IMAMATTA 3
3
Sasamban paddarame
1Amungkangngu sangkatou mangonggolu sapi maola'a sasamban paddarame, sapi udde wotongnge esakka, wotongnge lai wawine, arawe imbaṛṛangnga pia sangkulle. 2Taumata apan nangonggola ṛinone mangaddon limane su wowo puan binatangnga udde ana see ṛatanna su saruannu ngaran Dasannu Mawu. Manga imam papapulunni Harun ṛinone mangalassu daṛṛan sapi udde su mezbah sandiṛṛanne appata. 3Hunan sasamban paddarame su Mawu, imam ṛinone mangonggolu manga wageangngu winatangnga udde: aṛiwungkalu apan uapi'unna tinaine, 4wabbatune ringannu tawane wuṛṛu wageangngu atenene apan apianne. 5sarangkanambone udde suadio'a ringannu sasamba itattambunna waine, ṛinone itambunna su wowon mezbah. Hal᷊urun sasamba anna udde ma'al᷊uassa naungngu Mawu.
6Amungkangngu nionggola maola'a sasamban paddarame udde sambau domba ara'e ambinga, winatangnga udde wotongnge esakka, wotongnge lai wawine, arawe tawe wotongnge pia sangkulle. 7Amungkangngu pia sangkatou mangonggolu domba, i tou ṛinone mangapidda watukku Rasannu Mawu. 8Isudde i tou ṛinone mangandangngu limane su wowon puan domba udde ana see imam ṛinone mangalassu daṛṛan domba udde su mezbah sandiṛṛanne appata. 9Su sasamban paddarame su Mawu, imam ṛinone mangonggolu manga wageangngu domba udde: tawane, ahewallu tol᷊ene apan pia tawane wuṛṛu pototanna maranin duṛṛin liudde, aṛiwungkalune, 10wabbatune ringannu tawane, wuṛṛu wageangngu atene apan apianne. 11Imam apan mammanara ṛinone manambunnu sarangkanambone udde su wowon mezbah maola'a sasamba ia'imbe su Mawu.
12Amungkangngu niola'a sasamba sambau ambinga, taumata apan nangonggola udde ṛinone mangapidda watukku Rasannu Mawu. 13Isudde i tou ṛinone mangandangngu limane su wowon puan ambinga udde ana see ṛatanna su saruannu Rasanna. Imam ṛinone mangalassu daṛṛan binatangnga su mezbah sandiṛṛanne appata. 14Su sasamba anna ionggola su Mawu, imam ṛinone mangonggolu manga wageangngu ambinga udde: aṛiwungkalu apan uapi'unna tinaine, 15wabbatune ringannu tawane wuṛṛu wageangngu ate apan apianne. 16Imam apan mammanara ṛinone manambunnu sarangkanambone udde su wowon mezbah. Hal᷊urun sasamba anna udde ma'al᷊uassa naungngu Mawu. Anambon tawan binatangnga udde ionggola su Mawu. 17Taumatan Israel imbaṛṛangnga umanna tawa ara'e daṛṛa. Atoranna udde iapaamatta saran mal᷊annu-l᷊annu wuṛṛu tattuṛṛutannu suapan taumatan Israel apan uatana'a su al᷊awo'u tampa.
सध्या निवडलेले:
IMAMATTA 3: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन