PANDARIADDI 46
46
I Yakub wuṛṛu amonanne inaite watukku Mesir
1I Yakub nandiahite al᷊awo'u pussaane ana see inaite. Na'oma su Bersyeba i tou nangonggolu sasamba su Ruata apan sassubanni Ishak iamangnge. 2Sulal᷊ummu sambau aellega su tempo ṛabbi, Ruata nabbisara si tou, “I Yakub, i Yakub!”
“I ya'u, Mawu,” sasimbakke.
3“I Ya'u Ruata, Ruata apan sassubbannu iamangngu,” wisara-Ne. “Arie pa'ata'utta inai watukku Mesir. I Ya'u sarun mandiadi papapulunnu balahanna apan bahewalla poiaroddi. 4I Ya'u sarun tumantalongnga si'o watukku Mesir, wuṛṛu mangapiddu papapulunnu mabelengnga apia su wanua indi. I Yusuf sidutu su sandiṛṛannu napawe papatenu nia'omanna.”
5Ana see i Yakub nanantangken Bersyeba. Al᷊aṛṛanangnge nallurannu iamangngi mangitou see ana'a awingngi mangitou su kereta apan nionggolu ratu Mesir. 6I mangitou lai nangapiddu winatangnga papadul᷊iananna wuṛṛu al᷊awo'u darotongnga apan niasombanganni mangitou su Kanaan, ana see inaite watukku Mesir. I Yakub nangapiddu papulunne sarangkanambone, eteudde 7anambon ana'a pulunne esakka wuṛṛu wawine.
8Manga amonanni Yakub apan tinumantalongnga watukku Mesir eteudde; 9i Ruben, ana'a pahul᷊u; manga anangnge: i Henokh, i Palu, i Hezron wuṛṛu i Karmi. 10I Simeon, manga anangnge: i Yemuel, i Yamin, i Ohad, i Yakhin, i Zohar wuṛṛu i Saul ana'a wuṛṛu awingnge sangkatou wawinen Kanaan. 11I Lewi; manga anangnge: i Gerson, i Kehat wuṛṛu i Merari. 12I Yehuda; manga anangnge: i Syela, i Peres wuṛṛu i Zerah, wuṛṛu ana'i Yehuda waine, eteudde i Er wuṛṛu i Onan nate su Kanaan. Manga ana'i Peres: i Hezron wuṛṛu i Hamul. 13I Isakhar; manga anangnge: i Tola, i Pua, i Ayub wuṛṛu i Simron. 14I Zebulon; manga anangnge: i Sered, i Elon wuṛṛu i Yahleel. 15I mangitou sarangkanambone udde ana'a apan niasungkangi Lea si Yakub su Mesopotamia, wal᷊ine wua isudde lai anangnge wawine aranne i Dina. Nariaddi papapulunni Yakub wuassu awingnge i Lea sarangkanambone tallun pul᷊o talu su atoune.
16I Gad; manga anangnge: i Zifyon, i Hagi, i Syuni, i Ezbon, i Eri, i Arodi wuṛṛu i Areli. 17I Asyer; manga anangnge; i Yimna, i Yiswa, i Yiswi wuṛṛu i Beria wuṛṛu i Serah, wawinen mangitou. Manga ana'i Beria eteudde i Heber wuṛṛu i Malkiel. 18I Sire mapul᷊o annumma su atoune udde papapul᷊unni Yakub wuassi Zilpa, eteudde allangnga wawine apan nionggoli Laban si Lea, anangnge wawine.
19I Rahel awingngi Yakub uatahuanna darua ana'a, eteudde i Yusuf wuṛṛu i Benyamin. 20Su Mesir i Yusuf naasomba ana'a darua, eteudde i Manasye wuṛṛu i Efraim apan niasungkangngu awingnge i Asnat, ana'i Potifera, apan uaagassa manara imam su Heliopolis. 21I Benyamin; manga anangnge; i Bela, i Bekher, i Asybel, i Gera, i Naaman, i Ehi, i Ros, i Mupim, i Hupim wuṛṛu i Ared. 22Siri mapul᷊o appatta uddewe papapulunni Yakub wuassu awingnge i Rahel.
23Manansunna i Dan; anangnge i Husim. 24I Naftali; manga anangnge; i Yahzeel, i Guni, i Yezer wuṛṛu i Syilem. 25Siri pitu uddewe papulunni Yakub wuassi Bilha, allangnga wawine apan nionggoli Laban si Rahel anangnge.
26Papapulunni Yakub apan nabatukku Mesir sarangkanambone annumu pul᷊o annumma su atoune, tawe nasutta manga mananambone. 27Al᷊aṛṛana'i Yusuf apan nasungkanga su Mesir ruan katou, na'oman sara amonanni Yakub su Mesir sarangkanambone pitun pul᷊o su atoune.
I Yakub wuṛṛu amonanne su Mesir
28I Yakub nandolokki Yehuda niumamatta malliu ṛoro iapawago si Yusuf tadea'u maisasomban iamangnge su Gosyen. Napawe i mangitou na'omate su Gosyen, 29I Yusuf sinuma'e kereta inai maisasomban iamangnge isudde. Su tempo i mangitou nassomba, i Yusuf naṛṛa'uppa iamangnge wuṛṛu mal᷊annu lulluai. 30I Yakub nabbisara si Yusuf, “Orassa indi ya'u maapulute mate, ana waugu buatte naasilo wuṛṛu naasingkatta manungku i'o ta'e wiakka.”
31Ana see i Yusuf nabbisara manga tuṛṛangnge wuṛṛu manga ana'u tuṛṛangnge waine, “I ya'u inaite wuṛṛu mamasingkatta su ratu manungku manga tuṛṛangku wuṛṛu manga ana'u tuṛṛangku apan uatana'a su Kanaan nirumantate. 32I ya'u sarun mabbal᷊o manungku i yamiu manga mallal᷊u'adda domba wuṛṛu sapi, wuṛṛu uaapidden manga winatangnga wuṛṛu al᷊awo'u pussa'ang kamiu. 33Amungkangu ratu mamago si yamiu wuṛṛu maiwal᷊o manaranu, 34wal᷊oa'a si tou manungku i yamiu indi mamamadul᷊i winatangnga ro'en ta'e maradio'a, naal᷊ihidda al᷊amonan kamiu. Ringannu aroddi tou sarun mandolokki yamiu matana'a su wageangngu leta'u Gosyen.” I Yusuf namasingkatu olangnge udde ana waugu taumatan Mesir mammendamma addio'a maggahawen manga mallal᷊u'adda winatangnga.
सध्या निवडलेले:
PANDARIADDI 46: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन