Génesis 8
8
Diluviu yaku tsakinqan
1Tayta Diosqa manam qonqarqantsu Noéta y arcachö kaykaq ashmakunatapis. Tsaymi yaku wallkänanpä vientutsimurqan. Tsay vientuwanmi yaku wallkayayta qallaykurqan. 2Tsaymi patsa rurinchö kaq lamarpita yaku pashtamuqpis päraskirqan. Tsaynöllam ciëlupita yaku yarqamunanpä kicharaykaq punkupis wichqakaskirqan.
3Tsaypitam yaku wallkayar qallaykurqan. Pachak pitsqa chunka (150) junaqchörämi 4Ararat jirkachö arca takyarqan. Tsayqa karqan qanchis kaq killa chunka qanchis junaqmi. 5Tsaypita yaku warayllanta warayllanta wallkayaptinmi chunka killa qallaykunan junaq jirka puntakuna rikakäyarqan.
6Tsaypita chusku chunka (40) junaqtam Noé kicharqan arcapa ventänanta. 7Tsaypitanam juk cuervuta#8.7 Cuervuqa yukishpita mas jatun yanam kaykan. kacharqan yaku tsakinqanta o mana tsakinqantapis rikapakamunanpä. Tsaynö kaptinpis tsay cuervuqa manam kutirqantsu, sinöqa yaku jananpa wakpa kaypa pärirmi purirqan yaku tsakinqanyaq.
8Tsaypitanam kacharqan juk palumata patsa tsakinqanta o mana tsakinqanta musyamunanpä. 9Patsa jananchö yaku juntaraptinmi maychöpis ratananpä mana kaptin palumaqa arcaman kutirqan. Tsaymi Noéqa makinta makyarqan paluma ratananpä. Rataykuptinnam arcaman yaykutsirqan.
10Tsaypita qanchis junaqtanam palumata yapay Noé kacharqan. 11Patsa tsakanaykaptinnam paluma kutirqan olïvus räman amushqa. Tsaynöpam Noé musyarqan yaku tsakiykanqantana. 12Kutinqanpita qanchis junaqtam yapay palumata kacharqan. Peru tsay palumaqa manam kutirqannatsu.
13Joqta pachak juk (601) watayuq Noé kaykaptinmi yaku tsakirqan. Tsayqa karqan mushuq wata qallaykunan junaqmi. Tsay junaqmi arca qataraykanqanta kicharkur Noé rikarqan patsa tsakishqana kaykaqta. 14Ishkay kaq killachö ishkay chunka qanchis (27) junaq kaykaptinmi patsa tsakishqana karqan. 15Tsaymi Noéta Tayta Dios nirqan: 16<<Kananqa warmikiwan, tsurikikunawan y llumtsuynikikunawan arcapita yarquyayna. 17Tsaynölla llapan casta ashmakunata qarquyna wätana kaqkunata, mana wätana kaqkunata, lätaypa puriqkunata y llapan casta päriqkunatapis maytsaypa aywar entëru patsachö mirayänanpä>>.
18Tsaynö niptinmi Noé yarqurqan warminwan, tsurinkunawan y llumtsuyninkunawan. 19Tsaynöllam yarquyarqan wätana kaq y mana wätana kaq ashmakuna, lätaypa puriqkuna y llapan casta päriqkunapis. 20Noé yarquskirnam juk altarta pirqarqan tsaychö Tayta Diosta adorananpä. Tsaypitanam cada casta püru kaq ashmakunapita y päriqkunapita pishtarkur altarchö sacrificiuta rupatsirqan.#Lev. 1.1-7. 21Tsay rupatsinqanpa mushkuyninmi Tayta Diospa shonqunpänö karqan. Tsaymi nirqan: <<Runakunaqa wamra kayanqanpitam shonqun munanqannö jutsata rurallar kawayan. Tsaynö kawayaptinpis kay patsata manam yapayqa maldicionashätsu. Kanan ushakätsinqänöqa kay patsachö kawaqkunata manam ushakätsishänatsu.
22<<Kay patsa manarä ushakanqanyaqqa runakuna murukuyanqam y cosechayanqam.
Tsaynöllam kanqa achaypis, alaypis, usyapis, tamyapis, junaqpis y paqaspis>>.
सध्या निवडलेले:
Génesis 8: qxo
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2002, 2008, Wycliffe Bible Translators, Inc. All rights reserved.