LUKA 22
22
Zuwifuw ka nyamɔgɔw b'a fɛ ka Yezu faga
(Mat 26.1-5,14-16; Mar 14.1-2,10-11)
1Buru funubali nyanagwɛ, o min tɔgɔ ko Hɔrɔnya nyanagwɛ fana, o tun surunyana. 2Sarakalasebagaw ni sariya karamɔgɔw bɛna se ka Yezu faga cogo min na ni jama ma bɔ a kala ma, u tun b'o cogo nyinina bari u tun bɛ siran ko jama bɛna muruti.
Zuda b'a fɛ ka Yezu don mɔgɔjuguw bolo
3O tuma na, Zuda min bɛ wele Isikariyɔti n'o ye kalanden tan ni fila nunu dɔ ye, Sutana y'a daminɛ k'o hakili yɛlɛma. 4A taar'a fɔ sarakalasebagaw ni Alabatosoba kɔlɔsibagaw kuntigiw ye ko cogo b'ale fɛ ka Yezu don u bolo. 5O diyara u ye kosɛbɛ. U bɛnna a la k'u bɛna wari hakɛ dɔ d'a ma. 6Zuda sɔnna. A y'a daminɛ ka cogoyanyuman nyini waasa k'a don u bolo ni jama ma bɔ a kala ma.
Yezu b'a ka kalandenw fila ci ka taa Hɔrɔnya nyanagwɛ dumuni labɛn
(Mat 26.17-19; Mar 14.12-16)
7Buru funubali nyanagwɛ loon fɔlɔ nana se. Sagaden tun ka kan ka faga o loon ka kɛ Hɔrɔnya nyanagwɛ saraka ye. 8Yezu y'a fɔ Piyɛri ni Zan ye k'u ka taa Hɔrɔnya nyanagwɛ dumuni labɛn u ye.
9U y'a nyininga ko: “I b'a fɛ an k'o labɛn yɔrɔ jumɛn?”
10A y'u jaabi ko: “Aw dontɔ dugu kɔnɔ, aw ni cɛɛ dɔ bɛna nyɔgɔn kunbɛn, duun fanin bɛ jii la a kuun na. Aw ka tugu o cɛɛ nin nɔɔ fɛ. N'a donna luu min kɔnɔ, aw ye don yen, 11k'a fɔ o lutigi ye ko karamɔgɔ ko a n'a ka kalandenw bɛna Hɔrɔnya nyanagwɛ dumuni kɛ boon min kɔnɔ, k'o bɛ min? 12A bɛna bonba dɔ yira aw la sangaso la. An mako bɛna se fɛɛn minw ma, o bɛɛ b'a kɔnɔ. Aw ka nyanagwɛ nin dumuni labɛn o yɔrɔ la.”
13Piyɛri ni Zan taara. Yezu tun y'a fɔ u ye cogo min na, a kɛra ten fana. U ye dumuni nin labɛn yen.
Ala bɛ jɛnnyɔgɔnyakura layidu ta ni Yezu joli ye
(Mat 26.26-29; Mar 14.22-25; Kor fɔlɔ 11.23-26)
14Dumuni kɛtuma sera minkɛ, Yezu n'a ka ciden tan ni fila sigira dumuni na. 15A y'a fɔ u ye ko: “Ne tun b'a fɛ kosɛbɛ ka Hɔrɔnya nyanagwɛ nin ka dumuni kɛ n'aw ye sanni ne bɛ tɔɔrɔ, 16bari ne b'a fɔ aw ye ko ne tɛna Hɔrɔnya nyanagwɛ wɛrɛ ka dumuni kɛ tugu fɔɔ a dumukun ka dafa Ala ka mara kɔnɔ.” 17O tuma na, a ye duvɛn ta ka barika la Ala ye k'a fɔ ko: “Aw k'a minɛ k'a min, 18bari ne b'a fɔ aw ye ko ne tɛna duvɛn min tugu ni Ala ma na n'a ka masaya ye dugukolo kan.”
19O kɔ, Yezu ye buru ta ka barika la Ala ye. A y'a tilantilan k'a d'u ma k'a fɔ ko: “Nin ye ne fari ye [min bɛna kɛ saraka ye aw ka nafa kɔsɔn. Aw ye to ka nin kɛ k'aw hakili to ne la.” 20Dumuni kɛnin kɔ, a ye duvɛn fana ta ka barika la Ala ye. A y'a di u ma k'a fɔ ko: “Nin ye ne joli ye, Ala bɛ jɛnnyɔgɔnyakura sigi n'o min ye. O joli nin bɛna bɔn aw ka nafa kɔsɔn.]
Yezu b'a janfabaga koo fɔ
(Mat 26.20-25; Mar 14.17-21)
21“Mɔgɔ min bɛna ne don mɔgɔjuguw bolo, o tigi bɛ dumuni kɛra ni ne ye. 22Tinyɛ lo, Mɔgɔ Dencɛ bɛna sa i n'a fɔ Ala y'a latigɛ cogo min na, nga min bɛn'a don u bolo, bɔnɛ bɛna o tigi sɔrɔ.”
23Kalandenw y'a daminɛ ka nyɔgɔn nyininga k'o bɛna kɛ jon ye u cɛla.
Yezu ko nyamɔgɔ ka kɛ i n'a fɔ jɔɔn
(Mat 18.1; 20.25-28; Mar 9.34; 10.42-45)
24Kalandenw y'a daminɛ ka nyɔgɔn sɔsɔ kosɛbɛ, bari u tun b'a fɛ k'a lɔn ni mɔgɔ min ye nyamɔgɔ ye u cɛma. 25Yezu y'a fɔ u ye ko: “Dinyɛ ka masacɛw bɛ kuntigiya koow kɛ tɔw la, ani fanga bɛ minw bolo, olu b'a fɛ u k'u tɔgɔnyuman fɔ. 26Nga aw ta man kan ka kɛ ten. Mɔgɔ min ye nyamɔgɔ ye aw cɛma, o tigi ka kan ka kɛ aw bɛɛ makonyala ye i n'a fɔ aw ka dɔgɔnin. Fanga bɛ min bolo aw cɛma, o tigi ka kan ka kɛ aw bɛɛ ka jɔɔn ye. 27Mɔgɔ min bɛ dumuni labɛnna an'a bɛ di min ma wo, jon le ye mɔgɔba ye u fila cɛla? Dumuni bɛ di min ma, o tɛ wa? Ayiwa, ne bɛ aw cɛma i n'a fɔ jɔɔn.
(Mat 19.28)
28“Aw kɔni munyuna ka to ne fɛ n ka sɛgɛnw waati la. 29O le y'a to, ne Faa ye masaya di ne ma cogo min na, ne fana b'a di aw ma o cogo la, 30janko aw ka dumuni kɛ ka minni kɛ ne ka masaso kɔnɔ ani aw ka kɛ masaw ye ka sigi Isirayɛli jama kunna.”
Yezu ko Piyɛri bɛn'a fɔ ko a t'ale lɔn
31Yezu y'a fɔ ko: “Simɔn, Simɔn, Sutana ye sira nyini waasa k'i yuguyugu i n'a fɔ mɔgɔ bɛ mugu tɛntɛn cogo min na, 32nga, ne ye Ala dali i ye waasa i kana tigɛ ne la. N'i segira ka kɛ ne ta ye tuma min na, i k'i tɔnyɔgɔnw dɛmɛ.”
(Mat 26.33-34; Mar 14.29-30)
33Piyɛri y'a fɔ a ye ko: “Matigi, hali ni ne ka kan ka fara i kan u k'an don kaso la, walima u k'an faga, ne bɛ sɔn.”
34Nga Yezu y'a fɔ a ye ko: “Piyɛri, ne b'a fɔ i ye ko dondo tɛna kasi bii n'i m'a fɔ ko i tɛ ne lɔn fɔɔ sinyɛ saba.”
Yezu ko ni kɛlɛkɛminan tɛ min fɛ, o ka dɔ san
35O kɔ, Yezu y'a fɔ a ka kalandenw ye ko: “Ne y'aw ci tuma min na k'a fɔ aw ye ko aw kana taa ni wari ni dugutaaminan ani sanbara ye, fɛɛn dɔ ye aw dɛsɛ wa?”
U y'a jaabi ko foyi m'u dɛsɛ. 36A y'a fɔ u ye tugu ko: “Nga sisan, ni wari bɛ min fɛ, o k'a ta. O cogo la fana, ni dugutaaminan bɛ min fɛ, o k'a ta. Ni murujan tɛ min fɛ, o k'a ka nɛnɛ duloki feere ka dɔ san. 37Ne b'a fɔ aw ye, Ala ka kuma ye min fɔ ne koo la ko: ‘U y'a jati kojugukɛlaw dɔ ye,’ wajibi lo o ka kɛ. Ayiwa, o kɛ tuma surunyana.”
38Kalandenw y'a fɔ a ye ko: “Matigi, murujan fila filɛ.”
A y'u jaabi ko o ka nyi ten.
Yezu bɛ taa Ala dali kulu dɔ kan
(Mat 26.36-41; Mar 14.32-38)
39Yezu bɔra ka taa Olivuyirikulu kan i n'a fɔ a tun bɛ deli ka taa cogo min na. A ka kalandenw tugura a kɔ. 40A sera o yɔrɔ la tuma min na, a y'a fɔ u ye ko: “Aw ka Ala dali waasa Sutana kana aw nigɛ ka don koo la.”
41O kɔ, a bɔra u kɔrɔ dɔɔni ka se bɛrɛ fili koo kelen janya ma. A y'a kunbiri gwan k'a daminɛ ka Ala dali ko: 42“Ne Faa, n'i b'a fɛ, i ka ne kisi tɔɔrɔ nin ma, nga ne sago kana kɛ fɔɔ e sago.” [ 43O tuma na, mɛlɛkɛ dɔ bɔra sankolo la k'a yɛrɛ yira a la, ka barika don a la. 44Yezu nii tɔɔrɔnin tun bɛ. A ye dɔ fara Ala dalili kan. A wasiji nyaa kɛra i n'a fɔ joli n'o bɛ tɔnitɔni duguma.]
45A ye Ala dali ka ban tuma min na, a wilila ka taa kalandenw sɛgɛrɛ. A taara u sɔrɔ sinɔgɔ la nyanafinkojugu bolo. 46A y'a fɔ u ye ko: “Mun na aw bɛ sinɔgɔ? Aw ye wili ka Ala dali janko Sutana kana aw nigɛ k'aw don koo la.”
Yezu minɛko
(Mat 26.47-55; Mar 14.43-49; Zan 18.2-11)
47Ka Yezu to kuma na, Zuda min tun kɛra kalanden tan ni fila nunu dɔ ye, ale bilara jama nya ka na, a gwɛrɛla Yezu la ko a b'a fo. 48Nga Yezu y'a fɔ a ye ko: “Zuda, i bɛ Mɔgɔ Dencɛ don mɔgɔjuguw bolo ni foli le ye wa?”
49Mɔgɔ minw tun bɛ ni Yezu ye, koo min bɛna kɛ, olu y'o faamu minkɛ, u ye Yezu nyininga ko: “Matigi, an ka murujanw ta u kama wa?” 50U dɔ ye sarakalasebagaw kuntigiba ka jɔncɛ kinibolo tulo caron.
51Nga Yezu y'u jaabi ko: “Aw k'a dan nin ma.” A magara o jɔncɛ tulo la k'a kɛnɛya.
52O kɔ, sarakalasebagaw ni Alabatosoba kɔlɔsibagaw kuntigiw ani cɛkɔrɔba minw tun taara k'u b'a minɛ, a y'a fɔ olu ye ko: “Mun na aw nana ne kama ni murujanw ani berew ye i n'a fɔ ko ne kɛra benkannikɛla ye? 53K'a sɔrɔ ne tun bɛ n'aw ye tile o tile Alabatosoba kɔnɔ, aw ma ne minɛ, nga nin ye aw ka waati ye ani Sutana, ale min bɛ baara kɛ dibi la.”
Piyɛri ko a tɛ Yezu lɔn
(Mat 26.57-58; Mar 14.53-54; Zan 18.12-18)
54U ye Yezu minɛ ka taa n'a ye sarakalasebagaw kuntigi ka luu kɔnɔ. Piyɛri tugura u nɔɔ fɛ ka furancɛba to u ni nyɔgɔn cɛ. 55Mɔgɔw tun ye tasuma mana luu cɛmancɛ la ka sigi a daa la. Piyɛri taara sigi olu cɛma.
(Mat 26.67-75; Mar 14.65-72; Zan 18.19-27)
56Ka Piyɛri siginin to tasuma daa la, jɔnmuso dɔ y'a ye, a y'a nyaa basa a la k'a fɔ ko: “Cɛɛ nin fana tun bɛ ni Yezu ye.” 57Piyɛri y'o muso sɔsɔ k'a fɔ ko: “Ne t'a lɔn.” 58Waati dɔɔni o kɔ, cɛɛ dɔ fana y'a ye k'a fɔ a ye ko: “Ele fana ye u dɔ ye.” Nga Piyɛri ye o cɛɛ jaabi ko: “Ne tɛ u dɔ ye.” 59Lɛrɛ kelen nyɔgɔn tɛmɛnin kɔ, cɛɛ dɔ wɛrɛ segira k'a fɔ ko: “Siga t'a la, cɛɛ nin tun bɛ n'a ye bari Galileka lo.” 60Nga Piyɛri y'a jaabi ko: “E bɛ min fɔra, ne t'o faamu.” K'a to o kuma na, o yɔrɔnin bɛ dondo kasira. 61Matigi y'a nyaa yɛlɛma ka Piyɛri filɛ. Piyɛri hakili jigira Matigi ka kuma na, a tun ye min fɔ a ye ko: “Sanni dondo bɛ kasi bii, i bɛn'a fɔ fɔɔ sinyɛ saba ko i tɛ ne lɔn.” 62Piyɛri bɔra kɛnɛma ka kasi kosɛbɛ.
63Yezu kɔlɔsibagaw tun bɛ yɛlɛ a ma n'u b'a bugɔ. 64U tun y'a nyaa siri ka sɔrɔ ka to k'a bugɔ, ani ka tugu k'a nyininga ko: “Jon le y'i bugɔ?” 65U ye kumajugujugu wɛrɛw fɔ a ma.
Yezu bɛ Zuwifuw ka kiti tigɛyɔrɔ la
(Mat 26.59,63-65; Mar 14.55,61-64)
66Dugu gwɛra tuma min na, dugu cɛkɔrɔbaw, ni sariya karamɔgɔw ani sarakalasebagaw y'u lajɛn. U taara ni Yezu ye u ka kiti tigɛyɔrɔ la waasa k'a kiti. 67U y'a fɔ a ye ko: “N'i ye Ala ka Mɔgɔwolomanin nin ye, a fɔ an ye.” Yezu y'u jaabi ko: “Ni ne y'a fɔ aw ye, aw tɛna la a la. 68Ni ne y'aw nyininga fana, aw tɛna ne jaabi. 69Nga, kabini sisan, Mɔgɔ Dencɛ bɛna sigi Setigi Ala kinibolo fɛ.” 70U bɛɛ y'a fɔ ko: “O tuma na, e ye Ala Dencɛ ye wa?” A y'a fɔ u ye ko: “Aw yɛrɛ y'a fɔ ka ban do, ne lo.” 71U y'a fɔ nyɔgɔn ye ko: “An mako tɛ mɔgɔ ka fɔta la tugu ka sɔrɔ k'a jalaki, bari an yɛrɛw y'a dalakuma mɛn.”
सध्या निवडलेले:
LUKA 22: JULNT94
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Jula New Testament © Bible Society of Burkina Faso, 1994.
