Genesis 1
1
Ja b'a wa stuluyi spetsanili
(1—11)
Sk'e'ub' ja jastik sk'u'lan ja Dyosi
1Yajni k'e sk'u'luk ja Dyos
ja satk'inal sok ja lu'umi.
2Ja lu'umi, mix b'ob' ilxuk
cho mi jas sak'an ay.
Jaxa ja' jumasa,
toj k'ik'inal ja b'a'yi,
jaxa b'a sat ja ja'i,
ti' wa'n nijkel ja yespiritu ja Dyosi.
Ja sb'ajtan k'ak'u
3Ti yala jastal it ja Dyosi:
—Wax k'ana ay jas oj ijlab'anuk—
—Ti'xta'a, ijlab'ani—
4Yajni yila ja Dyos jel tsamal ja jastal ijlab'ani,
ti spila ja k'ik'inali.
5Ya sb'i'iluk —k'ak'u—.
Jaxa k'ik'inali ya' sb'i'iluk —a'kwal—.
Jachuk, och ja a'kwali,
cho el jul ja sakb'eli.
Jach' waj ja sb'ajtanil k'ak'u.
Chab'il k'ak'u
6Ti yala ja Dyosi:
—Wax k'ana ay jas tsats oj ajyuk
b'a yoj ja' b'a oj spili—
7—Ti'xta'a jach'ni waj ja—.
Ja Dyosi, ay jas toj ya stim ja ja' jumasa,
ja snalan ja ja'i, ib'elajel kani
jaxa pilan snalani, ti waj b'a nalan cha'an.
8Yajni yila tsamalil ja jas sk'u'lan
Ja Dyosi, ya' sb'i'iluk —satk'inal—.
Och ja a'kwali,
cho el jul ja sakb'eli,
Jach' sk'u'lan ja schab'il k'ak'u.
Yoxil k'ak'u
9Ti yala ja Dyosi:
—Wax k'ana, spetsanil ja ja'
it tey b'a yib'el ja satk'inali
a stsom sb'aj b'a junxta oj ajyuke,
a chiknajuk ja b'a takini—.
—Ti'xta'a jach'ni waj ja—.
10—Lu'um— ya sb'i'iluk ja Dyos ja b'a takijkani,
jaxa b'a stsomo sb'aj ja ja'i,
ya' sb'i'iluk —niwan paman ja'—.
11Yajni yila ja Dyos ja stsamalili, ti yala'a:
—Wax k'ana oj ajyuk b'a lu'umi,
tek'ul jumasa sok itaj
b'a oj satinuk sok b'a oj ya' yintil.
—Ti'xta'a jach'ni waj ja—.
12Ja b'a lu'umi, k'i' tek'ul sok itaj jumasa;
ja tek'ul jumasa ya'a sat,
jaxa itaj jumasa ya'a yintil.
Jel tsamal yila ja Dyos ja jas sk'u'lani,
13Och ja a'kwali,
cho el jul ja sakb'eli,
jach' b'ob' ja yoxil k'ak'u.
Chanil k'ak'u
14Ti yala ja Dyosi:
—Wax k'ana b'a satk'inali,
oj ijlab'anuk b'a oj spil ja k'ak'u sok ja a'kwali
Ja k'ak' jawi, ja oj sje' jastal oj ek'uk,
ja k'ak'u, sok ja jab'il jumasa;
15oj lijpuk ja b'a yaxal satk'inal
b'a oj ya' ijlab'anuk ja lu'umi.
—Ti'xta'a jach'ni waj ja—.
16Ja Dyosi, sk'u'lan ja chab' niwak k'ak'i:
ja k'ak'u ja oj ijlab'anuk ja sat k'ak'u,
ja nan ixawi ja oj ijlab'anuk ja a'kwali.
Cho sk'u'lani ja k'anal jumasa.
17Ja Dyosi, ti sk'u'lan b'a satk'inal ja k'ak' jumasa it
b'a oj ya' ijlab'anuk ja lu'umi,
18ti oj ijlab'anuk b'a k'ak'u sok b'a a'kwali,
ja k'ak' jawi, ja'ni b'a oj spil ja k'ik'inali.
Yajni wa'n ek'el sk'ujol ja Dyos yuj ja stsamalili,
19Och ja a'kwali,
cho el jul ja sab'el k'inali.
Jach' b'ob' ja schanil k'ak'u.
Sjo'il k'ak'u
20—Ti yala ja Dyosi:
—Wax k'ana ja niwan paman ja' jumasa
a b'ut schajnul.
Wax k'ana, ja yal chan jumasa
a jujpuke ek' b'a sat lu'um
sok a sk'uts e' ja yaxal satk'inali.
21Jach' sk'u'lan ja Dyos
ja niwak schajnul jumasa ja niwan paman ja'i.
Sk'u'lan tuktukil tik'e schajnul ja'
b'a oj snik sb'aj ja b'a yoj ja'i,
sok spetsanil ja yal chan jumasa wax jujpi.
Yajni yila ja Dyos ja stsamalili,
22ti jel tsamal ja jas yala sb'aji:
—Wax k'ana, ja chay jumasa
a pojxuke lek, a sb'ut' e' ja niwan paman ja' jumasa;
wax k'ana, ja yal chan jumasa,
a oj pojxuke lek ja b'a lu'umi—.
23Och ja a'kwali,
cho sakb'i k'inal.
Ja jawi ja sjo'il k'ak'u.
Swakil k'ak'u
24—Ti cho yala ja Dyosi:
—Wax k'ana, oj ajyuk b'a lu'umi
spetsanil tik'e chante jumasa:
alak'il chante jumasa,
chante jumasa sb'a k'u'l,
b'its'il chan sok yal us jumasa—.
—Ti'xta'a jach'ni waj ja—.
25Ja Dyosi, sk'u'lan ja chante jumasa sb'a k'uli,
cho sk'u'lan ja alak'il chante jumasa,
ja b'its'il chan sok ja yal us jumasa.
26Yajni, yila ja stsamalil ja Dyosi, ti yala'a:
—Ja ya'n la jk'u'luktik ja winiki
jach'ni ja jastalotik ja ke'ntiki.
B'a oj stalna ja chay jumasa b'a niwan paman ja'i
sok ja yal chan jumasa b'a wax jujpi',
spetsanil ja chante jumasa b'a lu'umi,
sok spetsanil ja b'itsb'il chan sok ja yal us jumasa—.
27Jach' sk'u'lan jastal
jaw ja Dyos ja winiki
jach'ni ja jastal ja Dyosi.
Jach' stojb'es ja jastal ja ye'n.
Sk'u'lan ja winik sok ja ixuki,
28ti yala yab' jastal ita:
—Wax k'ana oj untikananik lek,
wax k'ana oj pojxanik lek,
wax k'ana oj ja b'ut'ex ja lu'umi
sok we'n oj ja talnayex lek.
Talnayik lek ja chay jumasa b'a mari,
sok ja yal chan jumasa b'a wax jujpi,
sok spetsanil ja chante jumasa b'a sak'an ay
b'a wax b'its'ilji ek' b'a lu'umi—.
29Ti cho alji yabye yuj ja Dyosi:
—Ya'n oj ch'ak ka' b'a a k'ab'ex
spetsanil ja te' jumasa b'a wax ya' sb'ak'i
sok spetsanil te' b'a wax ya'a sati.
Spetsanil ja iti, ja oj makunuk b'a oj ja wabyex.
30Jaxa yaxal ak jumasa,
ja' oj yab' ja chante jumasa—.
—Ti'xta'a jach'ni waj ja—.
31Ti'to wa'n ek'el sk'ujol ja Dyosi,
yuj ja stsamalil ja jas sk'u'lani,
och ja a'kwali,
cho el jul ja sakb'eli.
Jach' b'ob' ja b'a swakil k'ak'u.
सध्या निवडलेले:
Genesis 1: YABD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Sociedad Bíblica de México 2021