Matíe 4
4
Dɩ́blʋ̀ɔ̀ sa Zozíi zɔ̀
(Málɩ́kɩ 1.12‑13; Lúkɩ 4.1‑13)
1Ɩ̀lɩa ká plɩ́ a, Blɔ̀blɔ̀zùzùò fa Zozíi zɩkpɩkɔfʋ́ a mnɩ́, bhè Dɩ́blʋ kɔ́ɔ́ zɔ̀ saà. 2Mɔ̀ɔmɔ̀ ɔ́ kʋ gàgàzrɩ̀ a yrií a gwlɩ̀ sɔ́, lé dɩ́bɩ a yrií a gwlɩ̀ sɔ́, ɔ́ pʋ́lɛ kleé, yrié bhli a, bhʋ́ kleé cíe ɔ bhlábhlʋ́ kʋ́. 3Mà Dɩ́blʋ̀ɔ̀ ʋ̀ sa nyʋa zɔ̀ a, ʋ́ ŋnɩ ɔ́ gɔ̀ lé ʋ́ srʋ ɔ́ mà: «Lagɔ a Yuwliyʋɔ́ ɔ́mɔ́ nɩ̀ ŋwɔ́ɔ cɩ́cása a, srʋ cɔ́kpalɩ́ɛ́ lɩ̀à ɩ ká flɔ́ɔ plɩ́.» 4Lé Zozíi srʋ Dɩ́blʋ̀ɔ̀ mà: «Á jɩ́jrà Lagɔ̀bɔ̀gʋ a mnɩ́ mà: Flɔ́ɔ a múó ʋ̀ nɩ́ nyɔ a lelilɩ ŋwɔ́ɔ, mà Cícíwɔlɩ fɩ́ɛ́, ɩ̀ wlʋ́ɛ́ Lagɔ neé a, ɩ́ ŋwɔ́ɔ nyɔ a lelilɩ.#4.4 A zɛlɩɩ sáà Detro 8.3.»
5Dɩ́blʋ̀ɔ̀ fa Zozíi Zelízalɛ́mʋ, Kplɔkplɔdùò a mnɩ́, lé ʋ́ gbláalɔɔ́ Lagɔ̀wlʋ̀ɔ̀ a tàye kʋ́. 6Lé ʋ́ srʋ ɔ́ mà: «Nɩ̀ ŋwɔ́ɔ cɩ́cása Lagɔ a Yuwliyʋɔ́ a, wlʋ́ dɛ́ lagowlú lé bhli dʋ̀dʋ kʋ́, máà ɩ́ jɩ́jrɔ̀ nà zà mà:
Lagɔ yi ʋ́ kplɔkplɔzìzi cíè,
Lé ɩ́ yi mɔ̀ glɔ̀gbɩ́ zɔ̀ tʋà,
Lé nà kokokpó
Nɩ́ ka cɔ́kpalɩ́yie gʋ́zʋ̀. # 4.6 A zɛlɩɩ sáà Lɔlɔ 91.11‑12. »
7Lé Zozíi srʋ Dɩ́blʋ̀ɔ̀ mà: «Ɩ́ jɩ́jrɔ̀ sɔ́kʋ́ mà: Nɩ̀ɩ ka lé kà Kanyɔɔ́ ɔ̀ ŋwɔ́ɔ nà Lagɔ a, zɔ̀ saà.»#4.7 A zɛlɩɩ sáà Detro 6.16.
8Lé Dɩ́blʋ̀ɔ̀ fɔɔ́ sɔ́kʋ́ kíkíkáda a múó wlú, lé ʋ́ tʋalɔɔ́ kɔ́ a léyibhlɩɛ́ fɩ́ɛ́, yà ɩ léyrie sɔ́, 9lé ʋ́ srʋ ɔ́ mà: «Lɛbhɛ lɩ́ɛ́ fɩ́ɛ́ lɩ̀à, nɩ̀ sra ná drɩ̀ koti sá, lé nɩ̀ bʋbɔ̀ mɔ́ɔ a, ɩ́ yi mɔ̀ léyibhlɩɛ́ fɩ́ɛ́ lɩ̀à nyɛ́.» 10Bhʋ́ Zozíi srʋ ɔ́ mà: «Wlʋ́ mɔ́ɔ yɩ́ kʋ́, Dɩ́blʋʋ̀! Ɩ́ jɩ́jrɔ̀ mà: Nà Kanyɔɔ́ ɔ̀ ŋwɔ́ɔ nà Lagɔ a, ɔ́ a múó coco, ɩ̀ kà lé kà bʋbɔ̀, ɔ́ a múó coco, ɔ́ drɩ̀ ɩ̀ kà lé kà koti sá sra.#4.10 A zɛlɩɩ sáà Detro 6.13.»
11Tányɩɛ́ mʋ́ Zozíi srʋ sɩ́tɛ̀ Dɩ́blʋ̀ɔ̀ a, bhʋ́ ʋ́ cío sá lé kplɔkplɔzìzi yi lé ɩ́ nyɛ́ ɔ́ lelilɩ.
Zozíi mʋ Kapɛnayʋ́mʋ
(Málɩ́kɩ 1.14‑15; Lúkɩ 4.14‑15)
12Tányɩɛ́ mʋ́ Zozíi nú mà á ya Zán Batísɩ jɩ̀ɩ ŋwʋ́ a, ɔ́ɔ mʋ Galiléebhlɩ a dúó á wlele Nazalɛ́tɩ a. 13Ɔ́ wlʋ́ sɔ́kʋ́ Nazalɛ́tɩ lé ɔ́ mʋ nyíé gɔ̀ Kapɛnayʋ́mʋ sí ka, Zabʋlɔ́ɔ yà Nɛfʋtalíi sɔ́ a bhlɩ́ a mnɩ́. 14Wɔlɩ́ɛ́ Lagɔ a nékʋ́cinyɔ Ezayíi cí wá a, ɩ ká neé sralɔɔ̀. 15Ɔ́ cí wá mà:
Zabʋlɔ́ɔbhlɩ, Nɛfʋtalíibhlɩ,
Nyúzɔ̀ɔ̀ ʋ̀ mnɛ nyɩ́é gɔ̀ mɔ̀
Zrʋdɛ́ɛ a pɩ́ʋ́ ànʋ a mnɩ́,
Galilée, nyʋa à nɩ́ Zúfʋnyʋa ŋwɔ́ɔ a,
Mɔ̀ ŋwʋ́ɛ́ á sá,
16 Bhlɩ́ɛ́ kʋ̀ wá cúcú a,
Ɛ́ ya nápɛ kádɛ yɛ́!
Bhlɩ́ ànɛ̀ɛ̀ ɛ̀ kʋ̀ wá sáà kwɩ́ a kalɩmɛ a,
Á nɩ nápɛ lʋɛ yɩ́. # 4.15‑16 A zɛlɩɩ sáà Eza 8.23; 9.1.
17Bhá yɩ́ ʋ́ jɩ̀ a, Zozíi ɔ́ɔ bháa yɩ́ ʋ́ tɔ́gɩ̀sɩ a pápʋ́ kʋ́, ɔ́ srʋɛ yɩ́ nyʋa mà: «A cɩ́cɩ á nɩnɩgbɩ mà Lagɔ a Léyibhlɩɛ́ a yiyitanyɩ ya ʋ́ mɛ́!»
Zozíi wle ɔ́ kʋjɩ̀nyʋ̀àà á mɔ̀na
(Málɩ́kɩ 1.16‑20; Lúkɩ 5.1‑11)
18Zozíi kʋ Galilée á nyɩ́é a tʋtrʋda lé ɔ́ yɛ́ nɩ́ayúó sɔ́, Simɔ́ɔ á wlele Pɩ́ɛ́lɩ yà ɔ nɩ́ayʋ́ Adrée sɔ́, zrìbhlanyʋa á ŋwɔ́ɔ, á kʋ nyɩ́é gɔ̀ á pálɛ pílo. 19Lé Zozíi srʋ á mà: «A jɩ́ mɔ́ɔ kʋ́, bhè ká amɔ nyʋa à fɩa nyʋa mʋ́ pláa.» 20Ɔ́ cí kɔ́ɔ̀kʋ́ sɩ́tɛ̀ a, á cíe a pílié sá, lé á jɩ́ ɔ́ kʋ́. 21Ɔ́ sɩsa bhɩɩ́ jɩ̀ a, Zozíi yɛ́ sɔ́kʋ́ nɩ́ayúó àna a sɔ́, Zebedée a yúó a sɔ́, Zákɩ yà Záan sɔ́, a yà á tʋ́ Zebedée sɔ́ kʋ gɔ́lʋ́ a mnɩ́, á sa a píli jí. Lé Zozíi wle á. 22Zozíi wle a kɔ́ɔ̀kʋ́ a, á tɩ ʋ́ a tʋ́ yà gɔ́lʋ́ɔ́ sɔ́ lé á jɩ́ ɔ́ kʋ́.
Zozíi cɩ́alɛ lé ɔ́ yalɩmalɛ nyʋa
23Zozíi bhlie Galiléebhlɩɛ́, lé ɔ́ cɩ́alɛ mɔ̀ɔ a zúfʋcɛcɩghlɩɛ́ a mnɩ́ nyʋa, ɔ́ cíé sáà Lagɔ a Léyibhlɩɛ́ a Námadìè a wɔlɩ́, lé ɔ́ yalɩmalɛ gúó fɩ́ɛ́ lé bhlɛ́kanyʋa fɩ́ɛ́. 24Ɩ́ ka ŋnɩ́ lé ɔ ŋnɩ́ mʋ àààn lé ɩ́ bhli Silíibhlɩɛ́ a lɔ̀fɩ́ɛ́, á lɔɔ́ gupuonyʋa a cícící, lé nyʋaá nyumozìzi kʋ jɩ̀ a, á la sáà zobhligu a bhlányʋa, kplákplányʋa lé Zozíi yalɩma á lɔ̀fɩ́ɛ́. 25Ɩ́ ka ŋnɩ́ lé nyʋa kɔ́kɔ́mnɩ́ jɩ́ɛ́ wá Zozíi kʋ́, àna wlʋ́ɛ́ Galilée, àna wlʋ́ɛ́ bhlɩ́ɛ́ á wlele Dí Kʋ́gbá a mnɩ́, àna wlʋ́ɛ́ Zelízalɛ́mʋ lé Zudée lé àna wlʋ́ɛ́ sáà bhlɩ́ɛ́ ànɛ̀ɛ̀ ɛ̀ kʋ̀ Zrʋdɛ́ɛnyié a bɩ́ a mnɩ́.
सध्या निवडलेले:
Matíe 4: NEY
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© (Active), Wycliffe Bible Translators, Inc. All rights reserved.
