PANDARIADDI 50
50
1I Yusuf natingkaṛṛa'an batanganne su iamangnge apiddu lulluai wuṛṛu nangari'a hatine. 2Ana see i Yusuf namarenta taṛaṛa ola'a winal᷊unanna tawe mawukku'a iapa rampa-rampa winal᷊unanni Yakub. 3Manara udde al᷊annune appatu pul᷊o su allone, eteudde su tempo apan inanaramanna iappaatta ma'ola'a rampa-rampa winal᷊unanna. Taumata Mesir nilumal᷊on i Yakub, pitun pul᷊o su allone al᷊annune.
4Napawe nasuete tempon lullal᷊o, i Yusuf nabbisara su manga mamanaran araratuanna, “Wal᷊oa'a tanata indi su ratu, 5‘Su tempo iamangngu allanga maranite mate, allangngu nirolokka massalu si tou, manungku allangnga sarun mallabingngi tou sulal᷊ummu labingnga apan buatte niola'a su leta'u Kanaan. Ana waugu udde, wala'awe allangngu inai mallabingngu iamangngu allangnga. Wua'udde allangnga sarun mabelengnga.’ ”
6Ana see ratu nabbisarate, “Roote pallabingngu iamangngu ere buatte nipa'irenu si tou.”
7Ana see i Yusuf inaite mallabingngu iamangnge. Anamabon mamanaran araratuanna, manga timma-timmadu araratuanna wuṛṛu anambon tembonannu Mesir, inai suadio'a ringanni Yusuf. 8Amonanne, tuṛṛa-tuṛṛangnge, wuṛṛu ana'u tuṛṛangnge waine inai lai. Tumba'u ana'a maradio'a wuṛṛu winatangngi mangitou tinantangnga su leta'u Gosyen. 9Tantara apan uasa'e kereta wuṛṛu awal᷊o tinumantalongnga lai, na'oman sara mallal᷊aṛṛenggenna udde mal᷊o'engnga atonna.
10Napawe i mangitou na'omate su tampan taumata mammuulla gandumma su Goren-Haatad, su samba'an ra'in Sal᷊ukku Yordan, i mangitou nilumallu ringannu massusa wuṛṛu tingikka ma'ikkata. I Yusuf na'ola'a lal᷊aghun lullal᷊o, pitu allo al᷊annune. 11Su tempo manga tumana'u Kanaan naasilo lal᷊alo su Goren-Haatad udde, i mangitou nabbisarate, “Asusawe eteapa lal᷊aghun lal᷊alon taumata Mesir udde!” Ana waugu udde tampa udde nissago Abel-Mizraim.
12Etearoddi manga ana'i Yakub tinumuṛṛutta tanatan i Yakub si mangitou. 13I mangitou nangapiddu winal᷊unanne watukku Kanaan wuṛṛu nilabingnga su liangngu Makhpela, su samba'an da'i Mamre, su wawail᷊anna apan buatte niwallianni Abraham wuassi Efron taumatan Het udde, apan maola'a pallal᷊abinganna. 14Napawe i Yusuf buatte nallabingngu iamangnge, i tou nabelengke waatukku Mesir suadio'a ringannu manga tuṛṛangnge wuṛṛu anambon taumata apan uatantalongnga si tou nallabingngu iamangnge udde.
I Yusuf napaatammudu naungngu manga iaangnge
15Napawe iamangngi mangitou natete, manga iaangngi Yusuf nabbisara, “Ereapate amungkangngu i Yusuf mangune wuṛṛu ma'apulu mabbal᷊issa al᷊al᷊eong kite dorone?” 16Ana waugu i tou napaapiddu tanata indi si Yusuf, “Tantal᷊anna iamangngi ite taambe nate, 17i tou nandolokki yami iapawal᷊o si'o arendi, ‘Ampungewe pasasal᷊a dorone apan niola'u manga iaangngu si'o.’ Nariaddi, naola'a manga allangngu Ruata apan sassubannu iamangngi ite, yami sumal᷊ande, ampungewe pasasal᷊a apan buatte niola'i yami.” I Yusuf nalluai napawe naasengkamma tanata udde.
18Ana see manga tuṛṛangnge sassane nirumanta wuṛṛu niumal᷊intudda su sandiṛṛanne apiddu nabbisara, “Yami indi allangngu.”
19Arawe i Yusuf nabbisara si mangitou, “Arie pa'ata'utta; ana waugu i ya'u tawe mapaṛṛuumanna naal᷊ihidda Ruata. 20I yamiu buatte nabbaidda ma'ola'a al᷊al᷊eo si ya'u, arawe Ruata namal᷊u al᷊al᷊eo udde nabbal᷊i apapia, tadea'u apa apan nariaddi paarorone udde maasalamatta anambon taumata apan mabbiakka orassa indi. 21Arie passinggawangnga. I ya'u sarun manuungngu hausanni yamiu wuṛṛu al᷊aṛṛana'i yamiu.” Etearoddi i tou napaatammudu naungngi mangitou ringannu manga wisara apan masaṛṛionto'a, na'oman sara i mangitou naluasse.
I Yusuf nate
22I Yusuf sidutu uatana'a su Mesir ringannu manga tuṛṛangnge; i tou nabbiakka na'oman sara uukke maṛṛasutta mapul᷊o su tonnane. 23I tou ta'e naasilo ana'a pulunni Efraim. I tou lai ta'e napabbuwunna manga ana'i Makhir, eteudde pulunni Manasye, naola'a anangnge sassane. 24Wisarane su manga tuṛṛangnge, “Papate'u maranite, arawe Ruata sarun sidutu mammadul᷊i si yamiu wuṛṛu mamiaṛṛa'i yamiu sumabangnga wuassu wanua indi, watukku wanua apan buatte pina'ire-Ne ringannu sasalu si Abraham, i Ishak wuṛṛu si Yakub.” 25Ana see i Yusuf nandolokku anambon ana'u tuṛṛangnge massalu, wisarane, “Pa'irete si ya'u, manungku napawe Ruata mamiaaṛṛa'i yamiu watukku wanua udde, i yamiu lai sarun mangapiddu winal᷊unangku.” 26Wua'udde i Yusuf natete su Mesir su uukka maṛṛasutta mapul᷊o su tonnane. I mangitou namuraten rampa-rampa su winal᷊unanne wuṛṛu niaddo su wasungnga.
सध्या निवडलेले:
PANDARIADDI 50: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन