MI CILIMA 11
11
1Laa yogunu ki tinga nni niba kuli den maadi maboyendu. 2Bi den ñani puoli po yaa diema ki ban pundi yaa joaloangu n ye Sineala yaa diema nni ki kali ki baa yaa ye lankani. 3Bi den yedi biyaba: «Cua mani tin pua i tankonkuomi ki puli yi.» I tankonkuomi den tie bipo nani a tana yeni ki tinga sinboanma mo den tie bipo nani mi tankpama yeni. 4Bi go den yedi: «Cua mani tin cili ki maa u dogu leni ku doanciangu yaagu n baa kpedi ki pundi tanpoli. Lani n tie ti yeli n ña hali boncianla. Ti kan go yadi yadi ki tinga nni mo.»
5Li Miali Diedo den ñani tanpoli ki jiidi ki baa le u dociamu leni ku doanciangu yaagu ke bi niba den maa yeni. 6Li Miali Diedo den yedi: «Diidi bi tie nibuoyende bi kuli go taa maboyende mo. Lani n teni ke bi cili laa tuonli. Moala pu kan go yie bipo ban jagi ke bi baa tieni yaala kuli yaa niinni. 7Cua mani tin jiidi ki ŋmadi bi maama lan tie ban da go gbadi biyaba maama.» 8Li Miali Diedo den yadi yadi ba hali foagima mi tinfanma nni ke bi den cedi kaa go maa u dogu yeni. 9Lani yaa po n teni ke bi yini u dogu yeni Babela, kelima Li Miali Diedo den ŋmadi ki tinga yaaba kuli yaa maama lankane. Li go den tie lankane ke Li Miali Diedo den yadi yadi ba mi tinfanma nni kuli.
Sema leni o puoliŋuani togida
10Bine n tie Sema yaa yaabila ki tabolinkaaga n den pendi ke li tieni bina lie. Sema n den pia bina kobiga o den mali Alipakisadi. 11Sema n den mali Alipakisadi, o den tieni bina kobimuu ki mali a bonjala leni a bonpola.
12Alipakisadi n den pia piitaa n bina muu yaa yogunu, o den mali Sela. 13Alipakisadi n den mali Sela o go den tieni kobinaa n bina taa ki mali a bonjala leni a bonpola.
14Sela n den pia bina piitaa yaa yogunu, o den mali Hebeli. 15Sela n den mali Hebeli, o go den tieni kobinaa n bina taa ki mali a bonjala leni a bonpola.
16Hebeli n den pia piitaa n bina naa yaa yogunu, o den mali Pelega. 17Hebeli n den mali Pelegi o go den tieni bina kobinaa n piitaa ki mali a bonjala leni a bonpola.
18Pelegi n den pia bina piitaa yaa yogunu, o den mali Lehu. 19Pelegi n den mali Lehu, o go den tieni kobilie n bina yia ki mali a bonjala leni a bonpola.
20Lehu n den pia piitaa n bina lie yaa yogunu, o den mali Seluga. 21Lehu n den mali Seluga, o go den tieni kobilie n bina lele ki mali a bonjala leni a bonpola.
22Seluga n den pia bina piitaa yaa yogunu o den mali Nahola. 23Seluga n den mali Nahola o go den tieni bina kobilie ki mali a bonjala leni a bonpola.
24Nahola n den pia piilie n bina yia yaa yogunu o den mali Tela. 25Nahola n den mali Tela o go den tieni kobiga n piiga n bina yia ki mali a bonjala leni a bonpola.
26Tela n den pia bina piilele yaa yogunu o den mali Abalama leni Nahola leni Halana.
Tela leni Abalama togida
27Mine n tie Tela yaa yaabila yaa maama. Tela den mali Abalama leni Nahola leni Halana. Halana mo den mali *Loto. 28Halana den kpe o maadogu nni yu n tie Ula, Kalide yaa diema nni ke o baa Tela da ye. 29Abalama leni Nahola den taa bi puoba. Abalama yaa pua den yi Salai, Nahola yaa pua den yi Milika, Halana yaa bisalo. Halana den tie Milika leni Jisika yaa baa. 30Salai den tie ŋoaliga waa den pia biga.
31Tela den taa o bijua Abalama leni Loto, o bijua Halana yaa bijua, ki go taa o biyuaga Salai, o bijua Abalama yaa pua, ke bi fii ki gedi u dogu. Bi den taani ki fii Ula yaa dogu, Kalide yaa diema nni ki baa gedi hali Kanana diema nni. Bi den pundi Halana dogu ki jiidi ki baa ye lankani. 32Tela bina kuli den tie kobilie n bina muu. Tela den kpe Halana dogu nni.
U Tienu yini Abalama n ña o diema nni
सध्या निवडलेले:
MI CILIMA 11: GUX03
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Gulmancema Bible © Bible Society of Burkina Faso, 2003.