MATIUS 7
7
Akuni uwak dolinakwi wene
(Luk. 6:37-38,41-42)
1“Ar Allah nen kir kinuwak dolkinaka kau, kir nen ir akuni amberak inuwak dolinabu maga o. 2#Mrk. 4:24Kir nen akuni ambetak inuwak dolinabugun eti ndak-ndak, Ar Allah nen, kir etegerogon ar kinuwak dolkinabigin o. Kir nen akuni inuwak dolinaku dogolir erugun eti ndak-ndak, Ar Allah nen kir etegerogon ar ekinabigin o. 3Kir o obakte mbalek kinilimo werek mendek birkatigik dek ar dogolir, nenaluk kinogari inilimo o amomon kau bikda tagwi? 4Kar kilimu o obakte mbalek enogo werek kigik, kogarak yoga dogolir, ‘Kilimu o amomon eti wuldagik,’ yiluk yorurak ndak a? 5Kir yi kinenggal yogwa arar o! Kir kinilimo o obarte mbalek werek mende eti ndak wuldartani o, nen kir kinilimo arar wuldartalok kalok, kir kinogariyak inilimo o amomon werek mende eti yenggak kalok, wulabu ndak erkinaka kugun o.
6Kinamendek oba korek maduk dek pano mendek eti yangge wogorugup o, nenaluk yangge eti medak togon aik mbalkinabu enogo o. O mutiara pano mendek eti wam wogorugup ar o. Nenaluk mutiara pano mendek enogo wam nen iniyok paga tibik tebek erogo bu nogo o.”
Nggino yugwi inom, kwakwi inom, nen tu puk-puk ekwi inom wene
(Luk. 11:9-13)
7“Kir nen nggino yugwi kalok, wokiragin o. Kir nen kwakwi kalok, kwakodagun o. Tu puk-puk ekwi kalok, tu kurogo binagagin o. 8Nenaluk, ir akuni nggino yugwi kalok, wogoragin o; ir akuni nen kwakwi kalok, kwaktagun o; ir nen tu puk-puk kugwi kalok, tu kukdagin o. 9Ap ambi akburak nen erom nggino yega kalok, nggir mendek wogorurak ndak a? 10Ikan nggino yega kalok, wado wogorurak ndak a? 11Kir maduk ekwa kigik ogwe, kir kinakburi pano mendek wogoraurak eti kinilu o. Nen Kinombae mbogor paga mendek nen kwak, ebiluk o! Ta nen ngginongge oba yoga kalok, amendek pano kwak enogo ar wogorigin o.
12 #
Luk. 6:31
Kir akuni nen ekbinagu wadok ketagwi eta kwak, kir nen ir akuni amberak etegerogon ar erinaku dogoni o. Musa nen diru mbalkige mendek o, Ir nabi-nabi nen wene yugu lagugwa mendek o, ilitinggen negen ebe eta ar o.”
Tu ande bugudak mbalek wene
(Luk. 13:24)
13“Kir tu ande bugudak eti paga unggwi lani o! Nenaluk, kali aikmo tuan lektagwi eti tuan obarte nggok ar yago ma, akuni pakalok eti paga lektagwi o. 14Akuni iniluk pano dogumo nggwe, tu ande o, tuwan o, bugudak dibirek o. Nen akuni bugudak mban inil ketagwi o, yiluk yoragage.”
O edo inom nen o enggen inom awene
(Luk. 6:43-44)
15“Ir ap nabi-nabi agur agar mendek warugun yemenaga pik pak dikbano o. Ir inebe nggeo kelo mendek talek arar wagu dogolir, inenggal domba talek ertatuk warugun enaga o. 16Ir ekwi inobabur paga, kir kinilu arigin. Irikngga adok werek mendek nen anggur enggen ndak-ndak yirigin dek o, nen mumun adok werek mendek nen, o ara enggen ndak-ndak yirigin dek ar o. 17O ebe mudi-mudi anggup wulka kalok, enggen eti pano ar yiri taga mendek o, nen o ebe engga tekmbarolek wulka kalok eti, enggen maduk ar yiri taga mendek o. 18O ebe mudi-mudi anggup wulka kalok eti, enggen maduk yiri tagodek o, nen o ebe engga tekmbarolek maduk eti nen enggen pano yiri tagodek ar o. 19O enggen pano mendek dombok yirir taga dek kalok, edo murogo kali kunigin o. 20#Mat. 12:33Ir ap nabi-nabi agur agar mendek enogo inenggal yogwa etegerogon ar o. Ir yabu erir lagwi paga, kir nen yenggak ar dagun o.”
Inane yugwi ndak-ndak erurak wene
(Luk. 13:25-27)
21“Ir akuni nen, An inane yornugu dogolir, ‘Tuhan, Tuhan,’ yiluk yitagwi mendek etoma obogar Allah akburi arugun dek o, ogwe ir akuni yabu An Nombae mbogor paga mendek akla andega ndak-ndak ekwi eti perak, Ar akburi arugun o. 22O irep kudi paga, akuni pakalok nen An inane yornugu dogolir, ‘Tuhan, Tuhan, Nir Allah Kar kendaga mbalogo wene yorani yirigen enogo arar yorarugu etnogore? Nen nir Tuhan kendaga mbalogo ar, akuni u monggar tekman mendek inoba kunik mo, inoba dek erogo bagwi, erukbuk mendek elalin ekwi, eko yoma dek a?’ 23#Mzm. 6:9Etegerogon yonugwi kalok, An nen wene onggo yoragin eti, ‘Kir An mondok ninggukdek arar o! Kir maduk ekwa yi, ya nen arar mondok lani o!’ ” yiluk yoragin o.
Ap mbere nen o palkugwa oba lirogo yoragige wene
(Luk. 6:47-49)
24“Ir An nane kolalku dogolir, wokbiluk ekwi mendek eti, ar ap aklanggar werek mendek nen o palka dogolir, kogona paga makbil eti nggir mendek biluk, o palkige eti ndak-ndak arar o. 25O nggir paga makbil biluk palkige enogo paga, o miyo nggok waga, i utuk waga, wiya kakde waga, eka dogolir, o palek ernogo, miyalik nen yiluk, ekigerek ogwe ndak dek arar agage o.
26Nen akuni An nane kolalkwi ogwe, ir nen ebe erir tagodek mendek eti, ar ap o palik nen yiluk, aklanggar dekma o todi paga palkige eti ndak-ndak o. 27Ma, o miyo nggok waga dogolir, i utuk, wiya kakde waga dogolir, o todimo palek enogo, miyak mayak eka dogolir, o uwak tagik tagok tebelogo birige o!”
Yesus obarne wene
28 #
Mrk. 1:22; Luk. 4:32 Ar Yesus wene obogar emeriragagemo, akuni yemenogo welagugwa mendek nen, Ar wene emerirarige etoma, wi au, yiluk bi wakugwa. 29Nenaluk, Ir ap guru-guru agama nen, wene emeku lagugwa eti ndak-ndak dek o, Ar wene emeriragage eti, alon obate paga emeriraga lagage o.
सध्या निवडलेले:
MATIUS 7: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
