Marcos 15
15
Roo oid Nai Jesus la asour governador Pilatus
(Mateus 27:1-2; 27:11-14; Lucas 23:1-5; João 18:28-38)
1Belebuus kokar, nai luli tuu room ois relijiaun Judeu ni, mai tuu teor ubu room, mestri room enlaa lei Judeu ni nor roo meit nii Tribunal Relijiaun Judeu ni libur loor oid teis enlaa Jesus ni mate. I room eis telo Jesus oid nee la Pilatus ni lima, governadoor ois Roma. 2Arfiil room raat nii Pilatus, ura tuuk la Jesus, “Dloo, ka tais? O fee roo Judeu ni daot, ka?”
Jesus ataan, “Iit tuu rasik fee dega manura.”
3I nai luli tuu room ois relijiaun Judeu duu maat Jesus dega Ura fun sala rini.
4Toom maa, governadoor tuuk siil la Jesus, “O ba fliik room kase ura, ka? Room nee sala rini la O. Manbae fee O ba ataan?”
5Mahee Jesus ba ataan teor-hua kiid, manura fun governadoor meit kauk ulu nor kakaha.
Governador Pilatus nee kastigu maet la Nai Jesus
(Mateus 27:15-26; Lucas 23:13-25; João 18:39-19:16)
6Toon-toon, arfiil roo Judeu room fun festa Paskua, man adada povu tuuk la governador asai artuub dadu kiid ois komarka. 7Nii leolbaan idura, nei artuub dadu kiid gala Barabas. Muna, roo fael ura nor ni taha room oid ataam la komarka, deslaa room kontra estadu Roma i room meit loet roo. 8Deslaa festa Paskua fedeis soub, fee roo rini laa nii governador Pilatus, oid tuuk dega, “Am-nai governador! Leolbaan Paskua raat soub! Se leob, am-nai asai artuub dadu iid ois komarka man adada.”
9Governador ataan, “Fun mansaba? Seen fee Au asai? Iim akar au asai roo Judeu ni Daot uri, ka?” 10Governador kase manura, deslaa ura taad dega nai luli tuu room ois relijiaun Judeu ni oid Jesus la ura, deslaa room hua sae tus-tus la Jesus.
11Mahee nai luli tuu room ois relijiaun Judeu ni, fois teor la roo rini oid tuuk la governador dega, “Aem boi sium Jesus! Asai fee Barabas lea!”
12Fliik manura, governador tuuk siil loi, “Se manura, au tenki fun sabiid la Jesus, iid bae fee iim haah Ura ‘Daot Judeu ni’?”
13I room hailagaa baklaal oid dega, “Loet telo Ura! Prega telo Ura la kruus!”
14I governador tuuk loi, “Mansaba? Ura ni sala sabiid?”
Mahee room hailagaa baklaal makaas deis dega, “Loet telo Ura! Prega telo Ura la kruus!”
15Deslaa governador naha fun roo rini kidura hua-lala kontenti, ura asai Barabas ois komarka, tuir room akar. Toom maa governador nee orde la soldadu room dae Jesus nor sikoti.#15:15:Soldadu Roma room uza sikoti bae fee fun ois animaal ni tia. Room teis fun sare-sare i ni lao id-iid room eis naam hati. Arfiil room dae roo bak-bako nor sikoti ura, roo tia hii sai msii meit. Dae telo meit, governador nee Jesus la soldadu room ni lima oid prega Ura nii kruus raat mate.
Soldadu room goza Nai Jesus
(Mateus 27:27-31; João 19:2-3)
16Faklau telo, soldadu room oid Jesus la room hati akampamentu nii palasiu governador ni.#15:16:Soldadu room ni hati too nii palasiu governador ni. Palasiu governador ura room haah nor teor Latin dega, praetorium. Nii la-ura room haah soldadu batailaun tema maa futu. 17I room huut Jesus nor batina koor uvas iid. Hena ura, adada daot room fee huut. I room fun meit koroa iid man daot room fee uza. Mahee koroa kiid naha lui la Jesus too, room fun ois ai rui. Room luul ai rui ura i deen la nii Jesus ni ulu.
18Toom maa room haihuu oid goza Jesus, i dega, “Iit tuu fee roo Judeu ni daot!” 19I room meit finji diku nor haihuu la Jesus. I room luu aba bak-bako la Ura ni ahe, nor room dae Ni ulu bak-bako nor ai. 20Room goza telo Jesus, room asai telo ni batina, i nee siil ni hena rasik la Ura huut. Toom maa, room oid Jesus sai ois sidadi Jerusalem, naha laa prega nii kruus raat mate.
Roo prega Nai Jesus nii kruus
(Mateus 27:32-44; Lucas 23:26-43; João 19:17-27)
21Arfiil room sai ois Jerusalem, nii saal fusu room asour artuub iid ois sidadi Sirene. Ura gala Simão, Alexandre nor Rufu ni ama. Ura hina maa ois foho naha tafae la Jerusalém, mahee soldadu room fael telo ura i obriga ura ool Jesus ni kruus.#Roma 16:13 22Room oid Jesus la nii hati kiid, gala Golgota. Golgota dega, ‘hati ulu hatu rui ni’. 23Nii la-ura, room nee nau-uvas kahur nor ai-nora la Jesus eun, oid Ura leob aguenta terus manhati. Mahee Jesus boi eun. 24-25Toom maa soldadu room haat Jesus la nii kruus oid prega Ura. I room fun mrii telo kruus too, nii tuuk liim-nai-fata belebuus. Depois room daad rifa oid taad seen fee eot Jesus ni hena.#Salmos 22:18 26Meit telo, room prega ai belar iid nii Jesus ni ulu hatu tete. Nii ai belar ura hlai manuri:
“Artuub iduri, roo Judeu ni daot”
Room hlai idura oid atuud dega room nei razaun iid oid loet Jesus. 27Nii la-ura, room meit prega roo fnao-klao ubu ruu. Iid nii Jesus ni lima-doloo; iid loi nii Jesus ni lima-toi. 28[Manura room fun tuir sabiid fee hlai enene nii Nai Maromak ni Livru Sagradu, dega, “Room fun Ura man fee artuub klao kiid.”]#15:28:Eskritura seir nor teor Gregu bae fee muna faklau, ba hlai versikulu 28. #Isaías 53:12
29Roo haigaa bae fee lolai faklau ois hati kidura fei Jesus prega bael nii kruus. I room goza nor alui Jesus, dega, “Hee! O dega O naha fun rahu telo Nai Maromak ni Uum Kreda Tuu, i O fun mrii siil nii leolbaan teul ni lala!#Salmos 22:8; 109:25; Marcos 14:58; João 2:19 30O duu ois kruus too maa! Salva O eta lolo rasik!”
31Nai luli tuu room ois relijiaun Judeu ni nor mestri room enlaa lei Judeu ni meit kase klao Jesus. Room kase la loor, dega, “Ura salva roo selu, mahee Ura rasik ba leob salva ni eta lolo. 32Muna Ura dega soub, Ura fee ‘Kristu’, Roo iid bae fee Nai Maromak promete soub fes muna, nor meit roo Israel room ni daot. Se manura didi, fois Ura mesa duu ois kruus too, la aem fei i fiar la Ura.”
Roo ubu ruu bae fee prega futu nor Jesus, room meit, kase klao la Jesus.
Nai Jesus ni mate
(Mateus 27:45-56; Lucas 23:44-49; João 19:28-30)
33Faklau telo ura, rae sai kokar telo meit, ois meudia raat tuuk teul leolseri. 34Nii tuuk teul leolseri, Jesus kirai nor tero Aramaiku, dega, “Eloi! Eloi! Lama sabaktani!”, idura dega, “Au Maromak! Au Maromak! Manbae fee Iit Tuu fois bael Au manuri?”#Salmos 22:1
35Roo seir fedeis nii hati kidura fliik Jesus ni tero too. Room meit dega la loor, “Iim fliik kook. Ura haah Elias, Nai Maromak ni gugu nor lama muna.” 36I artuub iid flaer la huu eer lumut i deum la nau miniro. I nout la nii ai iid oid door la Jesus ni gugu, la Ura eun. I roo ura dega, “Maa iit fei kook! Be fun la Elias maa alui Ura ois kruus.”#Salmos 69:21
37Toom maa Jesus kirai haet iid loi, Ura maet i sunuga meit boor.
38Nii Uum Kreda Tuu, nei kurtina iid oid hae Nai Maromak ni Hati Santu tus-tus. Arfiil Jesus maet nor maet, kurtina too meit misii la ruu enene, ois tete raat sua.#Ezodu 26:31-33
39Nii Golgota, nei komandanti iid mrii fedeis bael Jesus ni kruus. Arfiil ura fei Jesus ni mate, ura kauk ulu, oid dega, “Dloo didi! Roo iduri, Nai Maromak ni Ana.”
40-41Muna nei meit hiin rini bae fee toom Jesus i room maa nii Jerusalem futu nor Ura. Nii leolban idura, room fei Jesus ni mate ois roo lea. Ois hiin seirgaa iid fee: Salome, Maria ois aldeia Madala, nor Maria iid selu loi (ura fee Tiago loba nor José ni ina). Muna room ubu teul meit fee serbii Jesus nii Galileia.#Lucas 8:2-3
Roo taan Nai Jesus nii rate
(Mateus 27:57-61; Lucas 23:50-56; João 19:38-42)
42-43Arfiil leolmata naha duu, artuub iid nae saal naha alui Jesus ni maet isi ois kruus. Artuub idura gala José, ois sidadi Arimatea. Ura meit membru tuu kiid ois Tribunal Relijiaun Judeu ni, iid bae roo respeitu manhati. Ura hua-lala kode. I ura sempre gnaan Nai Maromak ni reun naha maa.
Jesus maet nii leolbaan sesta leolseri. Man siil ada leolban Sabdu, roo Judeu ni leolbaan oid arohan i baleob serbisu. Des manura fee nii leolbaan sesta, José naha alui enene Jesus ni maet isi ois kruus. I ura fun brani lolo laa asour governador Pilatus, oid tuuk Jesus ni maet isi. 44Arfiil governador fliik José tuuk manura, ura meit hleeh, oid dega, “Doloo, ka? Artuub idura maet telo soub? Au anoin dau Ura ba maet hei.”
Manura governador ruu roo laa haah komandanti too maa, oid tuuk, “Fun mansaba? Jesus maet telo soub, ka hihei?”
45Komandanti ataan, “Nai. Ura maet telo soub fes nafai.” Governador fliik manura, ura nee lisensa la José oid laa alui Jesus ni maet isi.
46Depois José laa aal hena heu kiid tubu karu tus-tus. Toom maa José laa nii Golgota, i ura nor roo seir laa alui Jesus ni maet isi ois kruus, room meit biil maet isi too fun kod-koed nor hena heu too. I José room oid Jesus ni maet isi laa ataam nii haut goa kiid bae roo bahat ois haut lolo. Toom maa room hael haut tuu kiid oid laa taa telo haut goa too. Meit telo, José room meit suli.
47Leolbaan idura, Maria ois aldeia Madala nor Maria iid selu (José ni ina), toom meit raat nii hati kidura. Room ubu ruu fei kod-koed hati bae fee room fois Jesus ni maet isi la too.
सध्या निवडलेले:
Marcos 15: BMGM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators Inc
