Genese 3
3
Ekaroa ve maea hahehahe, kai haela ve haiae
1Aualari karikivahaeape loa loalula eharu oaria va mekaka, aka Ekaroa hiki are va hehepo eharu havahu. Are uamari maeape: “Aualari ealilara leari maeape ha? Evalila oru ve kora ve hae le v'arekaea ha”? 2Uamari ekaroa kavale maeape: “Elalila oru ve kora ve hae larive, heroe; 3aka Aualari ve oharo maria: ‘Oru ve aru hihi ve la kora ve hae kalelue, kai arero mai kapaealue, ealila apihaeaki ave’.” 4Aka ekaroa uamari maeape: “Ealila apihaea va ka: 5ehovea Aualari ore e va larilai la hoa e va ikiore hovea hovea leikilai, e va veveke i heaha ila ore leikilai, Aualari ve la ikiore hovea hovea le leikilai”. 6Laelave, uamari ovohae eavape la kora ve hae va eapai veveke, aeka areve maea va mekakure, aeka are haela ve ikivere kora ehovea ikiore avarakive, are la hae ikaea le lape; are aeka hae uku areve vila kara avarape, kai are kara le lape. 7La hoa erealilave ovohae le kohelaukape; erealila ore le leivahaeape erealila va maheheare; erealila lauka kora koro koravape, kai erealila ve hopa le hahaeape.
8Mea vevehere leipe la hoa, Iehova Aualari oru ureve loa vea velaripe, kai erealila areve āra iapape, la hoa la haela i uva ila muruhari kora koro ureve arahukape, ehovea erealila Iehova Aualari ve oropa ve epavakive oaoka leivahaeape. 9Iehova Aualari haela itavi mariape: “A lahoa ha”? 10Are maeape: “Ara ave āra oru ureve la iapaila la hoa, ara oaoka laleila, ehovea ara maheare, laelave ara kaipu laraila”. 11Are maeape: “A va maheare la oharo aro leita lamaeaila ha? Ara a v'ila pupu leipe la kora hae a larila ha” 12Haela maeape: “A araro avikiarape, ehovea ara i hareho aeakive, la uamari, are la kora ve hae araro avilakiaraila, kai ara larila”. 13La hoa Iehova Aualari la uamari maeape: “A va learia eharu laleila ha”? Uamari maeape: “Ekaroa araro lakurupaeaila; ara le larila”.
14Iehova Aualari ekaroa maeape: “Ehovea a maria laleila, boromakau eharu oaria kai loa loalula eharu oaria va haiae perehekai, a kai haiae eapapo. A va eharau ve hae veakilai, ave ovokake hoa haiapo a va kekele mahuvu larilai. 15A va uamari ve iri haela leikilai, ave akoremari kai areve akoremari v'ila aeha hiki leivahaeakilai. Ere kai ave haro loa huharakilai, a kai ereve loa ikipi buravakilai”. 16Are uamari maeape: “Ave ero leiki hoa ara aro kakare eapapo avarakilai; a va kakare eapapo ila akoremari erakilai. Aka a va vila ve ikivere hiki kekelakilai, are a v'ila amua haela leikilai”. 17Are Adamu kai maeape: “Ehovea a va uva ve oharo hiki la iapaila, kai ara a v'ila pupu leipe la kora ve hae mariape ‘Arero kalelue’ a le larila; kekele kara a v'ila heaha le laleila, ehovea ave haiae. Ave ovokake aeaki hoa a va horova hiki ve areve iele larilai. 18Kora mare kai hohe mamareke ara va aro avarakilai. A va oru ve la kora mere larilai. 19Ave oropape orovahe ila pai larilai, aiai a havahu aeka kekele ve helari hoaukilai; ehovea ara aro kekele ve kaivape, a va kekele mahuvu, kai kekele mahuvu ve leia kai hoaukilai”.
20Haela areve uva rare Eva rare itavape, ehovea are va ovokake haela oaria ve uvari. 21Kai Iehova Aualari Adamu i Eva ila ve animala iilu pura karikipe, erealila elare maea oreaupe.
22Kahara, Iehova Aualari maeape: “Eavaila, la haela, elaviila hovea hovea laleila, ehovea are veveke i heaha ila ore laleila. Ma hoa are mai horapai ovokake kora ve hae ikaeaki ave, kai larive la hoa ovokake haiapo avaki ave”. 23Laelave, Iehova Aualari erealilara Edena la oru ve le paparaehape, areve maea ve karikipe la kekele kai ihakive. 24Are la haela avakape, Edena la oru ve; kauri ukaki are Kerubima paparaehape, kai a uru ila helarivila poke, ehovea ovokake kora ve la okiharo kiva leikive.
सध्या निवडलेले:
Genese 3: ORO
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Published by the British and Foreign Bible Society 1963-1972