स्तोत्रसंहिता 57

स्तोत्र 57

संगीत दिग्दर्शकासाठी. “अल्तश्केथ” चालीवर आधारित. दावीदाचे मिक्ताम गाण्याची रचना. दावीद शौलाच्या उपस्थितीपासून निसटून गुहेत लपून बसला त्या संदर्भाचे आहे.

1माझ्या परमेश्वरा, माझ्यावर दया करा, माझ्यावर दया करा.

कारण मी तुमचा आश्रय घेतला आहे;

संकटे जाईपर्यंत मी तुमच्या पंखांच्या

छायेखाली आश्रय घेईन.

2जे मला निर्दोष ठरवितात,

त्या सर्वोच्च परमेश्वराचा मी धावा करेन.

3ते स्वर्गातून साहाय्य पाठवून माझे तारण करतील;

जे माझा पाठलाग करतात त्यांचा ते तिरस्कार करतात; सेला#57:3 सेला या इब्री शब्दाचा अर्थ कदाचित गीत गाताना मध्ये थोडे थांबणे असा आहे

परमेश्वर त्यांची प्रीती आणि विश्वासूपणा पाठवून देतील.

4सिंहांनी मला घेरले आहे;

ज्यांचे दात भाले आणि बाण आहेत,

ज्यांची जीभ तीक्ष्ण तलवार आहे

अशा हिंसक स्वभावाच्या मनुष्यांमध्ये मी पडलो आहे.

5हे परमेश्वरा, तुम्ही गगनमंडळाहून उदात्त केले जावोत;

तुमचे गौरव सर्व पृथ्वी व्यापून टाको.

6माझ्या पावलांसाठी त्यांनी सापळा लावला आहे—

संकटात मी वाकून गेलो होतो.

माझ्या वाटेवर त्यांनी माझ्यासाठी खड्डा खणला होता—

परंतु ते स्वतःच त्यात पडले आहेत. सेला

7हे परमेश्वरा, माझे अंतःकरण खंबीर आहे,

माझे अंतःकरण खंबीर आहे;

मी तुमची स्तुती करीत गायन आणि वादन करणार.

8हे माझ्या जिवा, जागृत हो!

अगे सारंगी, आणि वीणे, जागृत व्हा!

मी प्रातःकाळाला जागृत करेन.

9हे प्रभू, मी प्रत्येक राष्ट्रात तुमची स्तुती करेन,

मी सर्व लोकात तुमची स्तुतिस्तोत्रे गाईन.

10कारण तुमचे वात्सल्य महान असून ते गगनमंडळाला भिडले आहे;

तुमचे विश्वासूपण आकाशाला जाऊन पोहोचते.

11हे परमेश्वरा, तुम्ही गगनमंडळाहून उदात्त केले जावोत;

तुमचे गौरव सर्व पृथ्वी व्यापून टाको.

सध्या निवडलेले:

स्तोत्रसंहिता 57: MRCV

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

पवित्रशास्त्र, मराठी समकालीन आवृत्ती™

यांची परवानगी घेऊन केले गेले आहे.

सर्व अधिकार जगभरात राखीव.

Holy Bible, Marathi Contemporary Version™

Used with permission.

पवित्रशास्त्र, मराठी समकालीन आवृत्तीबद्दल अधिक जाणून घ्या

स्तोत्रसंहिता 57