PANDARIADDI 49
49
Wisaran i Yakub panginsueanne
1Wua'udde i Yakub namago manga anangnge wuṛṛu nabbisara, “Paammule isindi, marani'u. I ya'u sarun mamasingkatta si yamiu apa sarun apendamanni yamiu su allon sal᷊immurine;
2Pa'ammule, manga ana'i Yakub,
Paddaringikke si Israel, iamangngu.
3I Ruben, ana'u pahul᷊une,
ete i'o auatangku, wua paarorone wuassu atatoha'u.
I'o awaṛṛanianne wuṛṛu atohasanne su wallatu anambon ana'u.
4I'o hampa umio'a naal᷊ihidda ua'e,
na'oman sara wal᷊inewe paarorone;
ana waugu i'o natiilla ringannu awingku waine,
i'o na'ola'a angngo su tatiil᷊annu iamangngu.
5I Simeon wuṛṛu i Lewi sangkatuṛṛangnga;
ahiddi mangitou araṛṛagissa.
6I ya'u maddiri tomantalongnga ammul᷊annu pa'aire mangitou,
aroddi lai tawe su ammul᷊anni mangitou.
Ana waugu i mangitou mammate sulal᷊ummu asasa'u,
napaal᷊omen sapi waugu lal᷊umanna'a.
7Niawontohante asasa'u mangitou, ana waugu ete pia lembone.
Niawontohante asasa'u mangitou ana waugu tumaniten maṛṛagissa.
I ya'u sarun mapaatal᷊ei mangitou su ahewallu Israel.
I ya'u sarun manal᷊iawukki mangitou su wallatu anambon balahanna.
8I Yehuda i'o sarun tumambo manga seennu;
manga tuṛṛangngu sarun maddalo si'o
wuṛṛu umal᷊intudda su saruannu.
9I Yehuda naal᷊ihidda singa saṛṛen tumuwo;
i tou namate seenne, ana see nabelengnga su sal᷊akke;
i tou nagaṛṛuannata ana see nilumallowanga,
wuṛṛu tawe saran sangkatou apan baṛṛani manal᷊asa'i tou.
10I Yehuda sarun mangagassa ta'innu araratuanna,
papapalunne sarun mamarenta saran mal᷊annu-l᷊annu.
Manga walahanna sarun mangapiddu aonggolla,
wuṛṛu umal᷊intudda ringannu uasuṛṛubbawa su saruanne.
11Ana'u keledaine ni'iitti tou su punnu alu,
punnu anggore apan apianne.
I tou mabbansalla laungnge ringannu anggore,
anggore maṛṛamu naal᷊ihidda daṛṛa.
12Matane maṛṛamu ana waugu na'inumma anggore,
isine mawira ana waugu na'inumma susu.
13I Zebulon sarun mamanua su winggin tahal᷊oangnga;
manga apalla sarun mabbal᷊ango su appanne;
naddatinggu Sidon passarannu wageangnge.
14I Isakhar naal᷊ihidda keledai matohassa
apan ual᷊allowangnga su wallatu so'annu winabbawane.
15I tou na'ellega aroddi apiane tampa udde
wuṛṛu aroddi aṛṛamage wanua udde,
ne i tou niumaru'ute mal᷊uassa iapapasanna,
wuṛṛu niwata'a iapamanara ere allangnga.
16I'o Dan, sarun makkuungngu walahannu sassane
i'o sarun maola'a ṛuanganna ere ṛuanganna waine su Israel.
17I'o naal᷊ihidda atoanna su wiwikku lal᷊anna,
atoanna mawisa su winggin dal᷊anna addio'a
apan nangi'i paallu awal᷊o
na'oman sara nawareta sumasa'ene.
18Oh Mawu, asasal᷊amatta apan buatte nianggola, ete udde ta'u raṛṛaddoanna.
19I Gad, i'o sarun pangaloannu mangangaṛṛo,
ewe'e i'o mawal᷊i'a mangaṛṛo si mangitou.
20I Asyer, wiakku mangke manambo wuṛṛu mangkapia,
i'o sarun manaddia wiakku manga ratu.
21I Naftali, naal᷊ihidda rusa napallossa,
mangkaṛṛamaga al᷊aṛṛanangnge.
22I Yusuf naal᷊ihidda keledai saṛṛen tumuwo
keledai matengnga maranin al᷊imatang kua'e,
tuttatal᷊angnga su sendekku wowone.
23Seetta mammangalo ringannu araṛṛaggissa,
nangenggenna si tou ringannu papiti'a wuṛṛu anaanna.
24Arawe i Yusuf sidutu matohassa ta'iakke,
sidutu matohassa anaanne,
ana waugu taṛṛinon Mallal᷊u'adda Lembon Matohassa,
Ruatan i Yakub, Mamamadul᷊in Israel.
25Ruatan iamangngu nantul᷊ungngu;
Apan Lembon Taṛṛino nangal᷊amatta si'o
ringannu uranna wuassu langitta
wuṛṛu ua'e wuassu wantan leta'a.
Ringannu ana'a wuṛṛu sapi,
26gandumma wuṛṛu wunga.
Al᷊amattu Ruatan iamangngu nangillembo
wuassu pa'a'ala manga wowone apan timmadete.
Antimanna umonto'e anambon al᷊amatta udde
su wowon puan i Yusuf, su wowon pakkanne.
Ete i tou apan apianne su wallatu manga tuṛṛangnge.
27I Benyamin uddewe serigala mal᷊aṛṛaga.
Su tempo marua allo i tou mannametta pabbawiakke.
Su tempo ṛabbi i tou mattahia ina'ul᷊ene.”
28Eteudde mapul᷊o dua ṛuangannu Israel, wuṛṛu manga wisara apan niwisaran iamangngi mangitou napawe nangonggolu tabbean patatal᷊ei si mangitou sambau-sambau.
I Yakub nate wuṛṛu nilabingnga
29-30Wua'udde i Yakub nananata manga anangnge, “Tate mal᷊annu lai ya'u sarun mapul᷊e ere al᷊amona'u. I ya'u labbinga'a su sandiṛṛanni mangitou sulal᷊ummu liangnga su Makhpela, su samba'an da'i Mamre su leta'u Kanaan. I Abraham buatte namalli liangnga wuṛṛu wawail᷊anna maranine wuassi Efron taumatan Het maola'a pallabinganna. 31Isudde nilabbingnga i Abraham wuṛṛu i Sara, i Ishak wuṛṛu i Ribka; wuṛṛu isudde lai pia labbingngi Lea. 32Wawail᷊anna wuṛṛu liangnga isudde buatte niwallianna wuassu taumatan Het. I ya'u labbinga'e isudde.” 33Napawe i Yakub buatte nananata su manga anangnge, i tou nilumallowangke ana see natete.
सध्या निवडलेले:
PANDARIADDI 49: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन