MATIUS 11
11
Yohanes Pembaptis aworomi nen lakbarige wene
(Luk. 7:18-35)
1Ar Yesus yabongga etarigin mende, aworomi inebe dua belas paga yoraga lagagerek, o etoma dambe kalok wulkige. Wundiluk, o kota korok-korok mende etoma wene Ar Allah nen yirige mende yorar lagage o. 2Ar Yohanes Pembaptis kede warogo batagama etoma birugwama dogolir, Kristus yabu eka aruk kolaldiluk, ar aworomi inebe mende negen, Ar Yesus kinok yori lani o yiluk lakbarigemo kinok yogu dogolir, 3“Ar Allah nen ap ambi warigin o yiluk Ane amburu yirige enaga Ninombae kar arar a, arte ap adik ambi torek dogogun a?” yiluk kinok yorugwa.
4Ar Yesus nen onggo yoraga dogolir, “Kir kinaruk kolalkop mende inom, kinil kogop mende inom, ar Yohanes kiniyok paga yori lani o, yiluk ir lakbaga dogolir: 5#Yes. 35:5-6, 61:1Wene Pano Wene Ar Allah nen akuni ininggi dek mende inake yorau yiluk yirige mende yoragwi, akuni inil mbuk mende inil kugwi, akuni ininggi iniyok warek mende tuwan lagwi, akuni inagakdo paga konanggo kunik mende dek agwi, akuni inaruk dogu mende inaruk kolalkwi, akuni warek mende iniluk erogo baga erir waga kogop etoma o. 6Ma ir akuni An monogo dambek banu paga wene ilikon kwakwi dek mende eti, kinakla adeknggen ar dogoni o!”
7Yohanes aworomi lakbarige mende yemenogo obok iniyok paga lagugwama, Ar Yesus nen Yohanes abok mende, akuni pakalok yemenogo yoraga dogolir, “Kir o ye dekma nde dekma telekma etoma nena kinil kuwok nen yiluk lagop? Irikngga omanggi omangga wiya waka kinil kuwok nen yiluk lagop a? 8Kir nena kinil kuwok nen yiluk lagop? Akuni tu pano yugu kinil dawok nen yiluk lagop a? Akuni tu pano etege rogon yugu mende, ir o istana etoma dogitaga mende o! 9Etegerogon ma nenaluk kir ye dek ma ndek dekma telekma etoma lagop? Ap nabi kinil kuwok nen yiluk lagop a? Ebebar o. Ar nabi mende kwak kigik, ebiluk nggok negen mende arar o. 10#Mal. 3:1Nenaluk, ar ap Yohanes yi ake, ayat Alkitab akla yirige mende yi o,
‘Ar Allah nen, An nen lakbi wagi mende ebe yi arar o,
Kar auwan kigik, ar nen Kar karuan alep yaka dogowak nen yiluk,
Ar kwak alep lakbirigimo o.’
11Wene yi kinakla eberek togo o! O agar paga yoma, Ar Yohanes kwak kigik, ap ambi nggok negen kwa dek arar o. Eta etegerogon ogwe, ir akuni Ar Allah akburi inakla ar ambi bugudak eti perak, ar Yohanes eti kigik ar kwak perak nggok mondok arar o. 12#Luk. 16:16Ar Yohanes wene yorarige eta paga nen yogondak kudi, Allah akburi mende yiduk maduk erinaku dogolir, akuni o yoma nir nggok aruwok o yiluk inobarne paga erir lektagwi o. 13Musa wene mbalek inom, ir nabi-nabi nen yabongga yegerogon etarigin o yiluk yugu lagugwa mende inom, ar Yohanes wagage kudi paga obogar etaga o. 14#Mal. 4:5; Mat. 17:10-13; Mrk. 9:11-13Kir ebebar andau kalok, Yohanes ebe eti ar Elia arar o, ar warigin yiluk abok yirige enogo arar o! 15Kinaruk werek kalok, diktogon arar kolalku dogoni o.
16Akuni o yogondak werek mende ya, nena mende paga oba lirogo yokirak? Ir inebe elegedak pasar onggo kunitagama korek welagwi eti ndak-ndak. Ir wonggalek amberak nen ir amberak inaigadu yoragu dogolir, 17‘Nir kinakla adeknggen mende ndai wakorik ogwe, kir pogol kigikdek werek! Nen nir ndai de yurak mende wakorik kwe, kir de yigikdek ar werek o!’ 18Ar Yohanes wagagerek, i anggur ninggidek nen ye nde ninggikdek kwan biluk tamban eka kalok; ir akuni ambetak nen yogu dogolir, ‘Ar monggar akla onggegemo o!’ yiluk yorugwa 19Nen yogondak Ar Akuni Inakbur enogo wagarik nen, ‘Ar agarom a, agi a, ner nega kalok ir akuni nen; ar eti mabuk ekwa, an-an yogwa, ir akuni pajak kuwak ekwa inogar, nen ir maduk ekwa mende inogar etaga erir taga o.’ Etegerogon ar ogwe, Ar Allah nen kologo begetek ndak-ndak etari taga mende ma, Ar akla andarige ndak-ndak, etegerogon arar etarir waritaga o,” yiluk yorarige.
O kota-kota ebebar andagikdek ma nggwe inake yirige wene
(Luk. 10:13-15)
20Ar Yesus nen, ir akuni o kota dombok elalin erir nega lagagemo nggwe yemenogo, ir nen iniliti dikbatalok inomaduk mbo burak ina'ir arugu nanggugwa, Ar nen puduk padak yoraga dogolir, 21#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4“Kir akuni o Korazim mende inom, o Betsaida mende inom nuk atani o! Erubuk mende elalin kir werekma erir wagagi yemenogo, o Tirus kwak o Sidon kwak etep dogolepma, ir akuni o etoma muk iniliti kwak batalok, tu warekma yirir taga mende yikbiluk, inaluwak paga wul mokmok nggililogo bugwi etep o. 22O irep kudi ari waga paga, Ar Allah nen ir akuni Tirus mende inom, Sidon mende inom, ir maga baurak kwak we amor negen kwe, kir kwak mondok ndakdek mende arar o. 23#Kej. 19:24-28; Yes. 14:13-15Nen kir, akuni o Kapernaum mende yi! Kinakla nen, kir pogorogo nen wokinarek mbogor paga dagagun yiluk andatagwi a? Dek mondok o! Ogwe kir indu kunikmu etoma mbo onggol binagagin o! Nenaluk elalin kir werek nggwe etarir waga mende etoma o Sodom kwak ambi etepma, o Sodom eti yogondak ya dogolep o. 24#Mat. 10:15; Luk. 10:12O Irep Kudi paga, Ar Allah nen akuni Sodom mende maga bau eti anggin dek negen erigin ogwe, kir perak anggin ambik arar o!”
Ar Yesus nen noba watni o, yiluk yoragage wene
(Luk. 10:21-22)
25O eta paga Ar Yesus tamban eka dogolir, “Nombae wa, mbogor agar inggi pago werek Tuhan Kar arar o! An wa yokigi nenaluk, ir akuni diru warek inaklanggar werek mende inoba wene yemenogo obogar kugunem yiluk kimak dagena, ogwe ir akuni diru inunggukdek mende inoba kwak inugur dagen eti paga arar o. 26Eti paga nen, Ninombae akla adeknggen ari taga o.”
27 #
Yoh. 3:35, 1:18, 10:15 Tuguluk Ar Yesus nen yoraga dogolir, “An Nombae nen ye wene nde wene yoma obogar, wornirigemo werek o. Ar akuni ambi ar nen ogwe Ar Akbur eti unggukdek ar o, ogwe Ar ilu eti Ar Ombae arar o. Nen Ar akuni ambi nen ogwe Ombae eti unggukdek ar o, ogwe ar ilu werek eti Ar Akbur arar o. Nen akuni tani kwak ar Elege eti nen Ar Ombae eti inilugur daurak o eti Ar Elege eti nen ar o.
28An noba watni o, Noba wagwi kinalok, kir kinoba anggin panggin, ye wene nde wene werek mende etoma, An nen dek erogo binagagin o yiluk, yoragage. 29#Yer. 6:16Wene An emerkerak taga etoma mutok lagwi, nen An nebe paga kir emertagwi eku dogoni o. Nenaluk, An niliti teberek mende, nen nobabur yanggolek mondok mende ma, kir kinoba telek anggin dek erogo binagaga erigin o. 30Nenaluk, An wene emekiragi mende etoma panondak mondok arar o, nen wene anggin kinoba bigi mende etoma, anggin dek arar o,” yiluk yorarige.
सध्या निवडलेले:
MATIUS 11: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
