MATIUS 22
22
Kwe yiku dogolir dago dakugwa mende oba lirogo yoragage wene
(Luk. 14:15-24)
1Ar Yesus nen, akuni pakalok wene ambi inom ar oba lirogo yoraga dogolir, 2ambi men yirige, “Ar Allah apma binanengga dogolir erigin mende eti, wene oba lirigin yi talek o: Ap raja nggain ambi akbur, ap kwe kunogo bega dogolir, dago nggok darkige mende ndak-ndak, oba lirogo yigin yi talek o. 3Ar raja enogo nen, yedoman mende obogar, akuni inayonggo birige mende, ineloktema wogonabi lani o, yiluk lakbarige mende, ir lau ina'ir nen puk agugwa. 4Tuguluk, ar ap raja enogo ayedoman amberak, yonggo lakbaga dogolir, men yorarige: Kir ap yonggo bagi mende etoma men yorano: ‘Dago nau mende, sapi nggokndak inom nen sapi inagwi ngger lerakwi panondak kau mende inom, takborogo warogo darinako o. Etiar ma, dago nau mende obok pikpuk erek arar ma, an nakbur kwe kunogo beganem, ibar waruak yege o, yiluk yorano o.’ 5Etegerogo yirigemo, yonggo wulkugwarik kigik ar ogwe, ir akuni inayonggo barugwa mende yemenogo, inoba bikda waru, dambe kalok, nen ir ineyabumo inadiktak dombok lagu dogolir, ir amberak yabumu lagwi, nen ir ambetak ineyabumo kota nggwe etoma etar tagama arar lagugwa, 6nen ir ambetak, ar ap raja mende yedoman lakbarige yemenogo, inebe pakbalok ndugi ndamuk pamuk inakwi, nen amberak mondok min inakugwa. 7Nen ar ap raja ernogo, aruk kolakbega lagagerek, ar wenemuk pakalok yirige. Nen tentara, akuni ar yedoman mende inakugwa werek yemenogo, inaruak nen yiluk lakbarigemo, ir ininggi werek yemenogo, ndugi ndamuk pamuk warogo, inai kali mbidak mbadak erogo barugwa o. 8Ekbiluk, ar ap ernogo, ir ayedoman mende wai yoralok, yoraga dogolir, ‘Kwe yirogo, agun imbirak kunogo bau, arar pik puk erek ogwe, akuni yonggo bago mende dek aga o. 9Ma, yogondak kir tuan paga nggwe etoma lani o, akuni tuan paga etoma, kinom abuk atuk kalok, ap kwe kunogo balok yiginakunem yi, ir ninom eruwok nen, ugun agan ar inayonggo bino o,’ yiluk yorarige. 10Yorarigemo, ir yedoman yemenogo obogar tuan nggok andogun dombok etoma lagugwa. Lagugwarik, akuni inobabur pano mende inom, maduk mende inom, ugunar inayonggo barugwa. Eti ekige paga, kwe yikunem enogo akuni mondok nggedek arar kuwak ekugwa.
11Ekugwama, ar ap raja ernogo, akuni kuwak erekma yemenogo, unggirigerek, il mbenak inabir laga lagagerek, ar ap ambiar, tu kwe yikunem yiritagwi mende yitukdek, wedek mende yituk lagagerek mo il karige. 12Kega lagagerek, yoga dogolir, ‘Nogar, kar tu kwe yikunem yiritagwi mende yitukdek unggi wagan ya, nenggerogon?’ Yorige mende akuni enogo wene onggo yu dambe karige. 13#Mat. 8:12, 25:30; Luk. 13:28Tuguluk ar ap raja enogo nen, yedoman yemenogo yoraga dogolir, ‘Ar akuni yi, inggi iyok kede warogo, o amum mo, kener watugu dogolir, de yi tagama etoma, mbo lakbi lani o,’ ” yiluk yirige.
14Ar Yesus, wene oba lirogo yi yega lagagerek, irep paga yegerogon yirige, “Inebe pakalok ar, wai yoragagerek ogwe, inebe we mbere ar mban pulinakige o.”
Pajak onggo biktagwi mende yirige wene
(Mrk. 12:13-17; Luk. 20:20-26)
15Tuguluk ir ap Farisi mende ernogo, wene kinok yiduk kwaru negen, Ar Yesus endokma nenggerogon waganuwok yiluk, wene inadik mbali lagugwa. 16Wene mbaldiluk, ir inaworomi mugurek lagwi mende o, akuni Herodes awurumi mutok lagwi mende o, Ar Yesus wene kinok yoruak nen, yiluk lakbarugwa. Ir akuni yemenogo nen, Ar Yesus yogu dogolir, “Guru wae, nir ninilu eti, Kar eti, wene ebebar mende yitaga mendek o. Kar nen, wene akuni Allah nen inake kolkige mende eti telekma mondok ar yitagan o. Nen emeriraga dogolir, ambi kimagago bigik, akuni inakla andegetek mende yitagodek o. Nen akuni inakla andegetek mende yugwi kalok, yinek yiluk inaruam waka, nen tuguluk Kar nen akuni inelokte yambeni tagodek o. 17Eti paga ma, kar nir yogondak yoneran o, agama nir mende paga wene mbalek, pajak ap Kaisar onggo wogogu dogorak ndak a, dek a?”
18Ir wene inakla mudi yugwi yenggak dalok, Ar Yesus nen wene onggo yoraga dogolir, “Kir akuni wene mbalek mutok ndak-ndak ekwa yonerawak, yiluk kinenggal mende mban erir nogwa#22:18: Akuni wene mbalek mutok ndak-ndak ekwa yonerawak, yiluk inenggal mende mban erir nogwa: Munafik yi, kir An nggedal nabuok nen yiluk yorniri tagwi nenaluk? 19Kir uang pajak onggo biktagwi eti mende? An nil kak nen inugur neyani nda!”
Yoragagemo ir enogo nen, uang perak ambiar wogorugwa. 20Wogorugwama, Ar Yesus il kalok yoraga dogolir, “Yi ta elokte agur, nen ta endaga diru mbalek?” 21Yirigemo, ir nen onggo yugu dogolir, “Kaisar o,” yiluk yirugwa.
Yorugwama, Ar Yesus onggo yoraga dogolir, “Etiar ma, Kaisar mende kalok, Kaisar ar wogogu dogoni o. Nen, Ar Allah mende kalok, Ar Allah ar wogogu dogoni o,” yiluk yoragage.
22Wene enogo yoragi nanggige, ir ernogo, wi au yiluk, bi waku lagugwarik, dambe kalok lagugwa.
Wene akuni wartatuk iniluk arurak mende yoragage wene
(Mrk. 12:18-27; Luk. 20:27-40)
23 #
Kis. 23:8
O etinem ar, ir ap Saduki mende Ar Yesus oba wagugwa. Ir akuni eti nen andugu dogolir, akuni watlaktuk iniluk arugun dek o, yiluk andartaga mende ma, ir nen Ar Yesus oba wagugwa. 24#Ul. 25:5Wagugwarik, ir nen Ar Yesus yogu dogolir, “Ninombae Guru wae, Ar ap Musa nen, wene yirige mende eti yegerogon, Ap ambi akburak dek kigik kangga kalok, ar ogar ambi nen agwe togwe enogo wokbiluk, nen kwe enogo elege endaka kalok eti, ar ogar kangge mende enogo ake wigalek yiluk, erogo burak yirige o. 25Etiar ma, akuni ambi inebe endago tujuh paga ma, inebe yoma welagiya o. Ma, ar elege manggwiya kwak enogo kwe waganggigerek ogwe, akburak dek kigik ar wartagage o. Ma, ar kangga dogolir, agwe enogo ogarak ake biluk wartagage o. 26Ogwe, ar ogar enogo akbur akdikmo, dek nggodek ar wartagage. Nen ogar ar ambudik mende ernogo, kwe enogo waganggigeregar ogwe, akburak dek kigik ar wartagage o. Nen inogar kenagan mende ernogo, waganggigerek ogwe etegerogon mban erir wagu nggodek, ap tujuh enogo takbok togon ar watagugwa o. 27Nen irep paga, kwedak enogo ogwe wartagagear o. 28Etiar ma, o akuni warek mende, iniluk erogo mekbagin enogo paga, kwe eti ta kwak agwe arigin o. Nenaluk, ir ap inebe tujuh ernogo, obogar nen kwe eti waganek welagugwarik ma o?”
29Ar Yesus nen onggo yoraga dogolir, “Kir bulatuk yugwi yenggak kinagi o, nenaluk, kir Alkitab inom, Allah obatne mende inom, mondok dik begekdek dogolir yugwi kinagi o. 30Akuni warek mende etoma iniluk atuk kalok, ir nen, kwe ap wok-wok yugun dek o. Ogwe ir inebe malaikat ndak-ndak ertatuk dogogun o. 31Ir akuni kanggwi mende, Ar Allah nen iniluk bagin o, yiluk yirige mende diru mbalek, ambi endaga talkugup a? Ar Allah nen yega dogolir, 32#Kel. 3:6‘An nebe, ar Abraham mende Allah, ar Isak mende Allah, nen ar Yakub mendek Allah o.’ Ar Allah eti, akuni warek mende inombae Allah, dek o. Akuni iniluk mende inombae Allah arar o!”
33Nen ir akuni pakalok yemenogo, wene Yesus yirige enogo inaruk kolalku lagugwarik, we, au, yiluk bi wakugwa.
Edo wene yorarige wene
(Mrk. 12:28-34; Luk. 10:25-28)
34Ar Yesus akuni Saduki mende wene yorarigemo, onggo yoru dek kalok, inande del karugwa mende, ir ap Farisi mende inaruk kolalku lagugwarik, ir wene mbaluok nen yiluk kuak ekugwa. 35Ar ap ambi ebe guru agama mende ma, ir inom nen, wene ilu dogolir, kinok yotuk, onggo yega kalok yoruwok nen yiluk, daker paga kinok yoga dogolir,#Luk. 10:25-28 36“Guru Nombae o, wene hukum agama paga, wene enggen odo negen yirige kwak eti nggi?”
37 #
Ul. 6:5
Ar Yesus nen onggo yega dogolir, “Kinombae Tuhan Allah eti, kiniliti enggen odo paga inom, kinaguringge paga inom, nen kir kinakla nggagalek mende paga inom, kiniliti kunik mondok eku dogono o. 38Wene eku dogorak mende, edo lektek negen etiar o. 39#Im. 19:18Nen wene ambotna lektek negen eku dogorak mende eti ebe yi o: akuni amberak, kir kinengga werek kiniliti kunik etar tagwi eti kwak, ir etegerogon ar kiniliti kunik eginaku dogoni o. 40Wene hukum agama paga, Musa nen yirige inom, nen ir nabi-nabi amberak nen yirugwa inom, yimbuk dambuk wene mbere endi paga, arar panggolek agarik o.”
Wene Raja Ndilninakwa ake yirige wene
(Mrk. 12:35-37; Luk. 20:41-44)
41Ir akuni Farisi mende etanogo wonggalek werek dagik, Ar Yesus nen wene kinok ambi men yoragage, 42“Wene Raja Ndilninakwa yi, ap ta umbuak kwak kogop? Kir kinakla nen ta andar tagwi?”
Ir onggo yogu dogolir, “Ap Daud umbuak mende arar o,” yiluk yorugwa.
43Yorugwama Ar Yesus nen, kinok yoraga dogolir, “Kalok, Roh Allah ar Daud akla unggirigerek nen, yega dogolir, Raja Ndilninakwa mende eti ‘Ar Tuhan’ arar o, yiluk yirige eti nenaluk? Nenaluk, ar Daud nen yega dogolir,
44 #
Mzm. 110:1
‘Tuhan nen Ar Tuhan yoga dogolir:
Ninggi ebema nggwe korektarin o.#22:44: inggi ebema ngge korektarin o yirige eti: Ir ap Yahudi mende nen eku dogolir, ininggi ebema nggwe korektarin o, yiluk bagwi kalok eti, ar eti alon palogo woguk bugu dogolir nen ye wene nde wene etoma ar apma mban ar bagarek dogowak o yiluk bagu lagugwa.
Korek keyagik, An nen kar kinom wim mbalek mende etoma, takbok togon waganogo, kar kapma inendop yungguli waruwak nen yiluk erinabigin o.’
45Etiar ma, ar Daud nen, Raja ndilinakwa yirige kalok, Tuhan eti ar Daud umbuak mende ndak kogop?”
46Wene Yesus yirige ernogo, akuni onggo yoru dambe karugwa o. Ma, na eti paga kudi nen, yogo ta nen Ar kinok yoru, inobade atuk damber karugwa.
सध्या निवडलेले:
MATIUS 22: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
