MATIUS 17
17
Ar Yesus wogok dirugwa wene
(Mrk. 9:2-13; Luk. 9:28-36)
1O iningi enam paga ekbiluk, Ar Yesus nen, ar Petrus o, ar Yakobus o, ogar Yohanes o, inadigar kur idu omanggi paga woginarek dagarige. 2Dagaluk werekma, ir inika paga, Ar Yesus arar ebe adik aga dogolir: Ar eloktenggen mo il akbinak ndak-ndak arar ertaga dogolir, nen iyom yugu mende enogo akbinak ndedalek wedalek eka paga, lak kaurak ndak dek mende arar etagage o. 3Etegerogon ekbiluk werekma, Ar aworomi inebe mbere ambi ernogo, ar Musa o, nen ar Elia o, imbirak Ar Yesus inom wene mbalkwi inil darugwa. 4Etegerogon darugwarik, ar Petrus nen Ar Yesus men yorige, “We, Tuhan wae, nir o ya ninadenggen mondok kertagwi o. Ma, Tuhan Kar wadok kwak dogomo, an o kemah mbere ambi negen, ambi Kar Tuhan kake, ambi ar Musa ake, nen ambi ar Elia ake palogo bik o.”
5 #
2Ptr. 1:17-18
#Kej. 22:2; Ul. 18:15; Mzm. 2:7; Yes. 42:1; Mat. 3:17, 12:18; Mrk. 1:11; Luk. 3:22 Yiluk ar Petrus wene auwan yeganem ar, agagona akbinak pakalok mende enogo akla nen, ane yega dogolir, “Yi An Nakbur Niliti kunik Ebe yi arar o. Ar nen, An niliti adeknggen erogo birtaga ma. Nen kir Ar ane kolek dogoni o!”
6Ar Yesus aworomi inom ane yega inaruk kolal diluk, ir inobade nen ineloktenggen agar paga wandu yiluk welagugwa. 7Ogwe Ar Yesus inoba wagagerek, Ar inggi paginaka kigik. “Ir arar iniluk agugwa o,” Tuguluk ar Yesus nen yoraga dogolir, “Kinobade kagup o!” 8Tuguluk ir inil bikarugwa mende, ir ambetak inom mondok dalokdek o. We, Ar Yesus ebe adigar werekma inil karuga.
9Ir inebe kurtaga nen wura wagu dogolir, Ar Yesus nen, ir inakla eberogo yoraga dogolir, “Kir nen eka kinil kogop mende etoma, ir akuni ya yoragik, kurumbi Akuni Inakbur abok, Ar auwan iluk atuk mbogor paga lagikdek kigik, mondok yoragup.”
10 #
Mal. 4:5
Ar Yesus aworomi nen, Ar kinok yogu dogolir, “Ir guru-guru agama nen, Ar Elia ndak alep warigin kalok perak ndak o, yiluk yega eti nenaluk?”
11Ar Yesus nen onggo men yirige, “Ar Elia ebebar watuk kalok, yi wene ndik wene obogar akdikmo dombok erigin o. 12#Mat. 11:14Ogwe wene ebe yokerak o, yokerak o, Ar Elia ebe obok arar wagarik ogwe; ir ar ebe ininggukdek o; nen ir nen, ar ebe ir wadok paga mutek mban ekbirugwa o. Nen eta etegerogon ar, ir nen Ar Akuni Inakbur wagage eti, oba anggin panggin etegerogon ar, erogo bugun o.”
13Tuguluk ir Ar aworomi yemenogo, Ar Yesus yitaga eti, ar Yohanes Pembaptis yiluk yirtaga eti yiluk inakla andarugwa.
Ar Yesus nen kugi obabur maduk mende elege akla unggiluk werekma murogo wulakige wene
(Mrk. 9:14-29; Luk. 9:37-43a)
14Etegerogon ekbiluk, Ar Yesus aworomi inebe mbere ambi enogo inom iniyok paga, ir akuni pakalok yemenogo inoba wukugwa ma, ap ambi Ar Yesus ika paga endop yunggu yiluk, tebe yi wagage o. 15Wagagerek men yorige, “Nombae o, an nakburak akba kan o, ar u iluk agik watagik eti mende erir taga o, nen u eti mondok maduk mende arar ma, ebe indumo mbo unggigik, nen ima mbo unggigik, erir taga o. 16Nen an muk wolok Kar kaworomi inoba bi wagarik ogwe, ir nen ar oba dek erogo bu ndak dek o.”
17Ar Yesus nen onggo yoraga dogolir, “Wee kir yi, ebebar pik pak andagwi dek kinagi o. Kir yi An ninom menda kudi dogogun nda, nen tokirek ar nenggerogon dogogin nda? Elege endi wolok watni o!” 18Yiluk yega lagagerek, Ar Yesus nen u obabur maduk mende, elege eti ilitimu unggirige enogo, wundi lan, yiluk mugogo wulakbirige o. Mugogo wulbirigemo, ar elege enogo oba u dek arar etagage.
19Tuguluk ir Ar Yesus mutok lagwi mende, Ar oba inadik ar wagugwarik, kinok yogu dogolir, “Abiyak, nir u obabur maduk mende yi mugogo wulabu ndak dek aga eti nenaluk kegen?” yiluk kinok yorugwa.
20 #
Mat. 21:21; Mrk. 11:23; 1Kor. 13:2 Ar Yesus nen onggo yoraga dogolir, “Kir kinakla ebebar andagwi mende eti bugudak ar o. Kinakla eberni nda! Kir kiniliti ebebar andagwi mende eti, we o sawi enggen bugudak bagadak eti ndak-ndak werek kalok, ‘Kir nen kinane, kur yi kebe ela nggwe ari lan yiluk yorumo,’ ar kur eti eta nggwe ari ligin ar o. Eta ma, kir nen etegerogon yugun mende etaru ndak dek ambi etarigin kwak ambi mondok dek arar o! 21[Ogwe kugi obabur maduk mende yi mende, wedek ar ibar wundilan yorurak ndak dek o, nir tamban inom nen puasa inom erugun kalok perak ndak o.]”
Ar Yesus kamburak mende yorarige wene
(Mrk. 9:30-32; Luk. 9:43b-45)
22O ambi paga, Ar Yesus aworomi o Galilea paga etoma kuwak ekugwama, Ar Yesus nen, ir wene yoraga dogolir, “We dogoludek ar, Ar Akuni Inakbur eti, ebe waganogo akuni inobarne werek mende inoba wogoragun o. 23Wogoramo ir nen, Ar ebe arar warugun o, ogwe inggi mbere ambi ekbiluk nen, Ar ebe iluk atuk menarigin o.”
Etegerogon yigi nanggige, ir Ar aworomi yemenogo nen, iniliti arar maduk agage o.
Tuhan ai palekma pajak onggo birugwa wene
24 #
Kel. 30:13, 38:26 Ar Yesus aworomi inom, o Kapernaum arar ari lagugwarik paga, Ar Tuhan Ai Palek ake pajak kuwak ekwa, ar Petrus oba wagugwarik kinok yoragu dogolir, “Kir kinombae Guru yi, Allah Ai Palek ake paga, pajak birtaga a dek a?” yiluk kinok yorugwa.
25Yorugwama, ar Petrus nen yoraga dogolir, “Onggo birtaga o!” yiluk yorarige. Arar yoralok uma lagagemo, Ar Yesus nen, ar Petrus ndak ane patarige, “Simon, kar kakla andagen nenggerogon? Ir ap raja-raja agar paga mende inake, pajak onggo ta nen burak? Akuni iningi dek mende nen a, akuni kuro mende nen a?”
26Yorigemo ar Petrus nen, Nombae akuni kuro mende nen o, yiluk yorige. Yorigemo Ar Yesus nen, “Etegerogon kalok, akuni ininggidek mende nen kalok, ir onggo burak dek o,” yiluk onggo yorige. 27“Ogwe ir akuni wagiya eti, ir nenggerogon yitagwi yiluk ninoba inakla andau ernogo o, ma kir danau ima etoma kede wurabi lani o. Kir ikan alep waganugun enaga ande bagalogo, uang andema werek enaga, nir nimbirak pajak onggo bu ndak-ndak werek enaga, waganino o. Wokbiluk nen, nir ninake pajak Tuhan Ai Palek eti ake onggo bino o,” yiluk yorige.
सध्या निवडलेले:
MATIUS 17: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
