Luka 23
23
Yesu arawa kwa Pilato
(Mat 27:1-2, 11-14; Mar 15:1-5; Yoh 18:28-38)
1Nalyo vakakwiipoo nseemu ulya wawo moose vakanrwaa kwa Pilato. 2Naasa vakapooka inkumba vakaamba, “Nndu yeu mmbo lwankooya asheevetaa vandu va uruka lweru kavaima valaute kodi ya Kaisari, kaamba we muni mmbwe Kristo akee mangyi.” 3Naasa Pilato kawesa Yesu, “A yewe mmbo kukee mangyi ya Vayuda ndesa?” Yesu kaallwa kammbia, “Ni yewe kwakyaamba.” 4Naasa Pilato kavia vakohani valya vaniini na nsemu ulya wa vandu, “Yeny nshilollye kindo kya uvingo kwa nndu yeu-fo.” 5Nawo vakaitika vakaamba, “Mmbo ayaa vandu va uruka eeloshaa kakwaanisa kunu Yudaya koose apookya kulya Galilaya katana afika kunu.”
Yesu arawa kwa Herode
6Naasa Pilato ekyiita indo kavesa kwakooya akee wa kulya Galilaya. 7Ammanya nisha mmbwa efo ushilyiny lwa Herode, naasa kanrika kulya kwa Herode, nawe asheye na kulya Yerusalemu fyeeri filya-da. 8Naasa llya Herode alelollya Yesu kafura kyuumu, kimmba eelangye illolya uka fyeeri fyaasha mashika elyi emmiita mbony takwe. Herode mmbo evikye nsia mmbo ashorwaa wende luuka kwa Yesu. 9Naasa kammbesa mbony shiingyi, lyo we nalarouwe nta kindo. 10Naasa vakohani valya vaniini vasasangyi na veelosha mavavaso vakasha isalala-fo, vakeengera inkumba. 11Naasa Herode kamwiinyala ando amwi na vasikari vakwe vakantatala, vakavembika soori shisha, vakambiira-se kwa Pilato. 12Naasa Herode katira mbuya na Pilato nkonu ulya mweni, mashika elyo mbee vesuvani.
Yesu autyo uvingo lweewaawa
(Mat 27:15-26; Mar 15:6-15; Yoh 18:39–19:16)
13Naasa Pilato kavaanga vakohani valya vaniini na vandu va nrwe na vandu va uruka vashekuummbya ando amwi, 14Kavavia, “Mmbo mulesheengye nndu yeu mukaamba mmbo akeeveta vandu. Neeny shammeembesa kya mwaandu wakwe mwiitye, llyo shilaoni kindo kya uvingo kya efyo mwankumba nafyo kyikee kwakwe. 15Naakwa ni Herode, nawe nta-fo, llyoony kammbiira na kweru. Nawe akakau nkwiifo kindo kisumani na ufu kyikee kitani mmbwe-fo. 16Naasany, shinkapaany nakweengye.” [ 17Nalye kyikee miishivye yakwe navaporomuye nndu umwi wo kyeeri kya sukukuu.] 18“Naasa vakaongora ando amwi nseemu ulya moose, utau nndu yeu nalakilolyo-fo, kuluporomuye Baraba!” 19Nawe Baraba ni nndu emmeenda yeerwa kifingyony kimaruma kya uriingyi lweefo kulya muriny na vandu vakawaawa. 20Naasa Pilato karera nawo lya kavii ni elyi eekundye ilekeya Yesu. 21Nawo vakakapa ngaya vakaamba, “Nkapye nsalabeny.” 22Naasa kavavia lya kararu, “A kindo kya ukasha nndu yeu aletana nkyokyi? Yeny nshilollye kindo kya uvingo kisumani na ufu kyikee efo kwakwe-fo. Naasany nshenkapaany shillekeye.” 23Nawo vakaitikya vekapaa kisangelele vakundye nandekapyo nsalabeny! Ngyunyanga tawo tikalyimba. 24Nalyo Pilato karumbwa kindetanwa ekyo vakunndye. 25Nalyo kalekeya nndu ulya aleerwa kifingyony kimaruma kya yaanta uriingyi na iwaa, na Yesu kavaniingya vantannyi shaasa vakundye.
Yesu akapywa nsalabeny
(Mat 27:32-44; Mar 15:21-32; Yoh 19:17-27)
26Naasa elyi veefo vasheendaa vanrie vakatira Simon wa Krene asha auka ireminy. Vakanrika nsalaba nashe yoo numa ya Yesu aurie. 27Naasa vandu va uruka vakallatya nseemu mwiingyi na vaka vekukapa-kapaa mbafu na imwiiya. 28Naasa Yesu kavaindukya kaamba, “Nyira vaka va Yerusalemu mulashiiye yeny-fo! Iiyeny kyany muveni na kya vana vany!” 29Llen-te kwikaa kushe fyeeri elyi vandu vashambaa, “Ngoma vaka fyuumba na misanga ilandeire wana na mavee alandeote. 30Llyo meendi vashepokaa ivia mafumbu, Luwoyeny! Na yeni fidooro lusikyeny! 31Mashika kwakooya vatanya nri yeto nshu indo a kya yeto muumu kisheendaa inda?”
32Naasa kweeifo na vasoro vavii vetana uravi veeriwa ando amwi nawe vandewaawa. 33Nalyo vakafika ando avangwaa ni Kisharongony. Nafo vakankapya-fo nsalabeny vakansanda na valya vetana makasha. Ulya umwi kavikwa kwa yoo woko lwakwe usha na ungyi yoo woko umuso. 34Naasa Yesu kaamba, “Woi Nde vafwaaye kimmba valeeshi ekyo vatana.” Naasa vakaavana na soori takwe veetikapyaa kura. 35Na vandu va uruka vasalali-fo velolaa. Na vandu valya va nrwe vakanteenda vakaamba, “Elyi nndu yeto alekira vengyi nalakukire we muni, kwakooya mmbwe Kristo nsauwe wa Iruva!” 36Naasa na vasikari valya vaiyo vakafika yoo kufii vakantatala, Vakanserisya mfinyo utarang'aa. 37Nalyo vakaamba, “Kwakooya yewe mmbo kukee mangyi ya Vayuda, Kukireeny kumuni-te!” 38Naasa na ipoo lyiifo lyikee ivike yoo uuwe ya nrwe wakwe lyikee ireiye, “Yeu mmbwe mangyi ya Vayuda.”
39Na valya veetana makasha valya vavambyo ando amwi nawe, ulya umwi kavemwaarara, “A yewe nshi Kristo? Naasany, kukyire kumuni kulusande-u neese.” 40Indi ulya ungyi karouwa kikee kya insakira kammbia, “A mmbo kulaireiye nta Iruva! Neewe kwaveva nndu kwaona uvingo yelo-da. 41Kyeru yese mmbo lwatannywa kisumani. Mashika kindo lwatawa ni ekyo kyikwaani na efo mitannyi yeeru. Indi yeu nnyatiri kindo atannyi kikasha-fo.” 42Nalyo kaamba, “Woi Yesu shikummbwa elyi kwafika isha kukee na umangyi lwafo!” 43Nawe kammbia, “Nkya dede shakuvia, ni inu-da kukooyaa kukee neeny efo Paradiso.”
Yesu afiiya nsalabeny
(Mat 27:45-56; Mar 15:33-41; Yoh 19:28-30)
44Nalyo kumfika kyeeri kya saa irindaru uruka loose lukawoyo ni ireema kukafika saa kyeenda. 45Na nkyeere ukareta sa ya vayo. Naasa isullya llya iniini lyaavanisye efo mmba ya Iruva lyikavambuka rany nnang'ani kavii. 46Nalyo Yesu kaonisa unyanga waasha kaamba, “Woi Nde ni efo maakony afo shakurambikyaany nrima wakwa.” Ammaa yaamba indo kakumba muu. 47Naasa nshilyi ulya wa vasikari iyana elyi allolya kiutika indo kaarafuma Iruva kaamba, “Ni kya dede nndu yeu ekee wa usumanu!” 48Na vandu vakuumbye-fo nkuka vasheye nafo ishelola ekyo, nawo-da elyi vallolya kilya kyautika, vakawuya na kyeny vekukapa-kapaa mbafu. 49Naasa kusalalye-fo na valya vaitani nawe woose sanda na vaka valya vavandami nawe vauka kulya Galilaya, nawo woose veefo-da velolaa efyo.
Irikwa lya Yesu
(Mat 27:57-61; Mar 15:42-47; Yoh 19:38-42)
50Nalyo akakau nndu nndumi ansha nafo avangwaa ni Yosefu, akee nndu nsongoru ni ntele kaveva wa usumanu. 51Nawe shila ilya yaawo varummbwa nyeerikye kasanga nawo-fo. Na kundo aukye ni kulya Arimataya ukee muri wa Vayuda, nawe ni nndu avereye umangyi lwa Iruva. 52Naasa nndu yeu kaengya Pilato kantereva mwiili ulya wa Yesu. 53Kawoolota kawoososya sooriny sha pyai. Kandewaara kundo kwa mbangeny kukee kudoshe iweny kulandearwa nta nndu. 54Na nkonu ulya ni nkonu wekudeesya na nkonu wa Sabato wiifo upokaany. 55Naasa na vaka valya valesha varyani nawe vauka kulya Galilaya nawo vakasora yoo numa. Vakalolya mbanga ilya na nnying'a wakwe shaasa usharwaa. 56Naasa vakawuya na kyeny. Vakandedeesya miri ifwamaa na mafura eyaamba. Na nkonu ulya wa Sabato mweni vakaimuya shaasa kyikee kivavasye.
सध्या निवडलेले:
Luka 23: MASNT00
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Testament in Kimashami © Bible Society of Tanzania, 2000.
