Luka 22
22
O Pisahalaka to Sapipatayaw ci Yisan
(Matay 26.1-5; Maroko 14.1-2; Yohani 11.45-53)
1Maraodto ko Ka^caan Pipatamod to ^Pang a Lisin (o roma a sowal i, Pita'lifan a Lisin). 2Tona matalaw to finawlan ko kakridan no citodongay to ta'ong ato pasifana'ay to Rikec, kilim saan cangra to pakayraan a midokdok a mipatay ci Yisan.
O Pipacakay ni Yuta ci Yisan
(Matay 26.14-16; Maroko 14.10-11)
3Itiya i, micomod ci Satan i faloco' ni Yuta o Iskariyot a tamdaw. (O ccay no tosa ko safaw a tarokos ni Yis ci Yuta.) 4Saka, tayra sato ci Yuta i kakrikridan no citodongay to ta'ong ato kakridan no midipangay a tayring no Fangcalay Pita'ongan a masasowasowal to samaanen ko pipatorod ci Yis i cangraan. 5Rahker sa cangra saka, kton sato to sowal to sapafliaw i cingraan to payso. 6Saka, hai sato ci Yuta, ta misatapangto a misa'imer to kanga'ayan a romi'ad, yo caho kafanafana' ko finawlan i, itiya a mipatorod ci Yisan i cangraan.
O Pitahka na Yis to Pita'lifan a Lisin
(Matay 26.17-25; Maroko 14.12-21; Yohani 13.21-30)
7Itiya i, maraodto ko pipacokan to tofor a siri to saki Pita'lifan a Lisin, o Ka^caan Pipatamod to ^Pang a romi'ad itiya. 8<<Katayra a mipatala to malotahka ita to saki Pita'lifan a Lisin,>> han ni Yis ci Pitiro aci Yohani a miocor.
9<<I cowa kami a mipatala saw?>> han nangra ci Yis a milicay.
10Pasowal sa ci Yis, <<Ano micomod kamo i niyaro' i, o mamalitmoh namo itira ko mi'orongay a tamdaw to ciparoay to nanom a koreng. Haklongen namo cingra tangasa i picomodan ningra a loma'. 11<I cowa ko malokamaro'an Ako ato nisawawaan Ako a komaen to saki Pita'lifan a Lisin? sanay ko Singsi,> han a milicay ko tawki noya loma'. 12Ta o papa'arawen ningra kamo to ccay a tata'angay a rawang i sakatosa a tingroh no loma', malkairaira ko lalosidan itira. Kaitira kamo a mipatala,>> han ni Yis.
13Tayra sato cangra. Mado^do ko nisowalan ni Yis. Saka, patala sato cangra itira to malotahka nangra to saki Pita'lifan a Lisin.
O Saki Tapang a Lafi
(Matay 26.26-30; Maroko 14.22-26; 1 Korinto 11.23-25)
14Maraodto ko toki saka, laccay sato ca Yis ato tarokos a mitahka. 15Pasowal sa ci Yis i cangraan, <<Wata: ko kahalamham Ako to sakalakapotaw ita a mitahka tonini a saki Pita'lifan a Lisin i 'ayaw no pisemsem Ako. 16Sowalen Ako kamo, tangasa i kalahcian nonini a dmak i Kitakit no Kawas i, caayto ko mamiliyaw kako a mitahka to matiniay,>> han Ningra.
17Ta tatoy sato ci Yis to takid. Kansiya sa Cingra to Kawas, ta sowal sa i cangraan, <<Dada, alaen a komaen. Ala'inip'inip han konini a takid. 18Sowalen Ako kamo, i ikor nonini, ano caay ka tangasa i katalahkalan no Kitakit no Kawas i, caayto ko mamiliyaw Kako a komaen tonini a ^pah,>> han Ningra.
19Ta tatoy sato ci Yis to ^pang. Kansiya sa Cingra to Kawas, ta pcih han Ningra konini a pafli i nisawawaan. Sowal sa, <<O todong no makinafalahay to saki tamowanan a tireng Ako konini, haenen ko piharateng namo i Takowanan,>> han Ningra. 20Mahrek cangra a komaen, haenen Ningra ko dmak a mitatoy to takid a somowal, <<O lalowadan no fa^lohay a katatlek ato Kawas a masadakay to saki tamowanan a rmes Ako konini.
21<<Nengnengen, ira a mikapot i Takowanan a mitahka koya pacakayay i Takowanan a tamdaw. 22O mamado^do no Wawa no Tamdaw ko nisa'osian no Kawas a dmak to pakayniay i sakapatay. Nikawrira, o cacilafo koya pacakayay i Cingraan a tamdaw,>> han Ningra.
23Saka, <<Cima ita ko sapihaenananay to dmak?>> saan cangra a malalicalicay.
O Kalaliyaliyang to Nika Cima ko Satadamaanay
24O romasato, malaliyaliyang ko nisawawaan to nika, <<Cima no mita ko mamalasatadamaanay hakiya?>> saan cangra. 25Pasowal sa ci Yis i cangraan, <<O mikowanay to finawlan ko hongti nonini a hkal, o midipotay han no finawlan ko mikowanay. 26Nikawrira, caay ko hahaenen ko no namo. O mamalosasafaay ko satadamaanay namo. O mamalomatayalay ko kakridan namo. 27O mitahkaay ato matayalay a patahka a tamdaw i, cima ko tadamaanay saw? Ora mitahkaay a tamdaw. Nikawrira, o matayalay ko dmak Ako a mikapot i tamowanan.
28<<I kapadesan Ako i, mararid kamo a mikapot i Takowanan. 29Orasaka, matiya o pipatorod no Wama takowanan to sakowan ko nipipatorod Ako i tamowanan to sakowan. 30O mamikapot kamo i Takowanan a komaen a mita'owak i nikowanan Ako a Kitakit. O romasato, o mamaro' kamo i tadamaanay a kamaro'an a misawkit to tosa ko safaw a ngangasawan no Israil.
O Pipali'ayaw ni Yis to Pihakeno ni Pitiro
(Matay 26.31-35; Maroko 14.27-31; Yohani 13.36-38)
31<<Simonaw, Simonaw, haratengen, mahayda ci Satan a milifet i tamowanan. Samatiyaen nira o pifitay to ^mi ko pilifet nira i tamowanan. 32Nikawrira, mitolon Kako to saki tisowanan to saka^caaw ka lasawad no piti'er iso to Kawas. Saka, ano pasasiyorto ko faloco' iso i, o papa'icelen iso ko faloco' no salikaka iso,>> han ni Yis.
33Paca'of sa ci Pitiro, <<Tapangaw, ano nika rofoto, ano nika patayto Iso i, ma^dengto kako a mikapot i Tisowanan,>> han ningra.
34Nikawrira, sowal sa ci Yis, <<Pitiroaw, pasowalen Ako kiso, i 'ayaw no nika skak no 'ayam ano dafak i, wa kinatolo kiso a mihakeno i Takowanan,>> han Ningra.
Papaysoan ato Lofoc ato Fonos
35Pasowal sa ci Yis i nisawawaan Ningra, <<Aka ka cipapaysoan, aka ka cilofoc, aka ka cicokap yo han Ako kamo a miocor i, ira ko maan a kacango'otan namo saw?>> han Ningra a milicay.
<<Awaay,>> han nangra a paca'of.
36Pasowal sa ci Yis i cangraan, <<Nikawrira, o tatatoyen no cipapaysoananay a tamdaw anini ko payso ningra. O tatatoyen no cilofocay a tamdaw ko lofoc ningra. O awaay ko fonos a tamdaw i, o papacakayen ningra ko kafafang ningra to sapi'aca to fonos. 37Sowalen Ako kamo, <O mikapotay to ciraraway a tamdaw Cingra a masa'osi,> yasanay a matilid i Fangcalay Cudad i, caay ka ^ca o mamalahci i Takowanan konini. Nawhani o mamalahci ko matiliday i Fangcalay Cudad to pakayniay i Takowanan a dmak,>> han ni Yis.
38Pasowal sa ko nisawawaan, <<Tapangaw, nengnengen, ini ko tosa a fonos,>> han nangra.
<<Ma^dengto!>> han ni Yis cangra.
O Pitolon ni Yis i Olif a Lotok
(Matay 26.36-46; Maroko 14.32-42)
39Miliyas ci Yis to niyaro' a matiya to hatiniay a tayra i Olif a lotok. Mihaklong ko nisawawaan i Cingraan. 40Yo tahirato cangra itira i, pasowal sa ci Yis i cangraan, <<Pitolon kamo, to saka^caaw ka sawi,>> han Ningra.
41Ta liyasen ni Yis cangra. Ma^deng a tahira ko nitkolan a fokloh ko nipiraay Ningra cangraan. Ta pitosor sa Cingra a mitolon. 42Sowal sa, <<Wamaaw, ano o faloco' Iso i, paliyasen konini a 'anengeray a takid! Nikawrira, aka ka o no Mako a harateng ko tatooren. Ka o no Miso a nafaloco'an ko lalahcien,>> saan Cingra. [ 43Itiya i, ira ko ccay a coyoh nai kakarayan a tayra i ci Yisan a pa'icel. 44Tata'ang ko rarom ni Yis saka, mangalef a mangalef ko pitolon Ningra. Samatiya sato o nika tara^ta' no rmes ko nika loso' no sino^et#22.44 sino^et -- o roma i, cifrang (sifo'), ifangat (Fata'an), cahiw (ka'amis). Ningra i sra.#22.44 Ira ko awaay a matilid i katlangay a cudad konini a 43-44 a tosir.]
45Mahrek a mitolon i, lowad sato ci Yis a tayra i nisawawaan, 'arawhani, marda' cangra to nano rarom nangra. 46Saka, sowal sa ci Yis i cangraan, <<Nawiro mafoti' kamo saw? Kalomowad. Pitolon to saka^caaw ka sawi,>> han Ningra.
Marpet ci Yis
(Matay 26.47-56; Maroko 14.43-50; Yohani 18.3-11)
47Yo pasowalho ci Yis i, irato a miraod ko finawlan. Oya ccay no tosa ko safaw a tarokos ci Yuta ko mikriday i cangraan. Copa sa cingra to sapicocopan ci Yisan. 48Sowal sa ci Yis i cingraan, <<Yutaaw, o picocop iso ko sapacakay iso to Wawa no Tamdaw haw?>> han Ningra.
49Nengneng sa ko mikapotay ci Yisan a nisawawaan tonini a dmak i, sowal sa, <<Tapangaw, tapa'aw niyam to fonos haw?>> han nangra. 50Sodoc sa to fonos ko ccay nangra a mitapa' to koli no sakakaay no citodongay to ta'ong a mikrit to kawanan a tangila ningra.
51Sowal sa ci Yis, <<Sawaden. Hatiraen aca,>> han Ningra. Ta kapa han Ningra ko tangila noya koli a miadah.
52Saka, pasowal sa ci Yis toya tayniay a mirpet i Cingraan a kakridan no citodongay to ta'ong ato kakridan no midipangay a tayring no Fangcalay Pita'ongan ato kalas no niyaro', <<Nawiro samato mico'ayay sa to kokong a cifonos a cisapalo kamo a tayni a mirpet i Takowanan saw? 53Mikapot Kako i tamowanan to romi'ami'ad i Fangcalay Pita'ongan i, caay ka sapirpetan kamo i Takowanan. Nikawrira, o piri'angan namo a romi'ad i matini, makowanto no 'icel no to'manay,>> han ni Yis.
O Pihakeno ni Pitiro i ci Yisan
(Matay 26.57-58, 69-75; Maroko 14.53-54, 66-72; Yohani 18.12-18, 25-27)
54Itiya haw i, rpet han nangra ci Yis a mikrid a patayra i loma' no sakakaay a citodongay to ta'ong. Pakaraaraay sa ci Pitiro a mikotod. 55Milikat cangra to namal i potal, maro' ko tamdamdaw itira a milaop, kihatiyatiya sa ci Pitiro i laloma' nangra. 56Itiya i, ma'araw no ccay a matayalay a fafahiyan ko nika maro' ni Pitiro i tatihi no namal. Sapalitalita sa cingra a minengneng. Sowal sa, <<O kapot ni Yis konini a tamdaw!>> saan.
57Nikawrira, mihakeno ci Pitiro a somowal, <<Patras sa kiso o fafahiyan a somowal. Caay ka fana' kako tora tamdaw!>> han ningra a somowal.
58Nanoya, ma'araw no roma a tamdaw ci Pitiro. <<O kapot nangra kiso!>> han ningra.
Pasowal sa ci Pitiro, <<Idang, caayay!>> han ningra.
59Nanoya, mata'lif ko ccay a toki i, ira ko roma a tamdaw a somowal, <<So'linay o kapot ni Yis konini a tamdaw, nawhani o Kalili a tamdaw cingra!>> han ningra a mipa'icel a somowal.
60Nikawrira, paca'of sa ci Pitiro, <<Idang, caay ka fana' kako tora nisowalan iso!>> han ningra.
Yo somowalho cingra i, maskak ko 'ayam. 61Sikol sa ko Tapang a pamotek a minengneng ci Pitiroan. Itiya i, maharateng ni Pitiro ko nano nisowalan no Tapang toya, <<Anini, i 'ayaw no nika skak no 'ayam to dafak i, wa kinatolo kiso a mihakeno i Takowanan,>> sanay. 62Ta sadak sato ci Pitiro a miongong a tomangic.
O Pisamsam ato Pisti' ci Yisan
(Matay 26.67-68; Maroko 14.65)
63Samsamen no misimaway ci Yis a misti' i Cingraan. 64Tahpoen nangra ko mata Ningra. <<Cima ko misti'ay i Tisowanan? Pasowalen kami,>> han nangra a milicay. 65Lokesen nangra ci Yis a somowal to masamaamaanay a tatiihay a sowal.
Masawkit i Pilaocan
(Matay 26.59-66; Maroko 14.55-64; Yohani 18.19-24)
66Yo ta^ngadto i, masa'opo ko kalas no niyaro' no Yutaya a tamdaw ato kakridan no citodongay to ta'ong ato pasifana'ay to Rikec. Kriden nangra ci Yis a patayra i pilaocan nangra. 67Licayen nangra Cingra, <<Pasowalen kami, ci Kristo Kiso haw?>> han nangra.
Nikawrira, sowal sa Cingra, <<Ano pasowasowalen Ako kamo i, caay ko papaso'lin kamo. 68Ano licalicayen Ako kamo i, caay ko papaca'of kamo. 69Nikawrira, i ikor nonini i, o mamaro' koya Wawa no Tamdaw i kawanan no Tadaci'icelay a Kawas,>> han Ningra.
70Sowal sa cangra a ma^min, <<Ano hatira i, o Wawa no Kawas Kiso saw?>> han nangra.
Pasowal sa ci Yis, <<O sowal namo konini!>> han Ningra.
71Sowal sa cangra, <<O maanho ko lalongocen ita a maan aca a wacay! Mato^toto ita a matngil ko sowal Ningra!>> saan.
सध्या निवडलेले:
Luka 22: AMIS2019
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© The Bible Society in Taiwan, 2019
