Matíe 9
9
Zozíi yalɩma kplákplányɔ
(Málɩ́kɩ 2.1‑12; Lúkɩ 5.17‑26)
1Zozíi bhá gɔ́lʋ́ lé ɔ́ mʋ ɔ bhlé a dú a mnɩ́.#9.1 Ɔ́ srʋ àmɔ̀ mà, Kapɛnayʋ́mʋdùò, ʋ́mʋ́ á wlele wá Zozíi ɔ bhlé. A zɛlɩɩ sáà Matíe 4.13. 2Ɔ́ kʋ mɔ̀ɔ lé nyʋa ŋwʋ́ kplákplányɔ àmàkɩ lé á lɔɔ́ mɔ́. Zozíi yɛ́ a fádùò a, ɔ́ srʋ kplákplányɔɔ́ mà: «Tɛ́ma mʋ́, mà nà nyumoé ya mɔ̀ cielo!» 3Lɔ̀ a másɛnyʋaá zùòo kʋ̀ la ʋ́ a, á srʋ á nyoku mà: «Nyɔɔ́ lɩ̀à nɩ́ Lagɔ nyɔ kʋ́ bhá.» 4Mà Zozíi yɩbhlɩ á duo kʋ́ a wɔlɩ́ a, ɔ́ srʋ á mà: «Ɛ̀kʋ̀ʋ̀ lé a ka sɩ́tɛ̀ a nyumo bhobhoé a di a mnɩ́ à? 5Srʋ nyɔ mà: Nà nyumoé yà mɔ̀ cielo, ɩ́zà soglù kà mʋ a, ànɩ̀gbá kɩ̀ɩ cícíé fíi kʋ́ a? 6Naa, a ka lé a ká saá yɩbhlɩ mà, dɛ́ dʋ̀dʋ kʋ́, Nyɔɔ́ a Yuwliyʋɔ́ ka pɔ́wa lé ɔ ká nyʋa a nyumoé ciè.» Ɔ́ cíi lé ɩ́ bhli a, ɔ́ srʋ kplákplányɔɔ́ mà: «Soglù, bháʋ́ nà àmàkɩ̀ɛ̀ lé mʋ gbó!» 7Á kʋ dáamúó lé nyɔɔ́ soglù lé ɔ́ mʋ gbó. 8Mà nyʋa fɩ́ɛ́ kʋ̀ la ʋ́ a, ŋanɩmɛ yilaá kʋ́, ɩ́ nɩ lé á fa Lagɔ ŋwnú, cémʋ́ Lagɔ nɩ lé ɔ́ nyɛ́ yrúkanyʋa bhʋ́anɩ a pɔ́wa a.
Zozíi srʋ Matíe mà ɔ jɩ́ ɔ́ kʋ́
(Málɩ́kɩ 2.13‑17; Lúkɩ 5.27‑32)
9Tányɩɛ́ mʋ́ Zozíi mʋ a, ɔ́ yɛ́ lapóo a kʋbhlinyɔ a múó, ɔ́ bɔ́ɔ lapóo a nɔnʋzrɩ̀da, ɔ́mɔ́ á wlele Matíe, ɔ́ srʋ ɔ́ anɩ́: «Jɩ́ mɔ́ɔ kʋ́!» Lé Matíe soglù lé ɔ́ jɩ́ ɔ́ kʋ́. 10Zozíi kʋ Matíe a gbó ɔ́ lie lé lapóo a kʋbhlinyʋa àna kɔ́kɔ́mnɩ́ yà bhàlʋ̀nyʋa sɔ́ yi ɔ yà ɔ́ kʋjɩ̀nyʋ̀àà sɔ́ gɔ̀ li ka. 11Mà tányɩɛ́ mʋ́ Falizɩ́ɛnyʋaá yɛ́ á, á yrá ɔ́ kʋjɩ̀nyʋ̀àà mà: «Ɛ̀kʋ̀ʋ̀ lé a másɛɛ́ yà lapóo a kʋbhlinyʋaá yà bhàlʋ̀nyʋ̀àà lɩ̀à sɔ́ lile kʋ́ à?» 12Zozíi nú wɔlɩ́ɛ́ á cí a, ɔ́ srʋ á mà: «Nyʋaá gú nɩ́ bhlá a, a nɩ́ yrá dɔ̀tányʋa, mà gupuonyʋa yrá dɔ̀tányʋa. 13A mʋ lé a mʋ́mɔ wɔlɩdrèè Lagɔ cí a, á gba, à ŋwɔ́ɔ lɛ́ mà: Wɔlɩdrèè ɩ́ yrá lɛ nyɔ mʋ́ a, ámá ŋwɔ́ɔ mà, nyɔ ka ŋazɩ̀dùò, ɩ́mɩ́ ɩ́ bhá mɔ̀ɔ lé ɩ́ zi bʋbɔ̀lɩ á sasʋ́ kʋ́. #9.13 A zɛlɩɩ sáà Ozée 6.6.
Nɩ́ sáà námanyʋa wle ka yi, mà bhàlʋ̀nyʋa á zà ɩ́ yi.»
Kleé a pʋlɛ a wɔlɩ́
(Málɩ́kɩ 2.18‑22; Lúkɩ 5.33‑39)
14Tányɩɛ́ a múó, Zán Batísɩ a kʋjɩ̀nyʋ̀àà yi Zozíi gɔ̀ lé á yrɔ́ɔ́ mà: «Másɛɛ̀, ɛ̀kʋ̀ʋ̀ lé àmɔ̀, à yà Falizɩ́ɛnyʋa sɔ́ à pʋ́lɛ kɔ́ɔ̀kɔ́ kleé, bhè nà kʋjɩ̀nyʋ̀àà nɩ́ pʋ́ʋ kleé à?» 15Bhʋ́ Zozíi srʋ á mà: «A yì saá mà nyɔɔ́ ɔ̀ síé a, lé ɔ̀ wlee ɔ lía a, á yio drɩ̀ kʋ lé á yi kʋ́ʋ? A nɩ́ ka míi! Yruú nà kà ʋ́ kʋ lé a ká á yʋwlɩɛ́ nyièdɩ sa à, bhʋ́ a tányɩɛ́, á yi yɩ́ kleé pʋ́ʋ.» 16Lé Zozíi srʋ á sɔ́kʋ́ mà: «Nyɔ nɩ́ bhá lokupɩʋ yalʋ, lé ɔ́ ká kótu zʋ pákɩ. A nɩ nií a, yruó kʋ́ á wɔlɔɔ̀ kótuó lé ʋ́ yɛ a, lokupɩʋ yalʋɔ́, jrie kótu zʋ̀ɔ̀ lé ʋ́ yrɔ lé fleé ghlímole. 17A nɩ́ bhá sáà nɔyalʋ lé a kʋ́ʋ jìdàní#9.17 jìdàní: Nyidìè mnɩ́ á ŋwʋ́ɛ́ wá nyú, bhlibhlʋ yà nʋ́ sɔ́ sá. gbɩ a mnɩ́ sá ŋwʋ́ʋ. A nɩ nií a, nʋ́ɔ́ bháalɛ lé jìdàníé wɔwlɔ lé nʋ́ɔ́ kɔ́sɔlɛ sá lé jìdàníé ya nʋ́ɔ́ sɔ́ ŋátɔ. Ɩ́ ka ŋnɩ́ a, nɔyalʋ, jìdàní yalɩ a mnɩ́ á ŋwʋ́lʋʋ́ sá bhʋ́ jìdàníé yà nʋ́ɔ́ sɔ́ nɩ́ ŋátɔ.»
Zozíi yalɩma ŋwnɔ́ lé ŋnɩ́keyʋ galɔ̀
(Málɩ́kɩ 5.21‑43; Lúkɩ 8.40‑56)
18Zozíi kʋ cída lé Zúfʋnyʋa a cífɩ srɔɔ drɩ̀ koti sá lé ɔ́ srʋ ɔ́ mà: «Másɛɛ̀, ná ŋníkeyʋ ya kakamnɩ́lɛ́ kú, Ɩ́bhìè yi bhè gbɛlɔɔ́ glɔ̀gbá jɩ̀, ɔ ká galɔ̀ àyé.» 19Lé Zozíi soglù lé ɔ yà ɔ́ kʋjɩ̀nyʋ̀àà sɔ́ jɩ́ nyɔɔ́ kʋ́ lé á mʋ. 20Mà á mnɛ lé ŋwnɔ́ a múó dòlú wlʋ́ɛ́ gɔ̀ a, ɩ́ lɩkpɩ kʋ́gbá lɩkpɩ sɔ́ lɛ̀, ŋwnɔ́ɔ́ la Zozíi bɩ́ lé ɔ́ gbɔ́ ɔ́ bàna a nimnuó. 21Ŋwnɔ́ɔ́ srʋ ɔ nyoku mà: «Nɩ́ trányɩ lé nɩ gbɔ́ ɔ bàna a, ɩ́ yi yalɩma.» 22Zozíi yrɩ́bha lé ɔ́ dʋdʋ̀ ŋwnɔ́ɔ́, lé ɔ́ srʋ ɔ́, ɔ́ anɩ́: «Ná yʋ́ʋ, tɛ́ma mʋ́ mà nà fádùò ya ʋ́ mɔ̀ɔ neé sa à!» Ɔ́ cíí kɔ́ɔ̀kʋ́ a, ŋwnɔ́ɔ́ ɔ́ɔ yalɩma. 23Mà Zozíi ŋnɩ cífɩɛ́ a gbó lé ɔ́ yɛ́ lɔbhlɩfàkwùè yà nyʋa a zumole sɔ́ a, bhʋ́ ɔ́ sa né lé ɔ́ srʋ á mà: 24«A wlʋ́ ʋ́, a flʋ zɔ̀, mà ŋnɩ́keyilɛɛ́ nɩ́ kú ɔ́ɔ ŋwɔ́mɛ.» Ɔ́ cí kɔ́ɔ̀kʋ́ átɛ̀ a áa nyɩalɛ yɩ́ ɔ́mɔ́. 25Tanyɩɛ́ mʋ́ á jɩ́ɩ nyʋaá lé á flʋ zɔ̀ a, bhʋ́alɛ́ ɔ́ pla sré lé ɔ́ bhli ŋnɩ́keyʋɔ́ a glɔ̀gbá kʋ́ a, ɔ́ɔ wlʋ́ kúyraá. 26Ŋnɩ́keyilɛɛ́ a galɔ̀wɔ̀lɩ̀ɛ̀ bháʋ́ bhʋ́anɩ bhlɩ́drèè a lɔ̀fɩ́ɛ́.
Zozíi yalɩma yɩ́cucúbhlanyʋa a sɔ́
27Zozíi wlʋ́ ʋ́ lé ɔ́ mʋ a, yɩ́bhlanyʋa a sɔ́ jɩ́ ɔ́ kʋ́ lé á pá gbanyìdi, á cíé mà: «Ɩ́bhìè Davídɩ a yʋ́ʋ, yɛ́ à gbɩ́ a ŋazɩ kʋ́ àyé!» 28Ɔ́ ŋnɩ gbó a, yɩ́bhlanyʋaá sɔ́ɔ́ ŋnɩ ɔ̀ mɔ́, bhʋ́ ɔ́ yrá á mà: «Cɩ́cása a mnɩ́ a yì saá mà ɩ́ yi ɩ̀lɩa míi?» Á ŋwnʋ́ kʋ́, á anɩ́: «Aan, Kanyɔɔ̀!» 29Bhʋ́ Zozíi gbɔ́ a yɩ́ɛ́ lé ɔ́ srʋ á, ɔ́ anɩ́: «A fádùò ya ʋ́ ayɩ neé sa a!» 30Lé nyʋaá sɔ́ɔ́ a yɩ́ɛ́ wlée. Mà Zozíi cílaá gɔ̀ námasa, ɔ́ srʋ á mà: «A mányɩ kʋ́, wɔlɩ́ɛ́ ɩ̀ ŋnɩ lɛ́ amɔ a, a ná cíí lé nyɔ kɩ́ɩ́ nú!» 31Mà áa sɔ́ɔ́ flʋ kɔ́ɔ̀kʋ́ zɔ̀ a, áa sa Zozíi a tesi bhʋ́anɩ bhlɩ́drèè fɩ́ɛ́ a mnɩ́.
Mùmùdɛ̀lɩ́ a yalɩmɛɛ́
32Yɩ́bhlanyʋaá mʋ kɔ́ɔ̀kʋ́ a, nyʋa fa sɔ́kʋ́ nyɔɔ́ nyumozùzu kʋ jɩ̀ lé ɔ̀ nɩ́ cí a, Zozíi gɔ̀. 33Mà Zozíi jɩ́ɩ nyumozùzùò, lé nyɔɔ́ bháaʋ́ cícíé kʋ́, neé mna nyʋaá fɩ́ɛ́ kʋ̀ ʋ́ a, á anɩ́: «À nɩ̀ kà wá wlʋ́ a, à nɩ́ à zà sɩ́tɛ̀ a wɔlɩ́ Izrayɛ́lɩbhlɩɛ́ lɩ̀à a mnɩ́ yɛ́ɛ!» 34Mà Falizɩ́ɛnyʋaá anɩ́: «Nyumozìzi a kámanyɔɔ́ a ŋnɩ́ mʋ́ ɔ́ jɩ́lɛ nyumozìzìè.»
Zozíi yà fákùè ɛ̀ nɩɩ́ tíenyɔ ka a sɔ́
(Málɩ́kɩ 3.6‑19; Lúkɩ 6.12‑16; 10.2)
35Zozíi plɩ́ɩ díkádɩ̀ɛ̀ yà dísʋsʋ́ɔ́ fɩ́ɛ́ sɔ́ a zúfʋcɛcɩghlɩɛ́ a mnɩ́, lé ɔ́ cɩ́a mɔ̀ɔ Lagɔ̀wɔ̀lɩ, ɔ́ cí sáà Lagɔ a Léyibhlɩɛ́ a Námadìè a wɔlɩ́ nyʋa gɔ̀, ɔ́ yalɩma gupuonyʋa lé ɔ́ sa nyʋa kalɩmɛ mʋ́. 36Ɔ nɩ dʋdʋ̀ nyʋa a zumole a, ŋazɩ yiloó kʋ́, nyʋaá ya sɩà lé bhobhoé ya á wlú zi, nànɩ́ bhlábhlɩ́ nɩɩ́ yɩ́gɔ̀ŋwʋ̀nyɔ ka à. 37Ɩ́ ka ŋnɩ́ lé ɔ́ srʋ ɔ́ kʋjɩ̀nyʋ̀àà mà: «Lágbàà nɩ́ bɛ́ bhè a fányʋa nɩ́ zù. 38Na, a bhibhie lágbàà a kanyɔ ɔ la fányʋa a ká ɔ lágbàà fá.»
सध्या निवडलेले:
Matíe 9: NEY
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© (Active), Wycliffe Bible Translators, Inc. All rights reserved.
