Joanes 1
1
Nuarin-tas alupas 1.
1IS ereuc a Intas an naopan iyehki is pam eri eteuc nobohtan, is amen a Intas ehele Atua, is lep Atua a Intas.
2Aien aigki is amen aien ehele Atua an naopan iyehki is pam eti eteuc nohohtan.
3Eris ago niji itai asega vai yin; et eti eteuc tah nitai ineig is eti ago aien.
4Is amen ehelen nitai umoh iran; is lep itai lah imi atimi nitai umoh iran.
5Et eteuc nirai lah an naupat; ja et ahtapanes inlah naupat.
6¶ Is abraig pan natimi is ethi a Atua, nidan Joanes.
7Is ham aien par asuptecnaig Nitai lah, mika eri imyiisjis ninivaijec natimi asega vai yin.
8Is eti itai lah iyehki aien, ja eris airai yin mika yi asuptecnaig Nitai lah iyehki aien.
9Is itai lah inivaijec iyehki, is ham aien an nobohtan mika eri lah natimi asega vai yin.
10¶ Is amen aien an nobohtan, eris lep ago nobohtan vai yin, ja eris eti ato yin an nobohtan.
11Is apan aien an pece o un, ja eris eti leh yin a nup uran pece o un.
12Ara asega eris leh yin ara, um asgeig an nidan, is alupai ra nemda aien mika eri ilpu hal o Atua ara:
13ara, is apos ra a Atua, jam eti apos ra vai ilpu retpora, ka inmerit o inliinmopura, ka inmerit o atimi.
14Is leh nohun a Intas, um amen eheleija, (ehtijis almoi natimi alupas o un aijumtaij, natimi alupas o Inhal o Etman et ethi ache,) is esjilid acen naiheuc o un, is lep idim inivaijec aien.
15¶ Is asuptecnai yin a Joanes, um ahlaig, um ika, Aien aigki kis tas vai yin ainyak, um ika, Aien etpu apitac nyak aien, inyi esjilid irak aien; is idim uhup irak aien.
16Intis leucse itai akaija asega irai iji itai is ahinag o un, im lep naiheuc et idivaig naiheuc a un.
17Is alupai caija intas alep a Moses, ja is ahes ehele Iesu Kristo intas aiheuc va atimi um inivaijec.
18Is idim eti ecet Atua tah natimi; ja is asuptecnai yin a Inhal o un et ethi ache, et amen aien an riti Etman.
19INTAS o Joanes ineigki an naopan iyehki eris abrai ilpu atimi ahlap im ilpu mapoi Livai a nupu Jutaia mika eri ahes Jerusalem ara, um apan, um ahodai yin, um ika, Aiek di aigki?
20Is asuptecnaig aien, um eti ateri; is idim asuptecnaig aien, um ika, Ek eti Kristo ainyak.
21Eris lep ahodai yin ara, um ika, Aiek di aigki? Na Elaija aiek, ka oʼo? Is um ika aien, Oʼo. Eris um ika ara, Na aprofeta iyehki aiek, ka i oʼo? Is um ika aien, Oʼo.
22Eris lep ika ehelen ara, Aiek di aigki? aniv euc aiek ehelema, mika ecri apan aijama um asuptecnaig ehele ra eris abrai cama ara. Nai ikha aiek vai euc?
23Is ika aien. Eh “ohran tah ainyak et ahlaig aien an namasacen, um ika, Akumu ago atoh nefalaig vai Ihova aijaua,” et idivaig is asaig a Aiseya naprofeta.
24Eris ilpu Farisi ara eris abrai ra.
25Eris ahodai yin ara, um ika ehelen, El et eti Kristo aiek, ka Elaija, ka naprofeta iyehki, na auri aiek par baptiso ira atimi?
26Is tas ehele ra a Joanes, um ika, Ek baptiso ira atimi ainyak an wai: ja et amen ehelemia tah et ethi, eka eti ato yin aijaua;
27aien aigki et apitac nyak aien, et idim esjilid irak aien, ek eti upene ainyak par ahiyi nehtit an cedpun neduon.
28Eris ago nitai iji eigki Bedabara an nahaijin Jortan itac, an nuarin ineig is baptiso iran a Joanes.
29¶ Is wat lahlah an tak apnyin, is ecet Iesu a Joanes napanvaig ehelen, um ika, Almoi Lam o Atua aijaua, aien aigki et iknipagki nedo has aien an nobohtan:
30aien aigki kis tas vai yin ainyak, um ika, Etpu ham natimi inyi ethi um apitac nyak, inyi esjilid irak aien; is idim uhup irak aien.
31Kis eti ato yin ainyak: ja kis ham ainyak um baptiso ira atimi an wai, mika eri ato yin a nupu Isreel.
32Is asuptecnaig a Joanes, um ika, Kis ecet Nesgan Upene ainyak is ahes an nohatag um asuol is idivaig nalaupa, um amen iran:
33kis eti ato yin ainyak: ja aien is abrai nyak aien mika ki baptiso ira atimi ainyak an wai, is ika ehelek aien, Aien aigki napu ecet shlegan Upene aiek nasuolvaig Necen um amen iran, etpu baptiso ira atimi aien an Nesgan Upene.
34Kis ecetai ainyak um asuptecnaig, um ika, Inhal o Atua ineigki.
35¶ Is wat lahlah an tak apnyin, is aiji a Joanes im lep natimi atahaijeg yin is ero;
36is alum Iesu aien natgavaig, um ika, Almoi Lam o Atua aijaurau!
37Erus atahaijeg intas o un natimi atahaijeg yin erahki, um apitac Iesu.
38Is ahidai yin a Iesu um ecet rau napitac yin vaig, um ika ehele rau, Erau merit vanhe aijaurau? Erus ika ehelen arau, Ak Rabai, (nesgan tas ineigki, Ak Natimi esege,) na amen aiek eda?
39Is ika ehele rau aien, Apam aijaurau um almoi. Erus apan arau um almoi nuarin ineig is amen iran aien, um amen ehelen an nadiat iyehki: is um jupura.
40ANTRIUS, etoai Saimona Pitrus, is atimi is ethi ira rau aien, erus atahaijeg intas o Joanes arau, um apitac Iesu.
41Is upyi uhup aien um ecet Saimona etoan, um ika ehelen, Ecra mun ecet Mesia aijama, (nesgan tas ineigki, Kristo, Natimi ineig is ati yin a Atua.)
42Is imyiapan yin ehele Iesu aien. Is wat ecet yin a Iesu, is ika aien, Na Saimona aiek inhal o Jona: uhpu anvi nidam par ika Sifas, (nesgan tas ineigki, Pitrus, Inhat.)
43Is wat lahlah an tak apnyin, is ika a Iesu yi apan Calili, is ecet j Filipus aien, um ika ehelen, Apitac i nyak aiek.
44Is upu Bedseta a Filipus, nuarin-pece o Antrius im Pitrus.
45Is ecet Nadanyel a Filipus, um ika ehelen, Ecra mun ecet Iesu nup an Nasared aijama inhal o Josef, aien aigki is aged intas vai yin a Moses an tas alep, im lep ilpu profeta.
46Is ika ehelen a Nadanyel, Et idim ahes an Nasared tah nitai upene, ka oʼo? Is um ika ehelen a Filipus, Apam aiek um almoi.
47Is ecet Nadanyel a Iesu napanvaig ehelen, um ika vai yin, Almoi nupu Isreel ineig aijaua, et eti efaifa aien!
48Is um ika ehelen a Nadanyel, Na ato nyak aiek vai di? Is tas a Iesu, um ika ehelen, Kis idim ecet euc ainyak an naopan iyehki as amen aiek itlian nateg, ja is par ahlaig vai euc a Filipus.
49Is tas ehelen a Nadanyel, um ika, Ak Natimi esege, nai Hal o Atua aiek; na Atimarid u nupu Isreel aiek.
50Is tas a Iesu, um ika ehelen, Nai imyiisjis ninivaijec aiek vai intas ineig ek mun asaig ehelum ainyak mika, Kis ecet euc ainyak itlian nateg? napu ecetai aiek niji itai inyi esjilid irai itai iji eigki.
51Is um ika ehelen aien, Et idim inivaijec ineig ek asaig ehelemia ainyak mika, Akupu ecetai nohatag aijaua an tak aopan etpu asalgei, im lep naridjai o ilpu agelo o Atua, im nasuol ura, irai Inhal o natimi.
सध्या निवडलेले:
Joanes 1: VAO63
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Vanuatu Bible (Intas Etipup) © United Bible Societies, 1863, 2019.
