Yohanes 6

I Yesu Mampokoni Tau Yabi Lima nSowu

(Mat 14:13-21; Mrk 6:32-44; Luk 9:10-17)

1-4Wali yako etu, tamo masae daratamo temponya roa nto Yahudi to rato’oka Roa Paskah. Wali tempo etu i Yesu pasi kami to anaguruNya malayag mangawote rano Galilea to rato’oka seja rano Tiberias. Pasi boros kojo tau to mangalulu i Yesu ri tempo etu apa sira roomo mangkita palaong to taa rapobiasa to inikaNya mampakatao muni tau to masaki. Wali ojo kadongka i Yesu pasi kami to anaguruNya nja’u sambote ndano, kami mana’u yako ri bangka panewa mandake wo’u sangkodi ri woto mpantana pei matunda ndate ria. 5Tempo i Yesu matunda ndate woto mpantana etu, tempo etu Ia mangalo’a pei mangkita boros kojo tau to ma’i mangampago Ia. Wali Ia manganto’oka i Pilipus, to’oNya, “Yako imbare kita damangoli pangkoni to darapokonika tau boros etu?” 6Wali kamonsonya i Yesu mangansani yami palaong to Ia damangika, pei Ia mampotanaka ewa wetu resi i Pilipus apa Ia rani mangansani bara ewa wimba to danato’o i mPilipus etu.

7Wali i Pilipus mangansono, to’onya, “Gete! Kita taa kojo gana doi daraolika tau boros etu pangkoni! Sakowa saro ntau wayu mbuya mapalaong, tiroo taa gana doinya daraolika pangkoni see maya rapokonika tau boros etu, nempo ojo sangkodija samba’a tau tiroo taa gana.”

8Wali samba’a wo’u anaguru i Yesu, i Andreas, to sintua’i pei i Simon Petrus, ia manganto’o, 9“Re’e samba’a ana langkai to mangangkeni pangkoninya, etu semo lima mpa’i roti to raika yako pae to rato’oka jelai. Pasi ia mangkeni seja dua mba’a bau paka mayunu. Pei pangkoni etu taa kojo gana ane rapokonika tau ewa wetu kaborosinya!”

10Pei i Yesu manganto’o, “To’oka tau boros etu matunda.” Wali kami to anaguruNya manganto’oka sira patunda, see naka sira matunda ri wawo ntarempas apa boros tarempas ndate ria. Wali tau etu boros, yabi lima nsowu owo to langkai.

11Wali yako etu i Yesu mangoko roti to nawaika nu ana langkai etu pei makai-kai manganto’oka i Pue Allah tarima matao. Roo see Ia mangantilaka kami to anaguruNya panewa kami mampookoka tau boros to matunda etu. Pasi ewa see seja inikaNya bau, wali sira mangkoni paka mabosu.

12Wali tempo sira samparia paka mabosumo, tempo etu i Yesu manganto’oka kami to anaguruNya, “Poromung toro mpangkoni to taa rakoni naka ne’e manja’at yau.” 13Wali kami mangamporomung toro nu roti jelai to taa nakoni ntau boros etu. Toro mpangkoni to iporomung mami etu dasampuyuwa pei dua karanji nabuke.

14Wali ojo pangkita ntau boros palaong to taa rapobiasa naika i Yesu etu, sira manganto’o, “Monso pu’u tau si’i semo to pantuntu tuntu i mPue Allah to ratulis yami ri raya ntuntu i mPue manganto’o Ia dama’i ri lino si’i.” 15I Yesu mangansani tau boros etu masanang kojo resi Ia see naka sira rani mangoko Ia pei mampakasaaka Ia mawali makole nsira, nempo si’a ewa wetu pamporani to si Ia. Wali see naka Ia mampiyaika sira, Ia mandake wo’u nto’u pantana ojo Ia ngkalioNya.

I Yesu Malinja ri Wawo nu Ue

(Mat 14:22-23; Mrk 6:45-52)

16Wali ojo kawenginya rao, kami to anaguru i Yesu malonso muni lo’u wii ndano. 17Rata la’u ria rao mawurimo, pei i Yesu tawa re’e muni resi kami. Wali kami mapone muni ri bangka dayau njo’u sambote ndano ri kota Kapernaum. 18Wali ri rayanya kami mangawote rano etu, bombang mawali bose kojo naika ngoyu marimbo. 19Panewa ojo kagananya lima bara ono kilometer kami mangawose bangka etu, tempo etu kami re’e mangangkita i Yesu mangampago bangka mami, pei i Yesu Ia malinja ri wawo nue. Wali kami meka kojo raya mami apa mampobuuka Ia bara wonggo. 20Pei i Yesu manganto’oka kami, to’oNya, “Ne’e meka, Aku se’i.” 21Wali ojo pangandonge mami gombo i Yesu etu, kami masanang mangawaika Ia mapone ri bangka mami. Panewa tempo Ia mapone, bangka etu mansaka dongka nja’u towo ndano to napago mami etu.

Tau Boros Mangaliwu i Yesu

22Wali yako etu, ojo kaeonya wo’u rao, nja’u tampa i Yesu mampokoni tau boros, nja’u ria nja’uwa tau boros to owo roo napiyaika i Yesu pasi kami to anaguruNya nja’u sambote ndano etu. Sira tiroo mangampeas i Yesu apa sira mangansani tempo kami to anaguruNya mayoko mapone ri bangka, i Yesu tawa mangalulu kami mapone ri bangka etu. Ojo kami to anaguruNya semo to nayau. Pasi tempo kami mayoko etu tare yusa bangka to maya napone i Yesu. See naka tau boros mampondayaka i Yesu tawa nayau. 23Pei yako etu rata bara sawei bangka to nadongka nja’u ria. Bangka etu dongka mosu ri tampa to i Yesu mampokoni tau boros roti ojo karoonya Ia makai-kai manganto’oka i Pue Allah tarima matao. 24Wali tempo tau boros mangkita i Yesu pasi kami to anaguruNya tamo re’e ri oyo nsira nja’u ria, tempo etu sira mapone ri bangka to owo dongka etu pei mawote njo’u kota Kapernaum yau mangaliwu i Yesu.

I Yesu Raporapaka Ewa Pangkoni to Mangawai Katuwu

25Wali ojo pangarata ntau boros i Yesu nja’u sambote ndano etu, sira mampotanaka resi Ia, to’o nsira, “Pa’a Guru, mpia karata ngKomi rire?”

26Pei i Yesu mangansono, “Aku manganto’oka komi, monso pu’u komi si’a mangaliwu Aku saba komi mangansani batuanginya palaong to taa rapobiasa to inikangKu. Pei komi mangaliwu Aku saba komi mabosu mangkoni roti iwaikangKu wengi, wali komi rani rapokoni wo’u. 27Wali komi madota mangampali pangkoni, pei ne’e pangkoni to taa masae maja’am to mawali bae batuanginya resi komi. Kasimbalinya yako etu, to tao-tao pangkoni to taa damaja’a yau to mawali bae kojo batuanginya resi komi. Etu semo anu to raporapaka ewa pangkoni to mangawai katuwu to singkasaenya. Wali Aku, Wiyaa nto Lino, damangawaika komi pangkoni to etu. Aku re’e kuasa mangika palaong to etu apa i Pue Allah, Pa’a, Ia roomo mampakanasa Ia semo to mampokau Aku.” Etu semo pasono i Yesu.

28Wali tau boros etu mampotanaka wo’u, sira manganto’o, “Palaong kesaa danaika mami see kami damangika pamporani i mPue Allah?”

29Wali i Yesu mangansono, “Palaong to naporani i mPue Allah, etu semo aya Aku to ipokauNya.”

30-31Wali see naka tau boros manganto’oka Yesu, “Ane ewa see, kesaa palaong to danuika ngKomi to damawali tondong resi kami, see tempo kami mangkita kami damangaya Komi? Ane bue-bue ngkita tempo owi, sira mangkoni pangkoni mana nja’u pada bone. Etu semo palaong to ratulis ri raya ntuntu i mPue Allah, to manganto’o, ‘Ia mangawaika sira pangkoni to yako ndate saruga to danakoni nsira.’ #Ayat 30-31 Lo’a Posuwunya 16:4; Masmur 78:24. Etu semo palaong to naika i Musa tempo owi. Wali wimba Komi bara maya mangika palaong to ewa wetu?”

32Wali i Yesu manganto’oka sira, “Aku manganto’oka komi, monso pu’u si’a i Musa to mangawaika sira pangkoni to yako ndate saruga, Pa’angKu semo. Pei pasiwa pangkoni to Ia mangawaika sira tempo owi etu, si’awa pangkoni to monso. Tempo si’i semo Pa’angKu mangawaika komi pangkoni to monso to yako ndate saruga. 33Apa pangkoni to nawaika i mPue Allah, etu semo to ma’i yako ndate saruga pei to mangawai katuwu to singkasaenya resi to lino.”

34Wali tau boros manganto’o, “Pa’a, yako ri tempo si’i waika kami pangkoni etu ponto eo.

35Wali i Yesu manganto’oka sira, Ia manganto’o, “Aku semo pangkoni to mangawai katuwu. Wali see naka i sema tau to mangalulu Aku, tau etu raporapaka ewa tau to tamo damoro komponya. Pasi i sema tau to mangaya Aku, tau etu raporapaka ewa tau to tamo damara nganganya rataka ri singkasaenya. 36Pei ewa Aku roomo manganto’oka komi, komi re’e mangkita Aku, pei nempo ewa see komi tiroo taa mangaya. 37Pei re’e tau to yusa to dama’i mangalulu Aku. Tau etu semo tau to nasarumakaka mPa’angKu Aku. Pasi samparia tau to ma’i mangalulu Aku etu, Aku taa kojo damangarubak yau. 38Apa Aku ma’i yako ndate saruga si’a damangalulu pamporani ndaya to si Aku. Pei Aku ma’i damangalulu pamporani mPa’angKu to nampokau Aku. 39-40Wali pamporani mPa’angKu to nampokau Aku, etu semo Ia rani Aku mangararamaka kojo samparia tau to isarumakakaNya resi Aku, see samparia sira darapalaes. Kasimbalinya yako etu, Ia rani Aku mangawangu muni samparia tau etu yako ri kapatenya ane rata ri kapuranya temponya to si’i. Apa ane ewa pamporani to si Ia, etu semo samparia tau to mangansani i sema kamonsonya Aku to AnaNya, pasi to mangaya Aku, tau etu damangarata katuwu to singkasaenya.”

41Wali ojo pangandonge nto Yahudi gombo i Yesu etu, re’e sira to maja’a rayanya pei mangkambumbuka Ia apa saba Ia manganto’o, “Aku semo pangkoni to nama’i yako ndate saruga.” 42Sira manganto’o, “Tau si’i i Yesu, Ia ojo ana i Yusup semo! Kita mangansani pa’aNya pei indoNya wali manasa resi kita Ia tau biasa semo. Wali gete, maka pei Ia manganto’o yako ndate saruga kama’iNya?”

43Wali i Yesu manganto’oka sira, “Pandooka kambumbu-mbumbu resi yunu ngkomi samba’a pei samba’a. 44Apa tare tau to nakoto ma’i mangalulu Aku ane Pa’angKu to nampokau Aku taa mangangkeni ia resi Aku. Pasi tau to ma’i mangalulu Aku etu, Aku damangawangu muni ane rata ri kapuranya temponya to si’i. 45Wali re’e to natulis nto pantuntu tuntu i mPue Allah nja’u raya ntuntuNya. Ia magombo mangkonong tau to damangalulu Aku, to’onya,

‘Sira samparia paka danapotunde i mPue Allah.’

(Yesaya 54:13)

Ewa wetu to ratulis. Wali monso pu’u samparia tau to mampodongeka anu to napotundeka mPa’angKu pei to manasanya anu to napotundeka mPa’angKu etu, tau etu semo to ma’i mangalulu Aku. 46Wali tau etu nempo napotundeka mPa’angKu si’a batuanginya sira re’e mangkita Pa’angKu, apa tare pasi samba’a tau to mangkita Ia. Ojo Aku to ma’i napokau i mPue Allah, Aku semo to re’e mangkita Pa’angKu.

47-48“Wali Aku semo pangkoni to mangawai katuwu. Pasi Aku manganto’oka komi, monso pu’u tau to mangaya Aku, tau etu re’emo katuwu to singkasaenya. 49Ane bue-bue ngkomi tempo owi, sira mangkoni pangkoni mana nja’u pada bone, pei nempo sira mangkoni mana etu sira tiroo mate. 50Pei pangkoni to Aku mangansaritaka komi, pangkoni to ma’i yako ndate saruga, ane tau mangkoni pangkoni to etu, ia tamo damate. 51Wali Aku semo pangkoni to mangawai katuwu, to ma’i yako ndate saruga. Wali i sema tau to mangkoni pangkoni si’i, tau etu datuwu singkasaenya. Pangkoni si’i korongKu semo to Aku mangawaika yau to lino see maya mangarata katuwu.”

52Wali ojo pangandonge nto Yahudi gombo i Yesu etu, sira maja’a rayanya pei maroso loonya masibanta, sira manganto’o, “Gete, wimba danaika ntau si’i mangawaika kita koroNya datakoni?”

53Wali i Yesu mangaligi sira mangkonong pangaya ntau ri palaongiNya tempo Ia damangawaika yau koroNya pasi raaNya, batuanginya Ia mangangkapateka to lino. Ia manganto’o, “Aku manganto’oka komi, monso pu’u komi tare katuwu to singkasaenya resi komi ane komi taa mangkoni koro to si Aku, Wiyaa nto Lino, pasi manginu raangKu. 54Pei tau to mangkoni korongKu pasi manginu raangKu, tau etu re’emo katuwu to singkasaenya. Pasi ane rata ri kapuranya temponya to si’i, Aku damangawangu muni tau etu yako ri kapatenya. 55Apa korongKu pasi raangKu tempo Aku mangkapateka komi, korongKu pasi raangKu etu mampakaroso tonii ngkomi. Wali anu to mampakaroso tonii ngkomi, anu to etu semo to bae wo’u batuanginya pei pangkoni pasi anu to rainu to mampakaroso koro ngkomi. 56Wali tau to mangkoni korongKu pasi manginu raangKu, tau etu maroo masingkatao pei Aku pasi Aku maroo masingkatao pei ia. 57Wali Pa’angKu to nampokau Aku, Ia semo pu’u ngkatuwu, see naka Aku re’e katuwu. Pasi ewa see seja tau to mangkoni Aku, ia re’e seja katuwu apa Aku damangawaika ia katuwu to singkasaenya.

58Wali korongKu si’i semo pangkoni to nama’i yako ndate saruga. Pangkoni si’i si’a ewa pangkoni mana to nakoni nu bue-bue ngkita tempo owi, apa sira mangkoni pangkoni etu pei nempo ewa see sira tiroo mate. Pei tau to mangkoni pangkoni si’i, tau etu datuwu singkasaenya.”

59Wali gombo to nato’o i Yesu etu, Ia manganto’o tempo Ia mampotundeka tau ri raya banua to napampotunde nto Yahudi nja’u kota Kapernaum.

Boros Anaguru i Yesu to Mangandolika Tangonya Yako Resi Ia

60Wali boros anaguru i Yesu to mangandonge gomboNya etu. Tempo sira mangandonge, boros sira to manganto’o, “Gete, makasar kojo anu to Ia mampotundeka kita etu mangkonong mangkoni koroNya. Bara tare tau to nakoto mampodongeka!”

61Wali tare tau to manganto’oka i Yesu mangkonong gombo nu anaguruNya etu, pei Ia mangansani sira sakambumbu apa saba anu to Ia nampotundeka etu. See naka Ia manganto’oka sira, to’oNya, “Wimba, komi bara rani mangandolika tangomu yako resi Aku apa saba gombongKu etu? 62Ane sakowa to etu masuli resi komi, taa manto’o ane ratamo temponya komi mangkita Aku, Wiyaa nto Lino, mawolili muni nto’u wakangKu ri saruga! 63Wali gombo to si Aku etu, gombo etu semo mampakanasaka resi komi ewa wimba jayanya komi damangarata Nosa i mPue Allah. Pasi Nosa i mPue Allah, Ia semo to mangawai katuwu. Ane to lino, tare kesaa to maya danaika see damangarata katuwu. 64Pei taa samparia komi to damangarata katuwu etu apa re’e tau ri oyo ngkomi to taa mangaya Aku.” Wali naka pei i Yesu manganto’o gombo etu, apa yako ri pamulanya Ia mangansani yami to imba sira to taa mangaya Ia pasi to imba sira to damamposora yau Ia resi baliNya. 65Wali Ia manganto’oka wo’u sira, to’oNya, “Re’e pu’u tau ri oyo ngkomi to taa mangaya Aku, wali etu semo to mampakanasa monso pu’u gombongKu ngena tempo Aku manganto’oka komi tare tau to maya ma’i mangalulu Aku ane Pa’angKu taa mangawai jaya.” Etu semo gombo i Yesu mampakanasaka sira tau to taa mangaya, sira taa kojo mangalulu jaya to nawai mPa’aNya etu. #Ayat 65 Lo’a Yohanes 1:11-13; 6:40.

66Wali yako etu, boros anaguruNya to mangandolika tango nsira yako resi Ia pei tamo mangaluluka Ia. 67See naka i Yesu mampotanaka resi kami to anaguruNya to sampuyu pei dua, Ia manganto’o, “Wimba komi bara rani seja mampiyaika Aku?”

68Wali i Simon Petrus mangansono, to’onya, “Pue, tare batuanginya kami mangaluluka tau to yusa. Apa ojo Komi semo to re’e kareba to mangawai katuwu to singkasaenya. 69Wali kami mangayamo pasi kami mangansanimo Komi semo i Kerisitu, Ana i mPue Allah to tuwu.”

70Wali i Yesu manganto’oka kami, “Aku semo to nangampilis komi sampuyu pei dua. Pei nempo ewa see, re’e samba’a yako ri oyo ngkomi to mawali joa i ngKepala nto pantipu semo.” 71Wali tempo i Yesu manganto’o gombo etu, Ia magombo mangkonong i Yudas, ana i nSimon Iskariot. Apa i Yudas ia samba’a kami to anaguru i Yesu to sampuyu pei dua, pei nempo ewa see ia tiroo damamposora yau i Yesu resi baliNya.

सध्या निवडलेले:

Yohanes 6: WNT

ठळक

सामायिक करा

कॉपी करा