Luka 22
22
Kyama kya iwaa Yesu
(Mat 26:1-5; Mar 14:1-2; Yoh 11:45-53)
1Naasa nkonu nniini ukafika isha ulya wa sukukuu ya mikate ilatiri ntarang'u yeto uvaangwaa ni Pasaka. 2Nalyo vakohani valya vaniini vasasangyi na veelosha mavavaso vakaruuya mwaanya wa iwaa Yesu, mashika veereiye mamwiingyi ulya wa vandu.
Yuda eerikya iriingya Yesu
(Mat 26:14-16; Mar 14:10-11)
3Naasa Satana kaanga Yuda ulya avaangwa Iskariote, nawe akee umwi wa valya ikumi na vavii. 4Nalyo kawara shia kandefisha shila na vakohani valya vaniini na vashilyi veshilya vasoro va efo poo ya mmba ya Iruva karera nawo shaasa ashenrambikyaa efo maakony awo. 5Nawo vakafura vakateeryana nawe vanniinge fesa. 6Nawe kairikya karuuyany mwaanya weenrambikya efo maakony awo kirika.
Yesu aruma vakiloshony vakwe vandedeesya Pasaka
(Mat 26:17-25; Mar 14:12-21; Yoh 13:21-30)
7Naasa nkonu ulya wa mikate ilatiri ntarang'o ukafika yeto usumani ishisha ngurana ya Pasaka. 8Nalyo karuma Petro na Yohane kaamba, “Yendeny, mundeludeesya Pasaka lushe ilya.” 9Nawo vakambia, “A kundo kwakunda lundeideesya ni kwi, mbee?” 10Nawe kavavia, “Llen-te, mukammaanga efo muriny, mwishekwaananyaa na nndu arie nungu ya mura, mmbwe mushellatyaa mufike nawe efo mmba kundo ashangaa. 11Naasa muvieny yeto muni kyeny, Llosha akunndye ando a ishelyiiya Pasaka ando amwi na vakiloshyony vakwe. 12Nalyo nndu yeto ashemwooraa kirya kiniini kya mmba ya uuwe kyikee kideesye, nng'u mushedeesyaa kilaayo yekyo.” 13Naasa vakeenda vakavekooya indo-da shaasa avavia. Vakandedeesya-fo Pasaka.
Yesu alya Pasaka na vakiloshyony vakwe
(Mat 26:26-30; Mar 14:22-26; 1Vak 11:23-25)
14Nalyo elyi kyeeri kyamfika kashekaa-fo rembo ilya shoonga na vakiloshyony vakwe. 15Kavavia, “Sheetirwa mmasha deny shilye shoonga yei ya Pasaka neeni kulaore shammeenda indeliswa ukiva. 16Mmbo shamuvia, ‘Nshisheilyaa-se-fo, na kutani yainutyo efo umanginy lwa Iruva.’ ” 17Nalyo kaipoo kikombe kaana Iruva kaamba, “Nngeny ekyi niny-fo moose. 18Mashika shamuvia, kipookya ulaalu nshishekyinaa-se kya kimu ekyo kya nsabibu-fo kutani umangyi lwa Iruva lwasha.” 19Nalyo kaipoo nkate kaana Iruva, kaufisha-fisha fyenga, kavaniingya kaamba, “Ekyi ni mwiili akwa [nato wiifo urambikyoo-u kimaruma kyany. Neeni kevetaniny indo kya ishikummbwa.” 20Na upata lulya lweeniwaa elyi numa ya Kilaayo kilya, kavetana nalo indo-da, kaamba, “Upata yelu ni nkundanu mwiiya wavikwa na samu yakwa, nayo iifo ishiiritwaa kimaruma kyany.] 21Indi loleny-te woko lwa yeto asheshiriingyaa mmbo lukee yaa meseny ando amwi neeny. 22Kya Mwana yeto wa nndu mmbo ashendaa shia yakwe shaasa kikee kirummbwe indi oshiny lwa nndu eto ashendiingyaa!” 23Nawo vakapooka ikuvesa wo veni na veni kya nndu wa efo kwawo ashetanaa indo mmbi?
Mmbi nniini
24Naasa kikava mmbo vallya ulai efo nnang'ani yaawo kya nndu akee nniini waawo. 25Naasa Yesu kavavia, “Vamangyi va vandu va masanga mmbo vavaafinyi, na yewo vavaitorye vakavaangwa, vambuya va uruka. 26Indi kyany yeni nta kilave indo-fo! Kya indi yeto akee nniini wa vengyi kunu nnang'ani yaany naaluke nave n-du wa vengyi. Neeto eefo asongoye vengyi naaluke mwiifurukannya vengyi. 27Mashika nniini wa vengyi ni ungau? Ndesa ni yeto akaa rembo keengyo shoonga ao ni yeto eefo amfurukanyaa-u? Nshi yeto akaa rembo keengyo shoonga? Kyasia, na yeny-da shavekaa kunu nnang'ani yaany shava mwiifurukannya vengyi.”
28“Kya indi yeni mmbo yewo musisirye-u ando amwi neeny efo fyeesyony fyakwa. 29Neeny shamuterevyany ding'u ya umangyi shaasa Nde aleshiterevya yeny, 30neeni muvekooya ikaa efo umanginy lwakwa musasangyi neeny mwilyaa na ina efo meseny akwa. Nalyo mushekaa-fo rembo efo fitiminy fya umangyi mushilye ngyufyari yeto ikumi na ivii ta Israeli.”
Yesu avia Petro ashenkanaa
(Mat 26:31-35; Mar 14:27-31; Yoh 13:36-38)
31“Yewe Simon, Simon-ro! Ekakato Satana alemuruuya kyuumu nakooye imweela sha nganu. 32Kyaindi yeny mmbo shilekuterevya kwa Iruva naambo kyikusiryo kyafo kilasheangwa. Neewe elyi numa kwakooya kwashiwuiya-se kuvangise vanavamau.” 33Nawe kammbia, “Nndumi shikee neewe mmbo nshidimaa naakwa ni inderawa kyifingyony naakwa ni indewaawa.” 34Nawe kaamba, “Petro shakuvia, oro ya nguku, nnyishereraa kulaore kwanshikana kararu kwaambe nkushiishi-fo.”
Yesu avia vakiloshyony kyakwe vakudeesye
35Nalyo kavavia, “Llya shilemuruma mularie nta mboloko nta nkusha, nta fyaaru, a ndesa kwiiyo kindo muletura?” Nawo vakammbia, “Nta kyimwi-fo!” 36“Kya indi ulaalu yeto akooyaa atiri mboloko neende arie, na yeto wa nkusha naa-kiwo-da. Na yeto akoyaa nalatiri nandekumba soori yakwe ya yeerya nandekuurya usu. 37Mmbo shamuvia, ekyo kyikee kireiye mmbo kyanrumbuwa kyindeinukya yaa kwakwa, kyeamba, ‘Nawe mmbo aleekenwa ando amwi na varavi.’ Mashika ekyo kikee kirummbwe kyakwa mmbo kiifo kimarisyony.” 38Naasa vakaamba, “Nndumi akakati ngyusu ivii tikee yaa.” Nawe kavavia, “Kifye.”
Yesu andetereva
(Mat 26:36-46; Mar 14:32-42)
39Nalyo kakwipoo-fo kaenda kulya ifumbuny lya miri ya mafura shaasa eeshivye. Na valya vakiloshyony vakallatya. 40Naasa eekyifika ando alya kavavia, “Ketereveny Iruva mulasheanga kyeesyony!” 41Nalyo kooka yoo vakai, kafika sha ando a yeera iwe. Kafiirya ndi kapooka itereva, 42kaamba, “Woi Nde kwakunda, ita upata yelo mbai lushiiyami. Indi kilaende shaasa shikundye yeny-fo.” [ 43Naasa nsu wa Iruva kasha ikoora nawe auka efo iruveeu kammbika finya. 44Nalyo kava asavaany kapooka itereva kanangisa. Kasina nrike ukava sha marony a samu wishoshokya-si.] 45Nalyo kakwipoo yoo kiterevyony kasha na alya vakiloshyony vakai, kakooya valele rony kimaruma kya fyoova fivatiri. 46Nawe kavavia, “Naambo-kyi mulele rony? Kwipoon-te mutereve Iruva mulakooye yaanga fyeesyony!”
Yesu atirwa
(Mat 26:47-56; Mar 14:43-50; Yoh 18:3-11)
47Eefo areraa indo akakau mamwiingyi wa vandu vansha nang'u. Na nndu avasongoye ni ulya avaangwa ni Yuda, akee wa valya ikumi na vavii, kasha na yoo kufii na Yesu kammiminda fyoomu. 48Naasa Yesu kammbia, “Yuda mmbo kwariingya Mwana yeto wa nndu na kimimindo?” 49Naasa valya varyani nawe elyi valolya kishendaa indo vakaamba, “Nndumi a lukavamanya na ngyusu?”
50Nalyo umwi wa efo nnang'ani yaawo kamanya kishinga kya nkohani nniini kammaswa kurwi ka woko usha. 51Naasa Yesu karouwa kaamba, “Kureeyeny kimande yoo!” Nalyo kapaana kuri kalya kanshiisa. 52Na Yesu kavia vakohani valya vaniini vansheya na vashilyi veshilya vasoro va efo poo ya mmba ya Iruva na masiingo alya a vandu, “Mmbo mwakwiipoo mukasha murie ngyusu na mbiiri sheelyi shikee mwaalashia? 53A tepa shilesinda neeni mikonu simu efo mmba ya Iruva nta mulashitire Indi ekyi nkyo kyeeri kyany na kya finya ta ireema.”
Petro akana Yesu
(Mat 26:57-58, 69-75; Mar 14:53-54, 66-72; Yoh 18:12-18, 25-27)
54Naasa vakantira vakeenda vanrie vakamfita efo mmba kwa nkohani ulya nniini. Na Petro kalatya yoo numa ashengyaa kwaasha. 55Nawo vakaata muro alya poo vakakaa rembo vakauringitya, nawe Petro kakaa-u rembo nawo.
Yesu afo ateendwa neekabwa
(Mat 26:67-68; Mar 14:65)
56Naasa nka kishinga wa efo poo kallollya Petro ekee rembo emikyoo mmuro, Kaamba, “Na yeu-da ni nndu eeryani na Yesu!” 57Nawe kanlema-fushu kaamba, “Nshimwiishi-fo-te!” 58Numa kyinnywa nndu ungyi kallola kaamba, “Na yewe-da kukee umwi waawo!” Naasa Petro kaamba, “Ode nndu, nshiwe yeny-fo!” 59Naasa kukaira kyeeri kyaanga, nndu ungyi kavika ukaari kaamba, “Ni dede, na yeu-da akee nndu eeryani na Yesu. Mashika nawe ni nndu wa Galilaya.” 60Naasa Petro kaamba, “Nshiishi ekyo kwaamba-fo nndu!” Nalyo yeni eefo areraa indo oro ya nguku ikakapa. 61Naasa Nndumi kainduka kalola Petro. Nalyo Petro kakummbwa kirero kya Nndumi kilya alemmbia, “Oro ya nguku nyishekapaa inu-fo kulaore kwanshikana kararu-fo!” 62Nalyo kasomuka na mbengyeny kaiya kavavyo nnu nriminy.
Yesu ateendwa neekapwa
(Mat 26:67-68; Mar 14:65)
63Nalyo vasoro valya vannrie vakantatala vakankapa na mbiiri. 64Nalyo vakansikya kisangu vakammbesa vakaamba, “Kyeamba yeto akukapa mmbi?” 65Vakarera na marero engyi meengyi emwaarara.
Yesu afitwa mbee ya Vakohani vaniini
(Mat 26:59-66; Mar 14:55-64; Yoh 18:19-24)
66Naasa elyi kwankya masiingo alya a vandu akashekuumbya-fo na vakohani vaniini na vaarya va fitabu, Vakanrwaa efo ikwaanuny lya vaniini. 67Vakaambaya-u, “Kwakooya yewe mmbwe Kristo luvieny!” Nawe kavavia, “Kwakooya shamuvia mmushiirikyaa-fo, 68Lingyi-se kwakooya shamuvesa kindo mmusherouwaa-fo. 69Indi kipookya ulaalu Mwana yeto wa nndu ashevaa mmbo akee rembo yoo woko usha lwa Iruva yeto Mwaafinya.” 70Naasa vakaamba woose, “A yewe mmbo kukee mwana wa Iruva-ny?” Na Yesu kavavia, “Ni yeni mwakyaamba, yeny mmbwe.” 71Naasa vakaamba, “Naambo-kyi-se lwakaa lwiruyaa ukureeki lungyi? Mmbo lweeta luveni kyuuka kaniny kakwe.”
सध्या निवडलेले:
Luka 22: MASNT00
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Testament in Kimashami © Bible Society of Tanzania, 2000.
