu gholo xü, eno ningu no Pa juküvü ithuluvae, ti ye Apu gholo Anu lakhi likhi akeu, küpükini ngo kuchou no chhitoi keu juküvü ke. 15(John no ighamku ishi Pa shepe shitsü, “I no khuu ghili pesü, ‘Khuu I thiu cheni keno Pa no I nguno akiqheue, kughengu Pa ye I züuno acheghivae’ ipiche keno tihu Pa ke.”) 16Paw kupukülai keu lono ningu kümtsü no küpükini shou küpükini ithuluvae. 17Kughengu Ayezah ye Moses vecheo tsüke, ikemu küpükini eno kuchou ye Jisü Khristo vecheo ighi. 18Khunomu Alhou ithulu mphi; ikemu Anu khuu Pa likhi, eno Apu phivilo acheni keno, Pa no Alhou julho pephe piyeve tsüae.
Baptiz kishiu John Shepe
(Mt 3:1-12; Mk 1:1-8; Lk 3:1-18)
19Kughou Jewmi no Jerusalem lo achinemi ngo Levimi puwu no John vilo, “No ye khuu kea?” ipi ighiju keno, John no hitoi ashepe shi, 20pa no mtsümishei, “Ni ye Khristo kumoe” ipi pipheve. 21“Imaye no ye khuu kea? Elijah keshea?” ipi panongu no ighiju. Pa no pi. “Ni ye kumoe.” “No ye Tungkupu hu keshea?” pa no pi, “Moe.” 22Ikehu panongu no pi, “Ningu puwu keqo khochile masa anike no ye khuu kea? No ye khuue picheni kea?” 23Pa no pi, “Isaiah tungkupu no pipüa ketoi, ‘Ampeu laghi müzüchoi shitsülo’ ipi asayeqha lono ighamku keu sütsa huno nike.”
24(Panongu ye Phariseemi no puwu ke.) 25Panongu no John ighiju, “Nono Khristo mu kumo, Elijah momu Tungkupu mu kumo aye, no ye kushiye baptiz shicheni kea?” 26John no panoqo khochile, “I no azü pesü baptiz shicheni, ikemu nongu ye nongu gholo puthugho akeu milakhi mthae, 27Pa no I thiu cheni, ni ye Pa pukhukuqho mu tsügha küzüpu kumoe.” 28Hi kümtsü Jordan kukuu Bethany khile John no baptiz shi akeno tileno shike.
Alhouw Ambeti Julo
29Tishiwo thoghiu John no Jisü pa küdau cheghi keu ithulu püzü pi, “Alhouw Ambeti khuu ayeghiqha xine pevetsü keno, julo! 30I no, ‘Timi lakhi I thiu cheni, ikemu Pa ye I nguno akiqheue, kughengu Pa ye I züuno acheghi ke’ ipikeu huye Pa ke. 31Ni ampi ye Pa mtha kemu hipau kimji ghenguno I no azü pesü baptiz shi ighi, tishianguno Israelmi lau Pa kilethi tsüniye ke.” 32Eno John no ishi thopi shi: “Kungugha lono Aghungu Kimthe no miqhedu toi iqighi no Pa shou ngokeu I no ithulue. 33Ni ampi ye Pa mtha ikemu khuu no I pelo azü pesü baptiz shipeniye puwu keno, Pa no I vilo pi, ‘Aghungu Kimthe no khuu shou iqighi no ngokeu nono ithulu keno, Pa no Aghungu Kimthe pesü baptiz shitsü nani.’ 34I no ithulu no nongu vilo ashepe shitsü anike hi no Alhou Nue.”
Jisü Khopemi Atüghümi
35Tishiwo thoghiu itaghi John no pa khopemi kini sasü puthugho akelo, 36Jisü cheghi keu ithulu no pi, “Julo, Alhouw Ambeti!” 37Akhopemi pama no ti chilu püzü Jisü pape wuve. 38Jisü no idewo pama no pa pape cheghi keu ithulu no iniju, “Nokujo ye kiu phucheni kea?” Pama no pa khochile, “Rabbi” (tipa kiqi ye Shikükau), “no ye khile ani kea?” 39Pa no pama vilo pi, “Ighilo nongu no ithulu nani.” Ikehu pama no wuno pa no khile akeno ti ithulu, eno tipani pa gholo ngove, kughengu ti ye avelau ayi bidi shiuve ke. 40John no pikeu chilu no Jisü papewu keu pama dolo lakhi ye Andrew, pa ye Simon Peter thiküzüu ke. 41Atüghüshi pa no pamu Simon phuwu no pa vilo pi, “Ningu ye Messiah (tipa kiqi ye Khristo) phuluvae.” 42Tishino pa no Simon sasü Jisü lau ighi. Jisü no pa juno pi, “No ye John nopu Simon. O je ye Cephas (tipa kiqi ye Peter) ipi kuniae.”
Philip ngo Nathanael Kulu
43Tishiwo thoghiu Jisü ye Galilee lo wuni keu shive. Pa no Philip sasü kuthulu no pa vilo pi, “I papelo.” 44Philip ye Andrew ngo Peter pama phughi Bethsaida lono ighi kemi. 45Philip no Nathanael sholu no pa vilo pi, “Timi khuu vehu Moses no Ayezah kaku lo yepüani eno tungkupmi no yepüani keno, ningu no phuluvae, pa ye Nazarethmi, Joseph nu Jisü.” 46Nathanael no pa vilo pi, “Nazareth lono kiuala akivi ipeghilu nani keshea?” Philip no pa khochile “Ighi no julo.” 47Nathanael no pa lau cheghi keu Jisü no ithulu püzü pa ghili ishi pi, “Julo, Israelmi kuchou, pa lolo pishikiqhi kühae.” 48Nathanael no Jisü vilo iniju, “No ye kishino ni ithi ani kea?” Jisü no pa khochile, “Philip no o kumphi züu nono mububo qholo akelono Ni ye no ithuluvae.” 49Nathanael no pa khochile, “Rabbi, no ye Alhou Nu! No ye Israel Kükaue!” 50Jisü no pa khochile, “I no o vilo ‘Nono mububo qholo akelono, ni ye no ithuluvae’ ipike ghenguno no ye pülü ani keshea? Nono hipaqo nguno akijeu ithulu nani.” 51Pa no itaghi pi, “Kuchou no I no nongu vilo pini, kungugha khaqhi püzü Alhouw kungumi no Timi Nu shou iku-iqiju akeu nongu no ithulu nani.”
सध्या निवडलेले:
JOHN 1: SUMRVBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Bible Society of India
© 2023, Used by permission. All rights reserved. More
