मत्तय 21:1-17

ते यरुशलेमेजवळ आले आणि जैतून डोंगरावर असलेल्या बेथफगे या गावास आले, तेव्हा येशूंनी आपल्या दोन शिष्यांना असे सांगून पाठविले. त्यांना म्हणाले, “समोरच्या गावात जा, तेथे पोहोचताच, तुम्हाला एक गाढवी दिसेल, तिच्याजवळ शिंगरू बांधून ठेवलेले असेल; त्यांना सोडून माझ्याकडे आणा. कोणी तुम्हाला विचारले, तर त्यांना एवढेच सांगा, प्रभुला त्याची गरज आहे आणि ते लागलीच पाठवून देतील.” संदेष्ट्याने केलेले भविष्यकथन पूर्ण व्हावे म्हणून असे झाले: “सीयोन कन्येला सांगा की, पाहा, तुझा राजा तुझ्याकडे येत आहे. तो लीन आहे व गाढवीवर बसून येत आहे, आणि गाढवीच्या शिंगरावर बसून तो येत आहे.” शिष्य गेले आणि येशूंनी त्यांना सांगितल्याप्रमाणेच त्यांनी केले. त्यांनी गाढवी व शिंगरू ही आणली आणि त्यांचे कपडे गाढवी व शिंगरूच्या पाठीवर टाकले मग येशू त्यावर बसले. गर्दीमधील काही लोकांनी आपले अंगरखे काढून रस्त्यावर त्यांच्यापुढे पसरले; तर इतर काहींनी झाडांच्या डाहळ्या तोडून त्यांच्यापुढे पसरल्या. मग जमावातील जे लोक त्यांच्यापुढे गेले, ते आणि जे लोक त्यांच्यामागून चालले. ते मोठ्याने ओरडून म्हणाले, “दावीदाच्या पुत्राला होसान्ना!” “प्रभुच्या नावाने येणारा धन्यवादित असो.” “सर्वोच्च स्वर्गात होसान्ना!” येशूंनी यरुशलेममध्ये प्रवेश केला, तेव्हा सर्व शहर जागे झाले आणि त्यांनी विचारले, “हा कोण आहे?” “हे येशू आहेत!” गर्दीतील लोकांनी उत्तर दिले, “गालीलाच्या नासरेथहून आलेले संदेष्टा आहेत.” येशू मंदिराच्या परिसरात गेले आणि तेथे खरेदीविक्री करणार्‍या सर्वांना त्यांनी बाहेर घालवून दिले. पैशाची अदलाबदल करणार्‍यांचे तक्ते आणि कबुतरे विकणार्‍यांची आसने त्यांनी उधळून लावली. ते त्यांना म्हणाले, “असे लिहिले आहे, माझ्या घराला प्रार्थनेचे घर म्हणतील पण तुम्ही याला लुटारूंची गुहा केली आहे.” मग मंदिरात त्यांच्याकडे आंधळे व अपंग लोक आले आणि त्यांनी त्यांना बरे केले. तरी जेव्हा मुख्य याजक आणि नियमशास्त्र शिक्षक यांनी ही अद्भुत कामे पाहिली आणि लहान मुलांना मंदिराच्या परिसरात, “दावीदाच्या पुत्राला होसान्ना!” असे ओरडतांना ऐकले, तेव्हा ते संतापले. त्यांनी येशूंना विचारले, “ही मुले काय म्हणत आहेत, हे तुम्ही ऐकत आहात ना?” “हो,” येशूंनी उत्तर दिले, “ ‘लहान लेकरे व बालके यांच्या करवी हे प्रभू तू आपली स्तुती प्रकट केली आहे,’ हे तुम्ही कधी वाचले नाही काय?” मग ते बेथानीस परत आले आणि रात्रीचा मुक्काम त्यांनी तेथेच केला.