Luk 3
3
Jɔn nwura anɛ alab atongo mba
(Mat 3:1-12; Mak 1:1-8; Jɔn 1:19-28)
1Sisa Tibɛrus afe oton ɛka Rom ka nnya wobo na ɛnɛ, Ɛtɔɔngɔ nnya noko ka ngara yi Fɔntus Falet ajɔ nton a Judia. Ɛrɔd ajɔ nton a Galili, mmɔannyɛ ji Filib ajɔ nton a Itura na Trakonitis, ka Lasanias nton a Abilɛnɛ, 2ka ngara yi Annas na Kafas ajɔ aton a baɛjɔ Ɔsɔwɔ, Ɔsɔwɔ atebe Jɔn mmɔ a Sakaria oteb ka ngara yi are ka eyomo. 3Ajɛn asibi baka wɔɔ bi ere ɛlagha aya Jɔdan, aragha ano Ɔsɔwɔ na mbɔ sa ayanga nekpen na ewura alab sɔng Ɔsɔwɔ atamasighi abibi afɛ. 4Si ayɛnɛ ka nwɛr mbono Ɔsɔwɔ Asaya:
“Nnɛ ya ajɔ atebe ka eyomo,
‘Tongo mba Ntaa,
one ntinni a mba ɔkiɛ!
5Sono abrɛbrɛ akonkon;
sana akonkon asɛnɛ.
Ne aba ya agɛdɛgɛdɛ atinni;
kpere ɛyagha ɛsɔbɔ.
6Anɛ kpakpa ayɛ nanagha Ɔsɔwɔ!’ ”
7Jɔn atɔ ɛbɔngɔ ji aba si awuru mbɔ alab, “Warr ba ere nasi abɔ a ɔnyɔ bi akpe bisi: Yɛnnɛ atuu war atɔng sɛ ɛbɛ niyiri ni Ɔsɔwɔ ama kɛ war*? 8Ne ejo ɛtɔngɔ si ɔmayanga nekpen. Ba kijɔfa ɛtɔ nɛnɛrɛ si, ‘Ekpe Abraam si nsɔjɛrɛ.’ Ntɔ warr si Ɔsɔwɔ amama akɔghɔ atan yafa ayanga abɔ akɛ Abraam. 9Nofok ɛmɔnɔngɔ ka abangannab nte, kpere ete ji erikab etingi nkab akɛbɛ atob ka ngon.”
10“Ka munu ene nang?” Ɛbɔngɔ ɛbɔmmɔ.
11Jɔn akpɛ, “Kpere nnɛ ya akpe ɛnɛmɛ baba akɛ nnɛ ya arifɔ, ka nnɛ ya akpe ejonɛnɛghɛ atam ane na.”
12Araggasi ba ɛkɛ a taksi bamɔng atam aba ama wuru alab, “Nkpekpene,” abɔmmɔ, “war ene nang?”
13Jɔn akpɛ, “Kikɔ ɔga si atɔa si ɔkɔ.”
14Ɔsɔja bamɔng abɔmmɛ, “ka war ene nang?”
Akpɛ, “Kikɔ akpugha anɛ ka nsam, ki ne adɛ ɔlagha anɛ nɔngɔ ji akpegha ebenga.”
15Anɛ ajɔ akonoekpo ka nte mbɔ si Jɔn amama ajɔ Kras. 16Jɔn akpɛ mbɔ wɔɔ, “Mmɛ nwuru alab yaga. Nnɛ ya aga afang agam aragha bagha mmɛ ndisi yi fɔngɔ alighi akpaghata ɛyɛ. Awuru war alab a Mbara Nfɛb na ngon. 17Akpe ɛfɛfɛb ka ɔbɔ ya afɛb wit ka mfo ba abo ka ɔgbara sa akɔ anɔbɔ akag ka baba, ka akɔ akpanfab akag ka ngon bi erijɔ ɛnɛmɛnɛmɛ.” 18Jɔn arag ajɛn ano etuu ɔtɔng ya akɛ mbɔ nsam ayanga nekpen.
19Ka Jɔn ayam nton a Ɛrɔd ya akɔ nka mmɔannyɛ Ɛrɔdias na abibi yaga wɔɔ ya ane, 20Ɛrɔd afɛnɛ ane ebibi ji afang aga ya ga sa akɔ Jɔn akag ka mgbɔkɔbɔ.
Ewuru alab na Ɛbangannab Jisɔs
(Mat 3:13-17; Mak 1:9-11; Mat 1:1-17)
21Ngara yi anɛ wɔɔ ajɔ awuru alab Jisɔs atam aba awurɛ alab. Nsɛrɛ si Jisɔs ajɔ akag njɔ, nobo eribi, 22ka Mbara Nɛfɛb asɛnɛ amakuɛ ka biji nasi ɛmɛb. Ntɔng aru ka nobo: “Wɔ Mmɔ ɛwaa yɔ ɔkɔrɔm, nete ɛyɛbɛm nana.”
23Munu Jisɔs are nnya natan na wobo ya agɔngɔ noto ɛnɛ. Ajɔ mmɔannu a Josɛf, sa anɛ akana, mmɔannu a Ɛli, 24mmɔannu a Mattat, mmɔannu a Lɛbi, mmɔannu a Melki, mmɔannu a Janna, mmɔannu a Josɛf, 25Mattatiyas, mmɔannu a Emɔs, mmɔannu a Naum, mmɔannu a Esli, mmɔannu a Naggai, 26mmɔannu a Maat, mmɔannu a Mattatiyas, mmɔannu a Sɛmɛyin, mmɔannu a Josɛk, mmɔannu a Joda, 27mmɔannu a Joanan, mmɔannu a Resa, mmɔannu a Jɛrubabɛl, mmɔannu a Sealtiel, mmɔannu a Neri, 28mmɔannu a Melki, mmɔannu a Addi, mmɔannu a Kosam, mmɔannu a Ɛlmadam, mmɔannu a Ɛr, 29Josua, mmɔannu a Eliesa, mmɔannu a Jorim, mmɔannu a Mattat, mmɔannu a Lɛbi, 30mmɔannu a Simiɔn, mmɔannu a Juda, mmɔannu a Josɛf, mmɔannu a Jonam, mmɔannu a Eliyakim, 31mmɔannu a Melea, mmɔannu a Menna, mmɔannu a Mattata, mmɔannu a Natan, mmɔannu a Debid, 32mmɔannu a Jesi, mmɔannu a Obed, mmɔannu a Boas, mmɔannu a Salmɔn, mmɔannu a Nason, 33mmɔannu a Aminadab, mmɔannu a Ram, mmɔannu a Ɛsrɔn, mmɔannu a Feres, mmɔannu a Juda, 34mmɔannu a Jɛkɔb, mmɔannu a Asik, mmɔannu a Abraam, mmɔannu a Tɛra, mmɔannu a Nawɔ, 35mmɔannu a Serug, mmɔannu a Reu, mmɔannu a Feleg, mmɔannu a Eber, mmɔannu a Sɛla, 36mmɔannu a Kainan, mmɔannu a Afasad, mmɔannu a Sɛm, mmɔannu a Nua, mmɔannu a Lamek 37mmɔannu a Mɛtusɛla, mmɔannu a Ɛnɔk, mmɔannu a Jared, mmɔannu a Maalalel, mmɔannu a Kenan, 38mmɔannu a Ɛnɔs, mmɔannu a Sɛt, mmɔannu a Adam mmɔannu a Ɔsɔwɔ.
सध्या निवडलेले:
Luk 3: NDD Nta
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©️2022 Luke Initiative for Scripture Translation
