PANDARIADDI 48
48
I Yakub nangal᷊amatta si Efraim wuṛṛu si Manasye
1Manga pira tempo wua'udde niapasingkatta si Yusuf manungku iamangnge maradda'e mawakkata. Nariaddi i tou inaite ringannu anangnge ruan katou, eteudde i Manasye wuṛṛu i Efraim nattembo si Yakub. 2Napawe i Yakub naaringikka manungku i Yusuf nirumanta, i tou nangammulu anambon auatanne, ana see niuma'ianna su tampan lallowanganne. 3Wisaran Yakub si Yusuf, “Ruata Lembontaṛṛino buatte naipasilon batangan-Ne si ya'u su Lus, su leta'u Kanaan, wuṛṛu buatte nangal᷊amatta si ya'u.” 4I tou buatte nabbisara si ya'u, “I Ya'u sarun mangonggolla si'o manambo ana'a pulunna, tadea'u papapulunnu maola'a manambo balahanna; i Ya'u sarun mangonggolu wanua indi su papapulunnu maola'a pussa'a mangitou saran mal᷊annu-l᷊annu.”
5I Yakub nanassu, “I Yusuf, anangngu ruan katou i Efraim wuṛṛu i Manasye apan niasungkanga su Mesir indi tantal᷊anna i ya'u taambe naranta isindi, udde lai ana'u, ere lai i Ruben wuṛṛu i Simeon. 6Wuṛṛu amungkangu i'o naasomba manga ana'a apia, i mangitou udde wal᷊inewe ana'u arawe udde sidutu anangngu; pussa'a mangitou sarun sengkamanni mangitou wuassi Efraim wuṛṛu si Manasye. 7I ya'u na'ola'a olangnge udde ana waugu i Rahel inangngu. Sulal᷊ummu amatangku mabelengnga wuassu Mesopotamia, inangngu nate su leta'u Kanaan, tawe marau wuassu Efrata, wuṛṛu i ya'u tumaniten massusa. I ya'u nallabingi tou poiaroddi, su sandiṛṛannu lal᷊anna watukku Efrata.” (Orassa indi Efrata tinumelengnga arane Betlehem.)
8Napawe i Yakub naasilo manga ana'i Yusuf udde, i tou naiwal᷊o, “Isai manga anangngu indi?”
9I Yusuf sinumimbakka, “Ete indi manga ana'u apan nionggolu Ruata si ya'u isindi, su Mesir.” I Yakub nabbisara, “Paarania'a itarua ringangku tadea'u i ya'u mangal᷊amatta.” 10I Yakub tate maasilo ringannu masemakka ana waugu timmadete wuṛṛu matane mal᷊abbuke. I Yusuf napaaranin anangnge udde ringanni Yakub, wuṛṛu i tou naṛṛa'uppa wuṛṛu nangari'a sitarua. 11Ana see i Yakub nabbisarate si Yusuf, “I ya'u tawe antimma sarun massombanu apia, arawe orassa indi Ruata ewe'e namala'u lai maasilo manga anangngu.” 12Wua'udde i Yusuf nanal᷊uru sitarua wuassu ṛiwan Yakub, wuṛṛu ana see i tou niumal᷊intudda su saruannu iamangnge.
13-14Wua'udde i Yusuf nangaddon anangnge maranin i Yakub, i Efraim iapa ṛembonne udde su amba'a aiṛṛi wuṛṛu iapa pahul᷊une su samba'a aikkatanna. Arawe i Yakub namatten ta'iakke wuṛṛu nangaddon lima aikkatanne su wowon puan i Efraim, wuṛṛu limane aiṛṛi su wowon puan i Manasye. 15Wua'udde i tou nangal᷊amatta si Yusuf, wisarane,
“Ruata, ete i Tou Mawu, sassubbanni Abraham wuṛṛu i Ishak, ete
i Tou apan ua'ehetta si ya'u naddatingngu orassa indi;
16ete i Tou mala'ekatta apan buatte namallo'u wuassu al᷊awo'u asasilaka.
Antimanna Ruata udde mangal᷊amatta manga ana'a indi.
Antimanna arangku wuṛṛu aranni Abraham wuṛṛu i Ishak sidutu wiakka ana waugu wuassu manga ana'a indi!
Antimanna i mangi tou maṛṛana'a mappulunna,
wuṛṛu pia papapulunna manambo su runia.”
17I Yusuf tawe mal᷊uassa napawe naasilo iamangnge nangaddon lima aikkatanne su wowon puan i Efraim; ana see i tou nangagassa liman iamangnge ningkatta wuassu puan i Efraim su puan i Manasye. 18Wisarane su Iamangnge, “Arie aroddi, Iamangnga. Indiwe ana'u pahul᷊une; addoa'e lima aikkatannu Iamangnga su puane.”
19Arawe iamangnge nanol᷊a'a, “I ya'u masingkatta, ana'u, i ya'u masingkatta. I Manasye sarun bahewalla taṛṛinone wuṛṛu papapulunne lai sarun mabbal᷊i balahanna apan bahewalla. Arawe tuarine lembon maggewal᷊anna lai taṛṛinone wuassi tou, wuṛṛu papapulunnu tuarine sarun maola'a walahanna apan bahewalla.”
20Ana see i tou nangal᷊amatta apia manga ana'a udde, wisarane, “Taumatan Israel sarun managgon arannu napawe i mangitou mangal᷊amata taumata. I mangitou sarun mabbisara, ‘Antimanna Ruata ma'ola'a si'o ere i Efraim wuṛṛu i Manasye.’ ” Ringannu aroddi i Yakub napaṛṛon i Efraim wuassu i Manasye.
21Ana see i Yakub nabbisarate si Yusuf, “Erete lai aellehannu, papate'u maranite, arawe Ruata sarun mantul᷊ungngi yamiu wuṛṛu mangapiddi yamiu mabelengnga watukku wanuan al᷊amonanu. 22Ete si'o, wuṛṛu wal᷊ine su manga tuṛṛangngu, i ya'u mangonggolu Sikhem, leta'a masuwukka udde apan buatte ta'u niaṛṛo wuassu taumatan Amori ringannu hal᷊ele wuṛṛu anaangku.”
सध्या निवडलेले:
PANDARIADDI 48: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन