MI CILIMA 8
8
1U Tienu den tiadi Nowe po leni ti moayandi leni ti denyandi yaadi n den ye leni o ku ñinbiagu nni kuli po. U Tienu den teni ke u faalu figi ki tinga nni ke mi ñima ñuudi ki wadi. 2U *kulu yaa ñinbuna leni tanpoli bona kuli den luoni ke ki taaga naa go den mini. 3Mi ñima den cili ki ñuudi ki tinga nni. Mi ñima den wadi hali dana kobiga n piimuu yaa bianu. 4Cilele yaa piiga n daleleeli ku ñinbiagu den sedi Alalati yaa juana yuli po. 5Mi ñima den wadi wadi ki pundi hali cipiiga. Cipiiga yaa dacilidaali a juana yula den ñiidi.
6Dana piinaa n den pendi, Nowe den luodi wan den tieni ku ñinbiagu yaa bonli. 7O den ŋa li kankali ke li den ñani ki guani figilima coacoali, hali ki tinga n ban kuodi yaa yogunu. 8O go den ŋa ki kpaajiega mo ki bua ki bandi mi ñima yaa den wadi mi tinfanma nni. 9Ama ki kpaajiega ki den baa kan baa jagini naani, lanwani ki den lebidi ki guani Nowe kani ku ñinbiagu nni kelima mi ñima da den baa ye u tingbanu kuli po. Nowe den tandi o nuu ki cuo ga ki kuani ga ku ñinbiagu nni. 10O den guudi dana lele goga ki go den ŋa ki kpaajiega ke ki ñani ku biagu nni. 11Ku yenjuogu ki kpaajiega den guani o kani ki babi *olifie tibu faagu o ñoabu nni. Lanwani Nowe den bandi ke mi ñima den wadi ki tinga nni. 12O go den guudi dana lele ki go ŋa ki kpaajiega ke ki gedi. Ama kaa go den guani o kani. 13Kobiluoba n binyenli yaa binli, ciyendo yaa dacilidaali mi ñima den ñuudi. Nowe den pindi ku ñinbiagu bonpinkaala ki diidi ki sua ke mi tinfanma kuodi cain.
14Cilie piilie n dana lele daali ki tinga den kuodi cain.
15Lanwani U Tienu den yedi Nowe: 16«Ña ku ñinbiagu nni, fini leni a pua, a bijaba leni a biyuamu. 17Go ñani yaa yandi buoli kuli n den ye leni a ku ñinbiagu nni yeni: i nuani, ti yandi leni li bonbalinkaala kuli. Teni ban ña ki yadi ki gbieni ki tinga kuli.» 18Nowe den ñani wani leni o bijaba, o pua, leni o biyuamu. 19Ti yandi buoli kuli: li bonbalinkaala, i nuani, yaala n balini tiipo, bonla kuli leni li buolu, bikuli den ñani ku ñinbiagu nni.
20Nowe den maa li *padibinbinli Li Miali Diedo po. O den gandi ti yandi leni i nuani siiga yaaba n ŋani ki padi li padibinbinli kani. 21Li Miali Diedo den gbadi yaa nuulu n mani opo. Lanwani Li Miali Diedo den maadi o pali nni mi naa maama: «N kan go soli ki tinga kelima o nisaalo po, kelima o pali nni o li tia mi biadima hali o biwaama yogunu. N kan go bolini yaala n fo kuli nani min tieni maama moala yeni.
22Hali ki tinga n baa ye,
Ti jaadi leni u jetaagu,
Ti waadi leni ku tontongu,
Ku siagu leni li fali,
U yensiinu leni ku ñiagu kan gbeni.»
U Tienu ñoanianu Nowe po
सध्या निवडलेले:
MI CILIMA 8: GUX03
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Gulmancema Bible © Bible Society of Burkina Faso, 2003.