മത്തായ് 7

നായംവിതിക്കന്റത്‌നപ്പെറ്റിയൊള്ള പടിപ്പിക്കിത്ത്

ലൂക്കോശ് 6:37–38,41–42

1വേറാള്കള വിതിക്കേറ് ഇന്റെ തെയ്‌വം നിങ്ങളയം വിതിക്ക്ത്ത്‌ല. 2നിങ്ങ വേറാള്കള വിതിക്കിന്റത് പേലതിന്ന തെയ്‌വം നിങ്ങളയം വിതിക്കും; നിങ്ങ ഏത് അളവ് കൊണ്ട് അളക്കന്റരോ ആ അളവ് കൊണ്ട് നിങ്ങ്ക്ക് അളന്ന് കിട്ടും. 3നിന്റ കണ്ണീല വെലിയ കോല് നിയ്യ് പാക്കാണ്ടി നിന്റ കൂട്ട്ന്റ കണ്ണീല മൊത പാക്കന്റത് എന്തന്ക്ക്? 4നിന്റ കണ്ണീല് കോല് കെടപ്പ്നിക്കി കൂട്ടേ നെല്ല് നിന്റ കണ്ണീല മൊത എട്ക്ക്ട്ട് ഇന്റ് ഏണ പേശ്‌വാനിക്കി പെറ്റ്ന്റ്. 5കള്ളനോയ്‌മ്പ്കാറാ, നീ ആത്തിയം നിന്റ ശൊന്തം കണ്ണീല കോല് എട്ത്ത് കള; ആണയിന്റെ നിന്റ കൂട്ട്ന്റ കണ്ണീല മൊത എട്ത്ത് കളവാനിക്കി നെല്ല കാണ്‌വാനിക്കി പെറ്റും.

6ശുത്തിയൊള്ളത് നായിക്കി ഇട്ട് കൊട്ക്കേറ്; അത് നിങ്ങള നയിപ്പിപ്പാനിക്കി വെരും. നിങ്ങള മാണിക്കക്കെല്ല് പെന്റീന്റ മൊകത്ത് ഇടേറ്; അത് കാല് കൊണ്ട് തിക്കിമിതിച്ച് കളയും.

കേക്കത്തം തേടത്തം മുട്ടത്തം

ലൂക്കോശ് 11:9–13

7കേളൻ ഇന്റെ നിങ്ങ്ക്ക് കിട്ടും; തേടിപ്പാരൻ ഇന്റെ നിങ്ങ അത് കണ്ട്പിടിപ്പ്റ്; മുട്ടൻ ഇന്റെ നിങ്ങ്ക്ക് വാച്ച തൊറന്ന് കിട്ടും. 8കേക്കന്റ ഏവന്ക്കം കിട്ടും; തേടന്റ ഏവനം കണ്ട്പിടിപ്പ്റ്; മുട്ടന്റ ഏവന്ക്കും വാച്ച തൊറന്ന് കിട്ടും. 9കയ്യൻ അട കേട്ടേ അവന്ക്ക് കെല്ല് കൊടക്കന്റ അപ്പൻമാര് നിങ്ങളീല് ഏവനീങ്കിലും ഒണ്ടാ? 10അവൻ മീൻ കേട്ടേ നിങ്ങ അവന്ക്ക് പാമ്പ്ന കൊട്പ്പ്റാ? 11ആണ തുട്ടൻമാരാഞ്ഞ നിങ്ങ്ക്ക് നിങ്ങള കുഞ്ച്‌ല്‌ക്ക് നെല്ല ഏവാരങ്ങള് കൊടപ്പാനിക്കി തിക്കൊണ്ട് ഇന്റെ മേലോകത്തീലൊള്ള അപ്പൻ അവനോട കേക്കന്റ ഏവന്ക്കും എത്തറമാട്ട്ക്കും നെല്ലവരം കൊട്ക്കും.

12വേറാള്കള് നിങ്ങ്ക്ക് എന്തനീങ്കിലും കാരിയം ചെയ്ഞ്ഞ് തെരണമിന്റ് നിങ്ങ ആശിക്കിന്റതിന്റെ അത് നിങ്ങ അവ്ങ്ങ്ക്ക് ചെയ്യണം; നായപ്റ്മാണമം വ്‌ലാത്തിമാരും ഇത് തിന്നയാണും പടിപ്പിക്കിന്റത്.

ഇട്ക്ക് വാച്ച

ലൂക്കോശ് 13:24

13ഇട്ക്ക് വാച്ചതിന്ന അകത്തിക്കി കടവൻ; എന്തനിന്റെ നാശത്ത്ക്ക് പോന്റ വാച്ച വെലീതും വീതിയൊള്ളതും ആണും; ഒരിന്നാള്കള് ആ വാച്ചതിന്ന കടന്ന് പോന്റാര്. 14ഇന്റെ ഉശ്റ്ക്കൊള്ള വെയ്യ് ഇട്ങ്ങീതും പാടൊള്ളത്‌മാണും; അത്‌ന കണ്ട് പിടിച്ചാള്കള് ഇത്ത്റിയേ ഒള്ള്.

ഒര മരമം അത്‌ന്റ പയങ്ങളം

ലൂക്കോശ് 6:43–44

15കള്ളവ്‌ലാത്തിമാര പാക്കണം; അവങ്ങ ആട്കള പേല നിങ്ങളാട്ടക്കി വെര്വ്റ്; ഇന്റെ അവങ്ങ കടിച്ച്കീറന്റ ചെന്നായ്‌കളപ്പേലയാണും. 16അവങ്ങ ചെയ്യന്റ കാരിയത്തീല് നെന്റ് നിങ്ങ്ക്ക് തിരിച്ചറിവേള്; മുര്ക്ക് മരത്തീനെന്റ് അത്തിപയ്യമം ഇഞ്ചപ്പാളീനെന്റ് മുന്തിരിപ്പയമം ഒരത്തനം പറിക്ക്ത്ത്‌ല. 17നെല്ല മരത്തീനെന്റ് നെല്ല പയമം ചാട്ടാത്ത മരത്തീനെന്റ് ചാട്ടാത്ത പയമം കായിക്കിന്റ്. 18നെല്ല മരത്തീല് ചാട്ടാത്ത പയമം ചാട്ടാത്ത മരത്തീല് നെല്ല പയമം കായിക്ക്ത്ത്‌ല. 19നെല്ല പയം കായ്‌ക്കാത്ത മരമൊക്ക വെട്ടി തിയ്യിലിട്ട്കളയും. 20ആണ കള്ളവ്‌ലാത്തിമാര അവങ്ങ ചെയ്യന്റ കാരിയങ്ങളീല് തിക്കൊണ്ടാവാനിക്കി പെറ്റും.

എക്ക് നിങ്ങള ഒരകാലത്തം തിക്ക്‌ല

ലൂക്കോശ് 13:25–27

21എന്ന കർത്താവേ, കർത്താവേ, ഇന്റ് വിളിക്കിന്റ ഒക്കളമില്ല, മേലോകത്തീല അപ്പന്റ ഇട്ടം ചെയ്യന്റവനാണും തെയ്‌വം വായന്റ ഒലകത്ത്ക്ക് പോന്റത്. 22നായവിതി തെവശത്തീല് കൊള്ളാള്കള് എന്നോട പേശ്‌വ്റ്, “കർത്താവേ, കർത്താവേ, നിങ്ങള പേരില് എങ്ങ ഉത്ത്റ്‌വ് പേശത്തം നിങ്ങള പേരില് പൂതങ്ങള പൊറത്താക്കത്തം നിങ്ങള പേരില് കൊള്ള അത്‌ശകങ്ങള് ചെയ്യത്തം ചെയ്ഞ്ഞം?” 23അപ്പിനിക്കി നാന് അവങ്ങളോട പേശ്‌വിൻ, എക്ക് നിങ്ങള ഒരകാലത്തം തിക്ക്‌ല; കെട്ടകാരിയം ചെയ്യന്റാള്കളേ, നിങ്ങ എന്ന വിട്ട്പേൻ.

വീട് കെട്ടന്റ റണ്ടാള്കള്

ലൂക്കോശ് 6:47–49

24നാന് പേശിയ ഈ വയനമൊക്ക കേട്ട് അത്‌ന്റ ചൊല്ല്ക്ക് നെക്കന്റ ഒക്കളം പാറയിന്റ മീത വീട് കെട്ടിയ പുത്തിയൊള്ള മന്ശ്‌ന പേലയാണും. 25മയ്യടിച്ച് തണ്ണിപ്പൊക്കം വെരത്തം കാറ്റ് ശക്ക്തിക്കി വീട്ട്ക്ക് അടിക്കത്തം ചെയ്ഞ്ഞ്‌ത്; ഇന്റാലും പാറയിന്റ മീത കെട്ടിയ വീടാഞ്ഞ്ത് കൊണ്ട് അത് വീന്ന്‌ല.

26ഇന്റെ എന്റ വയനം കേട്ട് അത്‌ന്റ ചൊല്ല്ക്ക് നെക്കാത്തവൻ മണല്ന്റ മീത വീട് കെട്ടിയ പുത്തിയില്ലാത്ത മന്ശ്‌നപ്പേലയാണും. 27മയ്യടിച്ച് തോട് കെവിഞ്ഞ്ത്, കാറ്റ് ശക്ക്തിക്കി ആ വീട്ട്ന്റ മീത അടിച്ച്ത്. ആണ ആ വീട് ഇടിഞ്ഞ് പൊളിഞ്ഞ് പീത്; ആ വീത്ത പയങ്കരമാഞ്ഞ്ത്.

ഏശുവ്ന്റ അതികാരം

28ഏശു ഈ വാക്ക് പേശി തീറത്തപ്പൻ അവന്റ പടിപ്പിക്കത്തീല് ആള്കള് അത്‌ശകപ്പെട്ട്പിയ്യാര്. 29അവൻ മതത്ത്നപ്പെറ്റി പടിപ്പിക്കിന്റാള്കള പേലയില്ല അതികാരത്തോടയാണും പടിപ്പിച്ചത്.

सध्या निवडलेले:

മത്തായ് 7: മുതുവാൻ

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

പുത്തൻ ചട്ടംबद्दल अधिक जाणून घ्या