লূক 19

সক্কেয়নি গিসিক ফি·ল্লানি গিম্মিনো

1যীশু যিরীহো সংজিলমা গিত্তা রি·য়াংআমিং। 2উনো সক্কেয় মিংগিবা সাকসা মান্দি দংআমিং। বিয়া খাজিনা গিলগিবারাংনি দাল·বাৎগিবা আরো মা·ন্নে চা·বাৎগিবা হং·আমিং। 3যীশু সা, উখো বিয়া নিনা হা·ম্মিংআমিং, ইন্দিবা খামবি খান·দামা ইন্নে মান্দি বাং·আনি গিম্মিন বিখো নিকনা মান·জাংআমিং। 4উনি গিম্মিন বিয়া যীশুখো নিনা ইন্নে মিকখাংচা খাত্তাংএ ডুমুর বিফাং ফাংসাও গাদোজক, মুয়ানা যীশু উয়া রামা গিত্তান রি·য়াংআমিং।

5যীশু উয়া ডুমুর বিফাংনি কেচ্চিও রি·বাএ সাক্কাচানা নিগোদোজক আরো সক্কেয়খো আগানজক, “সক্কেয়, হং·খাতগালবো, মুয়ানা দা·আলো আংআ নাং·নি নক্কো দংনা নাংনুয়া।”

6সক্কেয় বাকবাক হং·খাতবাজক আরো খুসি হং·এ যীশুখো রা·চাকজক। 7উখো নিক্কে গিম্মিকান খা·চাএ খা·চাএ ইনজক, “বিয়া সাকসা পাপী মান্দিনি চাচ্চি হং·না রি·য়াংজক।”

8সক্কেয় উনো চাদেংএ গিত্তেলনা আগানজক, “গিত্তেল, আংআ আংনি গামজিননি ফাকসামসাখো দিল্লা-চন্নারাংনা হ·ন্নেতিংজক আরো সাচাখোবা থগিয়ে রা·মানোদে উনি চাংব্রি বাত্তে হন·ফিল্লিংজক।”

9উনোন যীশু আগানজক, “ইয়া নক্কো দা·আলো পাপওনি জক্কা সকজক, মুয়ানা ইয়াবা অব্রাহামনি দেফান্থি হং·আ। 10গিম্মাগিবারাংখো সান্দিনা আরো পাপনিখো জক্কেৎনান মান্দিনি দেফান্থি রি·বাজক।”

রাজা আরো বিনি সাকচিখুং নকখলরাং

11যীশু জেও দংআমিং উনোনি যিরূশালেম বাং·এ চেল·জামিং, আরো জেরাং বিনি খাৎথাখো খিন্নাংআমিং বিসং, ইসলনি সংনক থেংরিন ফারাকনুয়া ইন্নে চানচিয়ামিং। উনি গিম্মিন যীশু বিসংনা স্খিনা ইন্নে ইয়া খাৎথাখো আগানজকঃ 12“দাল·গিবা মা·চংনি সাকসা মান্দি রাজা হং·আনি বিলখো রা·এ রি·বাফিলনা হা·সং চে·ল্লাচা রি·য়াংজক। 13রি·য়াংনা স্খাং বিয়া বিনি সাকচিখুং নকখলরাংখো রিক্কামজক আরো সাকফ্রাকফ্রাকনা রিৎচাসা দীনার হ·ন্নে আগানজক, ‘আংনি ফিল·বাখুজানা দিপ্পাৎ ইখো রা·এ বাদিংবো।’

14“ইন্দিবা বিনি হা·সংনি মান্দিরাং বিখো মিৎচিনুয়ামিং। ইনি গিম্মিন বিসং বিনি জা·মানো মান্দি ওয়াত্তেতি আগানেতজক, ‘চিংনি সাক্কাও ইয়া মান্দিনি রাজা হং·আখো চিংআ হাম·জা।’

15“ইন্দাকোবা বিয়া রাজা হং·আনি বিলখো মা·ন্নে রি·বাফিলজক আরো জেরাংনা থাংখা হ·ন্নামিং উয়া সাকচিখুং নকখলরাংখো রিংগামে রা·বাখানা গি·য়েৎজক। বিসং বাদিংএমিংনা সা বাসিক মান·দাপজক উখো বিয়া হা·আইনা হাম·জক। 16স্খাংগিবা রি·বাএ ইনজক, ‘গিত্তেল, নাং·নি থাংখাচা আংআ চাংচিখুং মান·দাপজক।’

17“রাজা বিনা আগানজক, ‘নাম্মেন দাকজক। না·আ নামগিবা নকখল। না·আ বাং·গিজানি গিম্মিন বিবিগিবা হং·জক ইন্নে আংআ নাং·না সং দামচিখুংখো নিরকখিনা হন·জক।’

18“গ্মিগিবা নকখল রি·বাএ আগানজক, ‘গিত্তেল, নাং·নি থাংখাচা আংআ চাংবংআ মান·দাপজক।’

19“বিয়া উয়া নকখলনা আগানজক, ‘না·আ সং দামবংআখো নিরকখিনা মা·ন্নুয়া।’

20“উনি জা·মানো সাকগিপ্পিন নকখল রি·বাএ আগানজক, ‘গিত্তেল, আংআ নাং·নি থাংখাখো রুমালো খাথমে দন্নামিং। 21নাং·নি গিম্মিনো আংআ খেনবিয়ামিং মুয়ানা না·আ খা·গ্রাক মান্দি; না·আ জেখো চিম্মংজা উখো রা·এ দংআ আরো জেখো গি·জা উখো রাত্তা।’

22“উনোন রাজা আগানজক, ‘ও দেংগু নকখল! নাং·নি খু·সুকচান আংআ নাং·খো বিচাল দাকনুয়া। না·আদে হা·আইয়ান, আংআ খা·গ্রাক মান্দি; জেখো চিম্মংজা উখো রা·এ দংআ আরো জেখো গি·জা উখো রাত্তা। 23ইন্দিদে আংনি থাংখাখো না·আ মুয়ানা বাদিংগিবাচা দনজাজক? ইন্দাকোদে আংআ রি·বাএ থাংখাখোবা মা·ন্নুয়ামিং আরো উমুং অকখিসা সুদবা মা·ন্নুয়ামিং।’

24“জেরাং রাজানি সেফাংও চাদেংএ দংআমিং রাজা বিসংখো আগানজক, ‘বিচাখো উয়া রিৎচাসা দীনারখো রা·রিকবো আরো হাজালসা দীনার দংগিবানা উখো হন·বো।’

25“উনোন উয়া মান্দিরাং রাজানা আগানজক, ‘গিত্তেল, বিচাদে হাজালসা দীনার দংআন।’

26“রাজা আগানজক, ‘আংআ না·সংনা আগানিংআ, দংগিবানা আরোবা হন·দাপনুয়া, ইন্দিবা জেচা দংজা বিচা দংগিবাখোবা রা·আংস্রাংনুয়া। 27আংনি বোবিলরাং জেরাং আংনি রাজা হং·আখো হাম·জা, বিসংখো ইনোনা রিমবাবো আরো আংনি মিকখাংও স·ওতে গালবো।’ ”

যিরূশালেমো রাসং চাএ নাপ্পা

28ইয়া খাৎথারাংখো আগানানি জা·মানো যীশু বিসংনা স্খাং স্খাং যিরূশালেমচানা রি·য়াংজক। 29বিয়া জৈতুন হা·ব্রিনি জা·রেকো দংগিবা বৈৎফগী আরো বৈথনিয়া সংওনা সকবাওন বিনি সাকগ্মি জা·রিকগিবাখো ইন্দাকে আগানে ওয়াত্তেতজক, 30“না·সং মিকখাংনি উয়া সংচা রি·য়াংবো। উনো নাপমিত্তিংও মাংসা গাধা বি·সাখো খায় দন্নাখো নিকনা মা·ন্নুয়া। উনি সাক্কাও দারাংবা মামুং সালোবা গাখাতখুজা। উখো এংএ ইনোনা রা·বাবো। 31‘মুয়ানা উখো এংআ’ ইন্নে সাবা সিং·ওদে, উনোদে আগানবো, ‘গিত্তেলনা নাংআ।’ ”

32জা·রিকগিবারাং রি·য়াংএ যীশুনি আগানা গিত্তান গিম্মিকখো নিকনা মান·জক। 33বিসং উয়া গাধা বি·সাখো এংমিত্তিংওন বিসংখো নকগিবা সিং·জক, “না·সং বি·সাখো মুয়ানা এংইংআ?”

34বিসং আগানজক, “গিত্তেলনা নাংআ।”

35জা·মানো জা·রিকগিবারাং উয়া গাধা বি·সাখো যীশুচা রা·বাজক আরো উনি সাক্কাও বিসংনি বে·এননি বা·রারাংখো আন্নে যীশুখো আসংএতজক। 36বিনি রি·য়াংমিত্তিংও মান্দিরাং আন·থাংথাংনি বে·এননি বা·রারাংখো রামাও আনদাপনা হা·বাচেংজক।

37ইন্দাকে যীশু যিরূশালেমনি সেফাংও রি·বাএ জৈতুন হা·ব্রিওনি হং·ওনবাগিবা রামাওনা রি·বাজক। যীশুমুং বিনি বাং·আ জা·রিকগিবারাং দংআমিং। উয়া জা·রিকগিবারাং বিনি বিল্লাকগিবা কামরাংখো নিক্কানি গিম্মিন খুসি হং·এ চ্রিকে ইসলখো রাসং দাক্কে ইন্না হা·বাচেংজক,

38“গিত্তেলনি বিমুংও রি·বাগিবা রাজানি

রাসং হং·খানা!

সালগিওন থম·থমা,

আরো উয়ো ইসলনি রাসং ফারাকা।”

39মান্দি বাং·আওনি মিত্তাম ফরীশীরাং যীশুনা আগানজক, “স্খিগিবা, নাং·নি জা·রিকগিবারাংখো জ্রিপ দংখানা আগানবো।”

40যীশু বিসংনা আগানজক, “আংআ না·সংনা আগানিংআ, ইরাং জ্রিপ দাক্কে দংওদে রং·থিরাং চ্রিকনুয়া।”

41বিসং যিরূশালেমনি সেফাংও রি·বাওন যীশু উয়া সংজিলমাখো নিএ গ্রাপজক। 42বিসং আগানজক, “আইয়াও, থম·থমাখো মা·ন্না জেখো দাকনা নাংআ, হো·এ দা·আল না·আ উখো হা·আইচাক্কোদে! ইন্দিবা উয়া দা·আও নাং·নি মিক্রোননি মিৎথিনাও দংআ। 43নাং·না ইন্দাকগিবা সাল সকবানুয়া জেনসালো বোবিলরাং নাং·নি সাক্কাও চাংফেংনুয়া আরো নাং·খো উইলউইলে দংনুয়া আরো গিম্মিক গিত্তা নাং·খো সিকচেচেপনুয়া। 44বিসং নাং·খো আরো নাং·নি নিং·আও দংগিবা মান্দি গিম্মিকখো রি·ম্মে হা·আও গোস্থাপনুয়া আরো রং·থি গি·সানি সাক্কাও রং·থি গি·সাখো দনজানুয়া, মুয়ানা ইসল জেনসালো নাং·ও গিসিক হ·ন্নামিং উয়া সালখো না·আ হা·আইএ রা·জাজক।”

45উনি জা·মানো যীশু থরম নক্কো নাপ্পে বাদিংগিবারাংখো হা·রিকেতজক। 46বিয়া উয়া বাদিংগিবারাংনা আগানজক, “রংথালগিবা শাস্ত্রও চক্কা দংআ, ‘আংনি নক বি·আনি নক হং·নুয়া,’ ইন্দিবা না·সং উখো রা·সেকগিবারাংনি হা·খল দাক্কে রা·জক।”

47যীশু সালাজ্রিংআন থরম নকচা রি·য়াংএ স্খিনা হা·বাচেংজক। খামাল দাল·গিবারাং, শাস্ত্র স্খিগিবারাং আরো মান্দিরাংনি দাল·গিবারাং বিখো স·ওতে গালনা হাম·জক, 48ইন্দিবা বাদিকে দাক্কে উখো দাকনুয়া উনি গিম্মিনো মামুং চলখো বিসং সান্দিয়ে মান·জাজক, মুয়ানা মান্দিরাং গিসিক নাংএ বিনি খাৎথা গিম্মিকখো খিন্নানুয়ামিং।

सध्या निवडलेले:

লূক 19: GLNT

ठळक

सामायिक करा

कॉपी करा